Wankex chi kʼanjelak chiru lee Dios, xbʼaan laj Walter Rane

20–26 abril

Mosiah 4–6

“Jun nimla jalok qe”

Il ru Mosiah 4–6, ut tzʼiibʼa li musiqʼejil naʼlebʼ nakakʼul. Naq nakakʼul li musiqʼanbʼil naʼlebʼ, naru taapatzʼ, joʼ xye li Elder Richard G. Scott, “Ma wan chik li tento tinnaw?” “Cómo obtener guía espiritual,” Liahona, noviembre 2009, 8).

Xtz’iib’ankil li nakak’oxla

Xkanab’ankileb’ chi wotzok

Maare taawaj xtikibʼankil li seraqʼ saʼ laa tzolebʼaal rikʼin xpatzʼbʼal rehebʼ li komon saʼ li tzolebʼaal naq teʼxwotz jun rehebʼ lix kʼutum li rey aj Benjamin saʼ Mosiah 4–5 li teʼraj xyuʼaminkil.

Xk’utb’al li tzol’leb’

Mosiah 4:1–12

Saʼ xkʼabʼaʼ li Jesukristo, naru naqakʼul ut nakana qikʼin li risinkil li qamaak.

• Wankebʼ li nekeʼsach rikʼin xkʼoxlankil naq inkʼaʼ chʼaʼaj li jalbʼa-kʼaʼuxlej, ut wankebʼ chik li nekeʼxkʼoxla naq numtajenaq chʼaʼaj. Re xtenqʼankilebʼ li komon saʼ li tzolebʼaal chixtawbʼal ru li kʼaʼru naʼajman ru re xkʼulbʼal li risinkil li qamaak, naru taaye rehebʼ naq teʼxtzʼil rix lix kʼutum li rey aj Benjamin saʼ Mosiah 4:1–12, ut teʼxsikʼ kʼaʼru naʼajman ru re naq li qaChoxahil Yuwaʼ tixkʼe risinkil li qamaak. Ebʼ li komon saʼ li tzolebʼaal naru teʼxtzʼiibʼa chiru li pizarron xtusulal li kʼaʼru nekeʼxtaw. Ye rehebʼ naq teʼxkʼoxla junaq li jaljookil ru aatin re xchʼolobʼankil li kʼaʼru xeʼxtzol. Qayehaq, naru teʼxjuntaqʼeeta li isink maak rikʼin jun aj kʼas li naʼisiman malaj nakuyman lix kʼas. Malaj ut naru teʼxjuntaqʼeeta xkʼuulankil li risinkil qamaak rikʼin rilbʼal li kʼaʼru naraj xchʼolaninkil rajlal, joʼ jun li awimq, malaj jun li ochoch.

• Naru taapatzʼ rehebʼ li komon saʼ li tzolebʼaal kʼaʼ raj ru teʼxye re anihaq li inkʼaʼ naxnaw ma naraj xjalbʼal xkʼaʼuxl, xbʼaan naq chʼaʼaj. Chan ru naq teʼxtenqʼa raj anihaq li kubʼenaq xchʼool, li nareekʼa naq inkʼaʼ naru xqʼaxbʼal ru li maak ut xqʼunil ru li tzʼejwalej? Naru taatenqʼahebʼ li komon saʼ li tzolebʼaal chixkawresinkil ribʼ choqʼ re li seraqʼ aʼin rikʼin xyeebʼal rehebʼ naq chiru junpaat teʼxtzʼil rix li raatin li rey aj Benjamin saʼ Mosiah 4:1–12 re xsikʼbʼalebʼ li yaalil naʼlebʼ li teʼruuq chi tenqʼank re li ani wan chi joʼkan. Chirix aʼan, ebʼ li komon saʼ li tzolebʼaal teʼruuq chixwotzbʼal li yaalil naʼlebʼ xeʼxtaw rikʼin li ani wan chixkʼatqebʼ.

Mosiah 4:11–27

Naq naqajal qakʼaʼuxl, toonujaq rikʼin lix rahom li Dios.

• Chan ru naqanaw wi xqakʼul li risinkil qamaak? Li rey aj Benjamin kixchʼolobʼ xyaalal kʼaʼru naʼux xbʼaan li tzʼaqal jalbʼa-kʼaʼuxlej—kanabʼebʼ li komon saʼ laa tzolebʼaal chixtawbʼal aʼan saʼ Mosiah 4:13–16. Naru ajwiʼ taaye rehebʼ naq teʼxkʼoxla lix yuʼamebʼ, ut teʼxkʼe reetal chan ru naq wankebʼ saʼ xyuʼaminkil li kʼaʼru kʼutbʼil saʼebʼ li raqal aʼin. Kʼaʼru li eetalil nekeʼril li komon saʼ li tzolebʼaal naq yoo chi jaleʼk lix chʼoolebʼ? Chan ru naq najalaak chan ru wanko rikʼinebʼ li qas qiitzʼin naq nokochal rikʼin li Kristo rikʼin li jalbʼa-kʼaʼuxlej? Maare ebʼ li komon saʼ li tzolebʼaal teʼruuq chixwotzbʼal chan ru naq xeʼril aʼin chi kʼulmank saʼ xyuʼamebʼ.

• Rikʼin rilbʼal li aatin saʼ Mosiah 4:11–12 ut 14–16, naru texʼaatinaq chirix kʼaʼru li naʼlebʼ li natenqʼank qe chi wank chi tiik joʼ naʼbʼej yuwaʼbʼej. Kʼaʼru nekeʼxkʼut li raqal aʼin chirix li wank choqʼ chaabʼil naʼbʼej ut yuwaʼbʼej?

• Wi nakaweekʼa naq us aatinak chirix lix kʼutum li rey aj Benjamin chirix rilbʼalebʼ li nebʼaʼ ut li nekeʼraj xtenqʼankil, naru taapatzʼ rehebʼ li komon saʼ li tzolebʼaal naq teʼril ru chi junjunqil li raqal saʼ Mosiah 4:16–27. Chirix xyaabʼasinkil li junjunq raqal, li ani xyaabʼasink re naru chixyeebʼal rikʼin tzʼaqal li raatin li kʼaʼru kixkʼut li rey aj Benjamin. Li raatin li Elder Jeffry R. Holland, “Ma maawaʼoʼ tabʼiʼ aj lemoox chiqajunilo?” (Jolomil chʼutubʼaj-ibʼ re octubre 2014) naru taaʼoksimanq saʼ li seraqʼ aʼin. Chan ru naru taqataaqe li naʼlebʼ kixkʼe li rey aj Benjamin naq “inkʼaʼ tooʼalinaq chi qʼaxal kaw wiʼchik chiru li qametzʼew”? (Mosiah 4:26–27). Chan ru naq li taqlahom naq “taqakʼe xkomon li kʼaʼru qe rehebʼ li nebʼaʼ ” wan rilom rikʼin li risinkil li qamaak?

Mosiah 4:29–30

Tento taqil qibʼ, ut li qakʼaʼuxl, li qaatin, ut li qabʼaanuhom.

• Wan naq chanchan naq usaq raj wi li Qaawaʼ tixkʼe raj qe jun xtusulal chixjunilebʼ li maak naru xbʼaanunkil. Aʼbʼanan, aʼan naxye qe, “Cheril eeribʼ … ut kananqex saʼ li paabʼaal chirix li kʼaʼru eerabʼihom chirix lix kʼulunik li Qaawaʼ ” (Mosiah 4:30). Re xtenqʼankilebʼ chi aatinak chirix li naʼlebʼ aʼin saʼ laa tzolebʼaal, naru taawoksi li patzʼom joʼ aʼin: Chan ru naq li qakʼaʼuxl, li qaatin, ut li qabʼaanuhom nekeʼkʼanjelak saʼ li qayuʼam ut saʼ xyuʼamebʼ li qas qiitzʼin? K’a’ru naraj naxye “kanaak saʼ li paabʼaal”? Kʼaʼru chi naʼlebʼ naru taqawotz chiqibʼil qibʼ li taatenqʼanq qe “chirilbʼal qibʼ ”?

Mosiah 5:1–7

Lix Musiqʼ li Qaawaʼ naru chixkʼanjelankil jun nimla jalok re qachʼool.

• Re xtikibʼankil li aatinak chirix li nimla jalaak naru naxkʼam chaq lix evangelio li Jesukristo saʼ li qayuʼam, naru taapatzʼ rehebʼ li komon saʼ li tzolebʼaal naq teʼxwotz kʼaʼut naq wan naq chʼaʼaj xjalbʼal li qayuʼam. Chirix aʼan, kanabʼebʼ chirilbʼal ru Mosiah 5:1–5, re teʼxsikʼ li “nimla jalok” li keʼxkʼul lix tenamit li rey aj Benjamin. Kʼaʼru li yaalil naʼlebʼ naqatzol chirix xjalbʼal li qachʼool rikʼin li kʼaʼru keʼxkʼul ebʼ aʼan? Naru taakʼoxla xpatzʼbʼal re junjunq komon saʼ li tzolebʼaal chixwotzbʼal chan ru naq li Santil Musiqʼej xtenqʼahebʼ chixjalbʼalebʼ xchʼool. Naru ajwiʼ teeril jun rehebʼ li video li yeebʼilebʼ resil saʼ “Xkomon chik li kʼanjelebʼaal.”

  

  Li Kolonel naru chixjalbʼal li qachʼool ut li qayuʼam. Uqʼej aj kʼirtesinel, xbʼaan laj Adam Abram

• Chirix aatinak chirixebʼ li yaalil naʼlebʼ saʼ Mosiah 5:1–7, maare teʼwanq li komon saʼ li tzolebʼaal li teʼkʼoxlanq re kʼaʼut naq lix jalajikebʼ xchʼool inkʼaʼ qʼaxal nim ut saʼ junpaat joʼ li keʼxkʼul lix tenamit li rey aj Benjamin. Li raatin li Elder D. Todd Christofferson saʼ “Xkomon chik li kʼanjelebʼaal” naʼaatinak chirix aʼin. Kʼaʼru naru naqatzol rikʼin li Elder Christofferson chirix lix jalajik qachʼool?

Mosiah 5:5–15

Li Dios naxkʼe inbʼoqbʼal chi ok saʼ sumwank rikʼin.

• Li naʼlebʼ saʼ Mosiah 5:5–15 naru naxtenqʼahebʼ li komon saʼ li tzolebʼaal chixtawbʼal ru ebʼ li osobʼtesink nekeʼxkʼul naq nekeʼok saʼ sumwank rikʼin li Dios ut nekeʼxpaabʼ li sumwank aʼan. Naru nakabʼoqebʼ chixkaʼsutinkilebʼ li raqal aʼin chi wan saʼ xchʼoolebʼ li sumwank re li kubʼihaʼ ut li kʼojobʼanbʼil kʼanjel re li loqʼlaj waʼak, ut teʼxwotz li kʼaʼru xeʼxtzol. (Chi’ilmanq ajwi’ Tzolʼlebʼ ut Sumwank 20:77, 79.)

Xb’oqb’aleb’ chi tzolok sa’ kab’l

Maare wankebʼ li komon saʼ laa tzolebʼaal li yookebʼ chixnumsinkil malaj ak xeʼxnumsi jun chʼaʼajkilal saʼ xyuʼamebʼ. Ye rehebʼ naq saʼ Mosiah 7–10 teʼril resil jun teep chi tenamit li keʼxtzol chan ru xkanabʼankilebʼ ribʼ chiru li Qaawaʼ saʼ xkutankil li chʼaʼajkilal.

Xkomon chik li k’anjeleb’aal

Ebʼ li video saʼ ChurchofJesusChrist.org chirix li “nimla jalok” (Mosiah 5:2).

• “El pan de cada día: cambio”

• “Un cambio de corazón”

• “Un potente cambio: conversión”

Wan naq naʼux li jalaak chiru kʼiila kutan.

Li Elder D. Todd Chirstofferson kiʼaatinak chirix li nimla jalok chʼoolej li yeebʼil resil saʼebʼ li loqʼlaj hu:

“Maare naru nakapatzʼ, Kʼaʼut naq inkʼaʼ nakʼulman li nimla jalaak aʼin wikʼin chi jwal saʼ junpaat wiʼchik? Tento taajultikoʼq aawe naq li kʼaʼru keʼxkʼul lix tenamit li rey aj Benjamin, laj Alma, ut xkomonebʼ chik li wankebʼ saʼebʼ li loqʼlaj hu, maawaʼ li nekeʼxkʼul chixjunilebʼ. Choqʼ qe laaʼo, wan naq li jalaak nakʼulman chi timil timil chiru kʼiila kutan. Li yoʼlaak wiʼchik jalan wiʼ rikʼin xyoʼlajik li qatibʼel, xbʼaan naq nakʼulman chiru xnumikebʼ li chihabʼ, ut inkʼaʼ saʼ junpaat. Ut xk’eeb’al xʼanchalil qach’ool sa’ li b’e a’an, a’an li rajb’al li ruchich’och’il yu’am q’axal wi’chik aajel ru.

“Aʼut joʼkan ajwiʼ, mikʼojla qachʼool rikʼin yal xyalbʼal qaqʼe bʼayaq. Mikʼojla qachʼool rikʼin naq yal bʼabʼay wan qajom chixbʼaanunkil li inkʼaʼ us. Chiqakʼul li loqʼlaj waʼak rajlal xamaan, ut miqakanabʼ xkanabʼankil qibʼ chiru li Santil Musiqʼej re tixmichʼ chaq chi tzʼaqal li maaʼusilal wan saʼ qachʼool. Ninchʼolobʼ xyaalal naq aʼ yaal joʼ nakatkana saʼ xbʼehil li yoʼlaak wiʼchik saʼ musiqʼejil, lix tojbʼal rix li maak xbʼaan li Jesukristo taarisi laa maak ut lix tzʼajnil li maak aʼan saʼ aachʼool, li aaleek inkʼaʼ chik sahaq chawu, ut rikʼin li Kristo tatwanq chi sant, joʼ naq aʼan ut lix Yuwaʼ santebʼ ” (“Nacer de nuevo,” Liahona, mayo 2008, 78).

Xchaab’ilob’resinkil li qak’utum

Sikʼebʼ li chaabʼil aj kʼamol bʼe saʼebʼ li loqʼlaj hu. Naq nakawil ru resil chan ru naq kikʼutuk li rey aj Benjamin chiru lix tenamit, sikʼ li naʼlebʼ saʼ lix bʼaanuhom li taatenqʼanq aawe chi kʼutuk chi jwal chaabʼil wiʼchik. Qayehaq, kʼaʼru kixbʼaanu li rey aj Benjamin re xkʼeebʼal reetal ma nekeʼxtaw ru lix tenamit li kʼaʼru yoo chixkʼutbʼal?