Li xMinerva Teichert (1888-1976), Laj Ammon chiru li rey aj Lamoni, 1949-1951, oléo en masonite, 35 15/16 x 48 pulgadas. Museo de Arte, Universidad de Brigham Young, 1969.

27 abril–3 mayo

Mosiah 7–10

“Rik’in lix metz’ew li Qaawa’ ”

Li tuslebʼ aatin aʼin kʼaʼjoʼ naq naru nakʼanjelak aawe, aʼut inkʼaʼ naru naxkʼul xnaʼaj li naʼlebʼ nakakʼul chi musiqʼanbʼil naq yookat chixtzolbʼal Mosiah 7–10.

Xtz’iib’ankil li nakak’oxla

Xkanab’ankileb’ chi wotzok

Wan naq us aatinak joʼ tzolebʼaal chirix li osobʼtesink yookebʼ chixkʼulbʼal li komon saʼ li tzolebʼaal naq nekeʼxyal xqʼe chixtzolbʼal li evangelio saʼ rochochebʼ. Kʼaʼruhebʼ li raqal saʼ Mosiah 7–10 li xeʼxkʼoxla saʼ xchʼool malaj xeʼxseraqʼi rikʼinebʼ lix junkabʼal chiru li xamaan aʼin? Chan ru naq aʼin xkʼanjelak saʼ xyuʼamebʼ?

Xk’utb’al li tzol’leb’

Mosiah 7:14–33

Wi naqajilosi qibʼ rikʼin li Qaawaʼ, naqakanabʼ qibʼ chiru, ut nokokʼanjelak chiru, aʼan tooxkol.

• Naq ebʼ li komon saʼ li tzolebʼaal xeʼxtzʼil rix Mosiah 7:14–33, maare li kʼaʼru keʼxkʼul lix tenamit laj Limhi xmusiqʼahebʼ chixjalbʼalebʼ xkʼaʼuxl ut chixjayalinkil ribʼ rikʼin li Qaawaʼ re risinkilebʼ saʼ chʼaʼajkilal. Re xtikibʼankil li aatinak, naru taakʼe xbʼoqbʼal jun komon naq taachalq saʼ li tzolebʼaal chi kawresinbʼil chixyeebʼal chi kʼosbʼil ru chan ru naq ebʼ lix tenamit laj Limhi keʼkana chi preexil. Junjunqebʼ chik teʼruuq chixwotzbʼal kʼaʼru xeʼxtzol rikʼin laj Limhi chirix xpaabʼankil ut xyoʼoninkil li Kolonel. Kʼaʼru naru naqatzol rikʼin lix jultikahom laj Limhi chirix chan ru naq li Dios kixkol lix tenamit? (cheʼilmanq li raqal 19–20). Naru taakanabʼebʼ li komon saʼ li tzolebʼaal chixwotzbʼalebʼ li raqal saʼebʼ li loqʼlaj hu malaj lix numsihomebʼ li xmusiqʼahebʼ chixkanabʼankil ribʼ chiru li Dios.

• Ebʼ li komon saʼ laa tzolebʼaal wan hoonal naq teʼruuq chixwaklesinkilebʼ xchʼool lix komonebʼ chixjilosinkil ribʼ rikʼin li Dios naq wankebʼ saʼ xpreexil li maak, malaj naq yookebʼ chixkʼulbʼal junaq chik li chʼaʼajkilal. Maare us raj choqʼ rehebʼ xtzolbʼal chan ru naq laj Limhi kixwaklesi xchʼool lix tenamit. Naru teʼril ru xbʼeen wa saʼ Mosiah 7:20–25 chan ru lix preexil lix tenamit laj Limhi, ut teʼxkʼoxla ani nekeʼxnaw ru li wan chi preexil chiru li maak. Chirix aʼan, taaruuq teʼxkʼe reetal li yaalil naʼlebʼ kixkʼut laj Limhi saʼ Mosiah 7:18–20, 33 re xtenqʼankil lix tenamit. Chan ru naru naqataaqe lix bʼaanuhom laj Limhi naq naqawaklesihebʼ xchʼool li ani raarookebʼ qabʼaan re teʼxkanabʼ ribʼ chiru li Dios?

• Re xtenqʼankilebʼ li komon saʼ li tzolebʼaal chixtawbʼal ru chan ru naq li Dios nokoxtenqʼa saʼ li chʼaʼajkilal, naru teebʼicha saʼ komonil ut texʼaatinaq chirix li bʼich “At xDios Israel” (Ebʼ li Bʼich, 5) malaj jalan chik bʼich li naxye xyaalal chan ru naq li Kolonel nokoxkol chiru chʼaʼajkilal. Chan ru naq Mosiah 7:17–20; Eter 12:27; ut 2 Korintios 12:7–10 nekeʼxnimobʼresi li qanaʼlebʼ? Maare ebʼ li komon saʼ li tzolebʼaal teʼruuq chixwotzbʼal lix numsihomebʼ naq xeʼkoleʼ xbʼaan li Qaawaʼ, maare chi yal bʼabʼay, rikʼin naq xeʼxkʼut xpaabʼaal chirix aʼan.

Mosiah 7:26–27

Ebʼ li winq yoʼobʼtesinbʼilebʼ joʼ xjalam-uuch li Dios.

• Saʼebʼ li raqal aʼin, laj Limhi kixchʼolobʼ rix junjunq li yaalil naʼlebʼ kʼutbʼil xbʼaan laj Abinadi, li kichʼaʼajkoʼ chiruhebʼ li tenamit xkʼulubʼankil. Kʼaʼru li yaalil naʼlebʼ naru nekeʼril li komon re li tzolebʼaal saʼebʼ li raqal aʼin? Chan ru naq ebʼ li yaalil naʼlebʼ nekeʼxjal chan ru naq naqil li Dios, ut chan ru naqil qibʼ laaʼo?

Mosiah 8:12–19

Li Qaawaʼ naxkʼehebʼ li profeet, laj ilol naʼlebʼ, ut ebʼ laj kʼutbʼesinel, re xtenqʼankil chixjunilebʼ li winq.

• Laj Ammon kiru chixchʼolobʼankil chiru laj Limhi lix kʼanjel jun aj ilol naʼlebʼ, ut chixyeebʼal xyaalal naq aajelebʼ ru li profeet, ebʼ laj ilol naʼlebʼ, ut ebʼ laj kʼutbʼesinel. Maare usaq raj xchʼolobʼankil naq saʼebʼ li qakutan laaʼo, li Xbʼeenil Awaʼbʼejil ut lix Molamebʼ li Kabʼlaju chi Apostol xaqabʼanbʼilebʼ xwankil joʼ profeet, aj ilol naʼlebʼ, ut aj kʼutbʼesinel. Chan ru naq laaʼo, joʼ laj Ammon, naru nokoʼaatinak chi kaw li qachʼool chirix lix aajelilebʼ ru li profeet, laj ilol naʼlebʼ, ut laj kʼutbʼesinel? (chiʼilmanq Mosiah 8:13–18). Maare ebʼ li komon saʼ li tzolebʼaal teʼraj xkanabʼankil aatin chiru li internet li taatenqʼanq rehebʼ li ras riitzʼin chixtawbʼal ru lix kʼanjel jun profeet, aj ilol naʼlebʼ, ut aj kʼutbʼesinel saʼebʼ li kutan aʼin. Kʼaʼru xqabʼi saʼ li jolomil chʼutubʼaj-ibʼ li tojaʼ xnumeʼ li taaruuq raj taqawotz rikʼinebʼ li qamiiw, ebʼ li komon saʼ qajunkabʼal, ut ebʼ li qech kabʼal, re xkʼutbʼal chiruhebʼ lix aajelil ruhebʼ li profeet?

• Chirix rilbʼal ru Mosiah 8:12–19, laaʼat malaj ebʼ li komon saʼ laa tzolebʼaal maare teeraj xyeebʼal lix nawom eechʼool chirixebʼ li profeet, joʼ kixbʼaanu laj Ammon, malaj eebʼantioxihom naq wan li naʼlebʼ chi kʼutbʼesinbʼil rikʼin xtzʼuumalebʼ re li profeet, joʼ kixbʼaanu laj Limhi (chiʼilmanq Mosiah 8:19).

• Li profeet aj Jose Smith aʼan laj ilol naʼlebʼ li xaqxo saʼ xjolomil li jun kʼojlajik aʼin (chiʼilmanq Tzolʼlebʼ ut Sumwank 21:1). Maare taawaj xyeebʼal rehebʼ li komon saʼ li tzolebʼaal naq teʼxwotz kʼaʼru xeʼxtzol rikʼin lix yehom laj Ammon chirixebʼ laj ilol naʼlebʼ (chiʼilmanq Mosiah 8:13–18 Chirix aʼan, taaruuq teʼaatinaq chirix chan ru naq laj Jose Smith kiwan choqʼ aj ilol naʼlebʼ. (Taaruuq taak’anjelaq D&C 135:3 and Moses 6:36 sa’ li seraq’ a’in.)

Mosiah 9:14–19; 10:6–10

Naru tooxaqliiq chiruhebʼ lix yalbʼal qix “rikʼin xmetzʼew li Qaawaʼ.”

• Li chʼol aatin “rikʼin xmetzʼew li Qaawaʼ ” nakʼutun wiibʼ sut saʼ li esil kixtzʼiibʼa laj Tzeniff chirix lix tenamit ut ebʼ li pleet keʼwan wiʼ rikʼinebʼ laj Lamanita—saʼ Mosiah 9:14–19 ut 10:6–10. Maare ebʼ li komon saʼ li tzolebʼaal teʼruuq chixtzʼilbʼalebʼ rix li raqal aʼin ut teʼxwotz kʼaʼru xyaalalil li chʼol aatin aʼin, joʼ nekeʼxkʼoxla. Chan ru naq naqakʼul “lix metzʼew li Qaawaʼ ”? Waklesihebʼ xchʼool li komon saʼ li tzolebʼaal re teʼxwotzebʼ li hoonal naq keʼxnumsihebʼ li chʼaʼajkilal rikʼin lix metzʼew li Qaawaʼ.

Mosiah 10:11–17

Li kʼaʼru naqasikʼ ru xbʼaanunkil naru nakʼanjelak chiru kʼiila tasal tenamit.

• Naru taakanabʼebʼ li komon chirilbʼal ru saʼ xchʼool Mosiah 10:11–17, ut teʼxsikʼ chan ru naq ebʼ laj Lamanita keʼwan chi jalbʼilebʼ xyuʼam xbʼaan li kʼaʼru keʼxsikʼ chaq ru xbʼaanunkil ut xpaabʼankil lix xeʼ xtoonebʼ. Kʼaʼru naxkʼut aʼin chirix kʼaʼru nakʼulman rehebʼ qakomon xbʼaan li naqasikʼ ru xbʼaanunkil laaʼo? Chan ru naq taqaj naq taanaweʼq qu laaʼo malaj ebʼ li qajunkabʼal chirix xnumik wiibʼ oxibʼ tasal tenamit? Maare ebʼ li komon saʼ li tzolebʼaal teʼruuq chixtzʼiibʼankil junjunq li naʼlebʼ teʼraj raj naq teʼnaweʼq wiʼ ru.

• Jun li chʼina kʼanjel—joʼ jun xtzolil li kokʼ xaqxookil dominó li nekeʼtʼaneʼ saʼ komonil wi natʼaneʼ li wan saʼ xjolomil—naru nakʼanjelak re xkʼutbʼal xyaalal chan ru naq li naxsikʼ ru xbʼaanunkil jun li kristiaan naxjal xyuʼamebʼ li ralal xkʼajol. Chirix aʼan, naru taakanabʼebʼ li komon saʼ li tzolebʼaal chirilbʼal ru Mosiah 10:11–17 ut teʼaatinaq chirix chan ru naq lix paabʼahomebʼ ut lix naʼlebʼebʼ laj Lamanita keʼxkʼut li kʼaʼru keʼxsikʼ chaq ru xbʼaanunkil lix xeʼtoonalebʼ kʼiila cient chihabʼ chaq. Li esil yeebʼil xbʼaan li Elder Donald L. Hallstrom, li natawman saʼ “Xkomon chik li kʼanjelebʼaal,” naʼaatinak ajwiʼ chirix aʼin, ut taaruuq taawotz. Maare ebʼ li komon saʼ li tzolebʼaal teʼxkʼoxlahebʼ li esil saʼ xyuʼamebʼ malaj saʼ resilal lix xeʼtoonalebʼ, chirix chan ru naq xbʼaan xyuʼam jun li kristiaan tiik xchʼool keʼchaabʼiloʼ xyuʼamebʼ kʼiila tasal tenamit.

Xb’oqb’aleb’ chi tzolok sa’ kab’l

Saʼ li xamaan aʼin ebʼ li komon saʼ li tzolebʼaal xeʼxtzol chirix li maaʼusilal keʼxkʼam laj Lamanita saʼ xbʼeenebʼ li ralal xkʼajol xbʼaan li kʼaʼru keʼxsikʼ ru xbʼaanunkil. Ye rehebʼ li komon saʼ li tzolebʼaal naq saʼ Mosiah 11–17 teʼril resil jun li winq li kixjal xyuʼamebʼ naabʼal xbʼaan lix tiikilal.

Xkomon chik li k’anjeleb’aal

Li kʼaʼru naqasikʼ ru xbʼaanunkil naru taakʼanjelaq saʼ xyuʼamebʼ li tasal tenamit chalel.

Li Elder Donald L. Hallstrom kixwotz chan ru naq xbʼaan lix tiikilalebʼ lix yuwaʼchʼin ut naʼchʼin keʼosobʼtesiik li tasal tenamit chalel:

“Lix naʼ xyuwaʼ lin yuwaʼ keʼwan wiibʼ ralal xkʼajol, jun winq (aʼan lin yuwaʼ), ut jun ixq. … Lix rabʼinebʼ kisumla saʼ 1946, ut kaahibʼ chihabʼ chik chirix aʼan, kikana saʼ yuʼam. Chʼina-us choqʼ re jun naʼbʼej ut yuwaʼbʼej roybʼeninkil naq taaʼalanq xbʼeen sut lix rabʼin, ut kaʼajwiʼ aʼan xrabʼinebʼ kiwan. Maaʼani kixnaw naq lutebʼ li kʼuulaʼal teʼyoʼlaaq. Saʼ xyoʼlajikebʼ, keʼkam xkabʼichal li kʼuulaʼal, ut kikam ajwiʼ lix naʼ.

“Kʼaʼjoʼ naq keʼrahoʼ xchʼool lin naʼchʼin ut lin yuwaʼchʼin. Aʼbʼanan lix rahilebʼ xchʼool kixkʼamebʼ rikʼin li Qaawaʼ ut lix tojbʼal rix li maak kixbʼaanu. Inkʼaʼ keʼxkʼoxla kʼaʼut naq kikʼulman aʼin, ut ani xmajeloʼ re taakʼulmanq; keʼxjayali bʼan ribʼ saʼ li tiikil wank. Lin naʼchʼin ut lin yuwaʼchʼin maakʼaʼebʼ xbʼihomal, inkʼaʼ mas naʼnookebʼ ru, inkʼaʼ keʼwan joʼ aj bʼeresinel saʼ li Iglees—aʼanebʼ bʼan yal chaabʼil aj Santil Paabʼanel saʼ Rosoʼjikebʼ li Kutan. …

“Lix tiikilal lin naʼchʼin xLou ut lin yuwaʼchʼin aj Art naq keʼxkʼul li chʼaʼajkilal aʼin, wanjenaq chi kʼanjelak chiru kaahibʼ tasal tenamit li xeʼnumeʼ chalen aʼan. Kʼaʼjoʼ naq kikʼanjelak saʼ xyuʼam li ralalebʼ (aʼan lin yuwaʼ) ut lin naʼ naq lix rabʼinebʼ aʼan, xchiʼipul rehebʼ li ralal xkʼajol, kikam ajwiʼ naq yoo chi alank. Naq 34 chihabʼ xyuʼam, kikam aʼan 10 kutan chirix naq kiyoʼla jun kʼuulaʼal, ut kixkanabʼ 4 li ralal, 10 kutan toj 8 chihabʼ xyuʼamebʼ. Joʼ chanru xeʼril chaq chi uxmank saʼ li tasal tenamit li ak xnumeʼ, ebʼ lin naʼ inyuwaʼ—chi inkʼaʼ nekeʼxbʼay ribʼ—keʼxjayali ribʼ rikʼin li Qaawaʼ re xkʼulbʼal xkʼojobʼankilebʼ xchʼool” (“Volverse al Señor,” Liahona, mayo 2010, 78–79).

Xchaabʼilobʼresinkil li qakʼutum

Abʼin. “Li abʼink aʼan jun bʼaanuhom re rahok. … Patzʼ re li qaChoxahil Yuwaʼ naq tatxtenqʼa chixtawbʼal ru li kʼaʼru nekeʼxye li komon saʼ li tzolebʼaal. Naq taakʼe aachʼool chirabʼinkil lix naʼlebʼebʼ, li teʼxye ut li inkʼaʼ teʼxye, qʼaxal wiʼchik tat-ok chixtawbʼal ru li nekeʼraj ru, lix patzʼomebʼ, ut li rajomebʼ xchʼool” (Li kʼutuk joʼ li Kolonel, 34).