“25–31 mayo. Mosiah 29–Alma 4: “Ke’wan chi xaqxo junelik ut chi ink’a’ neke’eek’an,” ” Kim, Taaqehin—Choqʼ re li Dominkil Tzolebʼaal: Lix Hu laj Mormon 2020 (2020)
“25–31 mayo. Mosiah 29–Alma 4” Kim, Taaqehin—Choq’ re li Dominkil Tzoleb’aal: 2020
Laj Alma li alalbʼej kijultikan aatin, xbʼaan laj Gary L. Kapp
25–31 mayo
Mosiah 29–Alma 4
“Ke’wan chi xaqxo junelik ut chi ink’a’ neke’eek’an”
Saʼ xkutankil laj Alma, nekeʼxkʼoxla naq laj tzolonel moko chaabʼil ta wiʼchik chiru li natzolok, “ut chi joʼkan juntaqʼeetebʼ chixjunil” (Alma 1:26). Naq nakakawresi aawibʼ chi kʼutuk, kʼoxlan chirix chan ru naq li naʼlebʼ aʼin wan rilom aawikʼin ut rikʼin laa tzolebʼaal.
Xtz’iib’ankil li nakak’oxla
Xkanab’ankileb’ chi wotzok
Ebʼ li komon saʼ li tzolebʼaal maare xeʼxkʼe reetal naq li kʼaʼru tzʼiibʼanbʼil resil saʼ Mosiah 29–Alma 4 chanchan li yoo chi kʼulmank saʼ li ruchichʼochʼ anajwan, ut saʼ lix yuʼamebʼ. Kanabʼebʼ chiru junpaat chixkaʼsutinkilebʼ li chʼol re xtawbʼal junjunq li naʼlebʼ joʼ aʼan. Kanabʼebʼ chixwotzʼbʼal kʼaʼru xeʼxtaw rikʼin anihaq li wan chixkʼatqebʼ.
Xk’utb’al li tzol’leb’
Naru naqakʼanjela li us saʼ li qatenamit.
-
Wi usaq raj choqʼ rehebʼ li komon saʼ li tzolebʼaal aatinak chirix chan ru xkʼanjelankil li us saʼ li tenamit wankebʼ wiʼ, naru texʼaatinaq chirix junjunq li chʼaʼajkilal li wankebʼ saʼ lee tenamit ut taatzʼiibʼa xtusulal chiru li pizarron (inkʼaʼ texʼaatinaq chirixebʼ li chʼaʼajkilal aʼin). Ebʼ li komon taaruuq teʼril ru Alma 2:1–7 re xtawbʼal kʼaʼruhebʼ li chʼaʼajkilal keʼxnumsi laj Nefita, ut kʼaʼru keʼxbʼaanu xbʼaan aʼan. Kʼaʼ raj ru kikʼulman wi ta “li ani wankebʼ saʼ li iglees” inkʼaʼ raj xeʼxkʼe chi abʼimank lix yaabʼ xkuxebʼ? Kʼaʼ chik ru naqatzol chirix wank choqʼ chaabʼil aj tenamit saʼ li esilal aʼin, joʼ naxye saʼ Mosiah 29:26–27, ut joʼ nawan saʼ li esil saʼ “Xkomon chik li kʼanjelebʼaal”? Ebʼ li komon saʼ li tzolebʼaal maare teʼraj xkʼoxlankil kʼaʼru teʼxbʼaanu re xkʼanjelankil li chaabʼilal saʼ xtenamitebʼ saʼ jun rehebʼ li chʼaʼajkilal li tzʼiibʼanbʼil chiru li pizarron.
Naru naqakʼe reetal ut naqatzʼeqtaana li bʼalaqʼil kʼutum.
-
Li resil laj Gideon naq kixyal ru rikʼin laj Nehor maare tixwaklesi xchʼoolebʼ laa tzolebʼaal. Maare naru naqapatzʼ chi rubʼelej re anihaq naq taaril ru li resil lix yuʼam laj Gideon ut tixwotz rikʼin li tzolebʼaal (chiʼilmanq Mosiah 19:1–8; 20:15–22; 22:1–9; ut Alma 1:2–9). Chirix rilbʼal li naʼlebʼ aʼin, ebʼ li komon saʼ li tzolebʼaal teʼruuq chixtzʼiibʼankil xtusulal li kʼaʼru chaabʼil chirix laj Gideon. Qayehaq, naq laj Gideon kirabʼi lix bʼalaqʼil kʼutum laj Nehor, “kixxaqabʼ ribʼ chiru rikʼin li raatin li Dios” (raqal 9). Saʼ li tzolok xeʼxbʼaanu saʼ junesal, ebʼ li komon saʼ li tzolebʼaal maare xeʼxtawebʼ li raqal li nekeʼxkaʼpakʼali lix kʼutum laj Nehor li natawman saʼ Alma 1:3–6. Kanab’eb’ chixwotzb’alebʼ li raqal xeʼxtaw. Wankebʼ junjunq raqal rehebʼ li loqʼlaj hu kʼutbʼilebʼ saʼ “Xkomon chik li kʼanjelebʼaal.” Chan ru naq nokoru chi wank joʼ laj Gideon saʼ xkolbʼal rix li yaal?
-
Lix bʼalaqʼil kʼutum laj Nehor, li yeebʼil resil saʼ Alma 1:3–6, naru nokoxtenqʼa chixkʼeebʼal reetal li naʼlebʼ naroksi laj Satanas re qabʼalaqʼinkil. Joʼ jun eetalil, chi kokʼ aj xsaʼ naxmuq li tikʼtiʼ saʼ xyi li yaalil naʼlebʼ. Naru taakanabʼebʼ li komon chi sikʼok saʼ Alma 1:3–4 ut teʼxkʼe reetal li tikʼtiʼ kixye laj Satanas, ut ebʼ li yaalil naʼlebʼ kiroksi re naq chaabʼilaq teʼkʼutunq. Kʼaʼru junjunq li tikʼtiʼ chi junajinbʼil rikʼin li yaal li nabʼalaqʼink rehebʼ li kristiaan saʼebʼ li kutan anajwan? Chan ru naru naqatenqʼahebʼ li qajunkabʼal ut li ani raaro qabʼaan chixkʼeebʼal reetal bʼar wan li yaal ut li tikʼtiʼ?
-
Ebʼ li komon saʼ li tzolebʼaal naru teʼxbʼicha malaj teʼril ru jun li bʼich chirix li tuulanil, joʼ “Saʼ laa chʼool tuulan chatwanq” (Ebʼ li Bʼich, 73), ut aatinanqex chan ru naq jalan li naʼlebʼ naxkʼut li bʼich rikʼin li kʼutbʼil xbʼaan laj Nehor saʼ Alma 1:2–9. Naru ajwiʼ teʼril chan ru naq jalan li kixkʼut laj Nehor chirixebʼ laj tzolonel re li evangelio rikʼin li kʼaʼru keʼxkʼut ut keʼxbʼaanu laj Alma ut xkomonebʼ chik aj bʼeresinel re li Iglees (chiʼilmanq Alma 1:26; 4:15–20). Kʼaʼru li yoo chaq chixsikʼbʼal laj Nehor? Chan ru naq jalan aʼan rikʼin li kixsikʼ laj Alma? Kanabʼebʼ li komon saʼ li tzolebʼaal chi kʼoxlak chirix kʼaʼru li yookebʼ chixsikʼbʼal naq nekeʼkʼanjelak saʼ li Iglees. Kʼaʼru naxkʼut saʼ Alma 1:26 chirix li tento saʼ qabʼeen naq yooko chi tzolok?
Xbʼaan li qʼetqʼetil naru naq nokoʼok “chi lajk saʼ li usaak.”
-
Jun seraqʼ chirix Alma 1 ut Alma 4 naru naxtenqʼahebʼ li komon saʼ li tzolebʼaal chixtawbʼal ru kʼaʼru nakʼulman re li junjunq ut re li Iglees naq wan li qʼetqʼetil. Naru nakakʼuubʼ li tzolebʼaal saʼ wiibʼ chʼuut, ut taapatzʼ re li jun chʼuut naq teʼtzoloq chirix lix wanjik li Iglees joʼ yeebʼil saʼ Alma 1:19–30, ut li jun chʼuut chik naq teʼaatinaq chirix lix wanjik li Iglees junjunq chihabʼ chik chirix aʼan, joʼ yeebʼil saʼ Alma 4:6–15. Patzʼ re li junjunq chʼuut naq teʼxye chan ru naq kiwan li Iglees ut ebʼ li komon li keʼwan chi saʼ, joʼ yeebʼil saʼebʼ li raqal xeʼril ru. Naru teʼxkʼuubʼ saʼ komonil chan ru naq teʼxbʼaanu aʼin—qayehaq, taaruuq teʼxyiibʼ jun jalam-uuch, malaj teʼxbʼaanu jun chʼina kʼutbʼesink. Chirix naq ebʼ li chʼuut xeʼxwotz li naʼlebʼ chiribʼilebʼ ribʼ, ye rehebʼ naq teʼaatinaq chirix kʼaʼru kikʼulman re li Iglees ut rehebʼ lix komon xbʼaan li qʼetqʼetil, ut kʼaʼru li osobʼtesink nachal rikʼin li tuulanil. Kʼaʼru li naʼlebʼ wankebʼ saʼebʼ li esil aʼin choqʼ qe laaʼo anajwan?
Li “raatin li Dios” ut “li saqen ruhil yaal chi chʼolobʼanbʼil” naru chixjalbʼal li chʼoolej.
-
Wankebʼ naabʼal li nekeʼreekʼa li kireekʼa laj Alma naq “kʼaʼjoʼ naq kiʼok chi rahoʼk xchʼool” (Alma 4:15) chirix lix maaʼusilalebʼ lix tenamit ut li chʼaʼajkilal wankebʼ wiʼ. Maare ebʼ li komon saʼ li tzolebʼaal taaruuq teʼxkʼoxla anihaq li raaro xbʼaanebʼ li wankebʼ wiʼ xkʼaʼuxl, ut taawanq saʼ xkʼaʼuxlebʼ li kristiaan aʼan naq yookebʼ chirilbʼal ru Alma 4:12–20. Chirix naq xeʼril ru, naru taapatzʼebʼ li patzʼom aʼin re xtikibʼankil jun seraqʼ chirixebʼ li raqal aʼin: Kʼaʼru kikʼamok chaq sahil chʼoolejil rikʼinebʼ li tenamit saʼ li chʼaʼajkilal wankebʼ wiʼ? Kʼaʼru xyaalalil choqʼ eere li chʼol aatin, “lix Musiqʼ li Dios inkʼaʼ kixkanabʼ ”? (Alma 4:15). Kʼaʼru kixmayeja laj Alma re xtenqʼankil lix tenamit, ut kʼaʼruhebʼ li mayej li wan naq patzʼbʼil naq taqakʼe laaʼo? Joʼqʼe naq xqil lix wankil li “saqen ruhil yaal chi chʼolobʼanbʼil”? (Alma 4:19). Chan ru naru taqawotz lix nawom qachʼool chi maakʼaʼ li qʼusum malaj li raqok aatin? Naru taakanabʼ xhoonalebʼ li komon saʼ li tzolebʼaal re xtzʼiibʼankil lix nawomebʼ xchʼool choqʼ rehebʼ li raarookebʼ xbʼaanebʼ.
-
Maare usaq choqʼ rehebʼ li komon aatinak chirix kʼaʼru li “saq ruhil yaal.” Saʼ li video “Apostle Testimony Montage” (ChurchofJesusChrist.org) wan junjunq xchʼolobʼankil li saq ruhil yaal. Chan ru naq li chʼolobʼahom aʼin, malaj jalan chik li xqabʼi, “nokoreekʼasi saʼ xjultikankil li kʼaʼru tenebʼanbʼil saʼ qabʼeen”? (Alma 4:19). Chan ru naq ebʼ li chʼolobʼahom aʼin nokoheʼxtenqʼa chi numtaak saʼ xbʼeen li qʼetqʼetil ut li wechʼok-ibʼ?
Xb’oqb’aleb’ chi tzolok sa’ kab’l
Naru nakachʼolobʼ chiruhebʼ li komon saʼ li tzolebʼaal naq saʼ Alma 5–7 teʼril ru li “saqen ruhil yaal” chʼolobʼanbʼil xbʼaan laj Alma, ut kʼaʼru xkʼulman xbʼaan aʼan saʼ xyanqebʼ li tenamit (chiʼilmanq Alma 4:19).
Xkomon chik li k’anjeleb’aal
“Kʼe chi eekʼamank laa wankil.”
Kaʼchʼin chirix naq kibʼoqeʼ li Hermana Belle S. Spafford joʼ jolomil awaʼbʼej re li Komonil re Tenqʼank saʼ 1945, keʼbʼoqeʼ laj bʼeresinel saʼ li Komonil re Tenqʼank saʼ jun chʼutam rehebʼ li xninqal ru ixq saʼ chixjunil li tenamit. Ebʼ laj bʼeresinel saʼ li Komonil re Tenqʼank ak wanjenaqebʼ saʼ li chʼutam aʼan chiru naabʼal chihabʼ, aʼut keʼreekʼa naq saʼebʼ li kutan aʼan inkʼaʼ yookebʼ chi kʼuleʼk saʼ chaabʼilal xbʼaan li chʼutam. Chirix aatinak rikʼinebʼ lix tenqʼ aj kʼehol naʼlebʼ, li Hermana Spafford kixye re li Awaʼbʼej George Albert Smith, Awaʼbʼej re li Iglees, naq li Komonil re Tenqʼank tento raj naq teʼrisi ribʼ saʼ li chʼutam.
Naq keʼaatinak chirix aʼin, li Hermana Spafford kixye, “Ma nakanaw, Awaʼbʼej Smith, maakʼaʼ naqakʼul saʼ li chʼutam aʼan.”
Moqon kixye:
“Li awaʼbʼej kinril chi sachso xchʼool. Kixye, “Hermana Spafford, ma junelik nakakʼoxla kʼaʼru taakʼul? Ma inkʼaʼ nakakʼoxla naq wan naq us xkʼoxlankil kʼaʼru naru nakakʼe? Laaʼin ninpaabʼ,” chan, “naq ebʼ li ixq aj Mormon wan kʼaʼru naru nekeʼxkʼe rehebʼ li ixq saʼ li ruchichʼochʼ, ut wan ajwiʼ kʼaʼru naru nekeʼxtzol rikʼinebʼ. Ruuchil risinkil eeribʼ saʼ li chʼutam, nintzʼaama naq taakʼam junjunq laa komon ixq li chaabʼilebʼ xnaʼlebʼ ut tatqʼajq saʼ li chʼutam aʼin.”
“Tojaʼ naq kixye rikʼin kawil aatin, “Kʼe chi eekʼamank laa wankil” ” (Belle S. Spafford, A Womanʼs Reach (1974), 96–97).
Li Hermana Spafford kixbʼaanu li kʼaʼru kiyeheʼ re. Kikʼanjelak kʼiila chihabʼ saʼ li chʼutam, ut moqon kixaqabʼaak joʼ jun aj jolominel chi saʼ.
Ebʼ li raqal saʼebʼ li loqʼlaj hu li nekeʼxkaʼpakʼali lix bʼalaqʼil naʼlebʼ laj Nehor.
Xchaabʼilobʼresinkil li qakʼutum
Kʼe reetal naq taakʼut li yaalil tzolʼlebʼ. “Junelik taapatzʼ aawibʼ, “Chan ru naq li kʼaʼru yookin chixkʼutbʼal tixtenqʼahebʼ li komon saʼ lin tzolebʼaal chixnimobʼresinkil lix paabʼaal chirix li Kristo, chixjalbʼalebʼ xkʼaʼuxl, chixbʼaanunkil ut chixpaabʼankil li sumwank rikʼin li Dios, ut chixkʼulbʼal li Santil Musiqʼej?” ” (Li k’utuk jo’ li Kolonel, 20).