Laj Abinadi chiru li rey aj Noe, xbʼaan laj Andrew Bosley

4–10 mayo

Mosiah 11–17

“Jun li saqen … li maajo’q’e naru xq’ojyinob’resinkil”

Kʼoxla chan ru naq laj Abinadi kixkʼut li evangelio. Kʼaʼru nakataw saʼ Mosiah 11–17 li naru tatxtenqʼa chi chaabʼiloʼk joʼ aj kʼutunel?

Xtz’iib’ankil li nakak’oxla

Xkanab’ankileb’ chi wotzok

Re xkanabʼankilebʼ li komon saʼ li tzolebʼaal chixwotzbʼal kʼaʼruhaq xeʼxtzol saʼebʼ li loqʼlaj hu saʼ junesal malaj saʼ junkabʼal, naru taaye rehebʼ naq teʼxtzʼaqobʼresi ru li chʼol aatin aʼin: Wi ta tinsikʼ ru jun raqal saʼ Mosiah 11–17 re xwotzbʼal rikʼin li ani raaro inbʼaan, aʼanaq raj .

Xk’utb’al li tzol’leb’

Mosiah 11–13; 17

Naru nokoxaqli chixkolbʼal rix li yaal, us ta maare tooxaqliiq qajunes.

• Us ta maare ebʼ li komon saʼ laa tzolebʼaal inkʼaʼ teʼwanq saʼ xxiwxiwil li kamk xbʼaan lix nawomebʼ xchʼool, naru naq teʼxnumsi li chʼaʼajkilal xbʼaan lix paabʼaalebʼ. Maare teʼruuq chixtawbʼal li bʼaanuhom malaj li aatin saʼ Mosiah 11–13 ut 17 li tixkʼe xkawilebʼ xchʼool re xaqliik ut xkolbʼal rix li yaal. Kʼaʼru kixkʼe xkawil xchʼool laj Abinadi ut laj Alma chi aatinak rikʼin xʼanchalilebʼ xchʼool? Chan ru naru nokowan chi xaqxo ut chi inkʼaʼ nokoʼeekʼan saʼ xkolbʼal rix li yaal? Ebʼ li aatin saʼ “Xkomon chik li kʼanjelebʼaal” maare teʼxkʼe aanaʼlebʼ.

• Re xtenqʼankil laa tzolebʼaal chi tzolok rikʼinebʼ li ani keʼwan chi kawebʼ xchʼool chixkolbʼal rix li yaal, naru taatzʼiibʼa chiru li pizarron, Ebʼ li keʼxaqli re xkolbʼal rix li yaal. Naru taatikibʼ rikʼin aatinak chirix laj Abinadi, ut taakanabʼebʼ li komon saʼ li tzolebʼaal chixwotzbʼal kʼaʼru xtochʼebʼ xchʼool chirix laj Abinadi naq xeʼril ru resil chiru li xamaan aʼin. Chirix aʼan naru teʼxye resil xkomonebʼ chik li winq ut ixq—li wankebʼ saʼebʼ li loqʼlaj hu, saʼ xjunkabʼalebʼ, malaj li xeʼxnaw ru—li nekeʼreekʼa naq xeʼxkʼut rikʼin xbʼaanuhom li xaqliik re xkolbʼal rix li yaal. Kʼaʼru nokoʼeekʼasiik chixbʼaanunkil xbʼaan lix bʼaanuhomebʼ aʼan?

Mosiah 12:19–37

Naq naqatzol li raatin li Dios, aajel ru naq taqakʼe qachʼool chixtawbʼal ru.

• Naq xeʼxtzol Mosiah 12:19–37 chiru li xamaan aʼin, ebʼ li komon saʼ li tzolebʼaal maare xeʼxkʼul xnaʼlebʼebʼ chirix kʼaʼru naraj naxye xkʼeebʼal qachʼool chixtawbʼal ru li raatin li Dios. Naru nakakanabʼ junjunq rehebʼ chixwotzbʼal lix kʼoxlahomebʼ. Malaj maare tatruuq chixnumsinkil li hoonal saʼ li tzolebʼaal re xsikʼbʼalebʼ li raqal aʼin saʼ komonil, ut aatinak chirix chan ru xchaabʼilobʼresinkil li tzolok chirix li evangelio. Qayehaq, kʼaʼut naq aajel ru naq teetaw ru lix chaqʼrabʼ li Dios joʼ ajwiʼ naq “teepaabʼ ”? (Mosiah 12:29).

• Kʼaʼru naru nekeʼxtzol li komon saʼ laa tzolebʼaal rikʼin rilbʼal chan ru naq jalan lix chʼoolebʼ ut lix bʼaanuhomebʼ laj tij chiru laj Noe rikʼin li tento raj taqabʼaanu laaʼo saʼ xtzolbʼal li evangelio? Kanabʼebʼ chirilbʼal ru Mosiah 12:19–37, ut teʼxsikʼ li kixye laj Abinadi saʼ xqʼusbʼalebʼ laj tij re laj Noe. Kʼaʼ raj ru tixye laj Abinadi chirix chan ru naq laaʼo naqatzol li evangelio anajwan? Kanabʼebʼ li komon saʼ li tzolebʼaal chixwotzbʼal kʼaʼru nekeʼxbʼaanu li natenqʼan rehebʼ chixkʼeebʼalebʼ xchʼool re xtawbʼal ru li evangelio ut re xchaabʼilobʼresinkil li tzolok chirix.

  

  Re xtzolbʼal li evangelio chi chaabʼil, aajel ru naq taqakʼe qachʼool chixtawbʼal ru.

Mosiah 13:28–15:11

Li kolbʼa-ibʼ nachal xbʼaan li Jesukristo ut lix tojb’al rix li maak li kixb’aanu.

• Re xqʼunbʼesinkilebʼ xchʼool li ani inkʼaʼ xeʼpaabʼan chirix lix kʼulunik li Mesias, laj Abinadi kixye jun profeetil aatin re laj Isaias (chiʼilmanq Mosiah 14). Wan kʼiila paay chan ru naq ebʼ li komon saʼ li tzolebʼaal teʼruuq chixkaʼsutinkil li chʼol aʼin. Taaruuq teʼril ru chi jachbʼil ru saʼ junjunq raqal ut teʼaatinaq chirixebʼ li raqal aʼan, malaj taaruuq taajach ru li tzolebʼaal saʼ kokʼ chʼuut re aatinak chirixebʼ li raqal li nekeʼwulak chiruhebʼ, ut joʼkanebʼ ajwiʼ li kokʼ aatin wan rubʼel li perel, re xtawbʼal chik xkomonebʼ lix naʼlebʼ. Waklesihebʼ xchʼool chixwotzbʼal kʼaʼru nekeʼxtzol chirix li Kolonel saʼ li chʼol aʼin.

• Ma nekeʼxtaw ru li komon saʼ laa tzolebʼaal kʼaʼru xyaalalil naq li Jesukristo “ak xkʼehom li elajinbʼil xbʼaan li tiik ruhil naʼlebʼ ”? (Mosiah 15:9). Re xtenqʼankilebʼ chixtawbʼal ru chi us, naru teetikibʼ rikʼin rilbʼal ru saʼ komonil “Tiik ruhil naʼlebʼ ” ut “Uxtaan, uxtaanank” saʼ li Kʼutul Raqal rehebʼ li Loqʼlaj Hu. Maare wan ani li taaruuq chixtzʼiibʼankil saʼ junpaat xyaalalilebʼ li aatin aʼin chiru li pizarron. Chirix aʼan, taaruuq teeril ru Mosiah 15:1–9 saʼ komonil. Chan ru naq li Jesukristo kixkʼe li elajinbʼil xbʼaan li tiik ruhil naʼlebʼ? Chan ru naq kixyeechiʼi li ruxtaan qe? Saʼebʼ li video saʼ “Xkomon chik li kʼanjelebʼaal,” wankebʼ chik li esil ut li jaljookil ru aatin re xchʼolobʼankil xyaalal li ruxtaan li Kolonel; wi teeril junaq rehebʼ li video aʼin maare tixtenqʼahebʼ li komon saʼ li tzolebʼaal chixkʼoxlankil jalanebʼ chik li jaljookil ru aatin chirix chan ru naq li Jesukristo kixkʼe li kʼaʼru elajinbʼil xbʼaan li tiik ruhil naʼlebʼ.

Mosiah 11; 12:33–37; 13:11–26

Ebʼ li taqlahom tento naq teʼwanq chi tzʼiibʼanbʼil saʼ li qachʼool.

• Maare naru nakatenqʼahebʼ li komon saʼ li tzolebʼaal chixtawbʼal ru kʼaʼut naq aajel ru naq teʼwanq li taqlahom chi “tzʼiibʼanbʼil saʼ li qachʼool” rikʼin xpatzʼbʼal rehebʼ kʼaʼru naraj naxye li chʼol aatin aʼin joʼ nekeʼxkʼoxla aʼan. Chirix aʼan, kanabʼebʼ chixkʼeebʼal reetal chan ru naq jalanebʼ li taqlahom kʼutbʼil xbʼaan laj Abinadi saʼ Mosiah 12:33–37 ut 13:11–26 rikʼinebʼ li maak li yookebʼ chixbʼaanunkil li rey aj Noe ut ebʼ lix tenamit (chiʼilmanq Mosiah 11:1–7, 14–15). Chan ru naq wi ebʼ li taqlahom wankebʼ chi “tzʼiibʼanbʼil saʼ qachʼool” jalan rikʼin yal xnawbʼalebʼ ru? (Mosiah 13:11). Chan ru naqanaw ma wankebʼ li taqlahom chi tzʼiibʼanbʼil saʼ li qachʼool? Ma wankebʼ li esil chirix aʼin naru naqawotz?

Xb’oqb’aleb’ chi tzolok sa’ kab’l

Ma xeʼreekʼa li komon saʼ laa tzolebʼaal jun sutaq li maare kireekʼa laj Abinadi—naq xeʼxwotz li evangelio chi maakʼaʼ ru? Ye rehebʼ naq saʼ Mosiah 18–26 teʼril resil xnimal li ruuchinihom lix kʼanjel laj Abinadi.

Xkomon chik li k’anjeleb’aal

Ebʼ li raatinebʼ li profeet chirix xaqliik re xkolbʼal rix li yaal.

Li Awaʼbʼej Russell M. Nelson kixkʼut: “Lix tz’aqal tzolom li Jesukristo wan rajomeb’ chi xaqliik, aatinak, ut wank chi jalan rik’ineb’ li kristiaan re li ruchich’och’. … Maawa’ li nak’ulman sa’ junpaat malaj xjunes rib’ re ok jo’ tzolom nim xwankil. Li qilob’aal tento taa’iloq rik’in li Kolonel ut lix evangelio. Q’axal ch’a’aj sa’ k’a’uxlej xyalb’al qaq’e chi ilok rik’in li Kolonel sa’ chixjunileb’ li qak’a’uxl. A’b’an naq taqab’aanu, taa’eeleliq li qaxiw ut li nawiib’an wi’ qach’ool” (“Roksinkil lix wankil li Jesukristo sa’ li qayu’am,” Jolomil chʼutubʼaj-ibʼ re mayo 2017).

Li Awaʼbʼej Thomas S. Monson kixye: “Junelik choowanq chi kaw qachʼool ut chi kawresinbʼil re xaqliik re xkolbʼal rix li kʼaʼru paabʼanbʼil qabʼaan, ut wi taaʼajmanq naq tooxaqliiq qajunes, chiqabʼaanu rikʼin xkawil qachʼool, chi kawobʼresinbʼil rikʼin xnawbʼal naq maajoʼqʼe wanko qajunes naq xaqxooko rikʼin li qaChoxahil Yuwaʼ ” (“Atrévete a lo correcto aunque solo estés,” Liahona, noviembre 2011, 67).

Li Awaʼbʼej Gordon B. Hinckley kixkʼut: “Laj Pablo kixtzʼiibʼa aʼin re laj Timoteo: “Moko li xiwak ta xqamaatani chaq rikʼin li Dios, aʼbʼan lix kawubʼ qachʼool, li rahok ut kuyuk-ibʼ. Joʼkan naq matxutaanak chixyeebʼal li yaal chirix li Qaawaʼ ” (2 Timoteo 1:7–8). Nawaj raj naq li junjunq komon saʼ li iglees aʼin tixkʼe raj li aatin aʼin bʼar wiʼ naru chirilbʼal rajlal eqʼla naq naxtikibʼ lix kutan. Tixkʼe raj xkawil qachʼool chi aatinak, tixkʼe raj qapaabʼaal re taqayal qaqʼe, tixkawobʼresi raj qapaabʼaal chirix li Qaawaʼ Jesukristo” (Enseñanzas de los Presidentes de la Iglesia: Gordon B. Hinckley (2016), 356–357).

Ebʼ li video chirix li tiik ruhil naʼlebʼ ut li uxtaan saʼ ChurchofJesusChrist.org.

• “Handelʼs Messiah: Debtorʼs Prison”

• “El Mediador”

• “Merced, justicia y amor”