Xjalajik xchʼool laj Alma li alalbʼej, xbʼaan laj Gary L. Kapp

18–24 mayo

Mosiah 25–28

“A’aneb’ xtenamit li Dios neke’yehe’ re”

Li naʼlebʼ mas chaabʼil re xkawresinkil aawibʼ chi kʼutuk chirix Mosiah 25–28 aʼan rilbʼalebʼ ru li chʼol aʼan ut xyuʼaminkil li naʼlebʼ kʼutbʼil chi saʼ. Naq nakabʼaanu, li Musiqʼej naru chamusiqʼankil re taakʼut li kʼaʼru mas aajelaq ru choqʼ rehebʼ li komon saʼ laa tzolebʼaal.

Xtz’iib’ankil li nakak’oxla

Xkanab’ankileb’ chi wotzok

Maare wankebʼ li komon saʼ li tzolebʼaal li nachʼaʼajkoʼ chiruhebʼ xtzolbʼalebʼ li loqʼlaj hu wulaj wulaj saʼ junesal malaj saʼ junkabʼal. Ma tenqʼanbʼilaqebʼ xbʼaan lix numsihomebʼ xkomonebʼ chik li komon saʼ li tzolebʼaal? Maare taaruuq taatikibʼ li tzolok rikʼin xkanabʼankilebʼ li komon saʼ li tzolebʼaal chixwotzbʼal kʼaʼru xeʼxbʼaanu saʼ xtzolbʼalebʼ li loqʼlaj hu saʼ junesal malaj saʼ junkabʼal li xkʼanjelak rehebʼ.

Xk’utb’al li tzol’leb’

Mosiah 26:15–31; 27:23–37

Li Dios tikto naxkuyebʼ xmaak li ani nekeʼxjal xkʼaʼuxl.

• Wan xkʼihal li naʼlebʼ chirix li jalok kʼaʼuxlej ut li kuyuk maak saʼebʼ li chʼol aʼin. Naru taatzʼilebʼ rix li naʼlebʼ aʼin rikʼin xtzʼiibʼankil Jalbʼa-kʼaʼuxlej ut Kuyuk maak chiru li pizarron, ut xpatzʼbʼal rehebʼ li komon naq teʼxtzʼiibʼa chi tusbʼil rubʼelebʼ li jolomil aatin aʼin kʼaʼru nachal saʼ xkʼaʼuxlebʼ naq nekeʼrabʼihebʼ li aatin aʼin. Chirix aʼan, teʼruuq chi sikʼok saʼ Mosiah 26:22–24, 29–31 ut 27:23–37 re xtawbʼalebʼ li aatin ut li chʼol aatin li nekeʼkʼutuk chirix li jalbʼa-kʼaʼuxlej ut li kuyuk maak. Tojaʼ naq ebʼ li komon saʼ li tzolebʼaal teʼruuq chixtiqbʼalebʼ li aatin ut chʼol aatin aʼin chiru li pizarron. Kʼaʼru nareekʼa li Dios chirixebʼ li nekeʼxjal xkʼaʼuxl ut nekeʼxsikʼ xkuybʼal xmaak?

• Wankebʼ li inkʼaʼ nekeʼxnaw ma tzʼaqal lix jalbʼalebʼ xkʼaʼuxl re naq li Dios tixkuyebʼ xmaak. Re xtenqʼankil anihaq saʼ laa tzolebʼaal li maare taareekʼa chi joʼkan, naru taaye rehebʼ li komon saʼ laa tzolebʼaal naq teʼxkʼoxla naq aʼanebʼ raj laj Alma li yuwaʼbʼej, ut naq jun komon saʼ li Iglees saʼ Tzarahemla xpatzʼ raj rehebʼ chan ru xkʼulbʼal xkuybʼal lix maak (naru ajwiʼ teebʼaanu jun kʼutbʼesink chirix aʼin). Kʼaʼru kixtzol laj Alma rikʼin li Qaawaʼ saʼ Mosiah 26:15–31 li taaruuq chixtenqʼankil li komon aʼan? (chiʼilmanq ajwiʼ Moroni 6:8; Tzolʼlebʼ ut Sumwank 58:42–43). Li aatin aʼin re li Awaʼbʼej Henry B. Eyring taaruuq chetenqʼankil: “Wi xereekʼa lix wankil li Santil Musiqʼej anajwan, naru taakʼul joʼ jun reetalil naq lix tojbʼal rix li maak yoo chi kʼanjelak saʼ laa yuʼam” (“Dones del Espíritu para tiempos difíciles,” Charla fogonera del Sistema Educativo, septiembre 2006, 4).

Mosiah 27:8–24

Li Dios narabʼihebʼ li qatij ut tixsumehebʼ joʼ li rajom xchʼool.

• Wankebʼ naabʼal saʼ qayanq li nekeʼxnaw ru li kireekʼa laj Alma li yuwaʼbʼej, naq li ralal wan “saʼ xpoʼjik xchʼool rikʼin li Dios” (Mosiah 27:11). Maare ebʼ li komon saʼ li tzolebʼaal naru nekeʼaatinak chirix chan ru naru nekeʼroksi li esil saʼ Mosiah 27:8–24 re xwaklesinkil xchʼool li ani wan jun xkomon li sachenaq. Rikʼin naq inkʼaʼ naru naqapatzʼ jun sachbʼa-chʼoolej, ut inkʼaʼ naru naqamin ru lix taql xchʼool anihaq, chan ru naq us tootijoq chirix li ani raaro qabʼaan li xsach xbʼe? (chiʼilmanq ajwiʼ Alma 6:6).

Mosiah 27:8–28:4

Chixjunilebʼ li winq ut ixq tento teʼyoʼlaaq wiʼchik.

• Aʼinebʼ junjunq li patzʼom li naru nekeʼxtenqʼahebʼ li komon saʼ li tzolebʼaal re tzolok chirix li yoʼlaak wiʼchik: Kʼaʼru xyaalalil li yoʼlaak wiʼchik? (chi’ilmanq Li K’utul Raqal reheb’ li Loq’laj Hu, “Jaleʼk xchʼool, jalbʼil xchʼool”). Chan ru naq naqayal qaqʼe chi wank rikʼinebʼ li qas qiitzʼin wi xooyoʼla wiʼchik chi musiqʼejil? Re xtenqʼankilebʼ li komon saʼ li tzolebʼaal chixsumenkilebʼ li patzʼom aʼin, naru taakanabʼebʼ chi sikʼok saʼ Mosiah 27:22–28 re xtawbʼal reetalil naq laj Alma ut ebʼ li ralal laj Mosiah keʼyoʼla wiʼchik chi musiqʼejil.

• Chiqajunil wan li jalok chʼoolej xqakʼul, xbʼaan naq joʼ kixye laj Alma, “chixjunilebʼ li winq … tento teʼyoʼlaaq wiʼchik” (Mosiah 27:25; tiqbʼil xkawil li aatin). Maare junjunq rehebʼ li komon saʼ li tzolebʼaal teʼruuq chixwotzbʼal chan ru naq xeʼjaleʼ xchʼool chirix lix evangelio li Jesukristo—maare rikʼin li xninqal ru numsihom saʼ xyuʼamebʼ, malaj yal chi timil, chi inkʼaʼ xeʼxkʼe reetal toj reetal naq xeʼril chi ixej. Naru ajwiʼ taakanabʼebʼ li komon saʼ li tzolebʼaal chixtzʼiibʼankil chiru junpaat resil li xeʼxkʼul. (Wi maakʼaʼ li hoonal re xbʼaanunkil aʼin saʼ li tzolebʼaal, naru taaye rehebʼ naq teʼxbʼaanu saʼ kabʼl.) Re xkʼutbʼal xyaalal naq lix jalajik qachʼool tento naq toj yooq chi uxmank, naru taaye rehebʼ li komon naq yalaq joʼqʼe teʼril ru lix tzʼiibʼahomebʼ, ut teʼxtzʼiibʼa chik li naʼlebʼ xeʼxkʼul.

• Laj Alma ut xkomonebʼ chik li wankebʼ saʼebʼ li loqʼlaj hu keʼroksi li jaljookil ru aatin chirix yoʼlaak wiʼchik re aatinak chirix li jalok naxkʼam chaq lix evangelio li Jesukristo saʼ li qayuʼam. Li Elder David A. Bednar xjuntaqʼeeta li jalok aʼin rikʼin jun li pepino li nayiibʼaman choqʼ pepinillo (chiʼilmanq “Xkomon chik li kʼanjelebʼaal”). Re xtenqʼankilebʼ li komon saʼ li tzolebʼaal chixkʼoxlankil kʼaʼru xyaalal li jaljookil ru aatin aʼin, naru taakʼam chaq saʼ li tzolebʼaal jun pepino ut jun li pepinillo. Malaj ut taaruuq taatzʼaama re anihaq naq tixkʼam chaq jun li akʼ kʼuulaʼal ut texʼaatinaq chirix kʼaʼut naq li yoʼlaak nakʼanjelak choqʼ jaljookil ru aatin chirix kʼaʼru keʼxkʼul laj Alma ut ebʼ li ralal laj Mosiah. (Chiʼilmanq Mosiah 27:23–28:7.)

Kisahoʼ xchʼool lix yuwaʼ, xbʼaan laj Walter Rane

Xb’oqb’aleb’ chi tzolok sa’ kab’l

Re xwaklesinkil xchʼoolebʼ li komon saʼ li tzolebʼaal re teʼril ru Mosiah 29–Alma 4 saʼ li xamaan taachalq, naru taaye rehebʼ naq saʼebʼ li chʼol aʼin, ebʼ li tenamit aj Nefita keʼkanabʼaak chi tzʼaqonk saʼ li kʼaʼru nakʼulman saʼ xjolomil li tenamit. Kʼaʼru naru naqatzol rikʼin li keʼxkʼul aʼan naq naqayal qaqʼe chi kʼanjelaq choqʼ re li chaabʼilal saʼ li tenamit wanko wiʼ?

Xkomon chik li k’anjeleb’aal

Jun kʼanjel naʼux chiru chixjunil qayuʼam.

Li Elder D. Todd Christofferson kixk’ut: “Li yo’laak wi’chik, jalan wi’ rik’in li yo’laak sa’ tib’elej, a’an chanchan jun li najtil b’e ut maawa’ k’a’ruhaq li nak’ulman yal jun sut. Ut aʼin rajbʼal naq wanko saʼ li yuʼam aʼin, re xbʼaanunkil chi joʼkan” (“Nacer de nuevo,” Liahona, mayo 2008, 78).

Li jalok chʼoolej ut ebʼ li pepino.

Li Elder David A. Bednar kixwotz li jaljookil ru aatin aʼin, li naxjuntaqʼeeta li yoʼlaak wiʼchik chi musiqʼejil rikʼin xyiibʼankil li pepino saʼ vinagre.

“Jun pepinillo aʼan jun pepino li jaltesinbʼil ru xbʼaan xtaaqenkil jun kʼuubʼanbʼil naʼlebʼ saʼ li wan wiʼ junjunq li yokbʼ. Li xbʼeen yokbʼ saʼ li kʼanjel re xjalbʼal jun pepino choqʼ pepinillo aʼan xkawresinkil ut xchʼajbʼal. …

“Li xkabʼ yokbʼ saʼ li kʼanjel re jalok, aʼan xsubʼbʼal ut xtzʼahobʼresinkil li pepino saʼ haʼ rikʼin atzʼam chiru naabʼal kutan. … Ebʼ li pepino kaʼajwiʼ nekeʼok choqʼ pepinillo wi subʼbʼilebʼ chi tzʼaqal saʼ li haʼ rikʼin atzʼam chiru joʼ kʼihal li kutan eetalinbʼil. Chiru xnumikebʼ li kutan, timil timil najalanoʼ chan ru naq wan li pepino, ut naxkʼe xsaqenkil ru ut lix sahil li pepinillo. Wi yal nasubʼeʼ chiru junpaat saʼ li haʼ rikʼin atzʼam, moko tzʼaqalaq ta re taaʼuxq li jalok aʼin. Tento taakanaaq chi subʼbʼil rajlal chiru naabʼal kutan re taaʼuxq li jalok.

“Lix raqik li kʼanjel aʼan naq li pepinillo li ak xeʼyaaloʼ nekeʼkʼeheʼ xtzʼapbʼal saʼebʼ li bʼoteey li chʼajbʼilebʼ ut saqobʼresinbʼilebʼ. Ebʼ li pepinillo nekeʼkʼeheʼ saʼebʼ li bʼoteey, nahoyman woqxinbʼil haʼ rikʼin atzʼam saʼ xbʼeen, ut nachiqman li bʼoteey saʼ haʼ li yoo chi woqxink. Tento naq isinbʼilaq chixjunil li tzʼaj saʼebʼ li pepino ut saʼebʼ li bʼoteey, re naq taaruuq xkʼuulankilebʼ li pepinillo chi kolbʼilebʼ rix. …

Joʼ chanru naq li pepino tento taawanq chi kawresinbʼil ut chi chʼajbʼil re taaruuq taajalmanq choqʼ pepinillo, joʼkan ajwiʼ laaʼex ut laaʼin naru nokokawresiik “rikʼin li aatin re li paabʼank joʼ ajwiʼ rikʼin li chaabʼil kʼutum” (1 Timoteo 4:6) ut naru nokokana chi saq qu rikʼinebʼ li kʼojobʼanbʼil kʼanjel ut ebʼ li sumwank li bʼaanunbʼil rikʼin lix wankil li Tijonelil re Aaron. …

“Joʼ chanru naq jun pepino najalman choqʼ pepinillo naq subʼbʼil ut kanabʼanbʼil saʼ li haʼ rikʼin atzʼam, laaʼex ut laaʼin nokoyoʼla wiʼchik naq wanko chi subʼbʼil ut nokokana saʼ lix evangelio li Jesukristo. … Li yokbʼ aʼin re li kʼanjel re jalaak naraj xnumik li kutan, li yalok qʼe, ut li kuyuk. …

“… Li haʼ yoo chi woqxink naxkanabʼebʼ li pepinillo chi wank chi kolbʼil rix ut chi kʼuulanbʼil chiru naabʼal kutan. Chi joʼkan, laaʼo ajwiʼ nokokana chi saqobʼresinbʼil ut chi santobʼresinbʼil naq chʼajbʼilo saʼ xkikʼel li Karneer, naq nokoyoʼla wiʼchik, ut naq naqakʼul ut naqoxloqʼihebʼ li sumwank li bʼaanunbʼilebʼ rikʼin lix wankilal li Tijonelil re Melkisedek” (“Os es necesario nacer de nuevo,” Liahona, mayo 2007, 19–21).

Xchaab’ilob’resinkil li qak’utum

Kawresi aawib’ rik’in xk’oxlankilebʼ li kristiaan. “Naq yookat chixkawresinkil aawib’, k’uub’ aana’leb’ a’ yaal jo’ li nakataw ru chirixeb’ li ani tzolb’ileb’ aab’aan. … Eb’ laj k’utunel li neke’k’utuk jo’ chanru li Kristo moko k’a’aj ta wi’ neke’xk’oxla chan ru te’k’utuq; k’eek’ookeb’ b’an xch’ool chixtenq’ankileb’ li komon chixnimankil lix paab’aal chirix li Jesukristo ut chi ok jo’ chanru a’an” (Li kʼutuk joʼ li Kolonel, 7).