Li xMinerva K. Teichert (1888-1976), Reelelik li rey aj Limhi ut lix tenamit, 1949-1951, oléo en masonite, 35 7/8 x 48 pulgadas. Museo de Arte, Universidad de Brigham Young, 1969

11–17 mayo

Mosiah 18–24

Okenaqo sa’ jun sumwank rik’in a’an

Naq nakawil ru Mosiah 18–24, k’oxlaheb’ li ani nakatzoleb’. K’a’ru nakanaw chirixeb’? Li Santil Musiq’ej naru chixmusiq’ankil laa k’oxlahom ut naru nakatxtenq’a chixk’eeb’al reetaleb’ li yaalil na’leb’ re li evangelio li mas te’k’anjelaq choq’ reheb’.

Xtz’iib’ankil li nakak’oxla

Xkanab’ankileb’ chi wotzok

Kanab’eb’ li komon sa’ li tzoleb’aal chixyeeb’al junjunq na’leb’ malaj junjunq aatin chirix li yaal li xe’xtaw naq yookeb’ chixtzolb’al Mosiah 18–24. (Wan junjunq li na’leb’ tusb’il sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al.) Waklesiheb’ xch’ool chixwotzb’aleb’ li raqal sa’ Mosiah 18–24 li neke’xk’uteb’ li na’leb’ a’in. K’a’ru xe’xk’ul rik’ineb’ li yaalil na’leb’ a’in?

Xk’utb’al li tzol’leb’

Mosiah 18:1–6

Rik’in li kub’iha’ naqak’ul jun sumwank re k’anjelak chiru li Dios ut re xaqliik jo’ aj yehol nawom chirix a’an.

• Naq nakawil ru Mosiah 18 ut nakakawresi aawib’ re k’utuk, maare tatmusiq’aaq chixtenq’ankileb’ li komon sa’ laa tzoleb’aal re taajultiko’q reheb’ ut te’xk’oxla sa’ xch’ool li sumwank xe’ok wi’ sa’ li kub’iha’. A’in jun na’leb’ re xb’aanunkil a’in: Kanab’eb’ li komon sa’ li tzoleb’aal chi k’anjelak sa’ komonil re xtz’iib’ankil chiru li pizarron xtusulaleb’ li ch’ol aatin li jultik reheb’ chirix li k’a’ru kixye laj Alma chirix li sumwank re li kub’iha’. Naq xe’xchoy, eb’ li komon sa’ li tzoleb’aal taaruuq te’ril ru Mosiah 18:8–10 ut te’xk’e sa’ li tusulal li k’a’ru maji’ wan. (Naru ajwi’ te’roksiheb’ li ch’ol aatin wankeb’ sa’ Tzol’leb’ ut Sumwank 20:37, 77, ut  79.) Maare usaq xpatz’b’al reheb’ k’a’ru xyaalalil li junjunq ch’ol aatin, ut k’a’ru naru te’xb’aanu re xpaab’ankil li jun raqal a’an re li sumwank re li kub’iha’. Chan ru naq li Qaawa’ nokorosob’tesi naq naqayal qaq’e chixpaab’ankil li qasumwank?

• Naq eb’ lix tzolom laj Alma ke’xkawresi rib’ re te’kub’eeq xha’, laj Alma kixk’ut chiruheb’ naq re “ok sa’ lix korral li Dios,” na’ajman ru ok sa’ sumwank chixtaaqenkil li Dios ut chixch’olaninkileb’ li ralal xk’ajol (chi’ilmanq Mosiah 18:8–9). Maare eb’ li komon sa’ li tzoleb’aal naru neke’xwotz lix numsihomeb’ naq eb’ a’an, malaj anihaq chik nawb’il ru xb’aaneb’, xe’kawob’resiik xb’aan li ani yoo chixpaab’ankil li sumwank re li kub’iha’ li yeeb’il xyaalal sa’ Mosiah 18:8–10. Qayehaq, ma wan anihaq xk’ojob’an xch’ooleb’ malaj anihaq xtenq’an reheb’ chixk’amb’al li riiqeb’? Chan ru naq eb’ li numsihom a’in nokohe’reek’asi chixpaab’ankil li qasumwank? Naru ajwi’ taajultika reheb’ li komon sa’ li tzoleb’aal chan ru naq laj Abinadi “kixaqli jo’ aj yehol nawom chirix li Dios sa’ chixjunil hoonal, ut sa’ chixjunil li k’a’aq re ru, ut sa’ chixjunil li na’ajej” (raqal 9). K’a’ru naru naqatzol rik’in lix b’aanuhom a’an naq naqasik’ xpaab’ankil li jun raqal a’in re li qasumwank re li kub’iha’?

Naq nakub’e qaha’, noko’ok sa’ sumwank naq took’anjelaq chiru li Dios ut chiruheb’ li qas qiitz’in.

Mosiah 18:17–31

Eb’ lix tenamit li Dios wankeb’ sa’ junajil.

• Sa’ Mosiah 18:17–31 naxye resileb’ li taqlahom kixk’e laj Alma reheb’ lix tenamit re xtenq’ankileb’ chi wank sa’ junajil jo’ komon sa’ lix Iglees li Kristo. Re xtenq’ankileb’ li komon chixk’oxlankil k’a’ru xyaalalileb’ li taqlahom a’in choq’ reheb’, naru nakaye reheb’ naq te’xtz’ileb’ rix li raqal a’in sa’ kok’ ch’uut, ut naq te’xtz’iib’a xtusulaleb’ li taqlahom neke’xtaw. Chan ru naq rik’in xtaaqenkileb’ li taqlahom a’in te’wanq li komon sa’ li teep sa’ junajil? Ma wan li jayalihom naru neke’xk’uub’ li komon sa ’li tzoleb’aal xjuneseb’ malaj sa’ komonil, re xtaaqenkil lix b’aanuhomeb’ lix tenamit laj Alma?

• Wankeb’ li neke’k’oxlank re, k’a’ut naq tento taawanq jun li iglees? Re xtenq’ankileb’ li komon chixsumenkil li patz’om a’in, naru taayiib’ xjalam-uuch jun ch’utleb’aal chiru li pizarron, ut taatz’iib’a li patz’om a’in chi rub’el. Chirix a’an, eb’ li komon sa’ li tzoleb’aal te’ruuq chi sik’ok sa’ Mosiah 18:17–31 ut te’xtz’iib’a chiru li pizarron eb’ lix sumenkil li patz’om li neke’xtaw sa’eb’ li raqal a’in. Naru ajwi’ neke’xtaw xsumenkil sa’ li raatin li Elder Christofferson sa’ “Xkomon chik li k’anjeleb’aal.” Maare naru nakakanab’eb’ junjunq komon sa’ li tzoleb’aal chixk’utb’esinkil chan ru naq te’xsume jun ramiiweb’ li ink’a’ naxpaab’ naq na’ajman ru jun li iglees li k’uub’anb’il. K’a’ut naq naqab’antioxi wank sa’ li Iglees?

• Naqaj raj naq chixjunileb’ te’reek’a naq k’ulub’anb’ileb’ sa’ li iglees, a’ut wankeb’ li neke’reek’a naq moko k’ulub’anb’ileb’ ta. K’a’ru naqatzol rik’in lix tenamit laj Alma sa’ Mosiah 18:17–31 li naru nokoxtenq’a chixyiib’ankil jun na’ajej b’ar wi’ chixjunileb’ neke’reek’a naq k’ulub’anb’ileb’?

Mosiah 21–24

Li Qaawa’ naru chixseeb’ob’resinkil li qiiq.

• Li iiq k’amb’il xb’aaneb’ li komon sa’ li tzoleb’aal jalaneb’ rik’ineb’ li k’amb’il xb’aan lix tenamit laj Limhi malaj lix tenamit laj Alma naq ke’wan chi preexil. A’ut li k’a’ru yeeb’il sa’eb’ li esilal a’in naru neke’k’anjelak sa’ xyu’am yalaq ani li nareek’a naq numtajenaq lix yalb’al rix ut li ch’a’ajkilal wan wi’. Kanab’eb’ li komon sa’ li tzoleb’aal chixwotzb’al li k’a’ru xe’xtzol sa’ Mosiah 21–24 chirix chan ru naq li Dios naru chiqatenq’ankil sa’eb’ li qach’a’ajkilal. (Re rilb’al jun xtusulaleb’ li esilal a’in, chi’ilmanq L. Tom Perry, “El poder de librarse,” Liahona, mayo 2012, 94–97.) Eb’ li komon te’ruuq ajwi’ chixwotzb’al junaq hoonal naq, jo’ lix tenamit laj Alma, xe’xk’ul xtz’aqob’resinkil ru lix yeechi’ihom li Dios naq a’an tixkotz li iiq k’eeb’il sa’ xb’eeneb’ ut taarula’aniheb’ sa’ xch’a’ajkilaleb’ (chi’ilmanq Mosiah 24:14).

• Maare us raj choq’ reheb’ li komon sa’ li tzoleb’aal xtz’iib’ankil chiru junpaat eb’ li ch’a’ajkilal xe’xnumsi, ut xk’oxlankil rix chan ru naq li Qaawa’ xtenq’aheb’ chixk’amb’al li riiqeb’. Ma wankeb’ li aatin sa’ Mosiah 21–24 li naxwaklesiheb’ xch’ool chixjayalinkil rib’ rik’in li Qaawa’ sa’ li ch’a’ajkilal? Chan ru naq lix yeechi’ihom li Qaawa’ re lix tenamit laj Alma sa’ Mosiah 24:14 wan rilom rik’in li sumwank noko’ok wi’ rik’in li Qaawa’ sa’ li kub’iha’? (chi’ilmanq Mosiah 18:8–10).

Xb’oqb’aleb’ chi tzolok sa’ kab’l

Re xwaklesinkileb’ xch’ool li komon chirilb’al ru Mosiah 25–28, ye reheb’ naq te’xk’oxla anihaq li xkanab’ xpaab’ankil li evangelio. Ye reheb’ naq sa’ rilb’aleb’ li ch’ol a’in, maare te’xtaw xna’leb’ chan ru naq te’xtenq’a li kristiaan a’an chi sutq’iik.

Xkomon chik li k’anjeleb’aal

Kʼaʼut naq naqaj ru li Iglees?

Li Elder D. Todd Christofferson kixye: “Ninnaw naq wankeb’ li neke’xk’oxla rib’ jo’ aj paab’anel, ut jo’ aj k’ulul re li Musiq’ej, a’ut neke’xtz’eqtaana li wank sa’ jun iglees, ut neke’xk’oxla naq maak’a’ rajb’al naq wan xkomon a’an. Choq’ reheb’ a’an, li paab’aal yal xjuneseb’ rib’ na’uxman. A’b’anan, li Iglees yiib’anb’il xb’aan li ani tz’aqal nak’ehok re li Musiq’ej—li Jesukristo. Us naq tooxaqliiq b’ayaq chixk’oxlankil k’a’ut naq a’an naxsik’ ru roksinkil jun iglees, lix Iglees, Lix Iglees li Jesukristo reheb’ laj Santil Paab’anel sa’ Roso’jikeb’ li kutan, re xb’aanunkil lix k’anjel a’an ut xk’anjel lix Yuwa’.”

Chirix a’an, li Elder Christofferson xwotz junjunq rajb’al naq li Qaawa’ xk’uub’ jun li Iglees (chi’ilmanq “K’a’ut naq wan li Iglees,” Jolomil ch’utub’aj-ib’ re octubre 2015):

• Re “xjultikankil li chaab’il esil re lix evangelio li Jesukristo, ut xk’anjelankil li k’ojob’anb’il k’anjel re li kolb’a-ib’—sa’ jalan chik aatin, xk’amb’aleb’ li tenamit rik’in li Kristo.”

• “Re naq taawanq jun xch’utameb’ laj Santil Paab’anel li te’xtenq’a rib’ chirib’ileb’ rib’ sa’ li “laatz’ ut ka’ch’in ruhil b’e li nak’amok sa’ li junelik yu’am.” (2 Nefi 31:18). … Sa’ junajil chirix li paab’aal, naqatzol qib’ ut naqawaklesi qib’, ut naqayal qaq’e chi ok chi tz’aqal tz’aqal choq’ tzolom.”

• Re xk’eeb’al “jun qach’utleb’aal rajlal xamaan re hilank ut ak’ob’resiik, jun na’ajej ut jun hoonal re xkanab’ankil chiqix li ruchich’och’—a’an li hilob’aal kutan.”

• “Re taab’aanumanq li k’a’ru aajel ru li ink’a’ raj taaruuq xb’aanunkil qajunes malaj sa’ kok’ ch’uut, jo’ k’anjelak rik’in li neb’a’il, … xk’amb’al li evangelio sa’ chixjunil li ruchich’och’, … xkab’lankileb’ ut xk’anjelankileb’ li Santil Ochoch, eb’ li rochoch li Qaawa’, b’ar wi’ neke’ru chi uxmank li k’ojob’anb’il k’anjel ut sumwank li aajeleb’ ru.”

• Re naq te’wanq lix laawil li tijonelil, re naq “eb’ laj k’anjel sa’ li tijonelil re li Iglees neke’xk’uula chi saq ru lix tzol’leb’ li Kolonel, ut chi tz’aqal re ru eb’ lix k’ojob’anb’il k’anjel aj kolonel, … neke’tenq’an chixkawresinkileb’ li ani taak’uluq reheb’, neke’xtz’il rix ma xk’ulub’ li ani taa’ajoq re xk’ulb’al, ut neke’xb’aanuheb’ … neke’ru chixtz’ilb’al rix b’ar wan li yaal ut li tik’ti’.”