Si Alma nagsangyaw

Nagtudlo sa Tinuod nga Doktrina, ni Michael T. Malm

Hunyo 8–14

Alma 8–12

Si Jesukristo Moanhi aron sa Pagtubos sa Iyang Katawhan

Sugdi ang imong pagpangandam sa pagtudlo pinaagi sa pagtuon sa Alma 8–12. Dayon ribyuha kining outline alang sa dugang nga mga ideya nga makaawhag sa mga sakop sa klase nga mopaambit kon unsay ilang nakat-unan diha sa ilang pagtuon.

Irekord ang Imong mga Impresyon

pagpaambit nga icon

Dapita ang Pagpaambit

Hatagi ang mga sakop sa klase og pipila ka minuto sa pagpamalandong bahin sa ilang personal o pamilya nga pagtuon sa kasulatan karong semanaha. Sa unsang paagi nga ang ilang pagtuon nakaimpluwensya sa mga pagpili nga ilang nahimo atol sa semana? Dapita ang pipila ka sakop sa klase sa pagpaambit sa ilang mga hunahuna.

pagtudlo nga icon

Itudlo ang Doktrina

Alma 8

Ang atong mga paningkamot sa pagpaambit sa ebanghelyo mahimong magkinahanglan og pagkamakanunayon ug pailub.

• Daghang tawo ang maglisud sa pagpaambit sa ebanghelyo—ilabi na kon mibati sila nga gisalikway, sama ni Alma. Ang ehemplo ni Alma mahimong makatabang kanila nga mosalig sa Dios ug mangita og kaisug nga magpadayon sa pagpaambit sa ilang mga pagpamatuod ngadto sa uban. Ikonsiderar kining mga pangutana alang sa panaghisgutan: Unsay atong makat-unan gikan sa mensahe sa anghel ngadto kang Alma diha sa Alma 8:15? Kalabut sa reaksyon ni Alma ngadto sa mensahe, nga makita diha sa Alma 8:14–32, unsaon man niini pagdasig kanato sa pagpaambit sa ebanghelyo kon makasinati kita og pagsalikway? Unsa nga tambag ang atong mahatag sa usa ka tawo kinsa misulay sa pagpaambit sa ebanghelyo apan gisalikway? Ang tambag ni Elder Jeffrey R. Holland diha sa “Dugang nga mga Kapanguhaan” mahimong makatabang niini nga panaghisgutan.

• Ang istorya ni Alma ug ni Amulek nagpakita kon unsa ka importante ang mga paningkamot sa mga miyembro ngadto sa misyonaryo nga buhat. Unsa ang nakat-unan sa mga sakop sa klase gikan sa Alma 8:19–30 mahitungod sa relasyon tali sa lokal nga mga miyembro ug sa full-time nga mga misyonaryo? (tan-awa usab sa Alma 10:1–12).

  duha ka pamilya nga naghimamat

  Ang pagpaambit sa ebanghelyo ngadto niadtong atong gihigugma mahimong usa ka malipayong kasinatian.

Alma 9:18–30

Ang Dios mohukom sa Iyang mga anak sumala sa kahayag ug kasayuran nga sila nakaangkon.

• Adunay seryuso nga pasidaan niining mga bersikulo ngadto sa tanang miyembro sa Simbahan—sa higayon nga makadawat kita sa kahayag ug kahibalo, kita gilauman nga mohatag niini og bili, moamuma niini, mosunod niini, ug mogamit niini aron sa pagpanalangin sa uban. Aron matabangan ang mga sakop sa klase sa pagsusi niining gilauman, mahimo nimo silang hangyuon sa pagbasa sa mga pagtulun-an ni Alma diha sa Alma 9:18–30 ug mopaambit sa mga mensahe nga ilang makit-an mahitungod sa ilang responsibilidad tungod sa unsay ilang nahibaloan. Ngano kaha nga duna may mas dako nga panghimaraut kon makasala kita batok sa mas dako nga kahayag? Hatagi og panahon ang mga sakop sa klase sa pagpamalandong kon unsay ilang mahimo aron mas magmatinuoron sa kahayag ug kahibalo nga ilang nadawat. Mahimo nimong isugyot nga basahon nila ang Doktrina ug mga Pakigsaad 50:24 samtang namalandong sila.

Alma 11–12

Ang plano sa Dios usa ka plano sa katubsanan.

• Mahimo nimong sugdan ang usa ka panaghisgutan bahin niining doktrina pinaagi sa pagdapit og usa ka sakop sa klase sa pagdrowing og diagram sa plano sa katubsanan diha sa pisara. Dayon mahimo nimong bahinon ang mga seksyon sa Alma 11–12 ngadto sa mga sakop sa klase ug dapita sila sa pagpangita sa mga kamatuoran nga ilang idugang ngadto sa diagram. Pananglitan, gitubos kita sa plano sa Dios gikan sa unsa man? (tan-awa sa Alma 11:38–45). Sa unsang paagi nga ang pagkahibalo niining mga kamatuoran mahitungod sa plano sa katubsanan makapanalangin sa atong kinabuhi?

• Aron matabangan ang mga sakop sa klase nga mopaambit kon unsay gitudlo sa Alma 11–12 ngadto kanila mahitungod sa plano sa katubsanan, mahimo nimong isulat ang mosunod nga mga ulohan diha sa pisara: Ang Pagkapukan, Ang Manunubos, Paghinulsol, Kamatayon, Pagkabanhaw, ug Paghukom. Ang mga sakop sa klase mahimong mopili og usa niining mga hilisgutan ug mosiksik sa Alma 11–12 alang sa mga kamatuoran nga ilang nahibaloan mahitungod niini. Dapita ang mga sakop sa klase sa pagsulat sa mga kamatuoran nga ilang makita, kauban sa usa ka pakisayran sa kasulatan, ubos sa tukma nga ulohan diha sa pisara. Isip usa ka klase, hisguti kon sa unsang paagi nga ang pagkasayud niining mga kamatuoran makaimpluwensya sa atong kinabuhi ug sa mga desisyon nga atong himoon.

• Ang mga sakop sa imong klase mahimong makabenepisyo gikan sa panaghisgutan nga nakasentro sa Alma 12:31–32, diin si Alma nagtudlo nga human sa Pagkapukan, gihatagan sa Dios sila si Adan ug Eva og mga sugo—apan human lamang sa pagtudlo kanila sa Iyang plano. Sa unsang paagi nga ang pagkasayud mahitungod sa plano makaapekto sa paagi sa atong pagtan-aw o pagbati mahitungod sa mga sugo? Siguro mahimo nimong hisgutan ang pipila ka piho nga mga sugo; pananglitan, sa unsang paagi nga ang pagkasayud mahitungod sa plano sa Dios makatabang kanato sa pagbalaan sa adlaw nga Igpapahulay o sa pagtuman sa balaod sa kaputli?

• Ang ubang mga sakop sa klase mahimong dunay mga pangutana mahitungod sa Alma 11:26–39, diin si Amulek miingon nga dunay usa lamang ka Dios. Ang mosunod nga mga kasulatan moklaro kon sa unsang paagi nga ang mga sakop sa Dios nga Kapangulohan “usa ka Dios” samtang managlahi gihapon nga mga binuhat: Juan 17:20–23; 2 Nephi 31:21; ug 3 Nephi 19:29. Kining pamahayag gikan ni Elder Jeffrey R. Holland mahimong makatabang usab: “Kita nagtuo nga Sila usa sa mahinungdanon ug mahangturong kinaiya nga mahunahuna gawas nga kita wala magtuo Kanila nga tulo ka mga tawo nga giusa ra diha sa usa ka lawas” (“Sa Bugtong Tinuod nga Dios ug kang Jesukristo Nga Iyang Pinadala,” Liahona, Nob. 2007, 40).

Alma 12:9–14

Kon dili kita mopatig-a sa atong kasingkasing, makadawat kita og dugang nga pulong sa Dios.

• Usa sa mga mensahe nga gitudlo ni Alma ug ni Amulek sa pipila ka higayon mao ang sa unsang paagi nga ang kahimtang sa atong kasingkasing makaimpluwensya kon unsa kadaghang kamatuoran ang atong madawat gikan sa Ginoo. Aron matabangan ang mga sakop sa klase nga madiskubrihan ang kamatuoran bahin niining baruganan, mahimo nimo silang hangyuon sa pagbasa sa Alma 12:9–14 nga magpares o diha sa ginagmay nga mga grupo ug hisgutan ang mga resulta sa pagbaton og tig-a nga kasingkasing. (Mahimo usab nimo silang hangyuon sa pagbasa sa Alma 8:9–11; 9:5, 30–31; ug 10:6, 25.) Unsa ang buot ipasabut nga makaangkon og humok nga kasingkasing? (tan-awa sa Jeremias 24:7; Alma 16:16; Helaman 3:35). Sa unsang paagi nga ang humok nga kasingkasing makatabang kanato nga mas masabtan ang pulong sa Dios?

• Nagtudlo si Alma nga kon mopatig-a kita sa atong kasingkasing, makadawat kita “sa gamay nga bahin” sa pulong sa Dios (Alma 12:10). Tingali ang mga sakop sa klase mahimong mopaambit og mga kasinatian gikan sa mga kasulatan nga naghulagway niining baruganan. Sa unsang paagi ang Ginoo mopahumok sa atong kasingkasing aron magpadayon kita nga makakat-on og dugang gikan Kaniya? Unsa nga personal nga mga kasinatian ang atong mapaambit?

• Aron matabangan ang mga sakop sa klase nga masabtan kon unsay gipasabut sa magbaton og humok nga kasingkasing, mahimo nimong ipaambit ang pipila sa mga ehemplo nga nalista diha sa “Dugang nga mga Kapanguhaan.”

pagkat-on nga icon

Awhaga ang Pagkat-on diha sa Panimalay

Aron madasig ang mga sakop sa klase nga mobasa sa Alma 13–16 karong semanaha, mahimo nimo silang sultihan nga ilang mahibaloan kon sa unsang paagi nga ang mga pulong ni Alma natuman diha sa kinabuhi ni Zeezrom ug sa mga tawo sa Ammonihah.

mga kapanguhaan nga icon

Dugang nga mga Kapanguhaan

Maisugong manalipod sa kamatuoran.

Si Elder Jeffrey R. Holland mihatag sa mosunod nga pag-awhag niadtong gipasipad-an tungod sa pagpaambit o pagpanalipod sa ebanghelyo:

“Kon wala pa kamo tawaga, moabut ang adlaw nga kamo pagatawgon sa pagpanalipod sa inyong tinuohan o tingali bisan sa paglahutay sa pipila ka personal nga mga pang-abuso tungod kay kamo mga miyembro sa Ang Simbahan ni Jesukristo sa mga Santos sa Ulahing mga Adlaw. Ang maong mga higayon magkinahanglan og kaisug ug maayong pamatasan sa inyong bahin.

“… Tingali maghunahuna mo kon may bili ba ang maisugong pagpanalipod sa pagka-moral atol sa inyong pag-high school o magmisyon diin ang inyong gitamud pag-ayo nga mga gituohan biay-biayon o makigbatok gayud sa katilingban nga usahay motamay sa pagpakabuhi nga dunay relihiyusong debosyon. Oo, may bili kini. …

“Mga higala, ilabi na sa akong batan-ong mga higala, pagmaisugon. Ang putli nga Kristohanong gugma nga nagagikan sa tinuod nga pagkamatarung makausab sa kalibutan. …

“Pagmalig-on. Pagpuyo nga matinud-anon sa ebanghelyo bisan og ang uban sa inyong palibut dili matinud-anon. Panalipdi ang inyong mga gituohan uban sa maayong pamatasan ug kamanggiloy-on, apan panalipdi kini” (“Ang Bili—ug mga Panalangin—sa Pagkadisipulo,” Liahona, Mayo 2014, 7–9).

Napahumok ang ilang kasingkasing.

Ang mosunod nga mga pakigpulong sa kinatibuk-ang komperensya naghatag og mga ehemplo sa mga tawo kansang kasingkasing napahumok pinaagi sa Ginoo:

• Ang sugilanon sa pamilyang Hatfield diha sa mensahe ni Presidente Russell M. Nelson nga “Ang Bugti sa Gahum sa Priesthood,” Liahona, Mayo 2016, 66–67).

• Ang sugilanon ni Harold Gallacher diha sa mensahe ni Presidente Thomas S. Monson nga “Ang Sagradong Tawag sa Pagserbisyo” (Liahona, Mayo 2005, 54).

• Ang sugilanon ni David diha sa mensahe ni Presidente Dieter F. Uchtdorf nga “Magkat-on gikan ni Alma ug Amulek” (Liahona, Nob. 2016, 73–74).

Pagpalambo sa Atong Pagtudlo

Tan-aw pinaagi sa panan-aw sa Dios. Paningkamot sa pagtan-aw sa mga sakop sa imong klase sama sa pagtan-aw sa Dios kanila, ug ang Espiritu mopakita kanimo sa ilang balaanong bili ug potensyal. Sa pagbuhat nimo niini, giyahan ka diha sa imong mga paningkamot sa pagtabang kanila (tan-awa sa Pagtudlo sumala sa Pamaagi sa Manluluwas, 6).