Si Alma ug Amulek nga naglakaw pagawas sa bilanggoan

Paghulagway nila ni Alma ug Amulek nga gipalingkawas gikan sa bilanggoan, ni Andrew Bosley

Hunyo 15–21

Alma 13–16

“Sulod ngadto sa Kapahulayan sa Ginoo”

Ang malungtarong pagkakabig nagkinahanglan og labaw pa kay sa makapadasig nga leksyon sa Sunday School kausa sa usa ka semana. Awhaga ang mga sakop sa klase sa pagtinguha og personal nga espirituhanong kasinatian sa tibuok semana.

Irekord ang Imong mga Impresyon

pagpaambit nga icon

Dapita ang Pagpaambit

Unsa kaha ang makapaaghat sa mga sakop sa klase nga mopaambit sa usag usa sa ilang mga kasinatian sa pagkat-on ug pagsunod sa ebanghelyo? Siguro mahimo nimo silang dapiton sa pagpaambit og usa ka ideya nga ilang nakit-an diha sa Alma 13–16 nga nakapasurprisa kanila o nga wala pa nila mahunahunai sa una. Samtang nagpaambit sila, hangyoa sila kon unsa ang ilang gibati bahin niining bag-ong ideya sa paghimo og kalainan diha sa ilang kinabuhi.

pagtudlo nga icon

Itudlo ang Doktrina

Alma 13:1–19

Ang mga ordinansa sa priesthood makatabang sa mga anak sa Dios nga makadawat og katubsanan pinaagi ni Jesukristo.

• Ang ubang mga sakop sa imong klase mahimong nakakita og butang nga nakapalambo sa ilang pagdayeg alang sa priesthood samtang nagtuon sila sa Alma 13. Dapita sila sa pagpaambit kon unsa ang ilang nakit-an. Mahimo usab nga magdungan kamo sa pagbasa sa mga bersikulo 2 ug 16 ug mangutana og sama sa “Sa unsang paagi nga ang priesthood ug ang mga ordinansa niini makatabang kaninyo nga ‘magpaabut ngadto sa Anak [sa Dios] alang sa katubsanan’?” Kon makatabang kini, usa ka lista sa mga ordinansa mahimong makita diha sa Matinud-anon sa Tinuhoan, 116–17.

  mga batan-ong lalaki diha sa lamesa sa sakrament

  Ang mga ordinansa sa priesthood makatabang kanato nga magpaabut ngadto kang Jesukristo alang sa katubsanan.

• Daghang tawo sa Ammonihah ang mga sumusunod ni Nehor, kinsa nagtudlo og sayop nga mga ideya mahitungod sa tahas sa mga pari. Aron matabangan ang mga sakop sa klase nga makakat-on mahitungod sa tinuod nga kinaiyahan sa priesthood, mahimo nimo silang hangyuon nga itandi ang panglantaw ni Nehor kon unsay angayang buhaton sa mga pari (tan-awa sa Alma 1:3–6) ngadto sa unsay gitudlo ni Alma (tan-awa sa Alma 13:1–12). Sa unsang mga paagi nga ang mga pagtulun-an ni Nehor susama sa mga panglantaw sa kalibutan mahitungod sa gahum ug pagpangulo? Sa unsang paagi nga ang mga pagtulun-an ni Alma nalahi?

• Ang pagbasa sa Alma 13:1–19 mahimong moresulta sa usa ka panaghisgutan mahitungod sa pagkahimong “giandam gikan sa katukuran sa kalibutan” alang sa atong mga responsibilidad diha sa buhat sa Ginoo. Unsay gisugyot sa Alma 13:3 mahitungod sa mga paagi sa atong pagtan-aw o pagdumala niining mga responsibilidad? (tan-awa usab sa D&P 138:56).

Alma 13

Ang Ginoo nagdapit kanato nga mosulod ngadto sa Iyang kapahulayan.

• Nagtudlo si Alma nga ang priesthood makatabang kanato nga “makasulod ngadto sa kapahulayan sa Ginoo” (Alma 13:16). Sa pagsugod og panaghisgutan mahitungod niini nga ideya, mahimo nimong hangyuon ang klase sa pagbasa sa Alma 13:6, 12–13, 16, ug 29 ug ipaambit kon unsay gitudlo niining mga bersikulo mahitungod sa “kapahulayan sa Ginoo.” Mahimo usab nilang matino ang mga kinaiya sa mga tawo nga “makasulod ngadto sa kapahulayan sa Ginoo.” Unsay atong mahimo aron makasinati sa kapahulayan sa Ginoo panahon sa atong mortal nga kinabuhi?

Alma 14

Sa mga panahon sa pagsulay ug trahedya, kinahanglan gayud kitang mosalig sa Ginoo.

• Ang Alma 14 mahimong usa ka oportunidad sa paghisgot kon unsaon nato pagtubag sa matinud-anong paagi kon kita o ang atong mga minahal sa kinabuhi mag-atubang og pagpanggukod o mga pagsulay bisan kon naningkamot kita nga mahimong matarung. Mahimo nimong sugdan pinaagi sa pagdapit sa mga sakop sa klase sa paghunahuna nga sila mga journalist nga nagreport og usa ka panghitabo diha sa Alma 14. Unsa kaha nga mga matang sa pangutana ang ilang ipangutana ni Alma o ni Amulek mahitungod sa panghitabo? Pananglitan, “Nganong gitugutan man kamo sa Ginoo ug ang ubang tawo nga mag-antus?” o “Unsa ang inyong matambag alang niadtong kinsa nakasinati og lisud nga mga pagsulay?” Base sa unsay atong nahibaloan gikan sa Alma 14, unsaon kaha ni Alma o ni Amulek pagtubag kining mga pangutana?

• Kasagaran kanato makasabut sa unsay gibati ni Amulek sa dihang nakasaksi siya sa pag-antus sa matinud-anong mga tawo didto sa Ammonihah: kita “usab gisakitan” (Alma 14:10), ug kita manghinaut nga kita dunay mabuhat kalabut niini. Unsa man ang atong makat-unan gikan sa giingon ni Alma niini nga sitwasyon? (tan-awa sa Alma 14:8–13). Mahimo nimong ipaambit ang pamahayag gikan ni Presidente Spencer W. Kimball diha sa “Dugang nga mga Kapanguhaan.” Tingali ang mga sakop sa klase mahimong mo-summarize sa nag-unang mensahe sa pamahayag ni Presidente Kimball sa ilang kaugalingong mga pulong.

Alma 15:16, 18

Ang pagkadisipulo nagkinahanglan og sakripisyo.

• Ang outline karong semanaha sa Dali, Sunod Kanako—Alang sa mga Indibidwal ug mga Pamilya nagsugyot sa paglista sa unsay gibiyaan ni Amulek ug unsay iyang nabatunan sa dihang gihangup niya ang ebanghelyo. Siguro andam ang mga sakop sa klase sa pagpaambit sa mga lista nga ilang gihimo, o mahimo nilang himoon kini nga lista diha sa klase. Kining mga kasulatan mahimong makatabang: Alma 10:4–5; 15:16, 18; 16:13–15; ug 34:8. Nganong andam man si Amulek nga mohimo sa maong mga pagsakripisyo? Nganong andam man kita sa pagbuhat niana? Sa unsang paagi nga kita makasunod sa ehemplo ni Alma, kinsa “naglig-on [kang Amulek] diha sa Ginoo”?

Alma 16:1–10

Ang mga pulong sa mga propeta matuman.

• Ang Alma 16 naghatag og mga ehemplo bahin sa usa ka tawo nga misalig sa usa ka propeta ug sa mga tawo kinsa wala mosalig. Aron matabangan ang mga sakop sa klase nga makakat-on niining mga ehemplo, mahimo nimong isulat diha sa pisara ang duha ka ulohan: Zoram ug Katawhan sa Ammonihah. Ang mga sakop sa klase mahimong mobasa sa Alma 16:1–10 ug mosulat ubos sa matag ulohan sa mga pulong nga naghulagway sa kinaiya niining katawhan ngadto sa mga pulong ni propeta Alma. Unsay atong gibuhat aron mapakita sa Langitnong Amahan nga kita dunay hugot nga pagtuo diha sa mga pulong sa buhi nga mga propeta?

pagkat-on nga icon

Awhaga ang Pagkat-on diha sa Panimalay

Ikonsiderar ang pagpangutana sa mga sakop sa klase kon nangandoy ba sila sukad nga mahimo silang mas maayo sa pagpaambit sa ebanghelyo. Ang pagbasa sa Alma 17–22 makapadasig kanila pinaagi sa mga ideya nga makatabang kanila sa pagtuman niini nga tumong.

mga kapanguhaan nga icon

Dugang nga mga Kapanguhaan

Ang Dios dili kanunay nga mopugong sa trahedya.

Si Presidente Spencer W. Kimball kausa mikomentaryo bahin sa daghang daw dili masabtan nga mga trahedya nga nahitabo sa kalibutan:

“Ang Ginoo makapugong ba niini nga mga trahedya? Ang tubag, Oo. Ang Ginoo nasayud sa tanang umaabut, uban sa tanang gahum sa pagkontrolar sa atong mga kinabuhi, moluwas kanato sa kasakit, pugngan ang mga aksidente, … bisan [ang pagpanalipod kanato] sa kamatayon, kon iyang gusto. Apan dili siya. …

“Kon ang tanang masakiton nga giapil nato sa pag-ampo nangaayo, kon ang tanan nga mga matarung gipanalipdan ug ang mga dautan gigun-ob, ang kinatibuk-ang programa sa Amahan mahimong walay bili ug ang nag-una nga baruganan sa ebanghelyo, ang kabubut-on, matapos. Wala na unyay tawo nga magkinabuhi sa pagtuo. …

“… Kon atong sirad-an ang mga pultahan alang sa mga kasub-anan ug kagul-anan, mahimo nga atong gisalikway ang atong mga mahinungdanon nga mga higala ug magtatabang. Ang pag-antus makahimong santos sa mga tawo samtang sila magkat-on og pasensya, pagkamainantuson, ug kahanas sa kaugalingon. …

“… Ako mapasalamaton nga bisan pinaagi sa priesthood dili nako mamaayo ang tanang masakiton. Basin mamaayo nako ang mga tawo nga angay na untang mamatay. Basin mahuwasan sa pag-antus ang mga tawo nga angay untang mag-antus. Nahadlok ako nga ako unyang mapakyas ang mga katuyoan sa Dios.

“Kon aduna pa lang ako’y gahum nga walay limitasyon, ug bisan limitado nga panan-aw ug panabut, basin akong giluwas si Abinadi gikan sa nagdilaab nga kalayo sa dihang gisunog siya hangtud namatay, ug sa pagbuhat sa ingon ako unta siyang gidaot sa hangtud. Namatay siya nga usa ka martir ug gidawat ang ganti sa pagkamartir—ang kahimayaan.

“Ako unta nga napanalipdan si Pablo batok sa iyang mga kasakit kon ang akong gahum walay kinutuban. Ako unta siyang giayo ug gitangtangan sa iyang mga ‘tunok sa lawas.’ [2 Mga Taga-Corinto 12:7.] Ug sa pagbuhat sa ingon ako untang naguba ang plano sa Ginoo. …

“Akong gikahadlokan nga kon didto pa ako sa Bilanggoan sa Carthage niadtong Hunyo 27, 1844, basin ako pang gipasimang ang mga bala nga mitaop sa lawas sa Propeta [Joseph Smith] ug sa Patriarch [Hyrum Smith]. Basin ako pa silang giluwas gikan sa mga kasakit ug mga pag-antus, apan mawagtang gikan kanila ang pagkamatay nga martir ug ang ganti. …

“Uban nianang walay kontrol nga gahum, sigurado nakong bation nga protektahan si Kristo gikan sa kasakit sa Getsemani, sa mga pang-insulto, sa korona nga tunok, sa mga pagpakaulaw didto sa korte, sa pisikal nga mga kadaot. Ako untang gitambalan ang iyang mga samad ug gipang-ayo kini, mihatag kaniya og bugnaw nga tubig imbis nga suka. Basin og ako pa siyang giluwas gikan sa pag-antus ug kamatayon, ug mawala sa kalibutan ang iyang maulaong sakripisyo. …

“Sa pag-atubang niining dayag nga trahedya kinahanglan natong ibutang ang atong pagsalig sa Dios, uban sa kasayuran nga bisan pa sa atong limitado nga panglantaw ang Iyang mga katuyoan dili gayud mapakyas” (Mga Pagtulun-an sa mga Presidente sa Simbahan: Spencer W. Kimball [2006], 17–20, 25).

Pagpalambo sa Atong Pagtudlo

Pagdapit og makugihon nga pagkat-on. “Samtang mangandam ka sa pagtudlo, imbis nga maghunahuna og, ‘Unsay akong buhaton sa pagtudlo?’ pangutan-a ang imong kaugalingon, ‘Unsay buhaton sa mga sakop sa akong klase aron makat-on?’” (Pagtudlo sumala sa Pamaagi sa Manluluwas, 29).