Si Jesus nga naggunit og usa ka nating karnero

Wala Kamo Kalimti, ni Jon McNaughton

Hunyo 1–7

Alma 5–7

“Kamo Nakasinati Ba Niining Dako nga Kausaban diha sa Inyong mga Kasingkasing?”

Samtang magbasa ka sa Alma 5–7, hunahunaa ang mga sakop sa imong klase kinsa nagpakita sa mga pagtulun-an niining mga kapitulo. Ikonsiderar ang mga paagi nga makatabang ka sa pagpaapil kanila diha sa inyong panaghisgutan inigka-Dominggo.

Irekord ang Imong mga Impresyon

pagpaambit nga icon

Dapita ang Pagpaambit

Hatagi og pipila ka minuto ang mga sakop sa klase aron mahinumduman ang unsay ilang nabasahan diha sa Alma 5–7 ug mangita og kamatuoran nga gusto nilang ipaambit sa klase. Dayon hangyoa sila sa pagpaambit niini ngadto sa usa ka tawo nga naglingkod sa duol.

pagtudlo nga icon

Itudlo ang Doktrina

Alma 5:14–33

Kinahanglan gayud kitang makasinati—ug padayon nga mobati—og dako nga kausaban sa kasingkasing.

• Ang mga sakop sa klase gidapit nga mamalandong sa mga pangutana diha sa Alma 5:14–33 sa outline karong semanaha sa Dali, Sunod Kanako—Alang sa mga Indibidwal ug mga Pamilya. Mahimo nimong sugdan ang panaghisgutan bahin niining mga bersikulo pinaagi sa paghangyo sa mga sakop sa klase sa pagpaambit kon unsa nga mga pangutana gikan niining mga bersikulo ang makahuluganon ngadto kanila. Mahimo dayon nimong dapiton ang mga sakop sa klase nga magtrabaho diha sa mga grupo sa pagribyu sa Alma 5:14–33 ug sa pagdiskubre kon unsay kahulugan sa makasinati og dako nga kausaban sa kasingkasing pinaagi sa Manluluwas ug sa Iyang Pag-ula. Mahimo usab silang mangita sa mga panalangin nga moabut tungod sa nausab nga kasingkasing. Unsa ang ubang mga ehemplo nga gigamit aron sa paghulagway sa kausaban nga gihulagway ni Alma? (Pananglitan, tan-awa sa Juan 3:1–7; 2 Mga Taga-Corinto 5:17; Dale G. Renlund, “Pagpatunhay sa Dako og Kausaban nga Kasingkasing,,” Liahona, Nob. 2009, 97–99.) Unsaon nato sa pagpabilin og kausaban sa atong kasingkasing sa tibuok natong kinabuhi? (tan-awa sa Alma 5:26).

  batang babaye nga nag-ampo kilid sa higdaanan

  Sa atong pagdangup ngadto sa Dios, makasinati kita og “kausaban sa kasingkasing.”

Alma 5:44–51

Makabaton kita sa atong kaugalingong pagsaksi bahin sa Manluluwas ug sa Iyang ebanghelyo pinaagi sa Espiritu Santo.

• Sama ni Alma, ang mga sakop sa imong klase nakabaton sa ilang kaugalingong mga pagpamatuod bahin sa Manluluwas ug sa Iyang ebanghelyo. Aron matabangan sila nga makakat-on kon unsay gibuhat ni Alma aron makadawat sa iyang pagsaksi pinaagi sa Espiritu, mahimong moapud-apod ka og mga piraso sa papel nga dunay pulong nga Pagpamatuod nga gisulat diha sa ibabaw. Ang mga sakop sa klase mahimong magtrabaho nga magpares sa pagribyu sa Alma 5:44–51 ug sa paggamit sa unsay ilang makat-unan niining mga bersikulo sa pagsulat og usa ka “resipe” alang sa usa ka pagpamatuod. Pananglitan, ang “mga sagul” sa resipe mahimong mao ang mga kamatuoran nga naglangkob sa atong mga pagpamatuod. Ang “mga instruksyon” alang sa resipe mahimong mao ang mga butang nga kinahanglan natong buhaton aron makabaton og pagpamatuod. (Tan-awa ang mensahe gikan ni Elder Dieter F. Uchtdorf diha sa “Dugang nga mga Kapanguhaan” alang sa pipila ka mga ideya.) Unsa nga “mga sagul” ug “mga instruksyon” ang ilang madugang ngadto sa ilang resipe gikan sa kaugalingon nilang mga kasinatian o uban pang mga kasinatian diha sa mga kasulatan? Dapita ang mga parisan sa pagpaambit sa unsay ilang nakat-unan ug unsay ilang gibuhat aron makadapit sa Espiritu Santo nga mopamatuod sa kamatuoran ngadto kanila.

Alma 6

Magpundok kita isip mga Santos aron maminaw sa pulong sa Dios ug mohimo sa Iyang buhat.

• Aron mapahinumduman ang mga sakop sa klase mahitungod sa kaimportante sa pagpundok isip usa ka grupo sa mga Santos, mahimo nimo silang dapiton sa paghunahuna nga ang usa ka tawo nga ilang nailhan mibati nga ang pagpasakop sa usa ka simbahan wala kinahanglana. Unsa ang ilang mapaambit gikan sa Alma 6 sa pagtudlo niining tawhana mahitungod sa mga panalangin nga mahisakop sa usa ka simbahan? Unsaon nato aron mas matuman ang mga katuyoan sa pagpundok nga gihulagway ni Alma?

Alma 7:7–16

Gidala sa Manluluwas diha sa Iyang kaugalingon ang atong mga sala, mga sakit, ug mga kasakit.

• Mahimong dunay mga tawo sa imong klase kinsa dinaliang nanginahanglan nga masayud kon unsay gitudlo sa Alma 7:7–16—nga gidala sa Manluluwas sa Iyang kaugalingon Mismo dili lamang ang atong mga sala apan ang ato usab nga mga sakit, mga kasakit, mga balatian, ug mga kahuyang. Unsaon nimo pagtabang kanila nga makadiskubre niini? Tingali makahimo ka og tsart diha sa pisara nga dunay mga ulohan nga Unsay giantus sa Manluluwas ug Nganong nag-antus Siya. Mahimong kompletuhon sa klase ang tsart human sa pagbasa sa Alma 7:7–16. Mahimong makatabang usab ang pagkonsiderar sa ubang butang nga giantus sa Manluluwas panahon sa Iyang kinabuhi (tan-awa ang mga ehemplo diha sa “Dugang nga mga Kapanguhaan”).

• Human maghisgot kon unsay gitudlo ni Alma diha sa Alma 7:7–16, tingali ang mga sakop sa klase mahimong mopaambit sa mga kasinatian sa dihang gitabangan sila sa Manluluwas, nga nagpasabut nga Siya mitabang gayud kanila (tan-awa sa “Dugang nga mga Kapanguhaan” alang sa mga ehemplo sa mga paagi nga mitabang kanato si Jesus). Mahimo usab nimong ipaambit ang mosunod nga kinutlo gikan ni Presidente Dallin H. Oaks: “Ang atong Manluluwas mipadayag nga Siya ‘mikunsad sa tanan nga mga butang’ (D&P 88:6). … Mahimo pa gani kitang moingon nga tungod kay nakasinati sa tanan nga mga butang, Siya hingpit nga nakapahimutang sa pagtuboy kanato ug paghatag kanato og kalig-on nga atong gikinahanglan aron makalahutay sa atong mga kasakit. Kinahanglan lang nato ang pagpangayo” (“Nalig-on Pinaagi sa Pag-ula ni Jesukristo,” Liahona, Nob. 2015, 64).

• Namahayag si Alma nga ang pag-anhi sa Manunubos “labaw ka mahinungdanon kay” sa bisan unsa pang butang. Tingali ang mga sakop sa klase mahimong maghunahuna nga anaa sila sa usa ka klase sa kasaysayan nga naghisgot sa labing importante nga mga panghitabo sa kasaysayan. Unsa nga mga bersikulo gikan sa Alma 7 ang ilang ipaambit aron pagsuporta sa pangangkon ni Alma diha sa bersikulo 7? Unsa nga tambag ang gihatag ni Alma sa iyang katawhan nga makatabang kanato sa pagpangandam alang sa pag-anhi sa Manluluwas?

pagkat-on nga icon

Awhaga ang Pagkat-on diha sa Panimalay

Aron maawhag ang mga sakop sa klase nga mobasa sa Alma 8–12, mahimo nimong ipaambit kanila nga kining mga bersikulo nagsaysay sa istorya sa duha ka lalaki. Ang usa wala ganahi sa Simbahan ug ang usa kusganong migukod sa Simbahan, apan ang duha parehong nahimong maisugon nga mga tigpanalipod sa pagtuo.

mga kapanguhaan nga icon

Dugang nga mga Kapanguhaan

Pagbaton sa atong kaugalingong mga pagpamatuod.

Si Elder Dieter F. Uchtdorf mihatag sa mosunod nga sumbanan sa kasulatan alang sa “pagdawat og usa ka personal nga pagpamatuod nga nagagikan sa pagsaksi sa Espiritu Santo”:

“Una: Magtinguha nga motuo. Ang Basahon ni Mormon nag-awhag kanato: ‘Kon [kamo] mopukaw ug modasig sa inyong mga galamhan, bisan ngadto sa pagsulay sa akong mga pulong, ug pagbansay sa usa ka tipik sa hugot nga pagtuo, … bisan [kamo] kutob ra sa pagtinguha sa pagtuo’ (Alma 32:27). … Ang Dios misaad kanato og balaanong panabang bisan kon aduna ra kita‘y usa ka tinguha sa pagtuo, pero kinahanglan kini nga usa ka tinuod ug dili usa ka pagpakaaron-ingnon lang nga tinguha.

“Ikaduha: Siksika ang mga kasulatan. Pangutana; tun-i kini; siksika diha sa mga kasulatan ang mga tubag. Usab, ang Basahon ni Mormon adunay maayong tambag alang kanato: ‘Kon [kamo] mohatag og luna, nga ang usa ka binhi mahimo nga matanom diha sa inyong kasingkasing’ pinaagi sa makugihon nga pagtuon sa pulong sa Dios, ang maayo nga binhi ‘mosugod sa pagtubo diha sulod sa inyong mga dughan’ kon dili kamo mobatok uban sa pagkawalay pagtuo. Kining maayo nga binhi ‘mopadako sa [inyong] kalag’ ug ‘modan-ag sa [inyong] salabutan’ (Alma 32:28).

“Ikatulo: Buhata ang kabubut-on sa Dios; sunda ang mga sugo. … Kinahanglan kitang moduol ngadto kang Kristo ug mosunod sa Iyang mga pagtulun-an. Ang Manluluwas nagtudlo: ‘Ang gitudlo ko dili akong kaugalingon, kondili iya sa nagpadala kanako. Kon tuyoon ni bisan kinsa ang pagbuhat sa kabubut-on sa Dios, nan, iyang mahibaloan ang akong gitudlo’ [Juan 7:16–17]. …

“Ikaupat: Pamalandong, pagpuasa, ug pag-ampo. Aron makadawat og kahibalo gikan sa Espiritu Santo, kinahanglan kitang mangayo sa Langitnong Amahan alang niini [tan-awa sa Alma 5:45–46; Moroni 10:3–4]” (“Ang Gahum sa Personal nga Pagpamatuod,” Liahona, Nob. 2006, 38–39).

Unsa ang giantus ni Jesukristo?

• Tintasyon (tan-awa sa Mateo 4:1–10)

• Kagutom ug kauhaw (tan-awa sa Mateo 4:2; Juan 19:28)

• Kamatayon sa usa ka minahal sa kinabuhi (tan-awa sa Mateo 14:10–13)

• Pagsalikway (tan-awa sa Mateo 26:55–56)

• Pagbiay-biay (tan-awa sa Mateo 27:29–31, 39–44)

• Kakabus (tan-awa sa Lucas 9:58)

• Pagbudhi (tan-awa sa Marcos 14:43–46)

• Kasakit nga labaw pa sa unsay maantus ni bisan kinsa (tan-awa sa Lucas 22:39–44; Mosiah 3:7; D&P 19:16–19)

Unsa ang ubang mga kasakit nga nasinati sa Manluluwas?

Giunsa ni Jesukristo sa pagtabang kanato?

• Nagpasaylo sa atong mga sala ug nagtangtang sa kahasol sa tanlag (tan-awa sa Enos 1:5–6)

• Nagpahumok sa kasingkasing sa uban (tan-awa sa Mosiah 21:15)

• Nagpalig-on kanato aron mapas-an ang atong mga alantuson (tan-awa sa Mosiah 24:14–15)

• Nag-ayo sa atong mga kahuyang (tan-awa sa 3 Nephi 17:6–7)

• Naghimo sa huyang nga mga butang nga malig-on ug naghupay kanato (tan-awa sa Ether 12:27–29)

• Nagtabang kanato aron makita ang mga kasakit sa hustong panglantaw (tan-awa sa D&P 121:7–10)

Sa unsang laing mga paagi nga si Jesus nagtabang kanato?

Pagpalambo sa Atong Pagtudlo

Paglambo isip usa ka magtutudlo nga sama kang Kristo. Isip magtutudlo, importante ang pagpamalandong sa mga paagi nga imong matabangan ang mga tigkat-on nga makaugmad og hugot nga pagtuo diha sa Langitnong Amahan ug ni Jesukristo. Ikonsiderar ang paggamit sa personal nga mga pangutana sa pagtimbang-timbang diha sa pahina 37 sa Pagtudlo sumala sa Pamaagi sa Manluluwas aron sa pagdasig kanimo.