“Mayo 25–31. Mosiah 29–Alma 4: ‘Sila Makanunayon ug Dili Matarug,’” Dali, Sunod Kanako—Alang sa Sunday School: Basahon ni Mormon 2020 (2020)
“Mayo 25–31. Mosiah 29–Alma 4,” Dali, Sunod Kanako—Alang sa Sunday School: 2020
Si Alma nga Batan-on nga Nagsangyaw, ni Gary L. Kapp
Mayo 25–31
Mosiah 29–Alma 4
“Sila Makanunayon ug Dili Matarug”
Sa panahon ni Alma, ang usa ka magtutudlo sa ebanghelyo wala gikonsiderar nga “maayo pa kay sa tinudloan; ug sa ingon niana silang tanan managsama” (Alma 1:26). Samtang mangandam ka sa pagtudlo, pamalandunga kon sa unsang paagi nga kining baruganan magamit nganha nimo ug sa imong klase.
Irekord ang Imong mga Impresyon
Dapita ang Pagpaambit
Ang mga sakop sa klase mahimong nakabantay og mga pagkasusama tali sa mga panghitabo nga gihulagway diha sa Mosiah 29–Alma 4 ug sa mga butang nga nanghitabo sa kalibutan karon o sa ilang kaugalingong kinabuhi. Hatagi sila og pipila ka minuto sa pagribyu sa mga kapitulo aron makakita og usa ka ehemplo. Dapita sila sa pagpaambit kon unsa ang ilang nakit-an ngadto sa tawo nga naglingkod sa duol.
Itudlo ang Doktrina
Kita mahimong positibo nga impluwensya diha sa atong mga komunidad.
-
Kon ang mga sakop sa klase makabenepisyo sa paghisgot kon unsaon sa pag-impluwensya ang katilingban alang sa kaayohan, mahimo nimo silang dapiton sa paghunahuna og pipila ka isyu nga gisagubang sa inyong komunidad ug ilista ang pipila diha sa pisara (likayi ang detalyado nga mga panaghisgutan bahin niining mga isyu). Ang mga sakop sa klase mahimong moribyu sa Alma 2:1–7 aron makita kon unsa nga isyu ang gisagubang sa mga Nephite ug unsay ilang gibuhat mahitungod niini. Unsa kaha unta ang nahitabo kon “ang mga katawhan sa simbahan” wala pa mopadungog sa ilang mga tingog? Unsa pa man ang atong makat-unan bahin sa pagkahimong maayo nga mga lumulupyo gikan niining istorya, gikan sa Mosiah 29:26–27, ug gikan sa istorya diha sa “Dugang nga mga Kapanguhaan”? Ang mga sakop sa klase mahimong maghunahuna og butang nga ilang mabuhat aron makaimpluwensya sa ilang komunidad alang sa kaayohan kalabut sa usa sa mga isyu diha sa pisara.
Kita makaila ug makasalikway sa sayop nga mga pagtulun-an.
-
Ang ehemplo ni Gideon nga mibatok kang Nehor mahimong makapadasig sa imong klase. Siguro mahimo nimong hangyuon daan ang usa ka tawo sa pagribyu sa kasaysayan ni Gideon ug ipaambit kini ngadto sa klase (tan-awa sa Mosiah 19:1–8; 20:15–22; 22:1–9; ug Alma 1:2–9). Base niini nga pagribyu, ang mga sakop sa klase mahimong molista sa pipila sa makapadasig nga kinaiya ni Gideon. Pananglitan, sa dihang nakadungog si Gideon sa sayop nga mga pagtulun-an ni Nehor, gisanta ni Gideon si Nehor “uban sa mga pulong sa Dios” (bersikulo 9). Sa ilang personal nga pagtuon, ang mga sakop sa klase mahimong nakakita og mga kasulatan nga misupak sa mga pagtulun-an ni Nehor nga makita diha sa Alma 1:3–6. Dapita sila sa pagpaambit sa mga kasulatan nga ilang nakit-an. Ang ubang mga kasulatan gisugyot usab diha sa “Dugang nga mga Kapanguhaan.” Unsaon nato aron mas mahisama kang Gideon diha sa atong pagpanalipod sa kamatuoran?
-
Ang sayop nga mga pagtulun-an ni Nehor, nga gihulagway diha sa Alma 1:3–6, makatabang kanato nga mailhan ang mga taktika nga gigamit ni Satanas aron sa paglingla kanato. Sama pananglit, kanunay niyang itago ang iyang mga bakak sa sulod sa kamatuoran. Ikonsiderar ang pagdapit sa mga sakop sa klase sa pagsiksik sa Alma 1:3–4 ug hibaloi ang mga bakak nga gisulti ni Satanas ug ang mga kamatuoran nga iyang gigamit aron makapadani niini. Unsa ang pipila ka bakak nga gisagulan og kamatuoran nga nakapalingla sa mga tawo karon? Unsaon nato pagtabang ang atong mga pamilya ug mga minahal sa kinabuhi nga makaila tali sa kamatuoran ug sa sayop?
-
Ang mga sakop sa klase mahimong mokanta o mobasa og usa ka himno mahitungod sa pagkamapainubsanon, ug hisguti kon sa unsang paagi nga ang mga mensahe niini lahi kay sa mensahe ni Nehor diha sa Alma 1:2–9. Mahimo usab sila nga motandi sa unsay gitudlo ni Nehor mahitungod sa mga magtutudlo sa ebanghelyo ngadto sa unsay gitudlo ug unsay gipakitang ehemplo ni Alma ug sa ubang mga lider sa Simbahan (tan-awa sa Alma 1:26; 4:15–20). Unsa man ang nakaaghat ni Nehor? Sa unsang paagi nga kini lahi kay sa kang Alma? Awhaga ang mga sakop sa klase sa pagpamalandong kon unsay nakaaghat sa ilang kaugalingon nga moserbisyo diha sa Simbahan. Unsay gisugyot sa Alma 1:26 mahitungod sa atong responsibilidad isip mga tigkat-on?
Ang garbo mao ang hinungdan sa “pagkapakyas sa [atong] pag-uswag.”
-
Ang paghisgot sa Alma 1 ug Alma 4 makatabang sa mga sakop sa klase nga makasabut kon sa unsang paagi nga ang garbo makaapekto sa mga indibidwal ug sa Simbahan. Mahimo nimong bahinon ang klase ngadto sa duha ka grupo ug hangyoa ang usa ka grupo nga magkat-on mahitungod sa kahimtang sa Simbahan sigun sa gihulagway diha sa Alma 1:19–30, samtang ang laing grupo magkat-on mahitungod sa kahimtang sa Simbahan pipila ka tuig human niana, nga gihulagway diha sa Alma 4:6–15. Hangyoa ang matag grupo sa pagpaambit kon unsay kahimtang sa Simbahan ug sa mga miyembro niini sumala sa mga bersikulo nga ilang mabasa. Mahimong dungan silang magplano sa mamugnaong paagi sa pagbuhat niini—pananglitan, mahimo silang magdrowing og hulagway o mag-andam og mubo nga dramatisasyon. Human makapaambit ang mga grupo sa usag usa, hangyoa sila sa paghisgot kon unsay ilang nakat-unan mahitungod sa mga epekto sa garbo diha sa Simbahan ug sa mga miyembro niini ug sa mga panalangin sa pagkamapainubsanon. Unsa nga mga leksyon ang girepresentar niining mga istorya alang kanato karon?
Ang “pulong sa Dios” ug “lunsay nga pagpamatuod” makapausab og kasingkasing.
-
Daghang tawo ang makasabut sa unsay gibati ni Alma sa iyang “hilabihan nga pagkaguol” (Alma 4:15) mahitungod sa pagkadautan ug mga kasakit sa iyang katawhan. Siguro ang mga sakop sa klase mahimong maghunahuna mahitungod sa usa ka minahal sa kinabuhi nga ilang gikabalak-an ug hinumduman kana nga tawo samtang magbasa sila sa Alma 4:12–20. Human makabasa ang mga sakop sa klase, mahimo kang mangutana og sama niini aron makaaghat og panaghisgutan bahin sa mga bersikulo: Unsay nagdala og hingpit nga kalipay ngadto sa katawhan diha sa ilang lisud nga mga kahimtang? Unsa ang kahulugan sa mga pulong nga “ang Espiritu sa Ginoo wala mopakyas kaniya” nganha kaninyo? (Alma 4:15). Unsa nga mga sakripisyo ang gihimo ni Alma aron matabangan ang iyang katawhan, ug unsa nga mga sakripisyo ang gipangayo nga usahay atong himoon? Unsa nga mga ehemplo ang atong nakita bahin sa gahum sa “lunsay nga pagpamatuod”? (Alma 4:19). Unsaon nato pagpaambit ang atong mga pagpamatuod nga dili morag maglektyur o mahimong mahukmanon? Mahimo nimong hatagan ang mga sakop sa klase og panahon sa pagsulat og mensahe sa pagpamatuod ngadto sa ilang mga minahal sa kinabuhi.
-
Tingali makabenepisyo ang mga sakop sa klase sa paghisgot kon unsa ang “lunsay nga pagpamatuod”. Sa unsang paagi nga kining mga pagpamatuod, o ang uban nga atong nadungog, “[n]agkutaw [kanato] nga mahinumdom sa [atong] katungdanan”? (Alma 4:19). Sa unsang paagi nga kining mga pagpamatuod makatabang kanato sa pagbuntog sa garbo ug panagbingkil?
Awhaga ang Pagkat-on diha sa Panimalay
Mahimo nimong ipasabut ngadto sa mga sakop sa klase nga diha sa Alma 5–7 makabasa sila sa “lunsay nga pagpamatuod” ni Alma ug makakita sa mga epekto niini diha sa katawhan (tan-awa sa Alma 4:19).
Dugang nga mga Kapanguhaan
“Ipabatyag ang inyong impluwensya.”
Sa wala madugay human nga si Sister Belle S. Spafford gitawag isip Kinatibuk-ang Presidente sa Relief Society niadtong 1945, ang mga lider sa Relief Society gidapit nga motambong og miting sa usa ka prominente nga nasudnong council sa kababayen-an. Ang kinatibuk-ang mga lider sa Relief Society nahimo nang mga sakop niini nga council sulod sa daghang katuigan, apan ilang gibati nga dili kaayo maayo ang pagtagad kanila sa council. Human maghisgot uban sa iyang mga magtatambag, “si Sister Spafford mirekomendar ngadto kang Presidente George Albert Smith, ang Presidente sa Simbahan, nga ang Relief Society kinahanglang moputol sa ilang pagkasakop niana nga council.
Samtang naghisgot sila sa rekomendasyon, miingon si Sister Spafford, “Kahibalo ka, Presidente Smith, wala kami makuha gikan niini nga Council.”
Sa wala madugay miingon siya:
“Ang Presidente mitan-aw kanako nga nahingangha. Miingon siya, ‘Sister Spafford, naghunahuna ka lang ba kanunay sa unsay imong makuha? Wala ba diay nimo hunahunaa nga maayo usahay ang paghunahuna sa unsay imong mahatag? Ako nagtuo,’ siya mipadayon, ‘nga ang Mormon nga kababayen-an adunay mahatag ngadto sa kababayen-an sa kalibutan, ug nga sila usab makakat-on gikan kanila. Kay sa ipahunong ninyo ang inyong pagpasakop, ako mosugyot kanimo nga imong dad-on ang pipila sa imong labing maayo nga mga board member ug adto og balik niini nga miting.’
“Dayon misulti siya nga naghatag og gibug-aton, ‘Ipabatyag ang inyong impluwensya’” (Belle S. Spafford, A Woman’s Reach [1974], 96–97).
Mituman si Sister Spafford niini nga tambag. Miserbisyo siya sulod sa daghang katuigan diha sa council ug sa katapusan napili isip usa sa mga lider niini.
Mga kasulatan nga misupak sa sayop nga mga pagtulun-an ni Nehor.
Pagpalambo sa Atong Pagtudlo
Siguroa nga nagtudlo ka sa tinuod nga doktrina. “Pangutan-a ang imong kaugalingon kanunay, ‘Sa unsang paagi ang akong gitudlo makatabang sa mga sakop sa akong klase nga makapalambo og hugot nga pagtuo diha kang Kristo, maghinulsol, maghimo ug motuman og mga pakigsaad uban sa Dios, ug modawat sa Espiritu Santo?’” (Pagtudlo sumala sa Pamaagi sa Manluluwas, 20).