anghel nga mipakita kang Alma ug sa mga anak ni Mosiah

Pagkakabig ni Alma nga Batan-on, ni Gary L. Kapp

Mayo 18–24

Mosiah 25–28

“Sila Gitawag og ang mga Katawhan sa Dios”

Ang labing maayo nga paagi sa pag-andam sa pagtudlo mahitungod sa Mosiah 25–28 mao ang pagbasa niining mga kapitulo ug pagsunod sa mga baruganan nga gitudlo niini. Sa pagbuhat nimo sa ingon, ang Espiritu mahimong modasig kanimo sa pagtudlo kon unsa ang labing importante alang sa mga sakop sa imong klase.

Irekord ang Imong mga Impresyon

pagpaambit nga icon

Dapita ang Pagpaambit

Ang ubang mga sakop sa klase mahimong nanglimbasug nga makabaton og kanunay nga personal ug pamilya nga pagtuon sa kasulatan. Ang mga kasinatian ba sa ubang mga sakop sa klase makatabang? Tingali mahimo nimong sugdan ang imong klase pinaagi sa pagdapit sa mga sakop sa klase sa pagpaambit og butang nga ilang gibuhat sa ilang personal o pamilya nga pagtuon sa kasulatan nga malampusong napahigayon.

pagtudlo nga icon

Itudlo ang Doktrina

Mosiah 26:15–31; 27:23–37

Ang Dios mopasaylo niadtong kinsa maghinulsol.

• Ang paghinulsol ug pagpasaylo mga tema nga nagbalik-balik niining mga kapitulo. Mahimo nimong tun-an kining mga tema pinaagi sa pagsulat og Paghinulsol ug Pagpasaylo diha sa pisara ug paghangyo sa mga sakop sa klase sa paglista ubos niadtong mga ulohan kon unsay mahinumduman kon maghunahuna sila niining mga pulong. Dayon mahimo silang mosiksik sa Mosiah 26:22–24, 29–31; ug 27:23–37 alang sa mga pulong nga nagtudlo kanila mahitungod sa paghinulsol ug pagpsaylo. Ang mga sakop sa klase mahimong modugang niining mga pulong ngadto sa lista sa pisara. Unsa ang bation sa Dios mahitungod niadtong kinsa maghinulsol ug magtinguha og kapasayloan?

• Ang ubang mga tawo mahimong maghunahuna kon ang ilang paghinulsol igo na ba aron ang Dios mopasaylo kanila. Aron matabangan si bisan kinsa diha sa imong klase nga mibati siguro niana, mahimo nimong dapiton ang mga sakop sa klase sa paghunahuna nga sila mao si Alma nga Tigulang ug nga usa ka miyembro sa Simbahan didto sa Zarahemla nangutana kanila kon unsaon pagbaton og kapasayloan sa iyang mga sala (siguro mahimo nimong ipa-role-play kini nga sitwasyon). Unsay nakat-unan ni Alma gikan sa Ginoo diha sa Mosiah 26:15–31 nga mahimong makatabang niining miyembro sa Simbahan? (tan-awa usab sa Moroni 6:8; D&P 58:42–43). Kining pamahayag gikan ni Presidente Henry B. Eyring mahimong makatabang usab: “Kon inyong gibati ang impluwensya sa Espiritu Santo karon, mahimo ninyong gamiton kini nga ebidensya nga ang Pag-ula naglihok sa inyong kinabuhi” (“Gifts of the Spirit for Hard Times,” Ensign, Hunyo 2007, 23).

Mosiah 27:8–24

Ang Dios nakadungog sa atong mga pag-ampo ug motubag niini sumala sa Iyang kabubut-on.

• Daghan kanato ang makasabut sa mga pagbati ni Alma nga Tigulang, kansang anak “misukol batok sa Dios” (Mosiah 27:11). Tingali ang mga sakop sa klase mahimong maghisgot kon unsaon kaha nila paggamit ang istorya diha sa Mosiah 27:8–24 aron sa paghatag og paglaum ngadto sa usa ka tawo kinsa adunay nahisalaag nga sakop sa pamilya. Kay nakasabut nga dili kita maka-demand og usa ka milagro o makakuha sa kabubut-on sa usa ka tawo, unsa man ang tukma natong i-ampo kon dunay usa ka minahal sa kinabuhi nga mahisalaag? (tan-awa usab sa Alma 6:6).

Mosiah 27:8–28:4

Ang tanang lalaki ug babaye kinahanglan gayud nga matawo pag-usab.

• Ania ang pipila ka pangutana nga makatabang sa mga sakop sa klase nga makakat-on mahitungod sa pagpakatawo pag-usab: Unsay gipasabut sa matawo pag-usab sa espirituhanong paagi? (tan-awa sa Giya ngadto sa mga Kasulatan, “Kinabig, Pagkakabig”). Unsaon nato sa pagpaningkamot sa pagbuhat ngadto sa uban kon natawo kita pag-usab sa espirituhanong paagi? Aron matabangan ang mga sakop sa klase nga matubag kining mga pangutana, mahimo nimo silang dapiton sa pagsiksik sa Mosiah 27:22–28:4 alang sa mga timailhan nga si Alma ug ang mga anak ni Mosiah natawo pag-usab sa espirituhanong paagi.

• Ang tanan adunay istorya sa pagkakabig, kay sama sa giingon ni Alma, “ang tanan nga katawhan … kinahanglan matawo pag-usab” (Mosiah 27:25; italics gidugang). Siguro ang pipila ka sakop sa klase mahimong mopaambit kon sa unsang paagi sila nakabig ngadto sa ebanghelyo ni Jesukristo—pinaagi man sa gamhanang espiritwal nga mga panghitabo sa ilang kinabuhi o pinaagi sa hinay-hinay, usahay dili mabantayan nga proseso nga mahimong mahibaloan lamang human kini mahitabo. Mahimo usab nimong hatagan ang mga sakop sa klase og panahon diha sa klase nga marekord ang ilang mga kasinatian. (Kon walay panahon sa pagbuhat niini diha sa klase, mahimo nimong isugyot nga ila kining buhaton sa panimalay.) Aron mahatagan og gibug-aton nga ang atong pagkakabig kinahanglang magpadayon, mahimo nimong isugyot nga ang mga sakop sa klase moribyu matag karon ug unya sa unsay ilang gisulat ug modugang og bag-ong mga kasinatian.

• Si Alma ug ang uban sa tibuok nga kasulatan migamit sa sambingay sa pagpakatawo pag-usab aron sa paghulagway sa kausaban nga gidala sa ebanghelyo ni Jesukristo sa atong kinabuhi. Si Elder David A. Bednar mitandi niining kausaban ngadto sa usa ka pipino nga nahimong atsara (tan-awa sa “Dugang nga mga Kapanguhaan”). Aron matabangan ang mga sakop sa klase nga makapamalandong kon unsay gitudlo niining mga pagtandi mahitungod sa pagkakabig, mahimong magdala ka og pipino ug usa ka atsara ngadto sa klase. O mahimo nimong dapiton ang usa ka tawo nga magdala og gamayng bata ug hisguti kon nganong ang pagkatawo usa ka maayong analohiya sa unsay nahitabo ngadto kang Alma ug sa mga anak ni Mosiah. (Tan-awa sa Mosiah 27:23–28:7.)

Si Alma nga Batan-on nga gidala ngadto sa balay sa iyang amahan

Ang Iyang Amahan Nagmaya, ni Walter Rane

pagkat-on nga icon

Awhaga ang Pagkat-on diha sa Panimalay

Aron madasig ang mga sakop sa klase nga mobasa sa Mosiah 29–Alma 4 sunod semana, mahimo nimong hisgutan ngadto kanila nga niining mga kapitulo, ang katawhan ni Nephi gihatagan og tingog diha sa ilang panggobyerno. Unsay atong makat-unan gikan sa ilang mga kasinatian samtang mosulay kita sa pag-impluwensya sa atong mga komunidad alang sa kaayohan?

mga kapanguhaan nga icon

Dugang nga mga Kapanguhaan

Usa ka tibuok kinabuhi nga proseso.

Si Elder D. Todd Christofferson nagtudlo: “Ang pagkatawo pag-usab, dili sama sa atong pisikal nga pagkatawo, mas labaw pa sa usa ka proseso kay sa usa ka hitabo. Ug ang pag-apil niana nga proseso mao ang labing importante nga katuyoan sa pagkamortal” (“Natawo Pag-usab,” Liahona, Mayo 2008, 78).

Pagkakabig ug atsara.

Si Elder David A. Bednar mipaambit sa mosunod nga analohiya sa pagtandi sa espirituhanong pagpakatawo pag-usab ngadto sa pag-atsara og mga pipino:

“Ang atsara mao ang pipino nga nausab sumala sa mga resipe ug sunod-sunod nga mga pamaagi. Ang unang paagi sa proseso sa pag-usab sa pipino ngadto sa atsara mao ang pag-andam ug paglimpyo. …

“Ang sunod nga mga lakang niini nga proseso sa kausaban mao ang paghumol ug pagpatuhop sa mga pipino diha sa tubig nga dunay asin sulod sa dugay-dugay nga panahon. … Ang mga pipino mahimo lamang nga atsara kon kini hingpit ug kompleto nga nahumol sa tubig nga dunay asin sumala sa gitagal nga panahon. Ang proseso sa pagpreserbar hinayhinayng mousab sa komposisyon sa pipino ug mogawas ang sihag nga hitsura ug ang lami sa pipino. Ang panagsa nga pagsablig o pagtuslob diha sa tubig nga asinon dili makahatag sa gikinahanglan nga kausaban. Hinoon, ang kanunay, padayon, ug kompleto nga paghumol maoy gikinahanglan alang sa gitinguha nga kausaban nga mahitabo.

“Ang katapusang lakang sa proseso mao ang pagsilyo sa napreserbar nga mga pipino diha sa mga botelya nga gi-sterilized ug gi-purify. Ang mga atsara isulod sa mga canning jar, ug ihumol sa nagbukal nga tubig nga asinon, ug buhaton diha sa sudlanan nga gipabukalan sa tubig. Ang tanang mga hugaw makuha na gayud gikan sa mga atsara ug sa mga botelya mao nga ang nahuman nga produkto maprotektahan ug mapreserbar. …

“Sama sa pipino nga kinahanglang andamon ug limpyohan sa dili pa kini himoon nga atsara, mao nga kamo ug ako andamon uban ‘sa “maayong pulong sa pagtuo ug sa maayong doktrina’ (1 Timoteo 4:6) ug unang nalimpyohan pinaagi sa mga ordinansa ug mga pakigsaad nga gipangalagad sa awtoridad sa Aaronic Priesthood. …

“Sama sa pipino nga mausab ngadto sa pagka-atsara kon kini ihumol ug ipatuhop sa tubig nga asinon, mao usab kamo ug ako matawo pag-usab kon motuhop kanato ang ebanghelyo ni Jesukristo. … Kining bahina sa proseso sa kausaban nagkinahanglan og panahon, pagpadayon, ug pailub. …

“… Ang proseso sa paghumol niini sa pinabukal nga tubig makaprotektar ug makapreserbar sa atsara sa taas nga panahon. Sa susama nga paagi, kita mouswag aron malimpyohan ug mabalaan samtang kamo ug ako mahugasan sa dugo sa Kordero, matawo pag-usab, ug makadawat og mga ordinansa ug motuman sa mga pakigsaad nga gipangalagad sa awtoridad sa Melchizedek Priesthood” (“Kinahanglang Matawo Kamo Pag-usab,” Liahona, Mayo 2007, 19–21).

Pagpalambo sa Atong Pagtudlo

Pangandam nga maghunahuna sa mga gitudloan. “Sa imong pagpangandam, himoa ang imong pagsabut sa mga tawo nga imong gitudloan nga maoy mogiya sa imong mga plano. … Ang Kristohanon nga mga magtutudlo dili mapasaligon sa usa ka piho nga estilo o pamaagi; sila mapasaligon sa pagtabang sa mga tawo nga mopalambo og hugot nga pagtuo kang Jesukristo ug mahimong mas sama Kaniya” (Pagtudlo sumala sa Pamaagi sa Manluluwas, 7).