Katawhan ni Limhi nga miikyas

Minerva K. Teichert (1888-1976), Escape of King Limhi and His People, 1949-1951, oil diha sa masonite, 35 7/8 x 48 ka pulgada. Brigham Young University Museum of Art, 1969

Mayo 11–17

Mosiah 18–24

Kami Misulod sa usa ka Pakigsaad uban Kaniya

Samtang magbasa ka sa Mosiah 18–24, hunahunaa ang mga tawo nga imong gitudloan. Unsa ang imong nahibaloan mahitungod kanila? Ang Espiritu Santo makapadasig sa imong mga hunahuna ug makatabang kanimo nga matino ang mga kamatuoran sa ebanghelyo nga may kalabutan gayud ngadto kanila.

Irekord ang Imong mga Impresyon

pagpaambit nga icon

Dapita ang Pagpaambit

Dapita ang mga sakop sa klase sa pagsugyot og pipila ka baruganan, o mga pamahayag sa kamatuoran, nga ilang nakita atol sa ilang pagtuon sa Mosiah 18–24. (Ang pipila ka baruganan gilista diha sa outline karong semanaha sa Dali, Sunod Kanako—Alang sa mga Indibidwal ug mga Pamilya.) Awhaga sila nga ipaambit ang mga bersikulo gikan sa Mosiah 18–24 nga nagtudlo niining mga baruganan. Unsa ang ilang mga kasinatian nga may kalabutan niining mga kamatuoran?

pagtudlo nga icon

Itudlo ang Doktrina

Mosiah 18:1–16

Ang bunyag naglakip og usa ka pakigsaad nga moserbisyo sa Dios ug mobarug isip saksi Niya.

• Samtang magbasa ka sa Mosiah 18 ug mag-andam sa pagtudlo, mahimong mobati ka nga madasig sa pagtabang sa mga sakop sa imong klase sa pagribyu ug pagpamalandong sa ilang pakigsaad sa bunyag. Ania ang usa ka paagi nga imo kining mabuhat: Dapita ang mga sakop sa klase nga magtinabangay sa paglista diha sa pisara og daghang pulong kutob sa ilang mahinumduman nga may kalabutan sa paghulagway ni Alma sa pakigsaad sa bunyag. Kon mahuman na sila, ang mga sakop sa klase mahimong mobasa sa Mosiah 18:8–10 ug modugang og bisan unsa ngadto sa mga lista nga posible nga wala maapil. (Mahimo usab silang modugang og mga pulong gikan sa D&P 20:37, 77, ug 79.) Mahimong makatabang ang pagpangutana kanila kon unsay gipasabut sa matag hugpong sa mga pulong ug unsay ilang mabuhat aron masunod kana nga bahin sa pakigsaad sa bunyag. Unsaon sa Ginoo sa pagpanalangin kanato samtang maningkamot kita sa pagtuman sa atong bahin sa pakigsaad?

• Samtang nangandam ang mga sumusunod ni Alma aron mabunyagan, gitudloan sila ni Alma nga ang pag-ipon “ngadto sa panon sa Dios” nagkinahanglan nga mohimo og usa ka pakigsaad nga mosunod sa Dios ug moatiman sa Iyang mga anak (tan-awa sa Mosiah 18:8–9). Tingali ang mga sakop sa klase mahimong mopaambit og mga kasinatian sa dihang sila o ang usa ka tawo nga ilang nailhan nalig-on pinaagi sa lain nga tawo nga mituman sa pakigsaad sa bunyag nga gihulagway diha sa Mosiah 18:8–10. Pananglitan, kanus-a man nga ang usa ka tawo mihupay kanila o mitabang kanila sa pakigtambayayong sa ilang mga alantuson? Sa unsang paagi kining mga kasinatian nakapadasig kanato sa pagsunod sa atong pakigsaad? Mahimo usab nimong pahinumduman ang mga sakop sa klase kon giunsa pagbarug ni Abinadi “ingon nga [usa ka saksi] sa Dios sa tanan nga mga panahon ug diha sa tanan nga mga butang, ug diha sa tanan nga mga dapit” (bersikulo 9). Unsa ang atong makat-unan gikan sa iyang ehemplo samtang nagtinguha kita sa pagtuman niini nga bahin sa atong pakigsaad sa bunyag?

bunyag diha sa kadagatan

Sa dihang bunyagan kita, mopakigsaad kita nga moserbisyo sa Dios ug sa uban.

Mosiah 18:17–31

Ang mga katawhan sa Dios nagkahiusa.

• Ang Mosiah 18:17–31 naghulagway sa mga sugo nga gihatag ni Alma sa iyang katawhan aron matabangan sila nga magkahiusa isip mga miyembro sa Simbahan ni Kristo. Aron matabangan ang mga sakop sa klase nga maghunahuna kon sa unsang paagi kini nga mga sugo magamit ngadto kanila, mahimo nimo silang hangyuon sa pagsiksik niining mga bersikulo diha sa ginagmay nga mga grupo ug maghimo og lista sa mga sugo nga ilang makit-an. Sa unsang paagi nga ang pagsunod niining mga sugo makatabang sa mga miyembro sa ward nga mobati nga mas nagkahiusa? Aduna bay mga tumong nga mahimo sa mga sakop sa imong klase sa tinagsa-tagsa o isip grupo sa pagsunod sa ehemplo sa katawhan ni Alma?

• Ang ubang mga tawo naghunahuna, nganong nagkinahanglan man kita og simbahan? Aron matabangan ang mga sakop sa klase nga makatubag niini nga pangutana, mahimong magdrowing ka og outline sa usa ka building sa Simbahan diha sa pisara ug isulat kini nga pangutana diha sa ubos niini. Ang mga sakop sa klase mahimo dayon nga mosiksik sa Mosiah 18:17–31 ug isulat diha sa pisara ang posible nga mga tubag nga ilang makita niini nga mga bersikulo. Mahimo usab nilang makit-an ang mga tubag diha sa kinutlo gikan sa pakigpulong ni Elder Christofferson sa “Dugang nga mga Kapanguhaan.” Tingali mahimo nimong ipa-role-play sa pipila ka sakop sa klase kon unsaon nila pagtubag ang usa ka higala nga dili motuo nga gikinahanglan ang usa ka organisadong simbahan. Nganong mapasalamaton man kita nga nahisakop sa Simbahan?

• Samtang ganahan kitang maghunahuna nga ang tanan mobati nga giabi-abi diha sa simbahan, subo lang, dili kana ang gibati sa tanan. Unsay atong makat-unan gikan sa katawhan ni Alma diha sa Mosiah 18:17–31 nga makatabang kanato sa pagmugna og dapit diin ang tanan mobati nga nahisakop sila?

Mosiah 21–24

Ang Ginoo mahimong mopagaan sa atong mga alantuson.

• Ang mga alantuson nga gidala sa mga sakop sa imong klase lahi kay sa niadtong gipas-an sa katawhan ni Limhi o sa katawhan ni Alma samtang naulipon. Apan ang mga mensahe niining mga istorya magamit ni bisan kinsa nga mibati nga nabug-atan sa kalisdanan o lisud nga mga kahimtang. Dapita ang mga sakop sa klase nga mopaambit sa unsay ilang nakat-unan gikan sa Mosiah 21–24 mahitungod kon unsaon sa Dios pagtabang kanato taliwala sa atong mga pagsulay. (Alang sa mubo nga summary niini nga mga istorya, tan-awa sa L. Tom Perry, “Ang Gahum sa Pagluwas,” Liahona, Mayo 2012, 94–97.) Ang mga sakop sa klase mahimo usab nga mopaambit sa mga higayon sa dihang sila, sama sa katawhan ni Alma, nakasinati sa katumanan sa saad sa Dios nga Iyang pagaanon ang ilang mga alantuson ug moduaw kanila diha sa ilang mga kasakit (tan-awa sa Mosiah 24:14).

• Mahimong makahuluganon alang sa mga sakop sa klase ang paggahin og pipila ka minuto sa pagsulat og personal nga mga hagit nga ilang giatubang ug ang pagpamalandong og mga paagi nga ang Ginoo mitabang kanila sa pagpas-an sa ilang mga alantuson. Aduna bay mga tudling gikan sa Mosiah 21–24 nga nakapadasig kanila nga modangup ngadto sa Ginoo panahon sa kalisdanan? Sa unsang paagi nga ang saad sa Ginoo ngadto sa katawhan ni Alma diha sa Mosiah 24:14 may kalabutan sa pakigsaad nga atong gihimo ngadto sa Ginoo atol sa bunyag? (tan-awa sa Mosiah 18:8–10).

pagkat-on nga icon

Awhaga ang Pagkat-on diha sa Panimalay

Aron madasig ang mga sakop sa klase nga magbasa sa Mosiah 25–28, hangyoa sila sa paghunahuna og usa ka tawo nga ilang nailhan nga mipahilayo sa ebanghelyo. Sultihi sila nga samtang magbasa sila niini nga mga kapitulo, mahimong makakita sila og mga ideya kon unsaon pagtabang niana nga tawo nga mobalik.

mga kapanguhaan nga icon

Dugang nga mga Kapanguhaan

Nganong gikinahanglan man nato ang Simbahan?

Si Elder D. Todd Christofferson miingon: “Nakaamgo ko nga dunay mga tawo nga nagkonsiderar sa ilang kaugalingon nga relihiyuso o espirituhanon apan misalikway sa pag-apil sa simbahan o bisan sa panginahanglan alang niana nga institusyon. Ang relihiyusong buhat alang kanila pangpersonal lamang. Apan ang Simbahan gihimo Niya nga maoy sentro sa atong espiritwalidad—si Jesukristo. Angay nga hunahunaon nganong mipili Siya sa paggamit sa usa ka simbahan, Iyang Simbahan, Ang Simbahan ni Jesukristo sa mga Santos sa Ulahing mga Adlaw, aron sa pagpahigayon sa Iyang buhat ug sa Iyang Amahan.”

Mipaambit dayon si Elder Christofferson sa mga rason nganong giorganisar sa Ginoo ang usa ka Simbahan (tan-awa sa “Nganong Anaa ang Simbahan,” Liahona, Nob. 2015, 108–11):

• “Aron masangyaw ang maayong balita sa ebanghelyo ni Jesukristo ug ipahigayon ang mga ordinansa sa kaluwasan—sa laing pagkasulti, pagdala sa katawhan ngadto kang Kristo.”

• “Aron magmugna og usa ka komunidad sa mga Santos nga mosuporta sa usag usa diha sa ‘higpit ug pig-ot nga dalan nga padulong sa kinabuhing dayon’ [2 Nephi 31:18]. … Nagkahiusa sa pagtuo, nagtudlo ug naglig-on kita sa usag usa ug naningkamot nga magpuyo sa labing hingpit nga sumbanan sa pagka disipulo.”

• Aron “maghalad og sinemana nga panagpundok sa pagpahulay ug pagbag-o, usa ka panahon ug dapit nga ihiklin ang mga paagi sa kalibutan—ang Igpapahulay.”

• “Aron makab-ot ang gikinahanglang mga butang nga dili mabuhat sa mga indibidwal o gagmay nga mga grupo [lakip na] ang pag-atubang sa kakabus, … [pagdala] sa ebanghelyo diha sa tibuok nga kalibutan … [pagtukod ug pagpadagan] og mga templo, mga balay sa Ginoo, diin ang importante kaayo nga mga ordinansa ug mga pakigsaad mahimong ipahigayon.”

• Aron mahimong maana ang mga yawe sa pagkapari [priesthood], diin “ang mga opisyales sa pagkapari sa Simbahan nagpreserbar sa kaputli sa doktrina sa Manluluwas ug ang integridad sa Iyang makaluwas nga mga ordinansa, … nagtabang niadtong gusto nga makadawat niini, hukman ang kwalipikasyon ug katakus niadtong mo-apply, ug dayon ipahigayon kini … [ug] makaila sa kamatuoran ug sa bakak.”