Si Ammon nga nagtudlo ni Haring Limhi

Minerva Teichert (1888-1976), Ammon before King Limhi, 1949-1951, oil diha sa masonite, 35 15/16 x 48 ka pulgada. Brigham Young University Museum of Art, 1969.

Abril 27–Mayo 3

Mosiah 7–10

“Diha sa Gahum sa Ginoo”

Kini nga outline mahimo nga usa ka bililhong kapanguhaan, apan kini kinahanglan nga modugang, dili mohulip, sa inspirasyon nga imong madawat samtang magtuon sa Mosiah 7–10.

Irekord ang Imong mga Impresyon

pagpaambit nga icon

Dapita ang Pagpaambit

Usahay mahimong makatabang ang paghisgot isip usa ka klase sa mga panalangin nga nadawat sa mga sakop sa klase samtang naningkamot sila sa paghimo sa ilang mga panimalay nga sentro sa ilang pagkat-on sa ebanghelyo. Unsa nga mga bersikulo gikan sa Mosiah 7–10 ang gipamalandungan o gihisgutan sa mga sakop sa klase diha sa ilang mga panimalay atol sa semana? Sa unsang paagi kini nakaapekto sa ilang kinabuhi?

pagtudlo nga icon

Itudlo ang Doktrina

Mosiah 7:14–33

Kon kita modangup ngadto sa Ginoo, mosalig Kaniya, ug moserbisyo Kaniya, Siya moluwas kanato.

• Samtang nagtuon ang mga sakop sa klase sa Mosiah 7:14–33, ang mga kasinatian sa katawhan ni Limhi mahimong nakapadasig kanila sa paghinulsol ug sa pagdangup ngadto sa Ginoo aron maluwas. Aron sa pagdasig og panaghisgutan, mahimo nimong dapiton ang usa ka sakop sa klase nga motungha sa klase nga andam nga mo-summarize kon sa unsang paagi nga ang katawhan ni Limhi nahiagum sa pagkaulipon. Ang laing pipila mahimong mopaambit kon unsay ilang nakat-unan gikan kang Limhi mahitungod sa pagbaton og hugot nga pagtuo ug paglaum diha sa Manluluwas. Unsa man ang atong makat-unan gikan sa mga pahinumdom ni Limhi kon giunsa sa Dios sa pagluwas ang Iyang katawhan? (tan-awa sa mga bersikulo 19–20). Mahimo nimong hangyuon ang mga sakop sa klase sa pagpaambit og mga istorya sa kasulatan o personal nga mga kasinatian nga nakapadasig kanila nga mosalig sa Dios.

• Ang mga sakop sa imong klase adunay mga oportunidad sa pagdasig sa uban nga mohangup ngadto sa Dios kon sila anaa sa pagkaulipon sa sala o nag-antus sa uban pang mga kasakit. Tingali mahimong makatabang kanila ang pagtuon kon giunsa pagdasig ni Limhi ang iyang katawhan. Mahimo nilang basahon og una ang paghulagway diha sa Mosiah 7:20–25 bahin sa pagkaulipon sa katawhan ni Limhi ug maghunahuna og usa ka tawo nga ilang nailhan kinsa nagsagubang sa pagkaulipon sa sala. Dayon mahimo nilang matino ang mga kamatuoran nga gitudlo ni Limhi diha sa Mosiah 7:18–20, 33 aron sa pagtabang sa iyang katawhan. Unsaon nato sa pagsunod sa ehemplo ni Limhi samtang nag-awhag kita sa atong mga minahal sa kinabuhi nga mosalig sa Dios?

• Aron matabangan ang mga sakop sa klase nga mas makasabut sa tabang nga gihatag sa Dios kanato diha sa kalisdanan, mahimong manganta kamo og dungan ug maghisgot og usa ka kanta nga naghulagway kon giunsa kita pagluwas sa Manluluwas. Unsa may madugang sa Mosiah 7:17–20; Ether 12:27; ug 2 Mga Taga-Corinto 12:7–10 sa atong panabut? Tingali ang mga sakop sa klase mahimong mopaambit og mga kasinatian diin giluwas sila sa Ginoo, bisan sa ginagmay nga mga paagi, tungod kay mipakita sila og hugot nga pagtuo diha Kaniya.

Mosiah 7:26–27

Ang tawo gilalang sa hitsura sa Dios.

• Niining mga bersikulo, gipasabut ni Limhi ang pipila ka kamatuoran nga gitudlo ni Abinadi nga lisud madawat sa mga tawo. Unsa nga mga kamatuoran ang matino sa mga sakop sa klase niining mga bersikulo? Sa unsang paagi nga kining mga kamatuoran nakaapekto sa paagi sa atong pagtan-aw sa Dios ug sa atong kaugalingon?

Mosiah 8:12–19

Ang Ginoo naghatag og mga propeta, mga manalagna, ug mga tigpadayag aron makahatag og kaayohan sa katawhan.

• Si Ammon adunay oportunidad sa pagpasabut ngadto ni Limhi sa tahas sa usa ka manalagna ug sa pagpamatuod sa kaimportante sa mga propeta, mga manalagna, ug mga tigpadayag. Mahimo usab nimong klaruhon nga sa atong panahon, ang Unang Kapangulohan ug ang Korum sa Napulog Duha ka mga Apostoles gipaluyohan isip mga propeta, mga manalagna, ug mga tigpadayag. Sa unsang paagi nga kita, sama ni Ammon, maisugong mamulong mahitungod sa panginahanglan alang sa mga propeta, mga manalagna, ug mga tigpadayag? (tan-awa sa Mosiah 8:13–18). Tingali ang mga sakop sa klase mahimong magplano og usa ka social media post nga makatabang sa uban aron makasabut sa tahas sa usa ka propeta, manalagna, ug tigpadayag sa atong panahon. Unsay atong nadunggan sa labing bag-o nga kinatibuk-ang komperensya nga atong mapaambit sa atong mga higala, mga sakop sa pamilya, ug mga silingan sa pagtudlo kanila mahitungod sa panginahanglan alang sa mga propeta?

• Isip resulta sa pagbasa sa Mosiah 8:12–19, ikaw o ang ubang mga sakop sa klase mahimong mopahayag sa inyong pagpamatuod bahin sa mga propeta, sama sa gibuhat ni Ammon, o sa inyong pasalamat alang sa pagpadayag pinaagi sa mga propeta, sama sa gibuhat ni Limhi (tan-awa sa Mosiah 8:19).

• Si Propeta Joseph Smith mao ang manalagna kinsa nagbarug isip pangulo niining dispensasyon (tan-awa sa D&P 21:1). Mahimo nimong pangutan-on ang mga sakop sa klase sa pagpaambit sa unsay ilang nakat-unan gikan sa paghulagway ni Ammon sa usa ka manalagna (tan-awa sa Mosiah 8:13–18). Dayon mahimo silang maghisgot sa mga paagi diin si Joseph Smith nahimong usa ka manalagna. (Ang D&P 135:3 ug Moises 6:36C 135:3 and Moses 6:36 mahimong makatabang niini nga panaghisgutanan.)

Mosiah 9:14–19; 10:6–10

Makasagubang kita sa atong mga hagit “diha sa gahum sa Ginoo.”

• Ang mga pulong nga “diha sa gahum sa Ginoo” kaduha makita sa rekord ni Zeniff bahin sa iyang katawhan ug sa ilang mga gubat batok sa mga Lamanite—diha sa Mosiah 9:14–19 ug 10:6–10. Tingali ang mga sakop sa klase mahimong mosiksik niining mga bersikulo ug mopaambit kon unsay ilang gibati nga gipasabut niining mga pulong. Unsaon nato paggamit “sa gahum sa Ginoo”? Awhaga ang mga sakop sa klase sa pagpaambit og mga kasinatian diin malampuson silang nakasagubang sa mga hagit diha sa gahum sa Ginoo.

Mosiah 10:11–17

Ang atong mga pagpili makaimpluwensya og mga henerasyon.

• Mahimo nimong dapiton ang mga sakop sa klase nga mobasa sa hilum sa Mosiah 10:11–17 ug mangita sa mga paagi nga ang mga Lamanite naapektuhan sa mga pagpili ug mga gituohan sa ilang mga katigulangan. Unsa ang gisugyot niini mahitungod sa mahimong mga epekto sa atong mga pagpili ngadto sa uban? Unsa may gusto natong mahimong paghulagway sa atong kaugalingon ug sa atong mga pamilya diha sa usa o duha ka henerasyon? Siguro mahimong isulat sa mga sakop sa klase ang pipila ka butang nga gusto nilang malakip sa maong paghulagway.

• Usa ka yano nga leksyon nga mogamit og mga butang—sama sa usa ka linya sa mga domino—mahimong makatabang sa pagpakita sa mga epekto sa mga pagpili sa mga tawo diha sa ilang kaliwatan. Dayon mahimo nimong dapiton ang mga sakop sa klase nga mobasa sa Mosiah 10:11–17 ug maghisgot kon sa unsang paagi nga ang mga gituohan ug mga kinaiya sa mga Lamanite naapektuhan gayud sa mga pagpili nga gihimo sa ilang mga katigulangan sa sayo pa nga mga siglo. Ang istorya ni Elder Donald L. Hallstrom, nga makita diha sa “Dugang nga mga Kapanguhaan,” usa ka laing ehemplo nga imong mapaambit. Tingali ang mga sakop sa klase mahimong makahunahuna og mga istorya gikan sa ilang kinabuhi o sa ilang family history mahitungod sa usa ka matarung nga tawo nga nakaimpluwensya alang sa kaayohan sa mga henerasyon.

pagkat-on nga icon

Awhaga ang Pagkat-on diha sa Panimalay

Karong semanaha ang mga sakop sa klase nakakat-on mahitungod sa negatibong epekto sa mga pagpili sa mga Lamanite ngadto sa ilang mga anak. Pahibaloa ang mga sakop sa klase nga diha sa Mosiah 11–17 mabasahan nila ang mahitungod sa usa ka indibidwal kansang pagkamatarung nakapausab sa kinabuhi sa kadaghanan.

mga kapanguhaan nga icon

Dugang nga mga Kapanguhaan

Ang atong mga pagpili makaapekto og mga henerasyon.

Si Elder Donald L. Hallstrom mipaambit kon sa unsang paagi nga ang pagkamatinud-anon sa iyang mga apohan nakapanalangin sa umaabut nga mga henerasyon:

“Ang akong mga apohan sa amahan adunay duha ka anak, anak nga lalaki (ang akong amahan) ug anak nga babaye. … [Ang ilang anak nga babaye] naminyo pagka-1946 ug upat ka tuig ang milabay nagpaabut na nga manganak. Adunay butang nga espesyal kaayo alang sa mga ginikanan nga magpaabut sa ilang anak nga babaye (niini nga hitabo bugtong anak nga babaye) nga manganak sa unang higayon. Walay nasayud nga nagsabak siya og kaluha. Sa dakong kasubo, siya ug ang kaluha tanan namatay sa iyang pagpanganak.

“Ang akong mga apohan nasubo kaayo. Ang ilang kagul-anan, bisan pa man, diha-diha mipabalik kanila ngadto sa Ginoo ug sa Iyang Pag-ula. Sa walay paghunahuna nganong mahitabo kini ug kinsa ang mabasol, sila nakatutok nga magpuyo og matarung nga kinabuhi. Ang akong mga apohan walay mga katigayunan; dili gani sila mga inila; wala sila maghupot og tag-as nga mga posisyon sa Simbahan—yano lamang silang matinud-anong mga Santos sa Ulahing mga Adlaw. …

“Ang kamatinud-anon ni Lolo Art ug Lola Lou, ilabi na kon mag-atubang og kalisdanan, nakaimpluwensya na karon sa upat ka mga henerasyon nga nagsunod. Sa direkta ug sa katulukibon, kini nakaapektar sa ilang anak nga lalaki (akong amahan) ug sa akong inahan; dihang ang kaugalingong anak nga babaye sa akong mga ginikanan, nga ilang kamanghuran nga anak, namatay tungod sa mga komplikasyon gumikan sa pagpanganak. Sa edad nga 34 , siya namatay 10 ka adlaw human nanganak, nagbilin og 4 ka anak, nga nanag-edad og 10 ka adlaw ngadto sa 8 ka tuig. Uban sa ehemplo nga ilang nakita sa milabay nga henerasyon, ang akong mga ginikanan—sa walay pagduha-duha—midangup sa Ginoo alang sa kahupayan” (“Dangup sa Ginoo,” Liahona, Mayo 2010, 78–79).

Pagpalambo sa Atong Pagtudlo

Paminaw. “Ang pagpaminaw usa ka buhat sa gugma. … Hangyoa ang Langitnong Amahan sa pagtabang kanimo nga makasabut kon unsay isulti sa mga sakop sa imong klase. Samtang hatagan nimo og mainampingong pagtagad ang ilang gipamulong ug wala gipamulong nga mga mensahe, mas makasabut ka sa ilang mga panginahanglan, sa ilang mga kabalaka, ug sa ilang mga tinguha” (Pagtudlo sumala sa Pamaagi sa Manluluwas, 34).