Mga Anti-Nephi-Lehi nga naglubong sa ilang mga hinagiban

Mga Anti-Nephi-Lehi Milubong sa Ilang mga Hinagiban sa Gubat, ni Jody Livingston

Hunyo 29–Hulyo 5

Alma 23–29

Sila “Wala Gayud Mobiya”

Samtang mobasa ka sa Alma 23–29, hinumdumi nga aron nga makatabang sa uban nga makat-on sa mga kamatuoran diha niini nga mga kapitulo, kinahanglan nga ikaw adunay makahuluganon nga mga kasinatian uban sa mga kamatuoran sa imong kaugalingon mismo.

Irekord ang Imong mga Impresyon

pagpaambit nga icon

Dapita ang Pagpaambit

Mahimo nimong dapiton ang mga sakop sa klase sa pagsulat diha sa pisara sa mga bersikulo nga labing mahinungdanon ngadto nila atol sa ilang personal o pamilya nga pagtuon. Paggahin og pipila ka minuto sa pagdapit og pipila ka tawo sa paghisgut og usa ka kamatuoran nga ilang nakat-unan gikan sa mga bersikulo nga ilang gisulat.

pagtudlo nga icon

Itudlo ang Doktrina

Alma 23–25; 27

Ang atong pagkakabig ngadto ni Jesukristo ug sa Iyang ebanghelyo mousab sa atong mga kinabuhi.

• Isip mga disipulo ni Jesukristo, kitang tanan naningkamot sa pagpalambo sa atong pagkakabig. Tingali ang sugilanon sa mga Anti-Nephi-Lehi makaawhag niadtong imong mga gitudloan sa ilang mga paningkamot sa paghimo niini. Mahimo ka nga magsugod pinaagi sa pagsulat diha sa pisara og pangutana nga sama sa mosunod: Unsay buot ipasabut sa pagkakabig? o Unsa nga mga klase sa mga kausaban ang mahitabo sa kinabuhi sa mga tawo kon sila makabig? Ang mga sakop sa klase mahimong mangita og mga tubag niini nga mga tudling: Alma 23:6–7, 17–18; 24:17–19; 25:15–16; ug 27:26–30. Tingali sila makahimo sa pagpaambit og mga panabut gikan sa ubang mga bersikulo nga ilang nabasa diha sa Alma 23–25 ug 27. Ang mga sakop sa klase mahimo usab nga mangita og makatabang nga mga tubag ngadto niini nga mga pangutana diha sa mensahe ni Elder David A. Bednar nga “Nakabig ngadto sa Ginoo” ( Liahona, Nob. 2012, 106–9; tan-awa usab sa “Dugang nga mga Kapanguhaan”). Unsa nga mga kausaban ang gihimo sa mga Anti-Nephi-Lehi isip resulta sa ilang pagkakabig? Sa unsang paagi nga ang ilang ehemplo nakadasig kanato sa pagpalambo sa atong pagkakabig ngadto ni Jesukristo ug sa Iyang ebanghelyo?

• Unsaon nimo sa pagdasig sa mga sakop sa klase sa pagbiya sa bisan unsa nga sayop nga mga tradisyon ug maningkamot sa paghinulsol ug dili na magpakasala pag-usab sama sa gibuhat sa mga Anti-Nephi-Lehi? Ikonsiderar ang pagribyu og dungan sa Alma 23:5–7. Unsa ang pipila ka maayo nga mga tradisyon nga ang ebanghelyo nagtabang nato sa pagpalambo? Unsa kaha ang girepresentaran sa “hinagiban sa … pagsukol” sa mga Lamanite diha sa atong panahon? Unsaon man nato “ [pag]lubong kanila sa ilawom sa yuta”? (Alma 24:17). Dapita ang mga sakop sa klase sa pagpamalandong unsa ang sayop nga mga tradisyon o mga hinagiban sa pagsukol ang ilang gikinahanglan nga biyaan aron sila hingpit nga makasunod sa ebanghelyo.

Alma 24:7–16

Pinaagi sa Pag-ula ni Jesukristo, mapasaylo kita kon kita maghinulsol.

• Kon imong gibati ang pag-aghat nga mohimo og panaghisgutan sa klase kabahin sa paghinulsol, ang sugilanon sa mga Anti-Nephi-Lehi diha sa Alma 24 magamit isip makadasig nga ehemplo. Mahimo nimong sangunan ang matag sakop sa klase sa pagbasa gikan sa Alma 24:7–16 ug hangyoa sila sa pagsulat diha sa pisara og usa ka butang nga ilang nakat-unan gikan sa ilang bersikulo kabahin sa paghinulsol. Mahimo dayon silang mosiksik sa mosunod nga mga kasulatan aron mangita og dugang nga mga panabut kabahin sa paghinulsol: Isaiah 53:5–6; 2 Nephi 2:6–8; ug Mosiah 5:2.

Alma 24:13–15; 26; 29

Ang ebanghelyo makahatag og kalipay.

• Diha sa Alma 23–29, ang pulong nga “kalipay” makita sa 24 ka higayon, nga naghimo niini nga mga kapitulo nga nindot nga dapit sa pagkat-on kon sa unsang paagi nga ang pagsunod sa ebanghelyo—ug pagpaambit niini—magdala og kalipay. Mahimo nimong bahinon ang mga sakop sa klase ngadto sa mga grupo ug hangyoa ang matag grupo sa pagribyu og pipila sa mosunod nga mga bersikulo, nga mangita sa mga hinungdan ngano nga si Ammon, ang anak nga mga lalaki ni Mosiah, ug si Alma nagmaya: Alma 24:13–15; 26:12–22; ug 29:1–17. Ang mga sakop sa klase mahimong molista sa unsay ilang nakit-an diha sa pisara. Unsa ang atong makat-unan gikan niini nga mga bersikulo kon sa unsang paagi nga ang ebanghelyo magdala kanato og kalipay?

• Si Presidente Russell M. Nelson mitudlo: “Kon ang sentro sa atong kinabuhi anaa sa plano sa Dios sa kaluwasan … ug ni Jesukristo ug sa Iyang ebanghelyo, mobati kita og kalipay bisan unsa pay mahitabo—o wala mahitabo—sa atong kinabuhi. Ang kalipay moabut gikan ug tungod Kaniya. Siya ang tinubdan sa tanang kalipay” (“Hingpit nga Kalipay ug Espirituhanon nga Pagsugakod,” Liahona, Nob. 2016, 82). Tingali ang mga sakop sa klase mahimong mopaambit og mga kasinatian nga nakatabang nila nga masabtan ang kamatuoran sa mga pulong ni Presidente Nelson.

• Si Alma og si Ammon nakakita og dako nga kalipay sa pagpaambit sa ebanghelyo. Tingali imong dapiton ang mga sakop sa klase sa pagpangita og mga bersikulo diha sa Alma 26 ug 29 nga mahimong makadasig sa usa ka batan-on nga moserbisyo og misyon—o makadasig ni bisan kinsa nga mopaambit sa ebanghelyo ngadto sa uban. Ikonsiderar ang paghatag og pipila ka minuto alang sa mga sakop sa klase nga magplano og usa ka butang nga ilang mahimo aron makapaambit sa ebanghelyo. Dapita sila sa paglihok kon unsa ang ilang giplano, ug sa umaabut nga klase mahimo nimo silang awhagon sa pag-istorya kabahin sa ilang mga paningkamot.

• Sa dihang si Alma mitabang sa uban sa paghinulsol, siya napahinumduman sa kaayo sa Dios (tan-awa sa Alma 29:10–13). Tingali imong mahatagan ang mga sakop sa klase og pipila ka gutlo aron sa pagtuon niini nga mga bersikulo ug ilista unsa ang nahinumduman ni Alma. Unsa ang nagpahinumdom nato sa kaayo sa Dios? Giunsa nato sa pagkakita sa kaayo sa Dios diha sa atong mga kinabuhi?

Alma 26–27

Mahimo kitang mga himan diha sa mga kamot sa Dios.

• Aron matabangan ang mga sakop sa klase nga mosuhid unsa ang kahulugan sa mahimong “mga himan diha sa mga kamot sa Dios” (Alma 26:3), mahimo ka nga magpakita og nagkadaiyang klase sa mga instrumento o mga himan. Mahimo usab nimong dapiton ang mga sakop sa klase sa pagdala og pipila ka mga himan nga ilang gigamit. Sa unsang paagi nga makatabang kaayo kini nga mga instrumento? Sa unsang paagi nga kita sama sa mga instrumento diha sa gimbuhaton sa Dios? Mahimo nimong dapiton ang mga sakop sa klase sa pagtino og mga paagi nga si Ammon ug ang iyang kaubanan nga mga misyonaryo nahimong mga himan diha sa mga kamot sa Dios (tan-awa, pananglitan sa, Alma 26:1–5, 11–12). Unsa nga mga panabut ang atong maangkon gikan sa Doktrina ug mga Pakigsaad 4 kabahin sa pagkahimong mga himan diha sa Iyang mga kamot? Ang mga sakop sa klase mahimo usab nga mopaambit og mga kasinatian sa dihang ilang gibati ang hingpit nga kalipay nga naggikan sa pagkahimong himan diha sa mga kamot sa Dios.

pagkat-on nga icon

Awhaga ang Pagkat-on diha sa Panimalay

Daghan sa sama gihapon nga sayop nga mga ideya nga mipahisalaag sa mga anak sa Dios karon komon usab sa panahon ni Alma. Sultihi ang mga sakop sa klase nga diha sa Alma 30–31 ilang makita kon giunsa ni Alma ug sa uban sa pagtubag niining sayop nga mga pagtulun-an.

mga kapanguhaan nga icon

Dugang nga mga Kapanguhaan

Nakabig ngadto sa Ginoo.

Nagtudlo si Elder David A. Bednar:

“Ang kahulugan sa ebanghelyo ni Jesukristo naglangkob og importante ug permanenting kausaban sa atong kinaiya nga nahimong posible pinaagi sa Pag-ula sa Manluluwas. Ang tinuod nga pagkakabig nagdala og kausaban sa gituohan, kasingkasing, ug kinabuhi sa tawo, sa pagdawat ug pagsunod sa kabubut-on sa Dios (tan-awa sa Mga Buhat 3:19; 3 Nephi 9:20) ug naglakip sa pasalig nga mahimong disipulo ni Kristo.”

Human sa pagkutlo sa Alma 23:6–8, si Elder Bednar nagpadayon sa pagpasabut:

“Duha ka dagkong mga elemento ang gihulagway niining mga bersikulo: (1) ang kahibalo sa kamatuoran, nga mahubad isip pagpamatuod, ug (2) nakabig ngadto sa Ginoo, nga akong nasabtan nga pagkakabig ngadto sa Manluluwas ug sa Iyang ebanghelyo. Sa ingon, ang gamhanang kombinasyon sa pagpamatuod ug pagkakabig ngadto sa Ginoo nakahimo og kalig-on ug kamakanunayon ug nakahatag og espiritwal nga proteksyon.

“Wala gayud sila mobiya ug mihunong sa paggamit ‘sa mga hinagiban sa ilang pagsukol, nga sila wala na makig-away batok sa Dios.’ Ang pagpadaplin sa gihambin nga ‘mga hinagiban sa pagsukol’ sama sa kahakog, garbo, ug kamasinupakon nagkinahanglan og labaw pa kay sa motuo ug masayud. Ang kombiksyon, pagpaubos, paghinulsol, ug pagnunot mag-una sa pagsalikway sa atong mga hinagiban sa pagsukol. Kamo ug ako nagtinir ba gihapon og mga hinagiban sa pagsukol nga nagpalayo nato nga makabig ngadto sa Ginoo? Kon mao, nan kinahanglan kitang maghinulsol karon.

“Hinumdumi nga ang mga Lamanite wala makabig sa mga misyonaryo nga nagtudlo nila o sa maayo kaayong mga programa sa Simbahan. Wala sila makabig sa kinaiya sa ilang mga lider o pagpreserbar sa kultural nga kabilin o mga tradisyon sa ilang mga amahan. Nakabig sila ngadto sa Ginoo—ngadto Kaniya isip Manluluwas ug sa Iyang kabalaan ug doktrina—ug wala gayud sila mobiya” (“Nakabig ngadto sa Ginoo,” Liahona, Nob. 2012, 107–9).

Pagpalambo sa Atong Pagtudlo

Tinguhaa ang giya gikan sa inyong mga lider. “Ang imong mga lider sa pagkapari [priesthood] ug auxiliary gusto nga motabang kanimo nga magmalampuson. Pangayo sa ilang tambag samtang maningkamot ka sa paglambo isip usa ka magtutudlo ug samtang mamalandong ka sa mga panginahanglan sa imong mga gitudloan” (Pagtudlo sumala sa Pamaagi sa Manluluwas, 5).