Si Alma nagtudlo ni Korihor

Ang Tanan nga mga Butang Nagpakita nga Adunay Dios (Si Alma ug Korihor), ni Walter Rane

Hulyo 6–12

Alma 30–31

“Ang Hiyas sa Pulong sa Dios”

Human mabasa ang Alma 30–31 ug mangita og pagdasig alang sa imong kaugalingong kinabuhi, paminaw alang sa mga pag-aghat kabahin sa kon unsa nga mga mensahe ang makapanalangin sa mga sakop sa imong klase.

Irekord ang Imong mga Impresyon

pagpaambit nga icon

Dapita ang Pagpaambit

Kon imong gibati nga ang mga sakop sa klase nagduha-duha sa pagpaambit, mahimong tagaan nimo sila og pipila ka minuto sa pagribyu sa Alma 30–31 o bisan unsa nga mubo nga mga sulat nga ilang gihimo sa ilang pagtuon sa balay karong semanaha. Dayon mahimo silang mopaambit sa usa ka kauban o sa klase og usa ka gamhanan nga mensahe nga ilang nakit-an.

pagtudlo nga icon

Itudlo ang Doktrina

Alma 30:6–31

Ang kaaway maningkamot sa paglingla kanato pinaagi sa sayop nga doktrina.

• Samtang imong ikonsiderar ang mga panginahanglan sa imong klase, makatabang ba nila nga masabtan ang kalainan tali sa mga kamatuoran sa ebanghelyo ug sa mga pangilad ni Satanas kon mogamit ka og leksyon nga maggamit og butang? Kon mao, mahimo kang magpakita nila og peke nga mga gamit, sama sa dulaan nga kuwarta o dulaan nga pagkaon, kauban sa tinuod nga kuwarta ug tinuod nga pagkaon. Unsaon nato sa pagkahibalo nga ang peke nga mga butang dili tinuod? Ang klase mahimo dayon nga motino sa sayop nga mga pagtulun-an ni Korihor diha sa Alma 30:6–31. Unsa ang makapadani kabahin niini nga mga pagtulun-an? Unsa ang gitanyag kanato sa mga kamatuoran sa ebanghelyo nga dili ikatanyag sa mga pangilad nga mga pagtulun-an ni Satanas? Dapita ang mga sakop sa klase sa pagpaambit unsa ang nakatabang ni Alma nga makahibalo tali sa tinuod nga doktrina ug sayop nga doktrina (tan-awa sa Alma 30:32–54). Unsa ang ubang mga paagi ang nakita sa mga sakop sa klase nga makatabang kaayo?

• Aron matabangan ang mga sakop sa klase nga mapanalipdan ang ilang mga kaugalingon gikan sa mga epekto sa sayop nga doktrina, mahimo nimong maribyu ang paghulagway sa usa ka anti-Kristo diha sa latid [outline] karong semanaha sa Dali, Sunod Kanako—Alang sa mga Indibidwal ug mga Pamilya. Asa nga mga bersikulo diha sa Alma 30:6–31 ang nagpakita nga si Korihor nahaum niini nga paghulagway? Asa sa iyang mga pagtulun-an ang susama sa sayop nga mga pagtulun-an sa atong panahon? (tan-awa sa Alma 30:12–18, 23–28). Unsaon nato nga makalikay sa pagkalingla niini nga mga pagtulun-an?

Alma 30:39–46

Ang tanang butang nagpamatuod sa Dios.

• Tungod kay nagpuyo kita sa usa ka kalibutan nga susama sa kang Alma, diin ang ubang mga tawo nagtudlo nga walay Dios, ang pagpamatuod ni Alma diha sa Alma 30:39–44 mahimong makatabang sa mga sakop sa imong klase. Mahimo nimo silang dapiton sa pagbasa niini nga mga bersikulo ug paghimo og lista diha sa pisara sa mga kamatuoran ug mga ebidensya nga gihatag ni Alma nga nagpamatuod nga adunay Dios. Unsa ang uban natong mga pagpamatuod nga buhi ang Dios? Isip kabahin sa panaghisgutan, ikonsiderar ang pamahayag ni Presidente M. Russell Ballard diha sa “Dugang nga mga Kapanguhaan.” Mahimo usab nga magdapit ka og usa ka tawo nga moanha nga andam sa pagkanta og usa ka himno kabahin sa pagkamaayo sa Dios, sama sa “How Great Thou Art [Katalagsaon Mo]” (Hymns [Mga Himno], nu. 86), o mahimo ninyong kantahon ang himno og dungan.

• Samtang si Alma nakig-istorya ni Korihor, iyang nabantayan nga si Korihor “misalikway sa Espiritu sa Dios nga kini mahimo nga walay luna diha [kaniya]” (Alma 30:42). Ikonsiderar ang paghangyo sa mga sakop sa klase sa pagsiksik sa Alma 30:39–46, nga mangita sa ubang mga pakisayran kabahin sa Espiritu Santo. Unsa nga tahas ang gihuptan sa Espiritu Santo sa pagpamatuod nganha kanato sa katinuod sa Dios ug ni Jesukristo? Unsaon nato sa pagtabang niadtong kinsa adunay mga pagduha-duha o mga pangutana nga mangita sa kamatuoran pinaagi sa Espiritu Santo?

  Si Korihor nakig-istorya ni Alma

  Si Korihor Nakigharong ni Alma, ni Robert T. Barrett

Alma 31

Ang pulong sa Dios adunay gahum sa paggiya sa katawhan ngadto sa katarung.

• Aduna bay mga sakop sa imong klase kinsa makapaambit og kasinatian sa dihang “ang hiyas sa pulong sa Dios” (Alma 31:5) nakatabang nila o sa usa ka tawo nga ilang nailhan nga makahimo og mga kausaban sa ilang kinabuhi? Siguro mahimo ka nga mokontak sa mga sakop sa klase sa sayo pa aron maandam sila sa pagpaambit sa ilang mga kasinatian. Awhaga sila sa pagpaambit og mga bersikulo gikan sa Alma 31 nga magamit sa ilang mga kasinatian. Ang ubang mga sakop sa klase mahimo usab nga mopaambit og mga paagi diin ang pulong sa Dios adunay “labaw nga gamhanan nga sangputanan diha sa [ilang] mga hunahuna” (Alma 31:5). Ang mga sakop mahimong makabenepisyo gikan sa pagbasa og ubang mga kasulatan nga nagpamatuod kabahin sa gahum sa pulong sa Dios (tan-awa sa “Dugang nga mga Kapanguhaan” alang sa pipila ka ehemplo).

• Samtang ang mga sakop sa imong klase nagtuon sa Alma 31 karong semanaha, tingali sila nadasig sa ehemplo ni Alma sa pag-ampo alang sa mga Zoramite. Ikonsiderar ang paghangyo kanila kon unsa ang ilang nakat-unan gikan niini nga kapitulo kabahin sa pagtabang ngadto sa mga sakop sa pamilya o mga higala kinsa mibiya sa dalan sa ebanghelyo o nga nakigbisog sa ilang pagtuo. Mahimo usab nimo silang hangyuon sa pagsiksik og dungan sa Alma 31 ug ilista diha sa pisara ang mga butang nga ilang nabantayan kabahin ni Alma nga nakatabang niya sa pagluwas sa mga Zoramite. Unsaon nato nga mas magamit ang pulong sa Dios sa atong mga paningkamot sa pagluwas sa uban? (Alang sa dugang nga mga panabut, mahimo nimong ipaambit ang kinutlo ni Elder Jeffrey R. Holland diha sa “Dugang nga mga Kapanguhaan.”)

• Unsa ang nakita sa mga sakop sa klase diha sa Alma 31:30–38 nga makatabang niadtong kinsa nagmasulub-on alang sa mga sala sa uban sama sa gihimo ni Alma?

pagkat-on nga icon

Awhaga ang Pagkat-on diha sa Panimalay

Pangutan-a ang mga sakop sa klase kon unsa nga doktrina o mga baruganan sa ebanghelyo ang tingali ilang itudlo aron sa pagbatok sa mga sayop nga nadiskubre ni Alma taliwala sa mga Zoramite. Sultihi sila nga samtang sila mobasa sa Alma 32–35 ilang madiskubrehan kon giunsa paggamit ni Alma ang pulong sa Dios aron matabangan ang mga Zoramite nga makita ang panginahanglan sa pag-usab.

mga kapanguhaan nga icon

Dugang nga mga Kapanguhaan

Mga kasulatan kabahin sa gahum sa pulong sa Dios.

• 2 Timoteo 3:15–17

• Mga Hebreohanon 4:12

• 1 Nephi 15:23–24

• 2 Nephi 31:20; 33:4–5, 10

• Jacob 2:8

• Helaman 3:29–30

• Joseph Smith—Mateo 1:37

Ang tanan nga butang nagpakita og ebidensya nga adunay Dios.

Si Presidente M. Russell Ballard mitudlo nga ang “walay katapusan nga mga ebidensya” nga gihatag ni Alma alang sa pagkaanaa sa Dios “nagpadayon sa pagpamatuod nganha kanato karon” (tan-awa sa Alma 30:44):

“Ang mga astronaut nga naglantaw sa kalibutan gikan sa kawanangan miingon kon unsa ka dili katuohan ang katahum niini ug unsa ka buhi kini nga tan-awon. Si Senador Jake Garn sa Estados Unidos misulat sa iyang kasinatian diha sa kawanangan: ‘Imposible alang kanako ang paghulagway sa katahum sa kalibutan. Usa kini ka kulbahinam, makapahingangha, espirituhanon nga kasinatian ang makita ang kalibutan gikan sa kawanangan samtang magbiyahe diha sa kawhaan og lima ka pilo sa gikusgon sa tingog. Makalantaw usab ako ngadto sa kaitumon sa kalapad sa kawanangan ug makakita sa binilyon nga mga bituon ug mga galaxy nga minilyon ka light-year ang gilay-on. Ang uniberso lapad kaayo mao nga imposible kini nga masabtan. Apan ako gayud nga nasabtan ang kamot sa Dios sa tanang mga butang. Akong gibati ang iyang presensya sa tibuok pito ka adlaw nako sa kawanangan. Nakahibalo ko nga ang Dios ang milalang niini nga yuta ug sa uniberso. … Nakahibalo ko nga buhi ang Dios ug mao ang Tiglalang kanatong tanan’ (sulat ngadto ni M. Russell Ballard, 3 Marso 1988)” (“God’s Love for His Children,” Ensign, May 1988, 58).

Pag-amuma sa uban pinaagi sa pulong sa Dios.

Si Elder Jeffrey°R. Holland mitudlo:

“Ato ba gayud nga giamuma ang atong kabatan-onan ug ang atong bag-ong mga miyembro sa paagi nga makapalahutay nila kon ang mga kalisud sa kinabuhi motunga? O ato ba silang gitagaan og klase sa theological Twinkie—nindot nga ideya nga walay espiritwal nga kahulugan? … Atol sa usa ka grabe nga tingtugnaw pipila ka tuig ang milabay, si Presidente Boyd K. Packer nakabantay nga daghan nga usa [deer] ang nangamatay tungod sa kagutom bisan kon ang ilang mga tiyan puno sa sagbot. Sa usa ka matinud-anon nga paningkamot sa pagtabang, ang mga ahensya misuplay sa unsay mora og makatabang diin ang pinakamahinungdanon maoy gikinahanglan. Ang makamahay kay ilang gipakaon ang usa apan sila wala moamuma niini. …

“Si Satanas dayag nga malinglahon sa iyang mga panudlo; nganong kita kinahanglan man? Naa man kita nagtudlo sa atong mga anak sa panimalay o nagbarug atubangan sa mga nanambong diha sa Simbahan, dapat kita dili gayud mohimo sa atong pagtuo nga lisud nga mabantayan. … Paghatag og panudlo nga nakabase sa mga kasulatan. Itudlo ang gipadayag nga doktrina” (“A Teacher Come from God,” Ensign, Mayo 1998, 26–27).

Pagpalambo sa Atong Pagtudlo

Tabangi ang mga tigkat-on nga makadiskubre sa mga kamatuoran sa ilang kaugalingon. Usa sa imong mga tahas isip magtutudlo mao ang paggiya sa imong mga tigkat-on nga madiskubrehan ang mga kamatuoran diha sa mga kasulatan. Mas adunay kahigayunan nga ilang masabtan ug ampingan ang mga baruganan kon ilang makita kini nga mga baruganan sa ilang kaugalingon mismo kay sa madungog lang nila nga gihisgutan sa ilang magtutudlo ang kabahin niini.