“Hulyo 13–19. Alma 32–35: ‘Itanom Kini nga Pulong diha sa Inyong Kasingkasing,’” Dali, Sunod Kanako—Alang sa Sunday School: Basahon ni Mormon 2020 (2020)
“Hulyo 13–19. Alma 32–35,” Dali, Sunod Kanako—Alang sa Sunday School: 2020
Hulyo 13–19
Alma 32–35
“Itanom Kini nga Pulong diha sa Inyong Kasingkasing”
Bisan kapila pa ka higayon nimo nga nabasa ang Alma 32–35, basaha kini pag-usab samtang nag-andam ka sa pagtudlo. Hangupa ang bag-ong mga panabut gikan sa Espiritu.
Irekord ang Imong mga Impresyon
Dapita ang Pagpaambit
Aron matabangan ang mga sakop sa klase sa pagpaambit kon unsa ang ilang nakat-unan gikan sa ilang pagbasa sa Alma 32–35 sa balay, mahimo nimo silang hatagan og pipila ka minuto sa pagribyu niini nga mga kapitulo ug isulat sa pisara ang bisan unsang tema o hisgutanan nga ilang nabantayan. Isip usa ka klase, hisguti ngano nga kining mga tema o hisgutanan makahuluganon.
Itudlo ang Doktrina
Makapili kita nga magmapainubsanon.
-
Aron sa pagpangulo og panaghisgutan kabahin sa pagkamapainubsanon sama sa gitudlo diha sa Alma 32:1–16, mahimo kang magsugod pinaagi sa pagdapit sa mga sakop sa klase sa paghingalan og mga kasinatian nga tingali makahimo sa usa ka tawo nga magpaubos sa (Alma 32:2–5 gihatag ang usa ka sanglitanan). Ang ubang mga sakop sa klase tingali ganahan nga mopaambit sa ilang kaugalingong mga kasinatian sa pagkat-on og pagkamapainubsanon. Sa unsang paagi nga ang “madala aron magpaubos” (Alma 32:12) mahimong usa ka panalangin? Ang mga pamahayag kabahin sa pagkamapainubsanon diha sa “Dugang nga mga Kapanguhaan” tingali makatabang nga makadasig og usa ka panaghisgutan. Mahimo usab nimong basahon ang Doktrina ug mga Pakigsaad 112:10 o mokanta og usa ka himno kabahin sa pagkamapainubsanon, sama sa “Be Thou Humble [Magmapainubsanon]” (Hymns [Mga Himno], nu. 130), isip usa ka klase.
Kita nagpakita og hugot nga pagtuo ni Jesukristo pinaagi sa pagtanom ug pag-amuma sa Iyang pulong diha sa atong kasingkasing.
-
Usahay kita maghunahuna sa pagsimba isip usa lang sa mga butang nga atong gihimo sa pormal nga dapit sama sa simbahan nga gambalay (tan-awa sa Alma 32:5, 9, 11), apan ang kahulugan ni Alma mas piho. Sama pananglitan, siya nagtudlo nga ang pagpalambo ug pagpakita og hugot nga pagtuo ni Jesukristo usa ka importante nga klase sa pagsimba nga pwedeng himoon gawas sa pormal nga dapit. Aron matabangan ang imong klase nga masabtan kini nga baruganan, mahimo ka nga magdrowing og hulagway sa usa ka liso ug usa ka kahoy diha sa pisara ug hisgutan ang mga pangutana sama sa mosunod: Unsa man ang girepresentaran sa liso? (tan-awa sa Alma 32:28; 33:22–23). Unsaon nato sa pagtanom ang binhi—o pagpamatuod ni Jesukristo ug sa Iyang Pag-ula—diha sa atong kasingkasing ug pag-amuma niini? (tan-awa sa Alma 32:36–43; 33). Unsa nga mga kasinatian ang atong mapaambit diin ang atong mga paningkamot sa pagsunod sa Manluluwas mihatag og bililhon nga bunga? Giunsa sa mga pagtulun-an ni Alma sa pag-impluwensya sa paagi nga kita nagsimba sa Langitnong Amahan ug ni Jesukristo?
-
Ang “pag-usisa” [experiment] nga gihulagway ni Alma aron sa pagtabang sa mga Zoramite nga molambo ang pagtuo ni Jesukristo makatabang usab nato nga makat-on kon ang ubang mga baruganan sa ebanghelyo tinuod. Aron matabangan ang klase nga makasabut sa pag-usisa ni Alma, mahimo ka nga maghisgut kon unsa ang pag-usisa. Tingali adunay usa ka tawo diha sa klase kinsa nakahimo og pag-usisa kaniadto ug pwedeng makatabang niini nga pagpasabut. Unsa ang katuyoan sa usa ka pag-usisa? Sa unsang paagi nga ang pag-usisa susama sa unsay gidapit ni Alma nga buhaton sa katawhan diha sa Alma 32:26–36? Tingali ang mga sakop sa klase makapaambit og nagkadaiyang mga paagi diin sila “miusisa” sa pulong sa Dios. Giunsa nila pagkahibalo nga “ang pulong [sa Dios] maayo”? (Alma 32:28).
-
Unsa kaha ang isulti ni Alma ngadto sa usa ka tawo kinsa gusto nga makabaton o mopalig-on og pagpamatuod ni Jesukristo? Aron sa pagsusi niini nga pangutana, mahimo nimong bahinon ang klase ngadto sa duha ka grupo. Ang usa ka grupo mobasa sa Alma 32:26–36 aron sa pagtino kon unsa kaha ang isulti ni Alma sa usa ka tawo kinsa naningkamot nga makabaton og pagpamatuod, ug ang laing grupo mobasa sa Alma 32:36–43 aron sa pagtino kon unsa kaha ang iyang isulti sa usa ka tawo kinsa nahuyang na ang pagpamatuod. Dayon usa ka tawo gikan sa kada grupo ang pwedeng magpuli-puli sa pagrepresentar ni Alma ug moakto kon unsaon sa pagtabang ang usa ka tawo nga makabaton o makapalig-on og pagpamatuod.
Alma 31:13–23; 33:2–11; 34:17–29
Makasimba kita sa Dios diha sa pag-ampo, bisan kanus-a ug bisan asa.
-
Tingali tabangan nimo ang klase sa pagtandi sa mga pagtulun-an ni Alma ug Amulek mahitungod sa pag-ampo ug pagsimba ngadto sa sayop nga mga ideya sa mga Zoramite. Mahimong iribyu sa mga sakop sa klase ang Alma 31:13–23 ug ilista sa pisara kon unsa ang gituohan sa mga Zoramite mahitungod sa pag-ampo ug pagsimba. Dayon mahimo silang mangita sa mga kamatuoran diha sa Alma 33:2–11 ug 34:17–29 nga sukwahi niini nga mga pagtuo. Unsa ang gitudlo niini nga mga bersikulo mahitungod sa unsaon kaha nato sa pagpalambo sa atong mga pag-ampo ug atong pagsimba?
-
Makadasig ka og panaghisgutan mahitungod sa pag-ampo pinaagi sa pagsulat sa mga pulong sama sa Kinsa? Unsa? Kanus-a? Asa? Ngano? ug Unsaon? diha sa pisara. Ang mga sakop sa klase makapangita sa Alma 33:2–11 ug 34:17–29 aron sa pagkaplag og mga tubag niini nga mga pangutana kabahin sa pag-ampo. Sama pananglitan, sila makatubag sa mga pangutana sama niini: Asa kita pwedeng mag-ampo? Unsa man ang pwede natong iampo? Mahimo usab silang makakita og mga tubag diha sa mga pulong sa usa ka himno mahitungod sa pag-ampo, sama sa “Did You Think to Pray [Ikaw Naghunahuna ba sa Pag-ampo]?” o “Sweet Hour of Prayer” (Hymns [Mga Himno], mga nu. 140, 142). Unsaon nato sa pagpalambo sa atong mga pag-ampo?
Ang maulaong sakripisyo sa atong Manluluwas “walay kinutuban ug walay katapusan.”
-
Si Amulek migamit sa mga pulong nga “walay kinutuban” ug “walay katapusan” sa daghan nga higayon aron sa paghulagway sa sakripisyo nga gihimo ni Jesukristo sa pag-ula alang sa atong mga sala. Tingali imong dapiton ang mga sakop sa klase sa pagpangita niini nga mga pulong diha sa Alma 34:9–14 ug dayon pangitaon kini diha sa diksyonaryo. Sa unsang mga paagi nga ang sakripisyo sa Manluluwas walay kinutuban ug walay katapusan? (tan-awa sa Hebreohanon 10:10; 2 Nephi 9:21; Mosiah 3:13). Sumala sa Alma 34:15–17, unsay angay natong buhaton aron makadawat sa mga panalangin sa pagsakripisyo sa Manluluwas? Unsa ang buot ipasabut sa “pagbansay sa inyong hugot nga pagtuo”? (Alma 34:17).
“Ayaw langaya ang adlaw sa inyong paghinulsol.”
-
Ang usa ka sambingay sama sa mosunod makatabang sa mga sakop sa klase nga makapamalandong sa mga peligro sa paglangay sa atong paghinulsol: dapita sila sa paghanduraw nga sila nakadawat og pagdapit nga moapil sa usa ka kalihokan nga nagkinahanglan og mga tuig sa pagbansay ug pagpangandam, sama sa Olympic nga kompetisyon o usa ka musical performance (pagpili og usa ka butang nga makahuluganon sa imong klase), apan kini nga kalihokan himoon ugma. Hisguti uban sa klase ngano nga sila tingali dili magmalampuson sa kalihokan bisan kon gamiton nila ang nahabiling higayon karon sa pagpangandam. Sa unsang paagi nga kini nga ehemplo may kalabutan sa mga pasidaan ni Amulek diha sa Alma 34:32–35? Ngano kaha nga kuyaw man ang paglangay sa atong mga paningkamot sa paghinulsol ug pag-usab? Dapita ang mga sakop sa klase sa pagpamalandong unsa ang ilang mahimo aron sa “pagpangandam alang sa kahangturan” (bersikulo 33) ug maghimo og mga plano sa pagbuhat niini sa walay paglangay.
Awhaga ang Pagkat-on diha sa Panimalay
Aron sa pagdasig sa mga sakop sa klase sa pagbasa sa Alma 36–38 niining umaabot nga semana, mahimo nimong ipasabut nga si Alma “magul-anon tungod sa kadautan sa iyang mga katawhan,” mao nga iyang gipundok ang iyang anak nga mga lalaki ug mitudlo kanila “mahitungod sa mga butang kabahin ngadto sa pagkamatarung” (Alma 35:15–16). Ang mosunod nga pipila ka kapitulo sa Alma naghatag og saysay kon unsa ang nakaaghat ni Alma nga itudlo sa iyang anak nga mga lalaki.
Dugang nga mga Kapanguhaan
Unsa ang buot ipasabut sa pagkamapainubsanon?
“Ang pagkamapainubsanon mao ang pag-ila sa mapasalamatong paagi sa imong pagdepende diha sa Ginoo—ang pagsabut nga ikaw kanunay nanginahanglan sa Iyang suporta. … Dili kini usa ka timailhan sa kahuyang, pagkamaulawon, o kahadlok; usa kini ka pagpaila nga ikaw nasayud diin ang imong tinuod nga kalig-on naggikan” (Matinud-anon sa Tinuhoan [2004], 142).
Si Elder Quentin L. Cook mipasabut: “Kon kita mamalandong gayud sa Dios nga Amahan ug ni Kristo nga Anak, kon si kinsa Sila, ug kon unsay Ilang makab-ot alang kanato, mopuno kini kanato og balaang pagtahud, pagdayeg, pasalamat, ug pagkamapainubsanon. … Ang pagkamapainubsanon naglakip usab sa pagkamapasalamaton alang sa daghan natong mga panalangin ug balaanong tabang. Ang pagkamapainubsanon dili ingon nga dagkong kalampusan nga makita o pagbuntog gani sa dagkong hagit. Usa kini ka timailhan sa espirituhanong kalig-on. Pagbaton kini sa hilum nga pagsalig nga kada adlaw ug kada oras makasalig kita sa Ginoo, makaserbisyo Kaniya, ug makatuman sa Iyang mga katuyoan” (“Ang Mahangturong mga Butang nga Nahitabo Kada Adlaw,” Liahona, Nob. 2017, 52, 54).
Mga kasulatan mahitungod sa hugot nga pagtuo.
Pagpalambo sa Atong Pagtudlo
Tutoki ang mga kasulatan. Samtang dunay daghang dugang nga mga kapanguhaan nga makapalambo sa panaghisgutan, hinumdumi nga ang mga kasulatan mao ang tinubdan sa doktrina. Tabangi ang mga miyembro nga makakaplag sa mga kamatuoran diha sa mga kasulatan. (Tan-awa sa Pagtudlo sumala sa Pamaagi sa Manluluwas, 21.)