“Juļae 6–12. Alma 30–31: ‘Ewānōk an Naan in Anij,”’ Itok, Ļoor Eō—N̄an Jabōt Jikuuļ: Bok in Mormon 2020 (2020)
“Juļae 6–12. Alma 30–31,” Itok, Ļoor Eō—N̄an Jabōt Jikuuļ: 2020
Men Otemjeļo̧k Rej Kam̧ool Ewōr juon Anij (Alma im Korior), jān Walter Rane
Juļae 6–12
Alma 30–31
“Ewānōk an Naan in Anij”
Ālkin riiti Alma 30–31 im pukot im̧we n̄an mour eo am̧ make, ron̄jake im̧we ko kōn ta ennaan ko renaaj kōjeraam̧m̧an membōr in kūlaaj eo am̧.
Je En̄jake ko Rej Im̧we Eok
Kajjitōk bwe ren Kwaļo̧k
Eļan̄n̄e kwoj en̄jake bwe membōr ro rej jānliktak n̄an kwaļo̧k, komaron̄ leļo̧k n̄an er jejjo minit ko n̄an aer etale Alma 30–31 ak jabdewōt note ko rekar kōm̧m̧ani ilo ekkatak ko aer ilo m̧weo ilo wiik in. Innām remaron̄ in kwaļo̧ke ippān juon m̧ōttāer ak kūlaaj juon iaan ennaan ko rekajoor rej loe.
Katakin Katak ko
Rikapo eo ej kajjieon̄ in m̧oņe kōj kōn katak ko rebōd.
-
Ilo am̧ ļōmņak kōn aikuj ko an kūlaaj eo am̧, enaaj ke jipan̄ er meļeļe oktak eo ikōtaan m̧ool ko an gospel eo im aujiid ko an Setan eļan̄n̄e kwoj kōjerbale jabdewōt men n̄an katak eo? Eļan̄n̄e aaet, komaron̄ ke kwaļo̧k jet iaan riab in m̧weiūk ko, āinwōt jāān in ikkure ko, kein ikkure m̧ōn̄ā ko, ippānļo̧k m̧ool in jāān ko ak m̧ool in m̧ōn̄ā ko. Ewi wāween ad jeļā bwe riab in m̧weiūk ko rejjab keien? Kūlaaj eo emaron̄ in kakileni katak ko rebōd an Korior ilo Alma 30:6–31. Ta eo me emaron̄ in kareelel kōn katak kein? Ta eo m̧ool ko an gospel eo ej letok n̄an kōj bwe katakin aujiid ko an Setan reban maron̄ litok? Kajjitōk ippān ro uwaan kūlaaj eo bwe ren kwaļo̧k ta eo ekar jipan̄ Alma kile kōtaan katak eo em̧ool im katak eo ebōd (lale Alma 30:32–54). Ta wāween ko jet ro uwaan kūlaaj eo rekar loe bwe ejipan̄?
-
N̄an jipan̄ ro uwaan kūlaaj eo ekkatak wāween kōjparok er make jān an katak ko rebōd jelet er, komaron̄ etale meļeļe ko kōn juon anti-Kraist ilo unin tōl eo an wiik in ilo Itok, Ļoor Eō—N̄an Kajjojo Armej im Baam̧le ko. Eoon ta ko ilo Alma 30:6–31 rej kwaļo̧k bwe Korior ejejjet n̄an kōmeļeļe in? Ewi wōt iaan katak ko an rej āinwōt katak ko rebōd ilo raan kein ad? (lale Alma 30:12–18, 23–28). Ewi wāween ad maron̄ kattoļo̧k kōj jān ad po ilo m̧oņ kōn katak kein?
Men otemjeļo̧k rej kam̧ool kōn Anij.
-
Kōnke jej mour ilo juon laļ eo āinļo̧k wōt eo an Alma, ijo me jet armej rej katakin bwe ejjeļo̧k Anij, naan in kam̧ool eo an Alma ilo Alma 30:39–44 remaron̄ lukkuun jipan̄ membōr ro uwaan kūlaaj eo am̧. Komaron̄ kajjitōk ippāer n̄an riiti eoon kein im kōm̧m̧ane juon laajrak ioon boot eo kōn m̧ool ko im kam̧ool ko Alma ej letok me rej kam̧ool bwe ewōr juon Anij. Ta naan in kam̧ool ko jet ewōr ippād bwe Anij ej mour? Āinwōt m̧ōttan wōt ekōnono in, ļōmņak in kwaļo̧k ennaan eo jān Būreejtōn M. Russell Ballard ilo “Kein Jipan̄ ko Jet” Komaron̄ barāinwōt kajjitōk ippān juon armej bwe en itok im pojak tok n̄an an al juon al kōn em̧m̧an eo an Anij, āinwōt “How Great Thou Art” (Hymns, no. 86), ak kom̧ maron̄ al al eo ippān doon.
-
Ke Alma ekar kōnono ippān Korior, ekar ļōmņak bwe Korior ekar “likūtļo̧k Jitōbōn Anij bwe en ejjeļo̧k jikin ilo [e]” (Alma 30:42). Ļōmņak im kajjitōk ippān ro uwaan kūlaaj eo n̄an lale Alma 30:39–46, pukote meļeļe ko jet n̄an Jetōb Kwojarjar eo. Ta eddo eo Jetōb Kwojarjar eo ej kōm̧m̧ane ilo kam̧ool n̄an kōj kōn m̧ool eo an Anij im Jisōs Kraist? Ewi wāween ad maron̄ jipan̄ ro ewōr pere ak kajjitōk ko ippāer pukot m̧ool eo kōn Jetōb Kwojarjar eo?
Korior ej Jum̧ae Alma, jān Robert T. Barrett
Naan ko an Anij ewōr kajoor ie n̄an tōlļo̧k armej ro n̄an jim̧we.
-
Ro uwaan kūlaaj eo am̧ me remaron̄ in kwaļo̧k juon en̄jake ke “ewānōk an naan in Anij” (Alma 31:5) ekar jipan̄ er ak bar juon armej rejeļā kajjeen kōm̧m̧ani oktak ko ilo mour eo an? Komaron̄ in aikuj kepaake ro uwaan kūlaaj eo m̧okta bwe remaron̄ pojak n̄an aer kwaļo̧k en̄jake ko aer. Rōjan̄ er n̄an kwaļo̧k jān eoon ko jān Alma 31 ko me rej jerbal n̄an en̄jake ko aer. Ro jet uwaan kūlaaj eo remaron̄ in barāinwōt kwaļo̧k wāween ko me naan ko an Anij ewōr juon an “ļapļo̧k kajoor in an jelōt ļōmņak ko an [aer]” (Alma 31:5). Membōr ro remaron̄ in jeraam̧m̧an jān aer riiti eoon ko jet me rej kam̧ool kōn kajoor in naan ko an Anij (lale “Kein Jipan̄ ko Jet” n̄an jejjo waanjon̄ak ko jet).
-
Ilo an ro uwaan kūlaaj eo am̧ ekkatak Alma 31 wiik in, remaron̄ kar im̧we jān waanjon̄ak eo an Alma ilo an jar kōn Rizorom ro. Ļōmņak in kajjitōk ippāer kōn ta eo rekar ekkatak jān jebta in kōn pukotļo̧k ro uwaan baam̧le ko ak ro m̧ōttāer ro rekar etal jān iaļ in an gospel in ak rej kakkōt kōn tōmak eo aer. Komaron̄ kajjitōk ippāer n̄an lale Alma 31 ippān doon im kōllaajrake ioon boot eo men ko rej loi kōn an Alma kar jipan̄ e lo̧mo̧o̧ren Rizorom ro. Ewi wāween ad kōjerbal naan eo an Anij eļapļo̧k ilo jerbal in kijejeto ko ad n̄an lo̧mo̧o̧ren ro jet? (N̄an kōļmenļo̧kjeņ ko jet, komaron̄ kwaļo̧k kout in jān Jeffrey R. Holland ilo “Kein Jipan̄ ko Jet.”)
-
Ta eo ro uwaan kūlaaj eo rej loe ilo Alma 31:30–38 me emaron̄ jipan̄ ro rej būrom̧ōj kōn jerawiwi ko an ro jet āinwōt kar Alma?
Kōketak Ekkatak ilo M̧weo
Kajjitōk ippān ro uwaan kūlaaj eo ta katak eo ak pedped in gospel eo remaron̄ katakin n̄an jum̧ae riab ko Alma ekar loi ilubwilijin Rizorom ro. Ba n̄an er bwe ilo aer riiti Alma 32–35 renaaj loe ewi wāween an Alma kar kōjerbale naan eo an Anij n̄an jipan̄ Rizorom ro loe aikuj eo n̄an oktak.
Kein Jipan̄ ko jet
Jeje ko rekwojarjar kōn kajoor eo an naan eo an Anij.
Men otemjeļo̧k rej kam̧ool bwe ewōr juon Anij.
Būreejtōn M. Russell Ballard ekar katakin bwe “menin kam̧ool ko ejjeļo̧k jem̧ļo̧kier” Alma ekar letok kōn an Anij pād “ej wōnm̧aanļo̧k im kam̧ool n̄an kōj rainin” (lale Alma 30:44):
“Rikatak kōn iju ro rej alooje laļ in jān mejatoto im kar kwaļo̧k ewi jon̄an an aiboojoj im ekōjkan emourur in an waļo̧k. Senator eo an United State Jake Garn ekar jeje kōn en̄jake eo an ilo mejatoto eo ilan̄: “Elukkuun pidodo aō maron̄ kōmeļeļeiki aiboojoj in laļ in. Ekam̧ōņōņō, im̧we, im ejetōbtōb en̄jake n̄an lale laļ jān mejatoto eo ilan̄ im ito itak ron̄oul ļalem kōttan m̧ōkaj in ainikien. Imaron̄ in barāinwōt kalimjōke kilmeej in mejatoto eo ilan̄ im loe bilien iju ko im milien jeljel in iju ko rej meram jān ettoļo̧k. Lan̄ eo elukkuun in kilep āinwōt an barāinwōt pen meļeļe kake. Ak ikar meļeļe pein Anij ilo men otemjeļo̧k. Ikar en̄jake an pād ippa ilo aolepān raan ko jiljimjuon ilo mejatoto eo ilan̄. Ijelā bwe Anij ekar kōm̧anm̧an laļ in im mejatoto eo ipeļaakin lan̄. … Ijeļā bwe Anij ej mour im ej Rikōm̧anm̧an eo an kōj aolep’ (letter to M. Russell Ballard, 3 March 1988)” (“God’s Love for His Children,” Ensign, May 1988, 58).
Naajdik ro jet kōn naan eo an Anij
Elder Jeffrey R. Holland ekar katakin:
“Jej ke lukkuun naajdik jodikdik ro ad im membōr ro ad rekāāl ilo wāween eo me enaaj jipan̄ er eļan̄n̄e kajoor ko an laļ rej waļo̧k? Ak jej ke leļo̧k n̄an er juon kain meram in katak ko—calorie ko ejjeļo̧k ūnen ilo jetōb? … Ilo juon iien m̧ōļo ekajoor jet iiō ko remootļo̧k, Būreejtōn Boyd K. Packer ekar je bwe juon oran eo em̧m̧an an deer ko rekar mej kōn kwōle ilo iien ekar obrak lo̧jeer kōn ujooj. Ilo juon kijejeto em̧ool n̄an jipan̄, kom̧bani ko rekar leļo̧k eļap kar ta eo ekar aikuj. Ajļo̧k bwe rekar naajdik deer ko ak rekar jab lale er. …
“Setan ej lukkuun māletlet ilo katak ko an, etke jej aikuj in? Mekarta jej kōmeļeļeiki ajri ro nejin ilo m̧weo ak jutak im̧aan juon jarlepju ilo m̧ōnjar eo, jen jab kōm̧m̧an bwe tōmak eo ad en pen waļo̧k. … Leļo̧k eoon ko rej katakin. Katakin katak ko em̧ōj aer waļo̧k” (“A Teacher Come from God,” Ensign, May 1998, 26–27).
Kōkōm̧anm̧anļo̧k Ad Katakin
Jipan̄ rūkatak ro loe m̧ool ko n̄an er make. Juon iaan eddo ko am̧ āinwōt juon rūkaki ej n̄an leļo̧k tōl n̄an rikatak ro m̧ool ko ilo jeje ko rekwojarjar. Maron̄ ļapļo̧k meļeļe kaki im kaorōki pedped ko eļan̄n̄e rej loe pedped in katak kein n̄an er make ijjelo̧kin baj ron̄jake wōt an juon rūkaki kōnono kaki.