Kōm̧eļeļe jān Joshua Dennis

Juļae 20–26

Alma 36–38

“Reilo̧k n̄an Anij im Mour”

Ilo am̧ m̧aanjabpopo n̄an katakin, keememej bwe ro uwaan kūlaaj eo ewōr wāween aer en̄jake ko raorōk ilo Alma 36–38. Ta eo komaron̄ kōm̧mane n̄an kalōk ioon en̄jake kein?

Je En̄jake ko Rej Im̧we Eok

Kajjitōk bwe ren Kwaļo̧k

Juon wāween n̄an rōjan̄ ro uwaan kūlaaj eo kwaļo̧k ta eo rej ekkatak ilo eoon kein ej n̄an ajije kūlaaj eo n̄an jilu kūrub ko im jitōn̄ kajjojo kūrub juon jebta jān Alma 36–38. Kajjitōk ippān kajjojo kūrub n̄an pukot im kwaļo̧k juon eoon em̧m̧an jān jebta ko aer.

Katakin Katak ko

Alma 36

Jemaron̄ bar ļotak jān Anij ilo ad ettā bōro im ukweļo̧k.

• Jet ro uwaan kūlaaj eo am̧ remaron̄ bwilōn̄ etke rekar jab bōk kain oktak in ekabwilōn̄lōn̄ āinwōt eo an Alma. Emaron̄ jipan̄ er eļan̄n̄e kwaar kwaļo̧k ta eo Elder David A. Bednar ekar katakin: “N̄an elōn̄ iaad wōj, oktak tok n̄an Irooj ej juon wāween eo ej wōnm̧aanļo̧k wōt im ejjab juon wōt kōttan ilo juon iien im ej waļo̧k in juon en̄jake ekajoor im kabwilōn̄lōn̄” (“Converted unto the Lord,” Ensign or Liahona, Nov. 2012, 107–8). Men̄e jet men ko kōn oktaktok eo an Alma rejeja, en̄jake eo an ej katakin pedped ko me kōj aolep aikuj in kōjerbale n̄an oktak eo ad make ej wōnm̧aanļo̧k wōt. Komaron̄ kajjitōk ippān ro uwaan kūlaaj eo n̄an lale Alma 36 im pukot pedped kein im kōllaajraki ioon boot eo. Ta ko jet rekar jipan̄ kōj lukkuun oktaktok n̄an gospel eo an Jisōs Kraist?

• Alma ekar kōjerbal naan in “ļotak jān Anij” n̄an kōmeļeļeik oktaktok eo an. N̄an jipan̄ ro uwaan kūlaaj eo meļeļe wāween in, komaron̄ kajjitōk ippāer n̄an riiti laajrak in eoon kein kajjojo armej ak le iaan, pukot ta meļeļein n̄an erom̧ ļotak jān Anij: 1 Jon 4:7; Mosaia 5:7; 27:25–26; im Alma 5:14; 22:15. Kajjitōk ippān ro uwaan kūlaaj eo ta eo rekar ekkatak. Innām remaron̄ etale Alma 36, pukoti uwaak ko n̄an kajjitōk in: Ewi wāween an armej en̄jake im m̧akūtkūt n̄e rej ļotak jān Anij? N̄an jipan̄ ro uwaan kūlaaj eo kejōkļo̧kjeņ kōn wāween aer maron̄ ļotak jān Anij, komaron̄ kwaļo̧k ennaan in jān Būreejtōn Ezra Taft Benson loe ilo “Kein Jipan̄ ko Jet.”

Alma 37

Jeje ko rekwojarjar rekar kōjparoki “kōn juon un emālōtlōt.”

• Bōlen ekkatak naan ko an Alma ilo an letok rekoot ko rekwojarjar n̄an ļaddik eo nejin Hilamōn emaron̄ jipan̄ ro uwaan kūlaaj eo kwaļo̧k ewi wāween aer kar en̄jake kajoor eo an jeje ko rekwojarjar ilo mour ko aer. Kōketak er n̄an lale Alma 37 n̄an pukot ennaan eo me Alma ekar leļo̧k n̄an Hilamōn kōn jeje ko rekwojarjar (eļaptata lale eoon 1–19 im 43–47). Ewi wāween ad kwaļo̧k bwe jeje ko rekwojarjar rej kwojarjar n̄an kōj? Ewi wāween ad maron̄, āinwōt Alma, katakin ro rejitōn bōro ippād n̄an “kōjparok aolep men kein ilo kwōjarjar”? (Alma 37:2). Ewi wāween an jeje ko rekwojarjar “kwaļo̧k tok an [Anij] kajoor” tok n̄an kōj? (Alma 37:14).

• Juon wāween n̄an ekkatak kōn kōjeraam̧m̧an ko kōn an lōn̄ jeje ko rekwojarjar ej n̄an katak ta eo Alma ekar ba ilo Alma 37 kōn rekoot ko rekwojarjar im men ko jet ekar lilo̧k n̄an Hilamōn. Komaron̄ kōm̧m̧ane juon laajrak ioon boot eo kōn men ko rekwojarjar: pileij ko an Nipai im brass pileij ko (Alma 37:2–20), ron̄oul-emān pileij ko an Ether im rukook ro (Alma 37:21–37), im liaona eo (Alma 37:38–47). Ro uwaan kūlaaj eo remaron̄ in riiti eoon kein n̄an ekkatak ta eo Alma ekar katakin kōn kajjojo iaan men kein. Ilo wāween rot jeje ko rekwojarjar remaron̄ kōļapļo̧k ememļo̧kjeņ ko ad? (lale Alma 37:8). Ta eo jemaron̄ ekkatak jān naan ko an Alma kōn kōjeraam̧m̧an ko kōn an lōn̄ jeje ko rekwojarjar ilo mour ko ad rainin?

  

  Jeje ko rekwojarjar rej katakin kōj ewi wāween ļoor Anij.

Alma 37:6–7, 41–42

“Jān men ko reddik im reļam waan men ko reļļap rej kūrm̧ool.”

• N̄an katakin aorōk eo an “men ko reddik im reļam waan” ilo jerbal eo an Anij, Alma ekar letok ruo waanjon̄ak ko: jeje ko rekwojarjar im liaona eo (lale Alma 37:6–7, 41–42; lale barāinwōt 1 Nipai 17:41). Ālkin etale waanjon̄ak kein, bōlen ro uwaan kūlaaj eo remaron̄ kwaļo̧k waanjon̄ak ko jān mour ko aer make kōn men ko reddik im reļam waan ilo jerbal eo an Anij. Komaron̄ kōņaan kepaake juon ak ruo uwaan kūlaaj eo m̧okta im kajjitōk ippāer n̄an bōktok juon men n̄an kūlaaj eo edik im emaron̄ bōktok men ko reļam waan ilo mour ko aer. Komaron̄ barāinwōt kwaļo̧k ennaan eo jān Būreejtōn Dallin H. Oaks ilo “Kein Jipan̄ ko Jet.” N̄an jipan̄ ro uwaan kūlaaj eo kōjerbal pedped in, komaron̄ in kajjitōk kajjitōk ko āinwōt laajrak in: Etke jet iien jej likjab in kōm̧m̧ane men ko reddik im reļam waan? Ewi wāween ad maron̄ im̧we kōj make im baam̧le ko ad anjo̧ jān kōņaan in?

Alma 37:38–47

Naan ko an Kraist remaron̄ in tōl kōj raan n̄an raan.

• Keidi naan ko an Anij n̄an Liaona eo emaron̄ in im̧we ro uwaan kūlaaj eo tiljekļo̧k im aolep iien riiti jeje ko rekwojarjar. N̄an tōl juon ekōnono kōn menin, komaron̄ kajjitōk ippān ro uwaan kūlaaj eo n̄an riiti Alma 37:38–47 ilo leiaia ippān doon, pukot men ko rej einļo̧k wōt doon ikōtaan Liaona eo im naan ko an Anij. Komaron̄ idajon̄jon̄e er n̄an pukot juon meļeļe eo einļo̧k wōt ilo kajjojo eoon. Innām komaron̄ je kajjojo eoon ioon boot eo im kajjitōk ippān ro uwaan kūlaaj eo n̄an je meļeļe ko eierwōt juon rekar loi iturin eoon ko tok jet. Ta eo wāween keidi in ej kwaļo̧k kōn wāween ad aikuj in kōm̧m̧ani ekkatak jeje ko rekwojarjar ad?

Alma 38

Kwaļo̧k naan in kam̧ool ko ad kōn Jisōs Kraist emaron̄ kōkajoorļok ro jej iakwe er.

• Naan ko an Alma n̄an ļaddik eo nejin Shiblon ekar letok juon waanjon̄ak in wāween kōkajoorļo̧k im rōjan̄ ro otemjej jej iakwe er mour kōn gospel eo. Bōlen ro uwaan kūlaaj eo remaron̄ riiti jebta in im kalikkar ewi wāween an Alma kōkajoorļo̧k Shiblon. Alma 38 ekadu—bōlen komaron̄ pepe in riiti āinwōt juon kūlaaj. Innām ro uwaan kūlaaj eo remaron̄ kwaļo̧k ippān doon eoon ko rekar loi im eļap tokjāer ak ko rekar leļo̧k n̄an er ļōmņak ko n̄an kōkajoorļo̧k ro uwaan baam̧le ko aer make im ro m̧ōttāer.

Kōketak Ekkatak ilo Mweo

Ro uwaan kūlaaj eo renan̄in ke ļōmņak kōn wāween ko̧o̧njeļ e juon eo rej iakwe eo ekar kōm̧m̧ane juon bōd eļap? Kōmeļeļeiki bwe er renaaj loe ļōmņak ko rejipan̄ ilo Alma 39–42.

Kein Jipan̄ ko Jet

Oktaktok ej āinwōt juon nin̄nin̄ ej kab ļotak.

Būreejtōn Ezra Taft Benson ekar katakin: “Eļan̄n̄e jekar dibuki oktaktok in ekajoor, eo ej bōktok wōt kōn tōmak ilo Jisōs Kraist im jān jerbal eo an Jetōb iood, innām jekar erom̧ juon armej ekāāl. Kōn menin, oktaktok ej keidi n̄an juon nin̄nin̄ ej kab ļotak. Taujin iami em̧ōj aer en̄jake oktaktok in. Kwaar meļo̧kļo̧k jerawiwi ko am̧, jet iien rej jerawiwi ko rem̧wilaļ im kōmettak, im jān kōjerbal bōtōktōk in Kraist ilo mour eo am̧, kwaar erom̧ juon eo erreo. Ejjeļo̧k am̧ bar ikdeleel n̄an bar jepļaakļok n̄an wāween ko am̧ m̧okta. Kwoj lukkuun m̧ool in juon armej ekāāl. En̄in ej ta meļeļein juon oktak in bōro” (“A Mighty Change of Heart,” Ensign, Oct. 1989, 4).

Men ko reddik im relam waan.

Būreejtōn Dallin H. Oaks ekar katakin:

“Ij kakeememej kōn kajoor eo an men ko reddik im relam waan jet tōre remootļo̧k ke iaar lo juon men ke ij etetal in jibbon̄. … Jikin etetal jimāān eo emijel im kajoor [ekar] kōk. Ej ke itok jen an ļap im kajoor an m̧akūtkūt? Jaab, kōk in ej waļo̧k jān an juon iaan okar ko erum̧wij, edik an eddōkļo̧k jān wōjke eo ej ekkejel. …

“Kōn menin āindein ke an kajoor eo ilo men ko reddik im relam waan jej ekkatak ilo jeje ko rekwojarjar im jān rikanaan ro remour. Ļōmņak kōn eoon eo jaar ekkatak n̄an kobaiktok ilo mour ko ad kajjojo raan. Ak ļōmņak kōn jar ko an juon make im an baam̧le eo ej bukwelōlō im jar me ej mōttan tōmak ko an Armej ro Rekwojarjar ilo Raan-ko Āliktata. … Men̄e iminene kein remaron̄ in men ko reddik im relam waan, aolep iien rej letok jetōbin lōn̄aj ekajoor n̄an eddōkļo̧k. Menin ej waļo̧k kōnke kajjojo iaan men ko reddik im relam waan rej letok jem̧jerā eo an Jetōb Kwojarjar, Rikam̧ool eo ej kōmeram kōj im tōl kōj n̄an m̧ool eo” (“Men ko Reddik im Relam Waan,” Ensign ak Liaona, Māe 2018, 90).

Kōkōm̧anm̧anļo̧k Ad Katakin

Kajjitōk ippān rūkatak ro n̄an katakin doon. N̄e ro uwaan kūlaaj eo rej kwaļo̧k naan in kam̧ool ak en̄jake ko aer, remaron̄ in kōketak ak im̧we kajjojo ro uwaan kūlaaj eo ilo juon wāween komaron̄ in kar jab. (Lale Teaching in the Savior’s Way, 30.)