Kōra, Etke Kwōj Jan̄? jān Mark R. Pugh

Juļae 27–O̧kwōj 2

Alma 39–42

“Karōk in M̧ōņōņō eo Eļap”

Katak ko an Alma ilo Alma 39–42 rej katak ko raorōk im alikar m̧ool ko raorōk. Ilo am̧ ekkatak jebta kein, kejōkļo̧kjeņ kōn m̧ool ko raorōktata n̄an kūlaaj eo am̧ im ta eo komaron̄ kōm̧m̧ane n̄an jipan̄ er loe m̧ool kein.

Je En̄jake ko Rej Im̧we Eok

Kajjitōk bwe ren Kwaļo̧k

N̄an leļo̧k n̄an membōr ro juon iien em̧m̧an n̄an aer kwaļo̧k ļōmņak ko aer im en̄jake ko kōn Alma 39–42, komaron̄ kajjitōk ippāer n̄an etale jebta kein im pukot jet iaan men ko Alma ekar ba ak kōm̧m̧ane ak ekar kam̧eiūr er.

Katakin Katak ko

Alma 39

Jerawiwi an m̧ōm̧ an kanniōk ej juon kajjōjō ilo mejān Anij.

• Ta eo jemaron̄ ekkatak jān bwebwenato in en̄jake eo an Koriantōn kōn jerawiwi im ukweļo̧k? Bōlen ro uwaan kūlaaj eo remaron̄ in riiti Alma 39: 1–14, jet iaer rej pukot ta eo Koriantōn ekar bōd an kōm̧m̧ane, ro jet rej pukot ta eo emaron̄ kar tōl er n̄an jerawiwi, im ro jet rej pukot kapilōk eo Alma ekar leļo̧k. Ilo aer kwaļo̧k ta eo rej loe, remaron̄ kar kōnono kōn wāween ad maron̄ jab po ilo kain bōd rot in wōt.

• N̄e armej ro rej jerawiwi ilo ļōn̄, ekkā aer bōk en̄jake ko rekabbweerer ak ebbweer im maron̄ en̄jake bwe er rejjab lukkuun aorōk. Ta pedped in katak ko ilo Alma 39–42 rej im̧we ro uwaan kūlaaj eo bwe ren en̄jake kōjatdikdik eo ej tōlļo̧k er n̄an ukweļo̧k? Kwaļo̧k ennaan in jān Sister Joy D. Jones ilo “Kein Katak ko Jet” emaron̄ jipan̄ ro uwaan kūlaaj eo meļeļe oktak eo ikōtaan erreo im ad aorōk ilo mejān Anij. (Lale barāinwōt Lynn G. Robbins, “Jiljilimjuonn̄oul Alen Jiljilimjuon,” Ensign ak Liaona, Māe 2018, 21–23.)

• Āinwōt m̧ōttan wōt ekōnono eo am̧, emaron̄ jipan̄ ro uwaan kūlaaj eo n̄an ekōnono jon̄ak ko an Irooj kōn erreo. Am̧ ekōnono emaron̄ jipan̄ eļan̄n̄e ej pedped ioon pedped in katak ko ijjelo̧kin juon laajrak in men ko kōm̧m̧ani im jab kōm̧m̧ani. N̄an waanjon̄ak, komaron̄ kajjitōk ippān ro uwaan kūlaaj eo n̄an kalikkar pedped in katak ko me Alma ekar katakin Koriantōn ilo Alma 39. Ilo kakkobaba, er remaron̄ in etale “Mour Erreo” ilo N̄an Kōkajoorļo̧k Jodikdik ro ippān kajjitōk āinwōt kein ilo ļōmņak: “Eļan̄n̄e kwaar aikuj in kōmeļeļeiki ilo tukaduin ko̧o̧njeļ in ippān juon pedped in katak, enaaj ta eo? Ro uwaan kūlaaj eo remaron̄ kar barāinwōt etale m̧wen̄an in ilo N̄an Kōkajoorļo̧k Jodikdik ro, pukot kōjeraam̧m̧an ko waļo̧k jān mour kōn kien erreo im waļo̧k ko jān jab pokake kien in. Ewi wāween an pedped in katak kein oktak jān ta eo laļ in ej katakin? Ewi wāween an pedped in katak kein jelet wāween ad ļōmņak kōn kien erreo? Kūlaaj eo am̧ remaron̄ jeraam̧m̧an jān aer riiti ennaan eo an Sister Wendy Nelson ilo “Kein Katak ko Jet” ilo aer uwaaki kajjitōk kein.

• Jet iien epidodo n̄an tōmak bwe kāālet ko ad rejjab jelet ro jet—jerawiwi ko ad rej ittiņo̧. Ta eo Alma ej katakin Koriantōn ilo Alma 39:11–12 kōn jekjek eo ej waļo̧k jān kāālet ko an? Kajjitōk ippān ro uwaan kūlaaj eo n̄an kejōkļo̧kjeņ kōn wōn ro emaron̄ jelet er jān kāālet ko rej kōm̧m̧ani, jim̧or rem̧m̧an im rebōd. Remaron̄ barāinwōt kwaļo̧k ewi wāween an m̧akūtkūt ko im waanjon̄ak ko an ro jet kar jipan̄ er kāālet jim̧or eo.

Alma 40–42

Pinmuur eo an Jisōs Kraist ej kōm̧m̧an bwe karōk in lo̧mo̧o̧r eo tōprak.

• Alma ekar katakin Koriantōn m̧ool ko kōj aolep aikuj in meļeļe, ekoba m̧ool ko kōn unleplep in mour in, laļ eo an jetōb, jerkakpeje eo, im ekajet eo. Ļōmņak im bōk juon iaan katak ko an Alma im leļo̧k n̄an ro uwaan kūlaaj eo ruo minit ko n̄an aer etal Alma 40–42 (kajjojo ak ilo ruo ilo̧k ruo) im je jon̄an wōt maron̄ elōn̄ m̧ool ko kōn unin kōnono in ilo aer pukote. Ro uwaan kūlaaj eo remaron̄ kwaļo̧k ippān ro jet ak ippān kūlaaj ta eo rekar loe. Komaron̄ āliji wāween in n̄an unin kōnono ko n̄e eļap am̧ iien. Etke m̧ool kein rekar aorōk n̄an ļaddik eo nejin Alma Koriantōn bwe en meļeļe?

• Meļeļe ko an Alma kōn jekjek eo an jetōb ko ālkin mour in emaron̄ kabwilōn̄ kōļmenļo̧kjeņ eo an ro uwaan kūlaaj eo kōn aorōk eo an itok eo an Rilo̧mo̧o̧r eo im ukweļo̧k jān jerawiwi ko ad ilo mour in. Komaron̄ je Jim̧we (Ukweļo̧k) im Nana (Jab Ukweļo̧k ioon boot eo im kajjitōk ippān ro uwaan kūlaaj eo n̄an etale Alma 40:11–26 im kōllaajrake ilo ioon boot eo naan ko ak meļeļe ko me Alma ekar kōjerbali n̄an kōmeļeļeiki jekjek eo an kajjojo kūrub in armej ro ālkin aer mej. Ewi wāween an katak kein im̧we kōj n̄an ukweļo̧k? N̄an meļeļe ko reļļapļo̧k kōn ta ej waļo̧k ilo laļ eo an jetōb, lale 1 Piter 3:18–20; 4:6 im Katak im Bujen ko 138:29–37.

• Ta eo ej itok n̄an kōļmenļo̧kjeņ ko an ro uwaan kūlaaj eo am̧ ke rej ron̄jake naan kein “kar kōjepļaaktok” ak “jepļaaktok”? Kajjitōk ippāer n̄an etale Alma 41 kōn wāween an kar Alma kōjerbali naan kein. Ta meļeļe eo an kōn men kein? Ta eo enaaj kōjepļaaktok n̄an kōj? Etke emaron̄ bōlen jipan̄ n̄an loe karōk eo an Jemedwōj Ilan̄ āinwōt juon “karōk in jepļaaktok”? (eoon2).

• Jet iaan ro uwaan kūlaaj eo am̧ remaron̄ kwaļo̧k kajjitōk in me āinwōt epād ilo kōļmenļo̧kjeņ eo an Koriantōn—ebaj jim̧we ke ak jejjet ke bwe juon Anij eo eļap an iakwe enaaj kaje ajri ro Nejin? (lale Alma 42:1). Bōlen komaron̄ kajjitōk ippān ro uwaan eo n̄an kejōkļo̧kjeņ kōn wāween aer naaj uwaake kajjitōk in im pukot uwaak ko ilo Alma 42:7–26.

• Eļan̄n̄e kwoj en̄jake bwe ekkar, ro uwaan kūlaaj eo am̧ remaron̄ jeraam̧m̧an jān aer loe juon eoon ilo Alma 42 me remaron̄ kwaļo̧k juon jin̄a ak kōkkaļļe me ej kōmeļeļeiki etke jej aikuji Pinmuur eo an Rilo̧mo̧o̧r eo. Ro uwaan kūlaaj eo remaron̄ kwaļo̧k ta eo rekar jin̄aik, im ro jet uwaan kūlaaj eo remaron̄ kajjieon̄ pukote eoon eo ej bōk jikin. Innām remaron̄ ekōnono kōn ta eo rekar ekkatak kōn aorōk eo an katok eo an Rilo̧mo̧o̧r eo.

  

  Jemaron̄ bōk juon naan in kam̧ool kōn Jisōs Kraist āinwōt ad Rilo̧mo̧o̧r.

Kein Jipan̄ ko jet

Aorōk eo an jetōb ko ad eļap.

Sister Joy D. Jones ekar katakin:

“In m̧ōk kwaļo̧k aikuj eo n̄an lo oktak eo kōtaan naan kein ruo raorōk: aorōk im erreo. Rejjab juon wōt. Jetōb aorōk ej meļeļe n̄an kaorōk kōj make ilo wāween eo Jemedwōj Ilan̄ ej kaorōk kōj, ejjab āinwōt an laļ in kaorōk kōj. Aorōk eo ad eaar pād m̧okta jen ad kar itok n̄an laļ in. ‘Iakwe eo an Anij ejjeļo̧k jem̧ļo̧kin im enaaj n̄an indeeo.’

Ilo bar juon wāween, erreo ej bōke kōn pokake. Eļan̄n̄e jej jerawiwi, edik ad erreo, ak eban dikļo̧k ad aorōk! Jej wōnm̧aanļo̧k wōt n̄an ukweļo̧k im kajjieon̄ in āinwōt Jisōs kōn aorōk eo ad. Āinwōt Būreejtōn Brigham Young eaar katakin: “Eo diktata, im eļaptata jetōb eo kiiō ioon laļ in … ej aorōkin laļ in.’ Jekdo̧o̧n ta, jej aolep iien wōr aorōkid ilo mejān Jemedwōj Ilan̄” (“Value beyond Measure,” Ensign ak Liahona, Nov. 2017, 14).

An laļ in kalimjōk erreo ejjab āinwōt an Anij kalimjōke.

Sister Wendy Nelson ilo keidi wāween an laļ in watōk kadkad ko an mour in kanniōk—“m̧ōm̧ an kanniōk an laļ”—ippān ta eo eaar ņa etan “erreo in m̧are ekkapit in Anij”:

“Kōn m̧ōm̧ an kanniōk an laļ, aolep men rej kōm̧m̧an. Kōn erre an m̧are, eaibbojoj ilo kōjparok n̄an kowaan jabdewōt men aolep men—jān kajin n̄an al n̄an pija in alooj—men kein rej jum̧ae Jetōb eo, jetōb eo am̧, ak kōrā ak ļeo pāleem̧.

“Ilo an m̧ōm̧ an kanniōk an laļ ej ļōn̄ im kakkure iakwe, erreo an m̧are ej kwaļo̧k eļapļo̧k iakwe.

“M̧ōm̧ an kanniōk an laļ ej kajook em̧m̧aan im kōrā ro im ānbwinnier, ijoke jem̧jerā an m̧are ej kautiej em̧m̧aan im kōrā ro im kōjeraam̧m̧an ānbwin eo āinwōt juon wōņāān eo eļap an mour in kanniōk in.

“Kōn m̧ōm̧ an kanniōk an laļ, kajjojo armej remaron̄ en̄jake aer kōjerbale, kakkure, im eļaptata ajimakeke. Kōn erreo an m̧are, ripālele ro eļapļo̧k aer en̄jake ippān doon im iakwe, eļapļo̧k kōjparok im meļeļe.

“M̧ōm̧ an kanniōk an laļ ej kakkure im rube jem̧jerā ko. Jem̧jerā an m̧are ej kōkajoorļo̧k m̧are ko. Ej rie, kōmour, im kautiej mour ko an ripālele ro im m̧are eo aer. …

“Mour ippān doon ilo kanniōk ej erom̧ juon ļōmņak ej peek juon kōnke ej jāmin kakūrm̧ool kallim̧ur ko an. Anij ekar kapit jem̧jerā an m̧are ej aiboojoj im enaaj wōnm̧aanļo̧k n̄an indeeo kōn kōjparok bujen an ļeo im lio pālele” (“Love and Marriage” [worldwide devotional, Jan. 8, 2017], broadcasts.ChurchofJesusChrist.org).

Kōkōm̧anm̧anļo̧k Ad Katakin

Maanjabpopo m̧oktaļo̧k. “Ilo am̧ kōļmenļo̧kjeņ elmen an pedped in gospel eo kwoj katakin naaj kōjeraam̧m̧an ro uwaan kūlaaj eo am̧, ļōmņak im im̧we ko renaaj waļo̧k ilo aolepān mour eo am̧—ilo am̧ ilo̧k im jerbal, kōm̧m̧ani jerbal ko ilo m̧weeo, ak iiaio̧ ippān baam̧le ak ro m̧ōttam̧. Jab ļōmņak kōn m̧aanjabpopo ilo jetōb n̄e juon men kōm̧m̧an iien n̄an e ak āinwōt juon men kwoj aolep iien kōm̧m̧ane” (Teaching in the Savior’s Way, 12).