Kōjeraam̧m̧an ko jān Anemkwoj, jān Scott M. Snow

O̧kwōj 3–9

Alma 43–52

“Jutak Pen ilo Tōmak eo ilo Kraist”

Ijello̧kin etale m̧akūtkūt kein kar elmakotitok ijin, pukot im̧we eo am̧ make ilo am̧ lukkuun katak Alma 43–52 im ļōmņak kōn wāween n̄an jipan̄ ro uwaan kūlaaj eo loe katak ko katakin.

Je En̄jake ko Rej Im̧we Eok

Kajjitōk bwe ren Kwaļo̧k

Kajjitōk ippān ro uwaan kūlaaj eo n̄an kwaļo̧k ta eo rej ekkatak jān Alma 43–52, komaron̄ kajjitōk ippāer kōn wāween aer naaj uwaake juon armej eo ej ba, “Ijjab loe wāween an tariņae ko kōmeļeļeiki ilo Bok in Mormon eo jejjet ilo mour eo aō.”

Katakin Katak ko

Alma 43–52

Pata ko ilo Bok in Mormon rej katakin kōn tariņae ko ad ņae nana.

• Ilo katak an kajjojo armej im baam̧le ilo wiik in, ro uwaan kūlaaj eo remaron̄ kejōkļo̧kjeņ ak rekoote ļōmņak ko aer kōn wāween an kar Rinipai ro bōbrae er make ņae Rileman ro im wāween an Rilemen ro jodiki Rinipai ro. Eļan̄n̄e ro uwaan kūlaaj eo rekar kōm̧m̧ane menin ilo m̧weo, kajjitōk ippāer n̄an kwaļo̧k ta eo rekar loe. Ak komaron̄ leļo̧k n̄an ro uwaan kūlaaj eo iien aer pukot en̄jake kein ilo iien kūlaaj kōjerbale eoon ko loe ilo laajrak eo an wiik eo ilo Itok, Ļoor Eō—N̄an Kajjojo Armej im Baam̧le ko. Ilo an ro uwaan kūlaaj eo kwaļo̧k ta ko rekar loi, rōjan̄ er n̄an ekōnono kōn wāween aer maron̄ ļoor waanjon̄ak eo an Rinipai ro bōbrae er make ņae men eo enana im ewi wāween ad maron̄ kile jodik ko an Setan ilo jetōb n̄an kōj.

Alma 46:11–22

Eļan̄n̄e jej kajoor ilo bōbraeik tōmak eo ad, jemaron̄ im̧we ro jet n̄an tōmak.

• Ewi wāween am maron̄ jipan̄ ro uwaan kūlaaj eo ļoor waanjon̄ak eo an Moronai ilo lukkuun dāpij tōmak eo aer ilo gospel eo em̧ōj an jepļaaktok an Jisōs Kraist? Ro uwaan kūlaaj eo remaron̄ riiti Alma 46:11–22 im kalikkari ta eo Moronai ekar kōm̧m̧ane im ta eo ekar katakin me ekar im̧we armej ro an eļapļo̧k ilo tiljek. Komaron̄ je men keni ioon boot eo ium̧wein heading eo Waanjon̄ak eo an Moronai. Innām komaron̄ kajjitōk ippān ro uwaan kūlaaj eo n̄an kejōkļo̧kjeņ kōn m̧akūtkūt ko an Moronai im elmakoti ta eo jemaron̄ kōm̧m̧ane rainin n̄an bōbrae tōmak ko ad. Komaron̄ je en̄jake ko ium̧win naan eo Peran in Jojomare Gospel eo Rainin. Ta m̧ool ko im aorōk ko rikanaan eo ad ekar katakin kōj me jemaron̄ katakin im bōbrai?

• Ewi wāween am̧ maron̄ jipan̄ ro uwaan kūlaaj eo kōjerbale ta eo Moronai ekar kōm̧m̧ane ippān taitōl in anemkwoj n̄an mour ko aer make? Kajjitōk ippāer n̄an riiti Alma 46:11–22 im kwaļo̧k m̧ool ko me Moronai ekar katakin im kajjitōkin armej ro an n̄an rie. Ta m̧ool ko im aorōk ko ritōl ro ad ilo Kabun̄ in rej kōmejajaiki ilo raan kein ad? (Komaron̄ etale jet iaer ilo N̄an Kōkajoorļo̧k Jodikdik ro, “Baam̧le Eo: Juon Naan in Kean̄ n̄an Laļ in,” ak ennaan ko an kweilo̧k eo eļap rekāāltata.) Ta apan̄ ko ippād ilo ad jojom̧ar e tōmak eo ad ilo laļ in rainin? Ta eo jemaron̄ ekkatak jān waanjon̄ak eo an an Moronai? Leļo̧k n̄an ro uwaan kūlaaj eo iien em̧m̧an n̄an aer kōm̧m̧ane taitōļ in anemkwoj eo aer make me emaron̄ kakeememej er n̄an peran ilo mour im jojomare e tōmak eo aer.

  

  Minerva K. Teichert (1888–1976), Defense of a Nephite City, 1935, oil on masonite, 36 x 48 inches. Brigham Young University Museum of Art

Alma 47

Setan ej kapoik im moņe kōj jidik kōn jidik.

• Kūlaaj eo am̧ emaron̄ jeraam̧m̧an jān aer ekkatak Alma 47, eo ej kwaļo̧k wāween an Amalickiah kobaik jab m̧ool n̄an ta ko Setan ej kōm̧m̧ane n̄an moņe kōj . Komaron̄ jinoe ilo am̧ kajjitōk ippān juon bwe en kwaļo̧k ilo tukaduin bwebwenato eo loe ilo Alma 47. N̄an kalimoik, komaron̄ kajjitōk ippān ruo uwaan kūlaaj eo n̄an pijaiki bwe er rej Amalickiah im Lehonti im kwaļo̧k bwebwenato eo. Ta eo Amalickiah ro raar kōm̧m̧ane me ej kakeememej kōj kōn men ko Setan ej kōm̧m̧ani n̄an kapo im moņe kōj? Rōjan̄ ro uwaan kūlaaj eo n̄an lale kajjojo eoon ilo aer ekōnono kōn kajjitōk in. Kout eo ilo “Kein Katak ko Jet” ekitbuuj bar juon waanjon̄ak kōn wāween an Setan moņe kōj. Ta naan in rōjan̄ eo jemaron̄ leļo̧k n̄an ro jet n̄an jipan̄ er ekkōļ kōn wāween an Setan kapoik kōj rainin? Ta eo jemaron̄ kōm̧m̧ane n̄an kōjparoke kōj make?

Alma 48:7–17

Ilo ad kajjieon̄ tiljek āinwōt Moronai, jenaaj erom̧ļo̧k āinwōt Rilo̧mo̧o̧r eo.

• Juon iien ekōnono kōn m̧wil ko an Moronai rekar maron̄ im̧we ro uwaan kūlaaj eo n̄an kajjieon̄ ļoor waanjon̄ak eo an. Komaron̄ jinoe ilo am̧ kwaļo̧k juon pija in Moronai, āinwōt in ilo laajrak eo an wiik in ilo Itok, Ļoor Eō—N̄an Kajjojo Armej im Baam̧le ko. Innām kajjitōk ippān ro uwaan kūlaaj eo n̄an katak Alma 44:3–4 im 48:7–13 je ioon boot eo naan kein im meļeļe kein rej kōmeļeļeiki Moronai. Komaron̄ riiti ippān doon Alma 48:17 im ekōnono kōn wāween an m̧wil ko an Moronai, āinwōt ko im rej ellaajrak ioon boot eo, kōtļo̧k an anjo̧ jān kareel eo an Setan im erom̧ āinwōt Jisōs Kraist. Ewi wāween ad maron̄ āinwōt Moronai?

Alma 48:7–9; 49:1–9; 50:1–6

Jemaron̄ kōkajoorļo̧k kōj make im baam̧le ko ad jān rikapo eo.

• Ro uwaan kūlaaj eo remaron̄ in jeraam̧man jān aer ron̄jake an doon kōnono kōn wāween aer kōjparok er make im baam̧le ko aer ņae moņ an Setan im kapo ko. N̄an im̧we juon iien ekōnono, komaron̄ in riit ippān doon Alma 48:7–9; 49:1–9; im 50:1–6. Ilo ad ļōmņak kōn aikuj eo ad kōn likōbejn̄ak an jetōb ņae jerawiwi, jemaron̄ ekkatak jān kijejeto ko an Rinipai ro ilo jojomar e er make? Ewi wāween ad maron̄ kalōk likōbejn̄ak an jetōb n̄an kōjparok kōj make im baam̧le ko ad ņae jerawiwi im kareel ko renana? Rōjan̄ ro uwaan kūlaaj eo n̄an kwaļo̧k ļōmņak ko me rekar jerbal er. Etke ej aorōk n̄an “jab kabōjrak m̧aanjabpopo ko”? (Alma 50:1).

Kōketak Ekkatak ilo Mweo

Juon wāween n̄an rōjan̄ ro uwaan kūlaaj eo n̄an riiti Alma 53–63 emaron̄ in jiron̄ er bwebwenato eo ilo jebta ko remaron̄ im̧we er im baam̧le ko aer n̄an maron̄ pokake im ejaake tōmak eo ekajoor.

Kein Jipan̄ ko jet

Waļo̧k ko jān leļo̧k n̄an kapo ko reddik.

N̄an katakin menin “jerawiwi ko reļļap rej deļo̧n̄e mour ko ad ilo ad leļo̧k m̧okta n̄an kapo ko reddik,” Būreejtōn Spencer W. Kimball ekar kwaļo̧k bwebwenato in ekadu:

“[Juon] kameļ im eo nejin kameļ eo … rekar ito itak kijoone āne jam̧dān eo epokpok ke juon ļan̄ ekar jarjar. Rito itak eo ekar m̧ōkaj im kajutak im̧ōn kōppād eo im deļo̧n̄ ilowaan, kilōke nuknuk eo n̄an kōjparok e make jān an m̧wijm̧wij, irir mejān jān ļan̄ eo. Kamel eo aaet ekar pād wōt namōj, im ilo an kōto eo enana kadļo̧k ānbwinnin kōn pok im ilowaan mejān im po̧tin ekar make loe an m̧ōjņo̧ im kajjitōk bwe en deļo̧n̄ n̄an lowaan em̧ nuknuk eo.

“‘Ewōr wōt ruum̧ n̄an n̄a make,’ rito itak eo ekar ba.

“‘Ak bōlen imaron̄ wōt kadeļo̧n̄e wōt po̧tū bwe in maron̄ menonoik mejatoto eobrak kōn po̧k?’ Kamel eo ekar kajjitōk.

“‘Ekwe, bōlen komaron̄ in kōm̧m̧ane menin,’ rito itak eo ekar uwaak, im kōppeļļoke nuknuk eo jidik wōt im po̧ti eo eaitok an kameļ eo ekar deļo̧n̄. Ewi wāween an kameļ eo ineem̧m̧an kiiō! Ak ejjab etto kameļ eo ekar jino m̧ōk kōn pok ko ilo mejān im lo̧jiln̄in … :

“‘Peltok in pok in ej āinwōt juon ainikien enana ioon bōra. Imaron̄ ke kadeļo̧n̄e bōra?’

“Bar juon alen, rito itak eo ekar ļōmņak bwe wāween eo eban kōm̧m̧an jorrāān n̄an e, bwe bōran kameļ eo ej wōr jikin ilo lōn̄in em̧ nuknuk eo me ejjab kōjerbale. Kōn menin kameļ eo ekar kadeļo̧n̄e bōran im menin mour in ekar bar juon alen babtoa—ak ekar ium̧win wōt juon iien ekadu.

“‘Baj tum̧aanū wōt,’ ekar kajjitōk, im bar juon alen rito itak eo ekar kōtļo̧k im ejjab etto aeran kameļ eo im nee ko ņeen rekar pād ilowaan em̧ nuknuk eo. Āliktata, kōn ejja jekjek eo ilo an akweļap im jipan̄, dilepān kameļ eo, aolepān tum̧aanin im aolepān ekar deļo̧n̄ ilowaan em̧ nuknuk eo. Ak kiiō ekar lukkuun obrak n̄an ruo, im kameļ eo ekar bwijlo̧ke rito itak eo namōjļo̧k n̄an kōto eo im ļan̄ eo” (Teachings of Presidents of the Church: Spencer W. Kimball [2006], 106–7).

Kōkōm̧anm̧anļo̧k Ad Katakin

Kūr eo am̧ ej im̧we. “Kūr eo am̧ n̄an katakin ej itok jān Irooj. … Kwaar ekkapit ium̧win tōl an ro rej kabwijer kii ko an priesthood eo; kōn menin, ewōr am̧ jim̧we n̄an bōk revelesōn eo am̧ make im kwoj aikuji n̄an tōprak. Kōjeraam̧man kein rej am̧ ilo am̧ pukoti, tiljek wōt, im kajjieon̄ erreo” (Teaching in the Savior’s Way, 5).