“O̧kwōj 3–9. Alma 43–52: ‘Jutak Pen ilo Tōmak eo ilo Kraist,’” Itok, Ļoor Eō—N̄an Kajjojo Armej im Baam̧le Ko: Bok in Mormon 2020 (2020)
“O̧kwōj 3–9. Alma 43–52,” Itok, Ļoor Eō—N̄an Kajjojo Armej im Baam̧le ko: 2020
N̄an Kōjeraam̧m̧an ko an Anemkwōj, jān Scott M. Snow
O̧kwōj 3–9
Alma 43–52: “Jutak Pen ilo Tōmak eo ilo Kraist.”
“Jutak Pen ilo Tōmak eo ilo Kraist”
Emaron̄ alikkar bwe iien ko kar kōmeļeļeik ilo Alma 43–52 rejjab lukkuun in jejjet n̄an kwe. Bōtaab āinwōt ilo aolep jeje ko rekwojarjar, ewōr juon an Irooj ennaan n̄an kwe. Lukkuun jar n̄an kappukōte.
Je En̄jake ko Rej Im̧we Eok
N̄e jej riiti naan kein ilo jino in Alma jebta 43—“Im kiiō ij ro̧o̧l n̄an bwebwenato eo kōn tariņae ko ikōtaan riNipai ro im riLeman ro”—Ejejjet n̄an kajjitōk etke Mormon eaar kobaik bwebwenato kein kōn tariņae ke eaar jab ļap jikin ioon pileij ko (lale Naan ko an Mormon 1:5). Em̧ool bwe elōn̄ ad tariņae ko ilo raan kein āliktata, bōtaab ewōr aorōkin ilo naan ko an eļapļo̧k jān kōmeļeļe ko kōn kōtōbalbal eo im eo an pata. Naan ko an rej barāinwōt kōpooj kōj n̄an pata eo me “jaar aolep deļo̧n̄e” (Hymns, no. 250), pata eo jej tariņae kajjojo raan ņae kajoor ko an nana. Pata in ej lukkuun m̧ool in, im ta eo ej waļo̧k jāne ejelet mour ko ad indeeo. Āinwōt RiNipai ro, jej “ketak kōn juon jibadbad eo em̧m̧anļo̧k,” eo ej “ad Anij, ad kabun̄, im anemkwōj, im ad aenōm̧m̧an, [baam̧le ko] ad.” Moronai eaar ņa etan menin “jibadbad eo an Rikūrijin ro,” ejja jibadbad eo jej tariņae kake rainin (Alma 43:45; 46:12, 16).
Ļōmņak ko n̄an Ekkatak Jeje ko Rekwojarjar Ippam̧ Make
Alma 43–52: “Jutak Pen ilo Tōmak eo ilo Kraist.”
Pata ko ilo Bok in Mormon rej katakin eō kōn pata ko aō ņae nana.
Riit kōn tariņae ko ikōtaan RiNipai ro im RiLeman ro emaron̄ ļapļo̧k meļeļeier n̄an kwe eļan̄n̄e kwoj kalimjōk men ko reier wōt juon n̄an pata ko ilo jetōb eo am̧ make. Ilo am̧ riiti Alma 43–52, kile ta eo RiNipai ro raar kōm̧m̧ane me ekar kōm̧m̧an aer jeraam̧m̧an (ak jerata). Innām kejōkļo̧kjeņ kōn ekōjkan am̧ maron̄ kōjerbal ta eo kwoj katak n̄an jipan̄ eok anjo̧ ioon pata ko am̧ ilo jetōb. Ilo am̧ ekkatak eoon ko āinwōt kein rej ellaajrak, je ļōmņak ko am̧ kōn ekōjkan am̧ maron̄ ļoor waanjon̄ak eo an Rinipai ro.
-
Alma 43:19. Rinipai ro raar pojak kōn kein tariņae. (Imaron̄ kajjieon̄ kōpooj eō make kōn kein tariņae ko ilo jetōb).
-
Alma 43:23–24. Raar kappukōt tōl eo an rikanaan eo.
Barāinwōt kile ekōjkan an RiLeman ro im rikejdāt ro an RiNipai kakkure RiNipai ro. Men kein remaron̄ kakkōl kwe kōn ekōjkan an rijum̧ae eo maron̄ kajjieon̄ jotiki eok. Ilo am̧ ekkatak, je ekōjkan an Setan maron̄ luko̧rko̧r eok ilo ejja jekjek ko wōt:
-
Alma 43:8. Zerahemnah eaar kappukōt n̄an kalluik armej ro an bwe en maron̄ wōr an kajoor ioer. (Ke iaar illu ippān armej ro jet, iaar leļo̧k n̄an Setan kajoor n̄an anjo̧ ioō.)
-
Alma 43:29. Rileman ro raar kōņaan bōktok RiNipai ro n̄an kōm̧akoko.
Bōbrae Jikin Kweilo̧k an RiNipai, jān Minerva K. Teichert
Ilo aō kajjieon̄ n̄an erom tiljek āinwōt Moronai, enaaj ļapļo̧k aō erom āinwōt Rilo̧mo̧o̧r eo.
Kwoj ke kōņaan bwe kwon kar erom āinwōt Rilo̧mo̧o̧r im kōm̧ōjņo̧ikļo̧k kajoor eo an rijum̧ae eo ilo mour eo am̧? Juon wāween n̄an ļoor kakkōl eo ilo Alma 48:17 n̄an erom “āinwōt Moronai.” Kanooj lale m̧wil ko im m̧akūtkūt ko an Moronai me rej kōmeļeļeik ilo aolepān Alma 43–52 bōtaab eļap tata ilo 46:11–28 im 48:7–17. Ta eo ej kabwilōn̄ eok kōn menin “em̧m̧aan ekajoor”? Ekōjkan an m̧wil ko im m̧akūtkūt ko maron̄ āinwōt an kōm̧ōjņo̧ik kajoor eo an devil ilo mour eo am̧? Kejōkļo̧kjeņ kōn ta eo kwoj en̄jake im̧we n̄an kōm̧m̧ane n̄an ļoor waanjon̄ak eo an Moronai im erom āinwōt Rilo̧mo̧o̧r eo.
Setan ej kapo im mo̧ne kōj jidik kōn jidik.
Setan ejeļā bwe elōn̄ wōt iaad rejjab m̧ōņōņō n̄an kōm̧m̧ani jerawiwi ko reļļap ak tōmak riab ko reļļap. Kōn menin, ej kōjerbal riab ko rejjab alikkar im kapo ko n̄an tōlļo̧k kōj n̄an jerawiwi ko me āinwōt reddik—lōn̄ in wōt eo ej ļōmņak jenaaj būki. Ej wōnm̧aanļo̧k wōt n̄an kōm̧m̧ane menin m̧ae iien jej jebwābwe jān mour jim̧we.
Komaron̄ lo jon̄an in ilo bwebwenato eo kōn Amalikaia m̧oņe Leionti, loe ilo Alma 47. Ilo am̧ ekkatak, kejōkļo̧kjeņ kōn ekōjkan an Setan maron̄ in kajjieon̄ n̄an m̧oņe eok, āinwōt kar kōmeļeļeik jān Elder Robert D. Hales.
“Rijeļā m̧oņ eo Amalikaia eaar libūjerjere Leionti n̄an ‘wallaļļo̧k’ im ioone ilo kom̧laļ eo. Ak ke Leionti eaar ilo̧k jān ijo em̧man, kar baijini ‘jidik kōn jidik’ m̧ae iien eaar mej, im jarin tariņae eo an raar pād ilo pein Amalikaia (lale Alma 47). Kōn iakwelel ko im ņa ruwōn ko, jet armej rej kaal kōj n̄an ilo̧k jān ijo em̧m̧an. Ijo em̧m̧an ej ijo meram eo ej. … Ej ijo eaenōm̧m̧an” (“Christian Courage: The Price of Discipleship,” Ensign ak Liahona, Nob. 2008, 74).
Lale barāinwōt 2 Nipai 26:22; 28:21–22.
Ippān doon ej bōktok ineem̧m̧an.
Ilo jekjek ko kar je ilo jinon in Alma 50, eaar āinwōt RiLeman ro renaaj kar luuji pata eo ņae RiNipai ro. Kein tariņae, kattōrak ko, im kijejeto in ippān doon ko an RiNipai ro ekōm̧m̧an aer āinwōt ban luuj (lale Alma 49:28–30 im 50:17–20). Bōtaab Rileman ro ejjab to raar bōk elōn̄ iaan jikin kweilo̧k ko aer—ekoba ro me Moronai eaar kapenļo̧k (lale Alma 51:26–27). Ekōjkan an kar waļo̧k? Kappukōt uwaak ko ilo am̧ riiti jebta kein (lale eļap tata Alma 51:1–12). Kejōkļo̧kjeņ kōn ta kakkōl ko me emaron̄ wōr ilo bwebwenato in n̄an kwe im baam̧le eo am̧.
Ļōmņak ko n̄an Ekkatak Jeje ko Rekwojarjar an Baam̧le im Nokon in Jota eo an Baam̧le
Ilo am̧ riiti jeje ko rekwojarjar ippān baam̧le eo am̧, Jetōb emaron̄ jipan̄ eok jeļā ta pedped in katak ko n̄an kwaļo̧ki im kōnono kake n̄an tōpar aikuj ko an baam̧le eo am̧. Erkein rej jet iaan ļōmņak ko.
Alma 45:2–8
Riiti eoon kein ippān doon emaron̄ im̧we baam̧le eo am̧ n̄an kōm̧m̧ane juon-ļo̧k-juon bwebwnato ko kōn gospel eo ippān ro uwaan baam̧le eo, āinwōt an kar Alma kōm̧m̧ane ippān Hilamōn.
Alma 46:12–22
Unin tōl in anemkwōj eo eaar im̧we RiNipai ro n̄an kōjparok kein ko an Anij im bōbrae tōmak eo aer. Ta ej im̧we eok n̄an kōm̧m̧an ejja āinwōt in? Bōlen baam̧le eo am̧ emaron̄ ejake taitōļ in anemkwōj eo ami make—juon būļāāk ak m̧ōttan nuknuk kōn naan ko ak pija ko me rej kakeememej kom̧ n̄an kōjparok kien ko an Anij kajjojo raan.
Alma 48:7–9; 49:1–9; 50:1–6
Ilo an baam̧le eo am̧ riit kōn kein kapenļo̧k ko an RiNipai ro, komaron̄ ekōnono kōn ekōjkan ami kapenļo̧k m̧weo im̧ōmi ņae rikapo eo. Ajri ro remaron̄ lem̧ōņōņō ilo kalōk juon kein kapenļo̧k jān men ko āinwōt jea im būļan̄kōj ko, ak remaron̄ jin̄aik ta eo rej ļōmņake ewi jekjek in kein kapenļo̧k ko an RiNipai.
Alma 51:1–12
Ta eo eoon kein rej katakin kōn ta eo emaron̄ waļo̧k ilowaan baam̧le eo ad n̄e jej akweel? Ekōjkan ad kōļapļo̧k ippān doon eo ad?
Kōn elōn̄ļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.
Kōkōm̧anm̧anļo̧k Am̧ Ekkatak Ippam̧ Make
Kajjitōk kajjitōk ko ilo am̧ ekkatak. Ilo am̧ ekkatak jeje ko rekwojarjar, kajjitōk ippam̧ make kajjitōk ko me remaron̄ jipan̄ eok kejekļo̧kjeņ kōn ewi jon̄an an em̧m̧an am̧ mour kōn ta eo kwoj riiti.
Taitōļ in Anemkwōj eo, jān Larry Conrad Winborg