“O̧kwōj 17–23. Helaman 1–6: ‘Ejm̧aan in Ad Ripinmuur,’” Itok, Ļoor Eō—N̄an Kajjojo Armej im Baam̧le ko: Bok in Mormon 2020 (2020)
“O̧kwōj 17–23. Hilamōn 1–6,” Itok, Ļoor Eō—N̄ān Kajjojo Armej im Baam̧le ko: 2020
O̧kwōj 17–23
Hilamōn 1–6
“Ejm̧aan in Ad Ripinmuur”
Pedped in katak ko ilo unin tōl in emaron̄ jipan̄ ekkatak eo am̧ kōn Hilamōn 1–6, bōtaab jab kōtļo̧k aer kōm̧m̧an jon̄am̧. Jetōb Kwojarjar enaaj tōl eok n̄an m̧ool ko kwoj aikuj in ekkatak.
Je En̄jake ko Rej Im̧we Eok
Bok in Hilamōn ej je jim̧or anjo̧ ko im jerata ko ibwilijin RiNipai ro im RiLeman ro. Ej ijjino kōn “juon apan̄ eļap ilubwiljin armej in riNipai ro” (Hilamōn 1:1), im jorāān ko ejjab bōjrak aer itok ilo aoelapān ļo̧o̧k eo. Ijin jej riit kōn jorrāān ko ilo kien, kumi in riko̧o̧t ro, jum̧ae rikanaan ro, im utiej bōro im jab tōmak ilo aoelepān āne eo. Bōtaab jej barāinwōt lo waanjon̄ak ko āinwōt Nipai im Liai im “ ro rettā burueer iaan armej ro,” ro raar jab mour wōt ak raar romaak ilo jetōb (Hilamōn 3:34). Elmen aer kar kōm̧m̧ane menin? Ekōjkan aer kar kajoor wōt ilo an jukjuk in pād eo aer kar jino m̧ōjņo̧ļo̧k im jepepļo̧k? Ejjab wāween eo wōt jabdewōt iaad jej kajoor wōt ilo “lan̄ rekajoor” devil eo ej jilkintok n̄an “bun̄it [kōj]”—kōn kalōk mour ko ad “ioon ejm̧aan in ad RiPinmuur, eo ej Kraist, eo Nejin Anij, … pedped eo eļan̄n̄e armej rej ekkal ioon rej jamin bun̄.” (Helaman 5:12).
Ļōmņak ko n̄an Ekkatak Jeje ko Rekwojarjar Ippam̧ Make
Utiej bōro ej kōjpeļļo̧k eō jān Jetōb eo im kajoor eo an Irooj.
Ilo am̧ riiti Hilamōn 1–6—im aolepān Bok in Mormon—komaron̄ kile juon jon̄ak in m̧wil in RiNipai ro: N̄e RiNipai ro rej wānōk, Anij ej kōjeraam̧m̧an er im rej bōk eļap jeraam̧m̧an. Ālkin juon iien, rej jino uteij bōro im nana, kōm̧m̧ani kāālet ko me rej tōlļo̧k n̄an kakkure im en̄taan. Innām rej bar kōttāik būruwier im im̧we n̄an ukweļo̧k, im Anij ej kōjeraam̧m̧an er bar juon alen. Jon̄ak in ej āliji e make ekanooj emakijkij jon̄an jet armej rej ņa etan “ālijii in utiej bōro.”
“āliji in uteij bōro.”
Pukōt waanjon̄akko kōn āliji in uteij bōro in ilo am̧ riit. Em̧ool komaron̄ kōņaan kōkaļļeik waanjon̄ak ko n̄e kwoj loi. Erkein rej jet kajjitōk ko n̄an jipan̄ eok meļeļe jon̄an in im lale ekōjkan an maron̄ jerbal n̄an eok:
-
Ta kein kam̧ool ko an utiej bōro eo kwoj lo ibwilijin Rinipai ro? (lale, n̄an waanjon̄ak, Hilamōn 3:33–34; 4:11–13). Kwoj ke lo waanjon̄ak ko an utiej bōro eo reierļo̧k wōt ilo kwe make?
-
Ta tōprak ko an uteij bōro im naan? (lale Hilamōn 4:23–26). Ta tōprak ko an ettā im ukweļo̧k? (see Hilamōn 3:27–30, 35; 4:14–16).
-
Ta eo Hilamōn eaar kōņaan bwe ļōm̧aro nejin ren keememeje? (lale Helaman 5:4–12). Ekōjkan an keememej m̧ool kein maron̄ jipan̄ eok joļo̧k utiej bōro?
Lale barāinwōt Dieter F. Uchtdorf, “Pride and the Priesthood,” Ensign ak Liahona, Nob. 2010, 55–58.
Imaron̄ in kōkwojarjar ilo aō leļo̧k ankilaō n̄an Anij.
Ilo Hilamōn 3, Mormon eaar kōmeļeļeik ilo juon iien ke Kabun̄ eo eaar kanooj in jeraam̧m̧an im kar kōjeraam̧m̧an jon̄an em̧ool ritōl ro raar bwilōn̄ (lale eoon 24–32). Āliktata jet armej raar utiej bōro, ilo an ro jet eddōkļo̧k “kajoorļo̧k im kajoorļo̧k ilo aer ettā, … em̧ool n̄an karreoik im kokwōjarjare būruweer,” (Hilamōn 3:35). Kile ilo eoon 34–35 ta eo armej ro eļapļo̧k aer ettā raar kōm̧m̧an n̄an erom ekwojarjar. Ekōjkan an men kein jipan̄ eok erom ekwojarjar? Emaron̄ jipan̄ n̄an jeļā bwe Unin Tōl eo n̄an Jeje ko Rekwojarjar (scriptures.ChurchofJesusChrist.org) ej kōmeļeļeik kōkwojarjar āinwōt “jekjek eo n̄an anemkwōj jān jerawiwi, erreo, im wānōk kōn Pinmuur eo an Jisōs Kraist.” Ta eo kwoj en̄jake kar im̧we eok n̄an kōm̧m̧an waanjon̄ak kein an rikaļoor rein? Ta eo kwoj kōm̧m̧ane n̄an leļo̧k ankilam̧ n̄an Anij?
Tōmak eo aō ej kajoorļo̧k jān “ļap in kein kam̧ool ko [em̧ōj aō] kar būki.”
Elder Jeffrey R. Holland eaar ba juon iien kōn tōmak ko aer: “kom̧ eļapļo̧k ami tōmak jen ami ļōmņak kōnke ta eo Bok in Mormon ej ņaetan “ļap in kein kam̧ool ko raar būki’ [Hilamōn 5:50]. … Leen ko an ko̧jpeļ eo rej kam̧ool ilo mour ko an Armej ro Rekwojarjar ilo Raan-ko Āliktata aolep jikin” (“Irooj, Ij Tōmak,” Ensign ak Kweilo̧k eo Eļap, Māe 2013, 94). Ilo am̧ riiti eoon kein, ļōmņak kōn kein kam̧ool ko me Irooj eaa liwaj n̄an kwe. N̄an waanjon̄ak, bōlen kwojjan̄in kar lukkuun in ron̄ ainikien Irooj, bōtaab em̧ōj am̧ en̄jake “juon unoojdikdik” jān Jetōb Kwojarjar eo me “eaar kabijļo̧k em̧ool n̄an lukkuun bōro”? (Hilamōn 5:30; lale barāinwōt KB 88:66). Bōlen em̧ōj an kar pād ilo marok, kar jar n̄an Anij kōn eļapļo̧k tōmak, im kar “obrak kōn m̧ōņōņō eo epen kōnono kake” (Hilamōn 5:40–47). Ta en̄jake ko jet raar kōkajoorļo̧k tōmak eo am̧ ilo Kraist im gospel eo An?
Ļōmņak ko n̄an Ekkatak Jeje ko Rekwojarjar an Baam̧le im Nokon in Jota eo an Baam̧le
Ilo am̧ riiti jeje ko rekwojarjar ippān baam̧le eo am̧, Jetōb emaron̄ jipan̄ eok jeļā ta pedped in katak ko n̄an kwaļo̧ki im kōnono kake n̄an tōpar aikuj ko an baam̧le eo am̧. Erkein rej jet iaan ļōmņak ko.
Hilamōn 3:27–30
Ke rikanaan Mormon eaar kōkadukļo̧k ļo̧o̧k ko rekwojarjar, ejjab ikutkut in an kar kōjerbal naan eo “āindein jej lo” n̄an kōmejajaik aorōk eo an m̧ool ko. Ta eo eaar kōņan bwe jān leo ilo Hilamōn 3:27–30? Ilo aolepān ekkatak ko am̧ wiik in, komaron̄ bōjrak en jab emakijkij n̄an kajjitōk ippān ro uwaan baam̧le eo am̧ ekōjkan aer kar kadedeļo̧k eoon eo “im āindein jej lo” ikkijien ta eo raar riiti. Ta m̧ool ko rej kōņaan kōmejajaiki?
Hilamōn 5:6–7
Jim̧m̧an Būreejtōn George Albert Smith eo emej George A. Smith eaar waļokļo̧k n̄an e ilo juon ettōņak im kajjitōk, “Ikōņaan jeļā ta eo em̧ōj am̧ kōm̧m̧ane kōn eta.” Būreejtōn Smith eaar uwaak, “Ijjan̄in de kōm̧m̧an jabdewōt men kōn etam̧ me kwoj aikuj in jook kake” (in Teachings of Presidents of the Church: George Albert Smith [2011], xxvi). Ālkin riiti Hilamōn 5:6–7, bōlen komaron̄ kōnono n̄an ro uwaan baam̧le eo am̧ kōn keememej im kautiej āt ko jej etōņaki, ekoba āt eo etan Rilo̧mo̧o̧r.
Hilamōn 5:12
N̄an jipan̄ baam̧le eo am̧ pijaikļo̧k ta meļeļe in n̄an bōk “juon pedped em̧ool,” bōlen komaron̄ kalōk juon em̧ edik ippān doon im likūt i ioon elōn̄ kain pedped ko. Innām komaron̄ ejake juon “kōto ekajoor” ilo am̧ būttūki dān eo ioon im kōjerbal juon deel ak kein kōm̧ōrāre bar n̄an ejaak kōto. Ta eo ekar waļo̧k n̄an m̧weo ke eaar pād ioon pedped ko rokoktaktak? Ekōjkan an Jisōs Kraist āinwōt “juon pedped em̧ool” ilo mour ko ad?
Hilamōn 5:29–33
Ta en̄jake ko em̧ōj ad būki ilo ad kile ainikien Anij ilo mour ko ad?
Kōn elōn̄ļo̧k meļeļe ko n̄an katakin ajri ro, lale unin tōl eo an wiik in ilo Itok,Ļoor Eō—N̄an Būraimere.
Kōkōm̧anm̧anļo̧k Am̧ Ekkatak Ippam̧ Make
Kijenmej ippam̧ make. Juon pedped an tōmak ej ekkaļ juon m̧ōttan ilo juon iien. Eļan̄n̄e kwoj lo jet katak ko reppen n̄an meļeļe kiiō, kijenmej wōt. Lōke bwe meļeļe eo enaaj itok ilo am̧ kalōk pedped eo am̧ ioon Jisōs Kraist kōn kōjerbale tōmak im ekkatak ilo tiljek.
© Bok in Mormon n̄an Rūriiti ro Reddik, Nipai im Liai kar Jepooļ kōn juon joor in kijeek, jān Briana Shawcroft; maron̄ jab kōm̧m̧an kape