“Juļae 27–O̧kwōj 2. Alma 39–42: ‘Karōk in M̧ōņōņō Eļap,’” Itok, Ļoor Eō—N̄an Kajjojo Armej im Baam̧le ko: Bok in Mormon 2020 (2020)
“Juļae 27–O̧kwōj 2. Alma 39–42,” CItok, Ļoor Eō—N̄an Kajjojo Armej im Baam̧le ko: 2020
Kōrā, Etke Kwōj Jan̄? jān Mark R. Pugh
Juļae 27–O̧kwōj 2.
Alma 39–42
“Karōk in M̧ōņōņō Eļap”
Ilo am̧ riiti Alma 39–42, Jetōb Kwojarjar eo emaron̄ lewaj n̄an eok kōļmenļo̧kjeņ ko kōn men ko me rej waļo̧k ilo mour eo am̧.
Je En̄jake ko Rej Im̧we Eok
N̄e juon eo jej iakwe eaar kōm̧m̧ane juon bōd eo eļap, emaron̄ in pen n̄an jeļā ekōjkan uwaake. M̧ōttan eo kōn ta eo ekōm̧m̧an bwe Alma 39–42 en kanooj in aorōk ej bwe ej kwaļo̧k ekōjkan an Alma—juon rikaļoor an Jisōs eo eaar juon iien eaar wōr an make jerawiwi ko rekanooj eļļap n̄an ukweļo̧k jāni—eaar kōtōbalbale kain jekjek eo. Ļeo nejin Alma Koriantōn eaar kōm̧m̧ane jerawiwi in m̧ōm̧ an kanniōk, im Alma, āinwōt ekkā an kōn kōm̧m̧ane, kar lōke kajoor eo em̧ool an katak eo em̧ool n̄an kōketak ukweļo̧k (lale Alma 4:19; 31:5). Ilo jepta kein, jej lale an Alma kijin̄en̄e ilo liaakeļo̧k jerawiwi im an jouj im iakwe n̄an Koriantōn. Im āliktata, jej kile lōke eo an Alma bwe Rilo̧mo̧o̧r “Enaaj itok n̄an bōkļo̧k [jero̧wiwi ko] ajeeded naan ko rem̧m̧an kōn lo̧mo̧o̧r” n̄an ro rej ukweļo̧k (Alma 39:15). Kōn meļeļe eo bwe Koriantōn ilo jem̧ļo̧k in eaar bar ro̧o̧l n̄an jerbal eo an jerbal in karejar eo (lale Alma 49:30) emaron̄ letok n̄an kōj kōjatdikdik eo n̄an jeorļo̧k bōd im lo̧mo̧o̧ren n̄e jej “inepata” (Alma 42:29) kōn jerawiwi ko ad make ak jerawiwi ko an juon eo jej iakwe.
Ļōmņak ko n̄an Ekkatak Jeje ko Rekwojarjar Ippam̧ Make
Jerawiwi an m̧ōm̧ an kanniōk e juon kajjōjō imaan mejān Irooj.
N̄an jipan̄ ļeo nejin kōn aorōk tata eo kōn jerawiwi an m̧ōm̧ an kanniōk, Alma eaar katakin “bwe men kein rej kajjōjō imaan mejān Irooj” (Alma 39:5). Etke mour erreo ej aorōk n̄an kwe? Etke ej aorōk n̄an Irooj? Kōmeļeļe in jān Elder Jeffrey R. Holland emaron̄ in jipan̄:
“Ealikkar ibwilijin n̄ūrbōktak ko An reļļap tata ikkijjien mour wabanban rej ekōjkan an juon itok n̄an laļ in im ekōjkan an juon etal jān laļ in. Eaar likūt jon̄an ko rekanooj in ju ilo jekjek kein.
“… Ikdeelel in kōņan an armej ej kōjparoke wōt n̄an juon ripālele em̧ōj aer m̧are kōnke ej kōkaļļe eo eļap tata an lukkuun juon wōt, kōn aolepān im kōn juon wōt kar kapiti jān Anij. … M̧are kar karōke n̄an meļeļe in kobatok eo edipio an juon em̧m̧aan im juon kōrā. … En̄in ej juon ippān doon eo an kain dipio eo me jej kōjerbal naan eo liāp n̄an bōk kallim̧ur ko an indeeo” (“Personal Purity,” Ensign, Nob. 1998, 76).
Ļōmņak kōn kapilōk eo an Alma n̄an Korianitōn ilo Alma 39:8–15. Ekōjkan an jipan̄ eok kōļapļo̧k meļeļe eo am̧ aorōk eo an kien erreo im ekōjkan n̄an anjo̧ ioon kapo eo? Katak ko an Alma rej barāinwōt kwaļo̧k ewi jon̄an m̧ōņōņō an Irooj n̄an jeorļo̧k ad bōd n̄e jej ukweļo̧k im bwe ewōr kōjatdikdik n̄an aolepād wōj. Ilo am̧ riiti Alma 39–42 wiik in, pukōt kein kam̧ool eo kōn tūriam̧o eo an Anij. Ekōjkan an kar tūriam̧o eo an Anij kar kōjeraam̧m̧an eok?
Lale barāinwōt “Mour Erreo,” N̄an Kōkajoorļo̧k Jodikdik ro, 35–37.
Inaaj jerkakpeje im jutak im̧aan Anij n̄an ekajet.
Ke Alma eaar kile bwe Koriantōn eaar wōr an kajjitōk ko kōn Jerkakpeje eo, eaar katakin e kōn ta eo ej waļo̧k ālkin ad mej. Ta m̧ool ko Alma eaar katakin ilo jepta ko 40–41 me remaron̄ in kar jipan̄ n̄an Koriantōn—im jabdewōt ro raar jerawiwi—n̄an meļeļe? Komaron̄ ejaake ta eo kwoj katak jān am̧ kile unin kōnono ko me Alma eaar kōnono kaki (ko āinwōt laļ eo an jetōb, jerakakpeje, im jepļaaktok eo) innām je ta eo Alma ej katakin kōn kajjojo iaaer. Ekōjkan an keememej m̧ool kein maron̄ jipan̄ eok n̄e kwoj en̄jake kapo ak pukōt jeorļo̧k bōd?
Imaron̄ kappukōt uwaak ko n̄an kajjitōk ko aō kōn gospel eo ilo tōmak.
Jet iien jemaron̄ ļōmņak bwe rikanaan ro rejeļā uwaak eo n̄an aolep kajjitōk kōn gospel eo. Bōtaab kile bwe ilo aolepān jepta 40, Alma eaar wōr jet kajjitōk ko raar jab uwaak kōn mour ālkin mej. Ta eo eaar kōm̧m̧ane n̄an lo uwaak ko? Ta eo eaar kōm̧m̧ane ke eaar ejjeļo̧k uwaak ko ippān? Ļōmņak kōn ekōjkan an waanjon̄ak eo an Alma maron̄ jipan̄ eok kōn kajjitōk ko am̧ kōn gospel eo me ewōr ippam̧.
Jar ej juon wāween jemaron̄ lo uwaak ko n̄an kajjitōk ko kōn gospel eo.
Pinmuur eo an Jisōs Kraist ekōm̧m̧an bwe karōk in pinmuur eo en pidodo.
Koriantōn eaar tōmak bwe kaje eo n̄an jerawiwi ko eaar jab mijak (lale Alma 42:1). Bōtaab Alma eaar katakin bwe ewōr juon wāween n̄an eļļā jān “mejatoto in būrom̧ōj” me jerawiwi eo ej likūt kōj ie: ukweļo̧k im tōmak ilo Pinmuur eo an Jisōs Kraist, eo ej jim̧or tūriam̧o im jim̧we (lale Alma 42:15). Ilo am̧ riiti Alma 42, pukōt ekōjkan an Pinmuur eo an Rilo̧mo̧o̧r eo kōm̧m̧an bwe en pidodo n̄an kwe n̄an bōk tūriam̧o eo ilo an jab “ko̧o̧t[e] kien” (eoon 25). Ta m̧ool ko kwoj loi ilo jepta in me rejipan̄ eok en̄jake An tūriam̧o?
Ļōmņak ko n̄an Ekkatak Jeje ko Rekwojarjar an Baam̧le im Nokon in Jota eo an Baam̧le
Ilo am̧ riiti jeje ko rekwojarjar ippān baam̧le eo am̧, Jetōb emaron̄ jipan̄ eok jeļā ta pedped in katak ko n̄an kwaļo̧ki im kōnono kake n̄an tōpar aikuj ko an baam̧le eo am̧. Erkein rej jet iaan ļōmņak ko.
Alma 39:1–9
Baam̧le eo am̧ emaron̄ ke jeraam̧m̧an jān juon ekōnono kōn kien erreo? Elan̄n̄e aindein, kōjerbal kein jipan̄ kein ekkar n̄an aikuj ko an baam̧le eo am̧: Alma 39:1–9; “Mour Erreo,” N̄an Kōkajoorļo̧k Jodikdik ro, 35–37; “Erreo,” Gospel Topics, topics.ChurchofJesusChrist.org; overcomingpornography.org; im pija in alooj ko “What Should I Do When I See Pornography?” im “I Choose to Be Pure” (ChurchofJesusChrist.org). Kejekļo̧kjeņ kōn ekōjkan am̧ maron̄ jipan̄ baam̧le eo am̧ meļeļe kōjeraam̧m̧an ko kōn kien erreo im kōn ikdeelel an kōņaan ilo m̧are (n̄an waanjon̄ak, lale pija in alooj eo “How to Talk to Your Kids about Intimacy” on ChurchofJesusChrist.org).
Alma 39:9–15
Ta eo jej katak jān eoon kein kōn ekōjkan ad kattoļo̧k jerawiwi?
Alma 42:4
Komaron̄ ikkure juon ikkure me m̧ōttan peba ko kōn m̧wil ko an Kraist ak pedped in katak ko an gospel eo kar jeje ioer rej ejepelōklōk ipeļaakin ruum̧ eo. Komaron̄ lo ewōr jet m̧ōttan peba ko ro uwaan baam̧le remaron̄ aiini ilo juon tōre, innām ekōnono kōn ekōjkan an men ko kar jeje ioon peba ko maron̄ jipan̄ kōj erom āinwōt Anij. Ekōjkan an “iien eo kar letok” n̄an kōj ioon laļ in āinwōt iien eo kar letok ilo ikkure in? Ekōjkan ad maron̄ kōjerbal “iien mālejjon̄” eo ad ioon laļ in n̄an erom āinwōt Rilo̧mo̧o̧r?
Alma 42:12–15, 22–24
Bōlen komaron̄ kwaļo̧k kadkad eo ikōtaan jim̧we im tūriam̧o ilo am̧ kōjerbal juon jin̄a kōn juon kein baaun eļam waan n̄an ekōnono kōn kajjitōk ko āinwōt kein: Ta eo ej waļo̧k n̄an kein baaun eo n̄e jej jerawiwi? Ekōjkan an jim̧we, emenin aikuj n̄an kein baaun eo bwe en peļaan? Ekōjkan an Rilo̧mo̧o̧r eotōpar aikuj ko an jim̧we im kōm̧m̧an an tūriam̧o bok jikin?
Kōn elōn̄ļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.
Kōkōm̧anm̧anļo̧k Ad Katakin
Kalimjōk wōt pedped in katak ko me enaaj kōjeraam̧m̧an baam̧le eo am̧. Ilo am̧ jar ilo ekkatak naan an Anij, kajjitōk ippam̧ make, “Ta eo ij loe ijin me enaaj ļap tata an ļap meļeļein n̄an baam̧le eo aō?” Kappukōt tōl eo an Jetōb ilo am kejekļo̧kjeņ kōn ekōjkan n̄an jipan̄ baam̧le eo am̧ lo m̧ool kein.
En̄in Ej Ļeo Nejū jān Elspeth Caitlin Young