“Juļae 20–26. Alma 36–38: ‘Reilo̧k n̄an Anij im Mour,’” Itok, Ļoor Eō—N̄an Kajjojo Armej im Baam̧le ko: Bok in Mormon 2020 (2020)
“Juļae 20–26. Alma 36–38,” Itok, Ļoor Eō—N̄an Kajjojo Armej im Baam̧le ko: 2020
Kōm̧eļeļe jān Joshua Dennis
Juļae 20–26.
Alma 36–38
“Reilo̧k n̄an Anij im Mour”
“Ilo am̧ en̄jake lan̄lōn̄ eo me ej itok jān am̧ meļeļe kōn gospel eo, kwonaaj kōņaan mour kōn ta eo kwoj katak kake” (Preach My Gospel [2004], 19). Je ļōmņak ko im en̄jake ko am̧ kōn ekōjkan am̧ mour kōn m̧ool ko kwoj ekkatak kaki.
Je En̄jake ko Rej Im̧we Eok
Ke Alma eaar lo nana eo ipeļaakin, eaar m̧wilaļ an en̄jake “būrom̧ōj,” “eļap en̄taan,” im “en̄taan in jetōb” (Alma 8:14). “Jero̧wiwi ilubwiljin armej rein,” eaar ba n̄an Rizoram ro, “ej kōmetak aō” (Alma 31:30). Eaar en̄jake juon men ejja āinwōt ālkin an kar ro̧o̧l jān mijen eo an n̄an armej RiZoram ro—eaar lale bwe “būruōn armej ro eaar jino kanooj pen, im bwe raar jino n̄an inepata kōnke jejjet eo an naan eo, būruōn eaar būrom̧ōj otem būrom̧ōj” (Alma 35:15). Ta eo Alma eaar kōm̧m̧ane kōn ta eo eaar loe im en̄jake? Eaar jab m̧ōkaj an ebweer ak jab kōjatdikdik kōn jekjek eo an laļ in. Ijello̧kin, “eaar kōm̧m̧an bwe ļōm̧aro nejin ren kuktok ippān doon” im katakin er “men ko rej an weeppān” (Alma 35:16). Alma eaar katakin er bwe “ejjeļo̧k bar juon iaļ ak wāween eo armej emaron̄ mour, ijello̧kun wōt ilo im kōn Kraist. … Lo, E ej naan in m̧ool eo im weeppān” (Alma 38:9).
Ļōmņak ko n̄an Ekkatak Jeje ko Rekwojarjar Ippam̧ Make
Imaron̄ ļotak jān Anij ilo aō ettā im ukweļo̧k.
Jet enaaj wōr aer en̄jake ko rekabwilōn̄lōn̄ āinwōt an Alma kar oktak. Bōtaab ewōr pedped in katak ko ilo en̄jake eo an me jemaron̄ aolep ekkatak jāni im mour kaki kōnke aolep rej aikuj “bar ļotak ilo Anij” (Alma 36:23). Ilo am̧ riiti Alma 36, kappukōt pedped in katak ko me komaron̄ mour kaki. N̄an waanjon̄ak, ekōjkan an juon eo eaar bar ļotak ilo Anij en̄jake kōn jerawiwi? kōn Jisōs Kraist? Komaron̄ barāinwōt kappukōt oktak ko komaron̄ kōtmeni n̄an loi ilo tōmak ko im m̧akūtkūt ko an juon eo ej bar ļotak ilo Anij.
Lale barāinwōt Mosaia 5:7; 27:25–26; Alma 5:14; 22:15; Hilamōn 3:35; “Conversion,” Unin Kōnono ko an Gospel, topics.ChurchofJesusChrist.org.
Jisōs Kraist eaar en̄taan kōn jerawiwi ko an laļ.
Komaron̄ kile jet ālij in men ko ilo kōmeļeļe eo an Alma kōn oktak eo an ilo jebta in. Ej kōnke Alma 36 ej juon waanjon̄ak em̧m̧an kōn juon jekjek in poem in Hibru kar ņa etan chiasmus, eo me naan ko ak ļōmņak ko rej kwaļo̧k ilo juon laajrak, ej tōlļo̧k n̄an juon unin ļōmņak, innām bar āliji ilo laajrak eo juon. Ilo Alma 36, ļōmņak eo ilo eoon 3 ej bar āliji ilo eoon 27, ļōmņak eo ilo eoon 5 ej bar āliji ilo eoon 26, im āindein an waļo̧k. Unin ļōmņak eo ej ennaan eo aorōk tata an chiasmus eo. Lale eļan̄n̄e komaron̄ lo unin ļōmņak eo ilo eoon ko 17–18. Kile ekōjkan an erom “pen ilo ļōmņak in” kar jelet Alma im ekar ukōt mour eo an. Ekōjkan an kar m̧ool in jelet eok? Ta ļōmņak ko jet raar ālij in men kwoj loi ilo eoon in?
Ekōjkan an kōmeļeļe in kōn ukweļo̧k im jeorļo̧k bōd im̧we eok n̄an ļoor waanjon̄ak eo an Alma im oktakļo̧k n̄an Rilo̧mo̧o̧r eo?
N̄an eļapļo̧k meļeļe kōn chiasmus, lale Book of Mormon Student Manual (Church Educational System manual [2009], 232–33).
Jeje ko rekwojarjar kar kōjparoki “n̄an juon un emālōtlōt.”
Kwonan̄in ke kar ļōmņak kōn juon kabwilōn̄lōn̄ im kōjeraam̧m̧an kōn an wōr jeje ko rekwojarjar rainin? Anij eaar “lōke [kōj] kōn men kein, ko rekwōjarjar” (Alma 37:14). Ilo am̧ riiti Alma 37, kappukōt kōjeraam̧m̧an ko me rej itok jān an wōr jeje ko rekwojarjar. Ekōjkan am̧ kar en̄jake kōjeraam̧m̧an kein? Ekōjkan ad maron̄ kōjerbal jeje ko rekwojarjar n̄an jipan̄ “kwaļo̧k tok an [Anij] kajoor n̄an epepen ko tokālik”? (Alma 37:18).
Ilo Alma 37:38–47, Alma ej keidi “naan eo an Kraist” n̄an Liaona eo. Ilo am̧ kejōkļo̧kjeņ kōn keidi in, ļōmņak kōn wāween ko kwar en̄jake kabwilōn̄lōn̄ im kajoor in katak ko an Kraist “raan n̄an raan” (Alma 37:40).
Lale barāinwōt D. Todd Christofferson, “Kōjeraam̧m̧an ko an Jeje Ko Rekwojarjar,” Ensign ak Kweilo̧k eo Eļap, Māe 2010, 32–35.
Jeje ko rekwojarjar ej katakin kōj ekōjkan ad ļoor Anij.
“Jān men ko reddik im reļam waan men ko reļļap rej kūrm̧ool.”
Jet iien jemaron̄ en̄jake āinwōt inepata ko ad rekanooj in ļap im kapokpok jon̄an uwaak ko rej aikuj in kilep im kapokpok barāinwōt. Aaet jān iien im bar iien, Irooj ej kāālet n̄an kōjerbal “men ko reddik im reļam waan” (Alma 37:6) n̄an kadedeļo̧k jerbal eo An im kōjeraam̧m̧an mour ko an ajri ro Nejin. Ilo am̧ riiti Alma 37:6–7, kejekļo̧kjeņ im je wāween ko kwar lo pedped in katak in ej jerbal ilo mour eo am̧. Ta je iaann men ko reddik im reļem waan Irooj ej kōjerbale n̄an kōjeraam̧m̧an eok im kadedeļo̧k jerbal eo An?
Lale barāinwōt Alma 37:41–46; Dallin H. Oaks, “Men ko Reddik im Reļam Waan,” Ensign ak Kweilo̧k eo Eļap, Māe 2018, 89–92.
Ļōmņak ko n̄an Ekkatak Jeje ko Rekwojarjar an Baam̧le im Nokon in Jota eo an Baam̧le
Ilo am̧ riiti jeje ko rekwojarjar ippān baam̧le eo am̧, Jetōb emaron̄ jipan̄ eok jeļā ta pedped in katak ko n̄an kwaļo̧ki im kōnono kake n̄an tōpar aikuj ko an baam̧le eo am̧. Erkein rej jet iaan ļōmņak ko.
Alma 36:5–26
Mekarta en̄jake eo an Alma eaar lukkuun kabwilōn̄lōn̄, oktak eo an ej kwaļo̧k jet pedped in katak ko me ej iooktok kōjwōj aolep. Kūr eo n̄an kajjojo uwaan baam̧le n̄an kāālet juon eoon jān Alma 36:5–26 me ej katakin kōn bar “ļotak jān Anij.” Ta eo jej ekkatak jān eoon kein? Bōlen ro uwaan baam̧le eo remaron̄ kwaļo̧k ekōjkan aer kar mour kake pedped in katak ko Alma eaar kōmeļeļeiki.
Alma 36:18–21, 24
Ekōjkan ad maron̄ kōjerbal eoon kein n̄an jipan̄ juon eo watok bwe ukweļo̧k ej juon en̄jake elem̧ōņōņō, ejjab juon eo ekamijak? Ekōjkan an ukweļo̧k maron̄ im̧we kōj n̄an kwaļo̧k gospel eo ippān ro jet?
Alma 37:6–7, 38–46
Ta jet iaan “men ko reddik im reļam waan” (Alma 37:6) me rej bōktok men ko reļļap ilo mour ko ad? Ilo wāween ta naan eo an Kraist ej āinwōt Liaona eo? Ekōjkan ad maron̄ jipan̄ ro jet ļapļo̧k aer niknik ekkatak jeje ko rekwojarjar?
Alma 37:35
Etke ej menin mālōtlōt n̄an ekkatak n̄an kōjparok kien ko “ilo [ad] em̧m̧an ded”?
Alma 38:12
Baam̧le eo am̧ ej ke jeļā ta meļeļe in bridle (kein kōjebwābwe)? Bōlen komaron̄ kwaļo̧k n̄an er juon pija in bridle im kōnono kōn ekōjkan an jerbal n̄an kōjbwebweik juon menin mour. Ta meļeļe in n̄an “kajeikiki aolep ikdeelel ko [ad]”? Ekōjkan an kajeikiki aolep ikdeelel ko jipan̄ kōj “obrak kōn iakwe”?
N̄an eļapļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.
Kōkōm̧anm̧anļo̧k Ekkatak Ippam̧ Make
Je Men ko Reim̧we. N̄e kwoj je im̧we ko ilo jetōb, kwoj kwaļo̧k n̄an Irooj bwe kwoj kaorōk tōl eo An, im Enaaj kōjeraam̧m̧an eok kōn ikutkut in ļo̧k revelesōn. Ilo am̧ ekkatak, je ļōmņak ko am̧. (Lale Teaching in the Savior’s Way, 12, 30.)
Enjeļ eo ej Waļo̧k n̄an Alma im Ļōm̧aro Nejin Mosaia, jān Clark Kelley Price