“Juļae 13–19. Alma 17–22: ‘Kalbwini Naan Eo ilo Būruōmi,’” Itok, Ļoor Eō—N̄an Kajjojo Armej im Baam̧le ko: Book of Mormon 2020 2020)
“Juļae 13–19. Alma 32–35,” Itok, Ļoor Eō—N̄an Kajjojo Armej im Baam̧le ko: 2020
Juļae 13–19
Alma 32–35
“Kalbwini Naan Eo ilo Būruōmi”
Je im̧we ko ilo jetōb kwoj būki ilo am̧ riiti Alma 32–35. Ta eo kwoj im̧we n̄an kōm̧m̧ane kōn ta eo kwoj katak kake?
Je En̄jake ko Rej Im̧we Eok
N̄an RiZoram ro, jar eo eaar kōn juon wōt make, iminene ej kōm̧m̧an aolep raan me eaar waļo̧k wōt juon alen juon wiik. Ekoba jutak ilo ijoko aolep remaron̄ lo er ie im āliji ilo waan, naan in utiej bōro ko me ej kabun̄ buruōn juon make. Bōlen eo enana, RiZoram eaar ejjeļo̧k aer tōmak ilo Jisōs Kraist—em̧ool raar kaarmejet kōn mour eo An—im raar kakkure ri jeram̧ōl ro (lale Alma 31:9–25). Ilo keidi, Alma im Amulek raar peran ilo katakin bwe jar eaar ļapļo̧k an aorōk kōn ta ko jej en̄jaki ilo buruōd ijjelo̧kin ilo juon jikin jar ilo̧bōlej. Im eļan̄n̄e ejjab tōlļo̧k n̄an meanwōd n̄an ro rej pād ilo aikuj, ej “waan, im ejjeļo̧k … tokjān” (Alma 34:28). Eo eļap tata, ej juon kōkaļļe in tōmak ilo Jisōs Kraist, eo eaar letok pinmuur kōn An “katok indeeo im ejjeļo̧k jem̧ļo̧kin” (Alma 34:10). Kain tōmak jab in, Alma eaar kōmeļeļeik, ej itok jān ettā bōro im juon “kōņaan wōt tōmak” (Alma 32:27). Ej eddōkļo̧k jidik kōn jidik, āinwōt juon wōjke, im ej aikuji naajdik eo ejjab m̧ūjkōk. Ilo am̧ riiti Alma 32–35, komaron̄ ļōmņak kōn tōmak eo am̧ make im jar ko; kwonan̄in ke en̄jake jabdewōt m̧wil ko āinwōt m̧wil ko an RiZoram ro? Enaaj ewi kōjkan am̧ naajdik tōmak eo am̧ ilo Jisōs Kraist bwe en erom “juon wōjke epikkālo̧k n̄an mour indeeo”? (Alma 32:41).
Ļōmņak ko n̄an Ekkatak Jeje ko Rekwojarjar Ippem Make
Imaron̄ kāālet n̄an ettā bōro
Alma eaar ļōmņak bwe RiZoram ro rejeram̧ōl raar ettā bōro im “bwe kar kōpooj er n̄an ron̄ naan eo” (Alma 32:6). Ilo am̧ riiti Alma 32:1–16, ļōmņak kōn ekōjkan am̧ m̧aanjabpopo n̄an ron̄jake naan eo an Anij.
Ta en̄jake ko raar kōttāik eok? Ta eo kwaar kōm̧m̧ane n̄an an ļapļo̧k am̧ ettā? Eoon kein remaron̄ katakin eok ekōjkan n̄an kāālet ettā ijello̧kin n̄an kipele n̄an ettā. N̄an waanjon̄ak, ta oktak eo ikōtaan erom “jeram̧ōl kōn men ko an laļ” im “jeram̧ōl ilo bōro”? (eoon 3). Ta meļeļe in n̄an “kōttāik [eok make] kōnke naan eo”? (eoon 14).
Lale barāinwōt “Humility,” Gospel Topics, topics.ChurchofJesusChrist.org.
Ij kōjerbal tōmak ilo Jisōs Kraist ilo aō kalbwin im naajdik An in naan ilo būruwō.
Etke kwoj ļōmņak Alma eaar kōnono kōn kalbwin juon ine n̄an uwaak kajjitōk ko an RiZoram ro kōn kabun̄ jar? Ta ine eo me Alma eaar kōnono kake? (lale Alma 32:28; 33:22–23). Ilo am̧ riiti Alma 32:17–43, jeļā naan ko im eoon ko me rej jipan̄ eok meļeļe ekōjkan kōjerbal tōmak ilo Jisōs Kraist im An naan. Ta eo kwoj ekkatak kōn ta eo tōmak im ta ejjab tōmak? Innām, ilo am̧ riiti jepta 33–34, pukōt uwaak ko n̄an kajjitōk eo an RiZoram ro “Ekōjkan [ad] kalbwin ine eo?” (Alma 33:1).
En̄in ej bar juon wāween n̄an ekkatak Alma 32–34: Jin̄aik pija ko n̄an kwaļo̧k iien ko reoktaktak ilo an juon ine eddōk. Innām kōkaļļeik kajjojo pija kōn naan ko jān Alma 32:28–43 men rej jipan̄ eok meļeļe ekōjkan kalbwin im naajdik naan eo ilo būruwōm̧.
Lale barāinwōt Matu 13:3–8, 18–23; Hebru 11; Neil L. Andersen, “Tōmak Ejjab kōn Jide, ak kōn M̧aanje,” Ensign ak Kweilo̧k eo Eļap, Nob. 2015, 65–68; “Faith in Jesus Christ,” Gospel Topics, topics.ChurchofJesusChrist.org.
Imaron̄ kabun̄ jar n̄an Anij ilo jar, jabdewōt iien im jabdewōt jikin.
Kapilōk eo an Alma im Amulek kōn kabun̄ jar im jar eaar meļeļe in n̄an kajim̧we likjab in meļeļe ko eaar wōr ippān RiZoram (lale Alma 31:13–23). Bōtaab m̧ool ko raar katakin kaki remaron̄ jipan̄ jabdwōt iaad kōn meļeļe jar im em̧m̧anļo̧k ad kabun̄ jar. Bōlen komaron̄ kōm̧m̧ane juon laajrak an m̧ool ko kōn jar me kwoj loi ilo Alma 33:2–11 im 34:17–29. Iturinļo̧k laajrak jab eo, kōm̧m̧ane juon laajrak bōlen kōn ļōmņak ko rebōd kōn jar me m̧ool kein rej kajim̧wi (lale Alma 31:12–23). Ekōjkan an naaj men ko kwoj ekkatak jān eoon kein jelet wāween am̧ jar im kabun̄ jar?
Wōn ro kar Zenos im Zenock?
Zenos im Zenock raar rikanaan ro me raar kam̧ool kōn Jisōs Kraist ilo tōre ko an Kallim̧ur M̧okta, bōtaab katak ko aer rejjab waļo̧k ilo Kallim̧ur M̧okta. RiNipai ro raar bōk katakin ko an rikanaan rein, bōlen kōnke raar pād ilo pileij būrāāj ko me Nipai eaar būki jān Laban. Rej kōnono kaki ilo 1 Nipai 19:10–12; Jekab 5:1; im Hilamōn 8:19–20.
“Mour in ej iien … n̄an maanjabpopo n̄an iioon Anij.”
Ilo am̧ riiti Alma 34:30–41, ļōmņak kōn ekōjkan am̧ maron̄ “kōkōm̧anm̧anļo̧k [am] iien ke kwoj pād ilo mour in” (eoon 33). Ekōjkan an ukweļo̧k im kijenmej jipan̄ eok m̧aanjabpopo n̄an ioon Anij? Ewōr ke iien ko kwoj aikuj n̄an kōm̧m̧ane me kwar aepedped kaki? Kanooj lale n̄an jerbal ioon jabdewōt im̧we ko ilo jetōb kwoj būki.
Lale barāinwōt Alma 12:24; Larry R. Lawrence, “What Lack I Yet?” Ensign ak Liaona, Nob. 2017, 60–63.
Ļōmņak ko n̄an Ekkatak Jeje ko Rekwojarjar an Baam̧le im Nokon in Jota eo an Baam̧le
Ilo am̧ riiti jeje ko rekwojarjar ippān baam̧le eo am̧, Jetōb emaron̄ jipan̄ eok jeļā ta pedped in katak ko n̄an kwaļo̧ki im kōnono kaki n̄an tōpar aikuj ko an baam̧le eo am̧. Erkein rej jet iaan ļōmņak ko.
Alma 32:9–11; 33:2–11; 34:38–39
Ta eo enaaj kar āinwōt eļan̄n̄e kar kōtļo̧k bwe jen kabun̄ jar im jar wōt ilo Jabōt? Ilo am̧ riiti eoon kein ippān doon, ro uwaan baam̧le eo remaron̄ ekōnono kōn ekōjkan aer maron̄ kabun̄ jar aolep raan im etke rej kam̧m̧oolol bwe remaron̄.
Alma 32:28–43
Pija in juon wōjke ej mottanļo̧k laajrak in; komaron̄ kōjerbale n̄an kwaļo̧k naan ko an Alma ilo eoon kein. Ak baam̧le eo am̧ emaron̄ ilo̧k n̄an etetal laļļo̧k n̄an pukōt menin eddōk ko ilo jon̄an ko aer reoktak ilo aer eddōk im riiti eoon ko jān Alma 32 me rej keidi eddōkļo̧k an menin eddōk n̄an tōmak eo ad. Bōlen kajjojo uwaan baam̧le eo emaron̄ kalbwin juon ine im ekōnono kōn ta eo jej aikuji n̄an kōm̧m̧an bwe en jipan̄ eddōkļo̧k. Ilo wiik ko rej itok wōt komaron̄ etale ine eo nejūm̧ im kakeememej doon kōn aikuj eo n̄an wōnm̧aanļo̧k wōt in naajdiki naan in kam̧ool ko ad kōn Jisōs Kraist.
Alma 33:2–11; 34:17–29
Ta eo eoon kein rej elmakote kōn ekōjkan ad maron̄ kōkōm̧anm̧anļo̧k jar ko ad kajjojo im baam̧le eo?
Alma 34:31
Ta en̄jake ko kar kwaļo̧k n̄an kōj me n̄e jej ukweļo̧k, jej jino “ilo iien em̧ōkaj tata” n̄an en̄jake kōjeraam̧m̧an ko an karōk in pinmuur eo?
Alma 34:33–35
Baam̧le eo am̧ ejeļā ke ta meļeļe in n̄an aepedped? Bōlen juon emaron̄ kwaļo̧k waanjon̄ak ko kōn aepedped im kaje ko an renana? Ta meļeļe in n̄an “ aepedped kōn raan in ukeļo̧k eo [ad]”?
Kōn elōn̄lo̧k ļōmņak ko kōn katakin ajri ro, lale laajrak eo an wiik in ilo Itok, Ļoor Eō—N̄an Būraimere.
Kōkōm̧anm̧anļo̧k Ad Katakin
Jin̄aik pija ko. Kōmaron̄ kōtļo̧k bwe ro uwaan baam̧le eo en jin̄a ilo aer ekkatak jān jeje ko rekwojarjar. N̄an waanjon̄ak, remaron̄ lem̧ōņōņō in jin̄aik juon ine ej eddōkļo̧k n̄an juon wōjke ilo aer ekkatak Alma 32.
“Kōn ami niknik im ami tōmak im ami kijejeto kōn naan eo ilo ņa kōņin, … lo, jidik wōt iien im kom̧ naaj bōk leen, eo eaorōk otem aorōk, eo etōn̄al ilōn̄in men otemjeļo̧k eo etōn̄al” (Alma 32:42).