Ta Eo Ilikjab Ie?

Jān Elder Larry R. Lawrence

Jān Jiljilimjuonn̄oul eo

Eļan̄n̄e jej ettā im kipilie, Jetōb Kwojarjar eo enaaj tōl ļo̧k kōj n̄an kapijuknen eo, bōtaab jej aikuj kajjitōk ippān Irooj kōn tōl ilo iaļ eo ļo̧k.

Ke iaar juon rūm̧m̧an ded, iaar jino etale Kabun̄ in. Ilo jino in iaar itok limoū kōn gospel eo kōn waanjon̄k ko an ro m̧ōtta rej Armej ro Rekwojarjar ilo Raan-ko Āliktata; bōtaab āliktata iaar itok limoū kōn katak eo ejej uwaan. Ke iaar katak bwe m̧aan im kōrā ro retiljek remaron̄ eddōk ļo̧k wōt im āliktata erom āinwōt ro jined im jemed ilan̄, iaar kanooj ļo̧kjeņaō. Iaar iakwe katak eo; iaar en̄jake em̧ool.

Ejjab to ālkin aō peptaij, iaar ekkatak Kwaļo̧k eo ioon Toļ eo, im iaar kile bwe Jisōs eaar katakin ejjab m̧ool in wōt kōn eddōk ļo̧k indeeo eo ilo Bible. Eaar ba, “Innām kom̧ naaj weeppān āinwōt Jememwōj i lan̄ E weeppān.”¹

Em̧ōj aō kiio membōr ium̧win 40 iiō ko, im jabdewōt iien ij riiti eoon in ilo jeje ko rekwojarjar, ij kememej jibadbad eo ad ioon laļ in. Jaar itok n̄an katak im eddōk ļo̧k m̧ae iien eo jej jidik kōn jidik erom kwojarjar ak weppān ilo Kraist.

Iaļ eo an rikaļoor ejjab juon eo epidodo. Kar ņa etan juon “iaļ in kōkōm̧anm̧an ļo̧k edim.”² Ilo ad ilo̧k ilo iaļ eo eaidin̄ im eaidik, Jetōb eo ej wōnm̧aanļo̧k wōt ilo idajon̄jon̄e kōj n̄an erom em̧m̧an ļo̧k im n̄an bun̄ m̧aan ļo̧k. Jetōb Kwojarjar eo ej juon eo m̧ōttad eo em̧m̧an ilo em̧m̧akūt in. Eļan̄n̄e jej ettā im kipilie, Enaaj bōk kōj kōn pein im tōl kōj n̄an kapijuknen.

Mekarta, jej aikuj in kajjitōk ippān Irooj kōn tōl ilo iaļ in ļo̧k. Jej aikuj kajjitōk jet kajjitōk ko reppen, āinwōt “Ta eo ij aikuj ukōte?” “Ekōjkan aō kōkōm̧anm̧an ļo̧k?” “Ekōjkan aō kōkōm̧anm̧an ļo̧k?” “Ta m̧ōjņo eo eaikuj kajoor ļo̧k?”

Jān ļōmņak kōn bwebwenato eo ilo Kallim̧ur Ekāāl kōn rim̧weie eo. Eaar juon likao ejim̧we eo ekar kadede kōjparok Kien ko Jon̄oul, bōtaab kar kōņaan erom em̧m̧an ļo̧k. Kōttōpar eo an eaar mour indeeo.

Ke eaar ioon Rilo̧mo̧o̧r eo, eaar kajjitōk, “Ewi men eo I jan̄in tōpare?”³

Em̧ōkaj Jisōs eaar uwaak, leļo̧k kapilōk eo me eaar n̄an likao in em̧weie eļap tata. “Jisōs e ba n̄an e, Eļan̄n̄e kwō kōņaan weeppān, kwōn ilo̧k im wiakaki men ko am̧ im leļok n̄an ro rej jeram̧ōl, im … itok im ļoor Eō.”⁴

Likao in eaar ilbōk; eaar jab n̄an jidik ļōmņak kain karmejet in. Eaar ettā n̄an kajjitōk ippān Irooj bōtaab jab tōmak n̄an ļoor kapilōk eo ekwojarjar kar leļo̧k n̄an e. Jej aikuj m̧ōņōņō in jerbal n̄e jej bōk juon uwaak.

Būreejtōn Harold B. Lee kar katakin, “Aolepād wōj, eļan̄n̄e jenaaj tōpar weppān, aikuj [ilo] juon tōre kajjitōk ippād make kajjitōk in, ‘Ta eo ilikjab ie?’”⁵

Iaar jeļā kajien juon jinen eo etiljek me eaar kōttāik e make im kajjitōk, “Ta eo ej dāpij eō jān eddōkļo̧k?” Ilo jekjek eo an, uwaak eo jān Jetōb eaar m̧ōkaj an itok: “Bōjrak jōkpen ņae.” Uwaak in eaar kabwilōn̄ e; liin eaar jab n̄an jidik ļōmņak kōn e āinwōt juon rijōkpen ņae. Mekarta, ennaan eo jān Jetōb Kwojarjar eaar lukkuun alikkar. Ilo raan ko im wiik ko tok ālik, liin eaar kile iminene in jekpen ņae eo an. Kam̧oolol kōn im̧we eo n̄an em̧m̧an ļo̧k, liin eaar kije n̄an bwini kōjeram̧m̧an ko an ijello̧kin bwini apan̄ ko an. Ilowaan raan ko, liin kar en̄jake okmeņeņ eo an Jetōb.

Juon likao ettā, eo eaar jab maron̄ lo juon leddik ekkar eaar ilo̧k n̄an Irooj kōn jipan̄: “Ta eo ej dāpij eō jān aō likao eo ejim̧we?” Eaar kajjitōk. Uwaak in eaar itok n̄an ļōmņak im būruwōn. “Karreoik kōnono eo am̧.” lo tōre eo, eaar kile bwe jet naan ko renana raar erom m̧ōttan naan ko an kōjerbali, im eaar kallim̧ur n̄an oktak.

Juon sister eo ejjeļo̧k rejetan kar peran ilo kajjitōk kajjitōk eo: “Ta eo ij aikuj in ukōte?” im Jetōb eo eaar unoojdikdik n̄an e, “Jab kabūņōņō armej n̄e rej kōnono.” Jetōb Kwojarjar eo eaar lukkuun leļo̧k kapilōk eo. E ej juon m̧ōtta eo ekanooj m̧ool im enaaj jiron̄ kōj men ko me ejjeļo̧k bar juon ejeļā ak ewōr an peran n̄an ba.

Juon kar mijenede kar lo an make en̄jake inepata kōn juon jikejuuļ eo ekanooj poub. Eaar kajjieon̄ pukōt iien n̄an jerbal, ekkatak, baam̧ļe, im juon kūr ilo Kabun̄ in. Eaar kajjitōk ippān Irooj kōn kapilōk: “Ekōjkan aō en̄jake aenōm̧m̧an kōn aolep men ko ij aikuj kōm̧m̧ani?” Uwaak eo eaar jab ta eo eaar kōtmene; eaar bōk en̄jake eo bwe ej aikuj kōjparok ļo̧k raan in Jabōt im dāpij an kwojarjar. Eaar kālet n̄an wujlepļo̧k Jabōt n̄an jerbal an Anij—n̄an jab jerbali kūlaj ko an ilo jikuuļ ilo raan eo im ekkatak gospel eo ijello̧kin. Oktak in edik eaar bōktok aenōm̧m̧an im jokkun wōt juon eo me eaar pukōte.

Iiō ko ļo̧k, iaar riiti juon bwebwenato ilo juon mākjiin an Kabun̄ in kōn juon leddik eo me eaar jokwe ettoļo̧k jān m̧we im̧ōn im etal n̄an kaļļōj. Liin eaar ļe lik ilo kūlaj ko an, mour in iaio eo an eaar jab ta eo eaar kōtmene, im ļiin eaar jab m̧ōņōņō. Āliktata, juon raan liin eaar bukelōlō im jan̄, “Ta eo imaron̄ kōm̧m̧ane n̄an kōkōm̧anm̧ān ļo̧k mour eo aō?” Jetōb Kwojarjar eaar unoojdikdik, “Jerkak im karroeik ruum̧ eo am̧.” En̄jake in eaar itok āinwōt juon ikkūm̧ ļo̧k eļap, bōtaab eaar ijjino eo eaar aikuji. Ālkin bōk iien n̄an karōk im kakoņ men ko ilo ellaajrak, liin eaar en̄jake an Jetōb kobrak ruum̧ eo an im ļōn̄aj būruwōn.

Jetōb Kwojarjar eo ejjab jiron̄ kōj n̄an kōkōm̧anm̧an ļo̧k aolep men ilo juon wōt iien. Eļan̄n̄e En kar, jenaaj kar erom ebbwer im jān liklik. Jetōb eo ej jerbal ippād ilo jon̄ak eo ad, juon bun̄tōn ilo juon iien, ak āinwōt an Irooj kar katakin, “lain im bar lain, naan in kean̄ im bar naan in kean̄, … em̧ōņōņō ro rej eo̧ron̄ naan in kain̄i ko Aō, … bwe n̄an eo ej bōk Inaaj leļo̧k eļapļo̧k.”⁶ N̄an waanjon̄ak, eļan̄n̄e Jetōb Kwojarjar eo eaar im̧we kom̧ n̄an ba “kom̧ool” emakijkij ļo̧k, im kom̧ij uwaak n̄an im̧we jab eo, innām Emaron̄ en̄jake ej iien n̄an kom̧ n̄an wōnm̧aanļo̧k n̄an jet men eļapļo̧k aer idajon̄jon̄—āinwōt katak n̄an ba, “Joļo̧k aō bōd; eaar aō bōd.”

Juon iien ejejjet n̄an kajjitōk, “Ta eo ilikjab ie?” ej n̄e jej bōk kwojkwoj eo. Rijilōk Paul eaar katakin bwe en̄in ej iien eo n̄an kajjojo iaad n̄an etale kōj make.⁷ Ilo iieo kautiej eo, ilo an ļōmņak ko ad oktak ļo̧k n̄an lan̄, Irooj emaron̄ ilo mera jiron̄ kōj ta eo jej aikuj in kōm̧m̧an tok ālik.

Āinwōt kom̧, iaar bōk elōn̄ kōjeram̧m̧an ko jān Jetōb eo ium̧win iiō ko kwaļo̧k n̄an eō ekōjkan aō maron̄ em̧m̧an ļo̧k. In kwaļo̧k jet iaan waanjon̄ak in ennaan ko aō make me iaar kanooj kautieji. Im̧we kein raar koba:

Jab kōļap ainikiōm̧.
Karōk eok make, ejake juon laajrak raan otemjej kōn men ko n̄an kōm̧m̧ani.
Kōkōm̧anm̧an am̧ kōpooj ānbwiinūm̧ kōn m̧ōn̄ā elōn̄ ļo̧k leen wōjke ko im pijitebōļ ko.
Kōļapļo̧k am̧ pād ilo tampeļ.
Bōk iien n̄an kejōkļo̧kjeņ m̧oktak jān am̧ jar.
Kajjitōk ippān lio pāleem̧ kōn kapilōk eo an.
Im kijenmej n̄e kom̧ij kattōr; jab iiūm̧ ļo̧k jān jon̄an iiūm̧ eo. (Ij kab de jerbale laajrak eo āliktata.)

Pinmuur eo ej ta eo ej kapidodo weeppān ak būn̄bōro. Jejjamin kar kōm̧m̧an make kōn kōj make, bōtaab jouj eo an Anij ebwe n̄an jipan̄ kōj. Āinwōt an Elder David A. Bednar kar juon iien kar ba: “Elōn̄ iaad ealikkar er meļeļe bwe Pinmuur eo ej n̄an rijerawiwi ro. Ijjab kanooj jeļā, mekarta, bwe jejeļā im meļeļe bwe Pinmuur eo ej barāinwōt n̄an rikwojarjar ro—bwe m̧aan im kōrā ro rem̧m̧an me rej pokake, erreo, im mejmejkaruo im ro rej kajieon̄ erom em̧m̧an ļo̧k.”⁸

Ikōņaan kwaļo̧k bwe kajjojo iaad ej bōk kuņaan ilo juon kōmālmel ilo jetōb jet iien em̧ōkaj, bōlen em̧ool joten in ilo ami jar. Kajjitōk ilo ettā ippān Irooj kajjitōk kein: “Ta eo ej dāpij aō jān aō eddōk ļo̧k?” Ilo juon wāween bar ba: “Ta eo ilikjab ie?” Innām kōttar ilo ikōn̄ kōn uwaak. Eļan̄n̄e kwoj m̧ool, uwaak eo enaaj m̧ōkaj an alikkar. Enaaj juon revelesōn n̄an wōt kwe.

Bōlen Jetōb eo enaaj jiron̄ eok bwe kwoj aikuj jeorļo̧k bōd an juon. Ak komaron̄ bōk juon ennaan n̄an ļap ļo̧k am̧ kālete pija ko am̧ kwoj alooji ak al ko kwoj ron̄jake. Kom̧ maron̄ en̄jake im̧we n̄an ļap am̧ m̧ool ilo jerbal ko am̧ ak ļap ļo̧k am̧ tenkwadik ilo jortak in jitlo̧k ko am̧. Ekanooj lōn̄ men ko jet.

Jetōb eo emaron̄ kwaļo̧k n̄an kōj m̧ōjņo̧ ko ad, ak Ej barāinwōt maron̄ kwaļo̧k n̄an kōj kajoor ko ad. Jet iien jej aikuj kajjitōk ta eo jej kōm̧m̧an ejim̧we bwe Irooj en maron̄ im̧we im kōketak kōj. N̄e jej riiti kōjeram̧m̧an in petriak ko ad, ej kakememej kōj Jemedwōj Ilan̄ ejeļā maron̄ ko ad rekwojarjar. Ej lem̧ōņōņō aolep iien jej bōk juon bun̄tōn m̧aan ļo̧k. N̄an E, iaļ eo ad ej eļap ļo̧k an aorōk jān iiūm̧ eo ad.

Kije, ro jeiū im jatū, ak jab n̄an jidik ebbwe. Jejjamin naaj tōpar weppān eo ad ilo mour wabanban in ad, bōtaab ijin ilo mour in jemaron̄ kalōk pedped eo. “Ej ad eddo n̄an em̧m̧an ļo̧k rainin jān ke jaar inne, im em̧m̧an ļo̧k ilju jān ke jaar rainin.”⁹

Eļan̄n̄e eddōk ļo̧k ilo jetōb ejjab juon men eaorōk tata ilo mour ko ad, eļan̄n̄e jejjab pād ilo iaļ eo ekije n̄an em̧m̧an ļo̧k, jenaaj jerwane en̄jake ko raorōk Anij ekōņaan litok n̄an kōj.

Iiō ko ļo̧k iaar riiti naan ko an Būreejtōn Spener W. Kimball, eo me ewōr kilaan aitok kitien ilo n̄a. Eaar ba: “Iaar katak bwe ijo ewōr juon bōro in kajjitōk, ikdeelel ekajoor n̄an kōm̧m̧an jim̧we, bōjrak jān jerawiwi ko, im pokake kien ko an Anij, Irooj ej letok eļap im ļap ļo̧k meram m̧ae iien ewōr kajoor n̄an dāil rōn̄ōļ an lan̄. ... Juon armej jim̧we rōt in ewōr an kallim̧ur eaorōk me juon raan enaaj lo mejān Irooj im jeļā bwe e ej.”¹⁰

Ej aō jar bwe en̄jake in eļap tata emaron̄ in ad juon raan ilo ad kōtļo̧k bwe Jetōb Kwojarjar en tōl kōj n̄an kapijuknen. Ilo etan Jisōs Kraist, amen.