Eaiboojoj an Jerbal!
Jān Būreejtōn Dieter F. Uchtdorf
Rikakpilōklōk eo Kein Karuo ilo Būreejtōnji eo Kein Kajuon
Ij jar bwe jenaaj mije wōt “erreo eo ilo Kraist” im kwaļo̧k an jouj n̄an kotak im ineek kōj.
Ro jeiū im jatū jitōbōro, ro m̧ōtta jitōnbōro, ej juon menin lan̄lōn̄ n̄an pād ippāmi rainin. Jej būrom̧ōj kōn ad lo jilu jea ko ejjeļo̧k kobbaer ijin im̧aan. Jej miji Būreejtōn Packer, Elder Parry, im Elder Scott. Kōmij iakwe er, im jar kōn ineem̧m̧an eo an baam̧le ko aer.
Ilo iien kweilo̧k in ilo wiikānin, enaaj wōr ad iien em̧m̧an n̄an rejtake jilu ro me em̧ōj kūr jān Irooj n̄an bōk jikier ibwilijin Doulul eo an Jon̄oulruo Rijilōk ro.
Ami jar ilo etaer enaaj kōkajoorļo̧k er ilo aer bōk kūr eo ekwojarjar an rijilōk.
Gospel eo ej ke Jerbal n̄an Eok?
Ejjab etto iaar lo juon kout me ekar kabōjrak eō im kar ļōmņak. Eaar āinwōt in: “Jiron̄ juon em̧m̧aan ewōr tiriļien iju ko ilo laļ in, im enaaj tōmak eok. Jiron̄ e uno eo ilo wo̧o̧ļ eo etutu, im enaaj jibwe n̄an an kam̧oole.”
Jej ke aolep āinwōt in jidik? Ālkin juon iien kar taktō jem̧aan ļo̧k, taktō ro aō retijem̧ļo̧k raar kōmeļeļeik ta eo ij aikuj kar kōm̧m̧ane n̄an ājmour. Bōtaab m̧okta ij aikuj kar bar katak jet men kōn n̄a make ij aikuj in kar jeļā ium̧in juon iien aitok: āinwōt juon rinan̄inmej, ijjab kanooj kijenmej.
Kōn jab kijenmej in iaar kālet n̄an kōm̧ōkaj jekjek in kemour eo kōn kōm̧m̧ane ekkatak eo aō make ilo Intōrnet. Iaar ļōmņak in kar lo m̧ool eo me taktō ro aō raar jab jeļā ak kar kajieon̄ ņooj jān n̄a.
Eaar bōk jidik iien n̄an n̄a m̧okta jān aō kar kile jum̧ae eo aō kōn ta eo iaar kōm̧m̧ane. Aaet, kappukōt men ko kōn kōj make ej juon ļōmņak enana. Bōtaab iaar kowaan m̧ool eo imaron̄ kar pedped ioon im ijello̧kin lo eō make itok limoū kōn meļeļe eo loe ilo Intōrnet.
Jet iien, m̧ool eo emaron̄ āinwōt kanooj ju, kanooj jej uwaan, im kanooj pidodo n̄an kōj n̄an kanooj kam̧oolol kōn aorōk eo eļap an. Kōn menin jej kowaan ta eo jaar en̄jake im jeļā bwe em̧ool ilo pukōt meļeļe ko rekabwilōn̄lōn̄ ak tarpok. Kōjatdikdik jenaaj katak bwe n̄e jej pukōt uwaak ko rejjab m̧ool, jej pukōt men ko me edik kilaer im aorōkier.
N̄e ej itok n̄an m̧ool eo ilo jetōb, ekōjkan ad maron̄ jeļā bwe jej pād ilo iaļ eo ejim̧we?
Juon wāween ej kōn kajjitōk kajjitōk ko rejim̧we—kain eo me ejipan̄ kōj kejōkļo̧kjeņ kōn eddōkļo̧k eo ad im etale ekōjkan an men ko jerbal n̄an kōj. Kajjitōk ko āinwōt:
“Mour eo aō ewōr ke meļeļe in?”
“Ij ke tōmak ilo Anij?”
“Ij ke tōmak bwe Anij ejeļā kajiō im iakwe eō?”
“Ij ke tōmak bwe Anij ej ron̄jake im uwaaki jar ko aō?”
“Ij ke lukkuun m̧ōņōņō?”
“Kijejeto ko aō rej ke tōl eō n̄an kōttōpar ko raorōk tata ilo jetōb im aorōk ko an mour?”
Kajjitōk ko rem̧wilaļ ikkijien unin mour in kar tōl elōn̄ kajjojo im baam̧le ko ilo aolepān laļ in n̄an pukōt m̧ool eo. Emakijkij an kappukōt jab in tōl er n̄an Kabun̄ eo an Jisōs Kraist im Armej ro Rekwojarjar ilo Raan-ko Āliktata im n̄an gospel eo kar kōjepļaktok.
Ij kōļmenļo̧kjeņ eļan̄n̄e kōj, āinwōt membōr ro an Kabun̄ in, maron̄ barāinwōt jeram̧m̧an jān kajjitōk ippād make jān iien n̄an iien: “En̄jake eo aō ilo Kabun̄ in ejerbal ke n̄an eō? Ej ke kepaak ļo̧k eō n̄an Kraist? Ej kōjeram̧m̧an eō im baam̧le eo aō kōn aenōm̧m̧an im lan̄lōn̄ āinwōt kar kallim̧ur kake ilo gospel eo?”
Alma eaar kwaļo̧k ejja kajjitōk ko wōt n̄an membōr ro an Kabun̄ eo ilo Zarahemla ke eaar kajjitōk: “Kom̧ ar bōk ke oktak in ekajoor ilo buruōmi? … [Im] [kom̧] maron̄ ke en̄jake kiiō”1 Kain etale in emaron̄ jipan̄ kōj bar kalimjōk ak bar kajim̧we kijejeto ko ad raan otemjeļo̧k ippān karōk in lo̧mo̧o̧r eo ekwojarjar.
Elōn̄ membōr ro renaaj m̧ōņōņō in uwaak bwe en̄jake eo aer āinwōt juon membōr in Kabun̄ in ej lukkuun jerbal n̄ar er. Renaaj kam̧ool bwe men̄e ilo iien jeram̧ōl ko ak m̧weie, men̄e men ko rem̧m̧an ak kōmettak, rej lo meļeļe in, aenōm̧m̧an, im lan̄lōn̄ kōnke kōn kallim̧ur eo aer n̄an Irooj im jerbal in kijejeto eo aer ilo Kabun̄ in. Aolep raan ij ioon membōr ro an Kabun̄ in me rej obrak kōn juon lan̄lōn̄ eromaak im ro rej kwaļo̧k ilo naan im jerbal bwe mour ko aer rekanooj jeram̧m̧an kōn jepļaaktok eo an gospel eo an Jisōs Kraist.
Ak ij barāinwōt kile bwe ewōr jet me edik ļo̧k en̄jake eo aer—eo ej en̄jake bwe uwaan eo aer ilo Kabun̄ in jet iien ejjab jon̄an eo raar kōjatdikdik kake.
Menin ekabūrom̧ōj eō kōnke ijeļā n̄a make ekōjkan an gospel eo maron̄ kōkajoor ļo̧k im kōkāal jetōb an juon—ekōjkan an maron̄ kobrak būruwōd kōn kōjatdikdik im ad ļōmņak kōn meram. Ijeļā kōn n̄a make ekōjkan an leen ko an gospel eo an Jisōs Kraist em̧m̧an maron̄ ukōt mour ko jān āinwōt in im bajjōk n̄an ejej uwaan im aiboojoj.
Ak etke āinwōt em̧m̧an ļo̧k an jerbal n̄an jet jān ro jet? Ta oktak eo ikōtaan rein ro en̄jake eo aer ilo Kabun̄ in ekobrak jetōb ko aer kōn al in iakwe in lo̧mo̧o̧r2 im ro me rej en̄jake bwe jet men ejabwe ippāer?
Ilo aō kar kejōkļo̧kjeņ kōn kajjitōk kein, elōn̄ ļōmņak ko rekar jiktok ippa. Rainin, ikōņaan kwaļo̧k ruo.
Kapidodoik
Moktata: Jej ke kōm̧m̧an bwe ad wāween ad mour āinwot rikaļooran en kapokpok?”
Gospel in eaiboojoj ekanooj in pidodo juon ajri emaron̄ meļeļe kake, bōtaab ekanooj in m̧wilaļ im kaipokpok jon̄an enaaj bōk to̧o̧n wōt ad mour—em̧ool n̄an indeeo—kōn katak im lo meļeļe eo edipio kake.
Ak jet iien jej bōk aiboojoj eo an m̧ool eo an Anij im kalbubuik kōn alen ioon alen kōn ļōmņak ko rem̧man, būrookraam̧ ko, im kōtmene ko ejaki in armej. Kajjojo iaer, kōn e make, maron̄ jipan̄ im jejjet n̄an juon tōre im jekjek, bōtaab n̄e rej pād ioon doon, remaron̄ ejake juon toļ edim me ej erom mijel im eddo jon̄an jemaron̄ jerwane erreim̧aan ļo̧k eo me aorōk eo an me juon iien jaar kanooj iakwe.
Kōn menin, āinwōt ritōl ro jej aikuj dim kōjparok Kabun̄ in im gospel eo ilo erreo eo im pidodo eo an im joļo̧k kobaik tok eddo ko rejjab aorōk ioon membōr ro ad.
Im aolepād wōj, āinwōt membōr ro an Kabun̄ in, jej aikuj n̄an kōm̧m̧āne juon kijejeto in mejmejkaruo n̄an wujlep ļo̧k ad kajoor im iien n̄an men ko me rekanooj aorōk, ilo an kōketak armej ro im kalōk aelōn̄ in kiin̄ eo an Anij.
Juon sister, rūkaki in Doulul eo an Kōrā, kar jeļā kajien kōn an wejepedik an kōpooj katak ko. Juon iien, liin eaar kālet n̄an kōm̧m̧ane juon quilt eaiboojoj me enaaj kar jerbal āinwōt jon̄ak eo ejejjet n̄an unin tōl eo an katak eo an. Bōtaab elōn̄ apan̄ rekar waļo̧k—eaar wōr ajri ro n̄an ektake er jān jikuuļ, juon rūturin eaar aikuj jipan̄ kōm̧m̧akūt, juon ļeo pālele eaar pipa, im juon m̧ōttan kar en̄jake ajimakeke. Raan eo an katak eo eaar epaaktok, im quilt eo eaar jab dedeļo̧k. Āliktata, bon̄ōn eo m̧okta jān katak eo an, liin eaar jab ļap an kiki ilo an kar jerbale quilt eo aolepān bon̄ōn eo.
Raan eo juon liin eaar m̧ōk im maron̄ kobaik ļōmņak ko an, bōtaab eaar peran ilo jutak im kwaļo̧k katak eo an.
Im quilt eo eaar jej uwaan—keke ko raar jejjet, kōļar ko raar kōpaļpaļ, im jon̄ak eo kaipokpok. Im ilo ioļapļap in kar juon naan me eaiboojoj kwaļo̧k unin tōl eo an katak eo an: “Kapidodoik.”
Ro jeiū im jatū, mour kōn gospel eo ejjab aikuj in kapokpok.
Ekanooj in kajju. Emaron̄ in kar kōmeļeļeik āinwōt in:
-
Ron̄jake naan eo an Anij kōn kōttōpar em̧ool ej tōl kōj n̄an tōmak ilo Anij im n̄an lōke kallim̧ur ko An.3
-
An ļap ļo̧k ad lōke Anij, eļap ļo̧k an būruwōd obrak kōn iakwe n̄an E im n̄an doon.
-
Kōnke kōn iakwe eo ad n̄an Anij, jej ikdeelel n̄an ļoor E im kajjokun wōt juon m̧akūtkūt ko ad ippān naan eo An.
-
Kōnke jej iakwe Anij, jej kōnaan jerbal n̄an E; jej kōņaan kōjeram̧m̧an mour ko an ro jet im jipan̄ rijeram̧ōl im riaikuj.
-
Ilo an ļap ļo̧k ad etetal ilo iaļ eo an rikaļoor, eļap ļo̧k ad ikdeelel n̄an katak kōn naan eo an Anij.
Im kōn menin ej āindein, kajjojo bun̄tōn ej tōl n̄an eo tok juon im kobrak kōj kōn ļap ļo̧k in tōmak, kōjatdikdik, im iakwe em̧ool.
Ekanooj pidodo, im eaiboojoj an jerbal.
Ro jeiū im jatū, eļan̄n̄e kom̧ kar ļōmņak bwe gospel eo ejjab kanooj em̧m̧an an jerbal n̄an kom̧, ij kūr kom̧ n̄an kātok jidik, etale mour eo am jān juon baluun epād iju eutiej, im kapidodoik jibadōk lo̧k eo ami n̄an kaļoor. Mije wōt katak ko, pedped ko, im kajjitōk m̧oktata an gospel in. Ij kallim̧ur bwe Anij enaaj tōl im kōjeram̧m̧an kom̧ ilo iaļ eo ami n̄an kakūm̧ool mour, im gospel eo enaaj kanooj jerbal em̧m̧an ļo̧k n̄an kom̧.
Ijjino Ijo Kom̧ij Pād Ie
Elmakot eo kein karuo aō ej: ijjino ijo kom̧ij pād ie.
Jet iien jej en̄jake ebbwer kōnke jejjab “ļap ļo̧k” kōn jabdewōt—ļap ļo̧k ilo jetōb, kautiej, meletlet, ājmour, m̧weie, jouj, ak maron̄. Ilo m̧ool, ejjeļo̧k bōd kōn kōņaan kōkōm̧anm̧an ļo̧k. Anij eaar ejake kōj n̄an eddōk ļo̧k Ak kememej, m̧ōjņo̧ ko ad remaron̄ jipan̄ kōj n̄an ad ettā im ukōt kōj n̄an Kraist, eo enaaj “kōm̧m̧an mennin m̧ōjņo̧ ko ren erom kajoor.”4 Satan, ilo jekjek eo juon, ej kōjerbal m̧ōjņo̧ ko ad n̄an jon̄an eo me jej ebbwer jān em̧ool kajieon̄.
Iaar katak ilo mour bwe jejjab aikuj in “ļōn̄ ļo̧k” kōn jabdewōt n̄an jino erom armej eo Anij ekōņaan bwe jān erom.
Anij enaaj bōk kom̧ āinwōt ami pād ilo tōre in im jino jerbal ippāmi. Men eo de eo kom̧ij aikuj in ej bōro eo ekōņaan, juon ikdeelel n̄an tōmak, im lōke ilo Irooj.
Gideon eaar lo emake āinwōt juon rijeram̧ōl jerata, dik tata ilo m̧weo im̧ōn jemen. . Bōtaab Anij eaar lo e āinwōt juon em̧m̧aan kajoor im peran.5
Ke Samuel eaar kālet Saul n̄an erom kiin̄, Saul eaar kajieon̄ kōnono n̄an e bwe en jab kiin̄. Saul eaar jān juon iaan bwij ko reddik tata an im̧ōn Israel. Ekōjkan an maron̄ kiin̄?6 Ak Anij eaar lo e āinwōt “e wūlio.”7
Jekdo̧o̧n rikanaan eo eļap Moses eaar kanooj en̄jake tōrjān jon̄an im ebbwe ilo juon tōre jon̄an eaar kōņaan ebbwer im mej.8 Bōtaab Anij eaar jab ebbwer jān Moses.
Ro jeiū im jatū jitōnbōro, eļan̄n̄e jej kalimjōk kōj wōt kōn mejād wabanban, jemaron̄ jab lo kōj āinwōt ebwe. Ak Jemedwōj Ilan̄ ej lo kōj āinwōt wōn lukkuun kōj im wōn kōj jemaron̄ erom. Ej lo kōj āinwōt ļaddik im leddik ro Nejin, āinwōt ānbwiin ko an meram indeeo kōn piktok indeeo eo im kōn juon jibadbad ekwojarjar.9
En̄taan eo an Rilo̧mo̧o̧r eaar kōpeļļo̧k kōjām in lo̧mo̧o̧r eo n̄an aolep n̄an bar jepļak n̄an Anij. An “jouj ebwe n̄an aolep [ro] rej kōttāik er make [Anij].”10 An jouj ej kajoor in kōmaron̄ eo me ekapidodoik n̄an deļo̧n̄e aelōn̄ in kiin̄ in lo̧mo̧o̧r eo an Anij. Kōnke kōn An jouj, jenaaj aolep jerkakpeje im lo̧mo̧o̧r ilo aiboojoj in aelōn̄ in kiin̄ eo.
Em̧ool aelōn̄ in kiin in aiboojoj eo ettā tata, aelōn̄ in telestial, eļļāļo̧k aolep jeļāļo̧kjeņ,11 im ejjeļo̧k oran armej renaaj jolete lo̧mo̧o̧r in.12
Ak kōn jouj an Rilo̧mo̧o̧r emaron̄ kōm̧m̧an eļap ļo̧k n̄an kōj. Āinwōt membōr ro an Kabun̄ eo an Jisōs Kraist im Armej ro Rekwojarjar ilo Raan-ko Āliktata, jej jibadōk jet men eļap ļo̧k aer kabwilōn̄lōn̄. Ej mour āinwōt Anij ilo aelōn̄ in celestial. Ej mour indeeo ilo im̧aan mejān Jemedwōj ilo Lan̄. Ej menin letok eo eļap tata an Anij.13 Ilo aelōn̄ in celestial, jej bōk dipiio eo an, im aiboojoj eo an.”14 Ilo m̧ool, aolep ko Jemed ewōr ippān naaj letok n̄an kōj.15
Mour āinwōt Anij ej ad kōttōpar; rikaļoor ej ad em̧m̧akūt.
Ilo ami kōjerbal jidik tōmak im jino ilo̧k eo ami āinwōt juon rikaenōm̧m̧an rikaļoor an Irooj Jisōs Kraist, būruwōmi enaaj oktak.16 Aolepān ami emaron̄ obrak kōn meram.17
Anij enaaj jipan̄ kom̧ erom juon men eļap ļo̧k n̄an kōm jān ami kar maron̄ ļōmņake. Im kom̧ lo bwe gospel eo an Jisōs Kraist ilo m̧ool ejerbal ilo mour eo ami. Ejerbal.
Ej Jerbal!
Ro jeiū im jatū, ro m̧ōtta jitōnbōro, ij jar bwe jenaaj kalimjōk “erreo eo ilo Kraist”18 ami kōtļo̧k An jouj n̄an kotak im bōk kōj ilo em̧m̧akūt in ad jān ijo jej kiiō pād ie n̄an jibadbade eo an eaiboojoj ilo im̧aan mejān Jemedwōj.
Ilo ad kōm̧m̧ane āindein, im juon enaaj kajjitōk ippād, “Ekōjkan erom juon membōr in Kabun̄ in eo an Jisōs Kraist Armej ro Rekwojarjar ilo Raan-ko Āliktata jerbal?” Jenaaj maron̄ ba kōn utiej im kōn lan̄lōn̄ eļap, im ilo ettā, “Eaiboojoj an jerbal! Kom̧m̧ool kōn ami kajjitōk! Kwon kōņaan ke eļap ļo̧k?”
En̄in ej aō kōjatdikdik, aō jar, aō naan in kam̧ool, im aō kōjeram̧m̧an ilo etan Jisōs Kraist, amen.