“Kar Kālet n̄an Kwaļo̧k Naan in Kam̧ool kōn Eta”

Jān Elder David A. Bednar

Jān Doulul eo an Jon̄oulruo Rijilōk ro

Eaiboojoj n̄an wōr em̧m̧aan ro rōrūttoļo̧k kōn kekemo̧o̧j eļap ilo jetōb im ekajet rej jerbal ilo jerbal in tōl ko reutiej an Kabun̄ eo kar kōjepļaaktok an Jisōs Kraist.

Ilo 1996 Būreejtōn Gordon B. Hinckley kar bwebwenato ippān ilo national tipi nuuj būrookraam̧ eo 60 Minutes. Mike Wallace, juon rikōm̧m̧an nuuj eo etijem̧ōo̧k im jeļā kilen kajjitōk, kar intōrpiuki Būreejtōn Hinckley kōn elōn̄ unin kōnono ko raorōk.

Ilo jem̧ļo̧k in ļo̧k ekōnono eo aerro, Mr. Wallace ekar ba, “Elōn̄ armej rej ba, ‘Kabun̄ in ej tōl in doulul in ļōļļap ro. Kabun̄ in ej juon kabun̄ ej tōl jān ļōļļap ro.’”

Būreejōn Hinckley eaar uwaak ilo laudin̄din̄ im ilo ejjeļo̧k pere, “Ta ejjab em̧m̧an ke n̄an wōr juon em̧m̧aan ekekemo̧o̧j ilo jeban ke, juon em̧m̧aan in ekajet em̧m̧an me ejjab m̧akūtkūt kōn jabdewōt kōto in katak?” (broadcast on Apr. 7, 1996).

Jibadbad eo aō ej n̄an kōmeļeļeik etke ilo m̧ool ilo an wōr em̧m̧aan ro rōrūttoļo̧k kōn kekemo̧o̧j eļap ilo jetōb im ekajet jerbal ilo jerbal in tōl ko reutiej an Kabun̄ eo kar kōjepļaaktok an Jisōs Kraist—im etke jej aikuj “ron̄jake” im “eoron̄” (Mosaia 2:9) n̄an katak ko an em̧m̧aan rein Irooj eaar “kālet n̄an kwaļo̧k naan in kam̧ool kōn Etan ibwilijin laļ ko, bwij ko, lo ko, im armej ro” (K&B 112:1).

Ij jar bwe jān maron̄ aolep katakin jān Jetōb Kwojarjar eo ilo ad kejōkļo̧kjeņ ippān doon unin kōnono in eaorōk.

Juon Katak Katak jāne To̧o̧n wōt ad mour

Ij kōnono kōn unin kōnono in jān elmakot ejej uwaan edim. Ium̧win iiō ko 11 remootļo̧k, iaar eo uwaan Doulul eo an Jon̄oulruo Rijilōk ro edik tata ilo laajrak in rūtto̧o̧n iiō. Ilo tōreen iiō in jerbal ko aō, jon̄an rūtto̧o̧n iiō an em̧m̧aan ro rej jerbal ilo Būreejtōnji eo Kein Kajuon im Doulul eo an Jon̄oulruo Rijjilōk ro ekar 77 iiō rūtto̧o̧n—jon̄an rūtto̧o̧n iiō eo erūtto tata an Rijilōk ro eaar dettan eo erūtto tata ium̧win 11 iiō ko ilo tōre in bōk eddo in.

Emōj aō jeram̧m̧an kōn iminene eo im lo̧ļe in koba in rijilōk ro, kabun̄, juon make, im tijem̧ļo̧k an ro uwaan doulul eo me ij jerbal ie. Juon waanjon̄k jān iaio eo aō ippān Elder Robert D. Hales ej kalikkar iien ko rem̧m̧an rejej uwaer iaar katak jān im jerbal ippān ritōl rein.

Jet iiō ko ļo̧k iaar pād ippān Elder Hales juon raelepān Jabōt ilo m̧weo im̧ōn ilo an kar mour tak jān juon nan̄inmej eļap. Kōm kar kōnono kōn baam̧ļe ko am, eddo ko an doulul eo am, im en̄jake ko am raorōk.

Ilo juon tōre iaar kajjitōk ippān Elder Hales, “Em̧ōj am̧ erom ļeo pālele, jemen, rikkure, jeban pejnej ewejepedik, im ritōl an Kabun̄. Ta katak ko kwar katak ilo am̧ kar rūttoļo̧k im kar lokjak kōn nan̄inmej ilo ānbwiin?”

Elder Hales eaar bōjrak ium̧win jidik iien im kar uwaak, “N̄e kwojjab maron̄ kōm̧m̧ane ta eo kwar iien otemjej kadedeļo̧k, innām kwoj kōm̧m̧ane wōt ta eo eaorōk tata.”

Eaar ļo̧kjān aō kōn uwaak eo elem waan im likio. Ro m̧ōtta jitōnbōro rijilōk kar kwaļo̧k ippa juon katak an toon wōt aō mour—juon katak kar katak kōn idajon̄jon̄ ko reppen an en̄taan ilo ānbwiin im etal ilo jetōb.

Likjab ko im M̧ōjņo̧ ko an Armej

Likjab ko me rej kaje an bwij wōļāļo̧k emaron̄ ilo m̧ool erom kein jipan̄ ko ejej uwaer an katak ilo jetōb im meļeļe. Ejja un ko wōt elōn̄ remaron̄ tōmak kōm̧m̧an jon̄an wejepedik eo an ritōl rein emaron̄ erom jet iaan kajoor ko aer reļļap tata. Jon̄ak ko an ānbwiin remaron̄ kōļapļo̧k meļeļe eo an juon. Jon̄ak an maron̄ emaron̄ kalikkar aorōk tata ko. Jakeke n̄an kōm̧m̧an elōn̄ men ko emaron̄ kōjaaļo̧k kōttōpar eo n̄an men ko eļap aer aorōk.

Jet armej em̧ōj aer elmakote ro reddik ļo̧k, elōn̄ ļo̧k ritōl ro rekajoor ļo̧k aikuji ilo Kabun̄ in n̄an ņa mejļan ilo jejjet ļo̧k apan̄ ko reļļap an laļ in ad rainin. Bōtaab Irooj ejjab kōjerbal tōmak ko im iminene ko an raan kein an tōl n̄an kōtōprak jibadbak ko An (lale Aiseia 55:8–9). Jemaron̄ kōtmene bwe Būreejtōn eo im ritōl ro jet rōrūtto an Kabun̄ in iien otemjej em̧m̧aan ro renaaj rūtto im em̧ōj aer bōk eļap jeļā ilo jetōb.

Irooj ej kwaļo̧k jon̄ak in tōl kōn doulul ko ilo Kabun̄ eo An rej letok n̄an im kadikļo̧k m̧ōjņo̧ ko an armej rej waļo̧k. Ekaitoktok limo, jon̄ak ko an mour wabanban an em̧m̧aan rein ilo m̧ool kapen un eo ekwojarjar an revelesōn ko me rej itok im kōn er. Em̧ool, em̧m̧aan rein rej kūr jān Anij kōn kanaan (lale Laajrak in Tōmak ko1:5).

Jon̄ak in M̧aanjapopo

Iaar lale an Ritōl ro aō ilo juon m̧ōttan edik in jibadbad eo an Irooj ilo an em̧m̧aan ro rōrūtto ļo̧k rekekemo̧o̧j im em̧m̧an ilo ekajet jerbal ilo jerbal in tōl ko reutiej an Kabun̄ in. Em̧m̧aan rein em̧ōj katakin er jān Irooj ium̧win juon tōre eaitok, eo rej bōk jikin, jerbal, im iakwe. Em̧ōj aer katak n̄an meļeļe kajin eo ekwojarjar an Jetōb Kwojarjar im jon̄ak ko an Irooj n̄an bōk revelesōn. Em̧m̧aan rein ejej uwaer em̧ōj aer dipuk jekjek in eddōk ļo̧k eo ejej uwaan me em̧ōj an kōkōm̧anm̧an ļo̧k erreim̧aanļo̧k eo aer, kareel meļeļe ko aer, ejake ilo er iakwe n̄an armej ro jān aolep laļ ko im jekjek ko, im kapen m̧ool eo an Jepļaaktok eo.

Em̧ōj aō kar kam̧ool im bar kam̧ool Ritōl ro aō kajieon̄ ilo tiljek n̄an kakūrm̧ool im kōļapļo̧k eddo ko aer ilo aer ļon̄tak kōn jorrāān ko reļļap an ānbwiin. Em̧m̧aan rein rejjab bōbrae er jān ioon kaen̄etaanan. Ijello̧k, rej jeram̧m̧an im kajoorļo̧k n̄an bun̄ m̧aanļo̧k ilo peran ilo aer en̄taan ilo im kōn kaen̄etaanan.

Jerbal ippān rijerbal rein an Irooj, em̧ōj aō itok n̄an jeļā ikideele eo aer eļap tata ej n̄an jeļā im kōm̧m̧an an kilaan Jemedwōj Ilan̄ im Nejin Emake Wōt. Ilo ekōnono ko aō ippān Ritōl rein aō, im̧we em̧ōj bōk im jem̧ļo̧k ko em̧ōj kar kōm̧m̧ani me rej kwaļo̧k juon jon̄ak eo bwe kōm kar bōk juon jon̄an jeļāļo̧kjeņ im m̧ool eļap ļo̧k meletlet an armej, ļōmņak, im iminene. Ippān doon ilo jerbale jorrāān ko reppen, amwōj meļeļe kōn juon unin kōnono ekar ļap ļo̧k ilo wāween ko rekabwilōn̄lōn̄ jān kajoor eo an Jetōb Kwojarjar.

Ijeram̧m̧an n̄an lale ilo aolep raan paotok ko, maron̄ ko an juon make, im m̧wil eo ettā an ritōl rein. Jet armej rej lo likjab ko an armej an Ritōl rein ekōjorrāān im kadik ļo̧k tōmak. N̄an n̄a likjab ko rej kōketak im kōkōm̧anm̧an ļo̧k tōmak.

Juon Dam̧oļo̧k in Katak

Kiiō iaar kam̧ool jiljino Ritōl ro aō em̧m̧akūt kōn mej ilo kanniōk n̄an bōk eddo ko rekāāl ilo laļ eo an jetōb: Būreejtōn James E. Faust, Būreejtōn Gordon B. Hinckley, Elder Joseph B. Wirthlin, Elder L. Tom Perry, Būreejtōn Boyd K. Packer, im Elder Richard G. Scott.

Ritōl rein reperan kar wujlepeļo̧k “aolepān jetōb ko” aer (Omni 1:26) an kam̧ool kōn etan Jisōs Kraist ilo aolepān laļ in. Aolepān katak ko aer eļap aer aorōk

Ritōl rein rej kwaļo̧k ippād ilo jem̧ļo̧k in iiō in jerbal in kwaļo̧k ko aer tukadu in katak ko kar katak ilo n̄oul iiō ko an jerbal kwojarjar. Ritōl rein raar katakin m̧ool ko eļap tokjāer ilo juon tōre ilo an jet maron̄ tōmak diktata ko raar litok.

Ļōmņak kōn katak ko āliktata an rikanaan ro reļļap ilo jeje ko rekwojarjar. N̄an waanjon̄ak, Nipai eaar kōjem̧ļo̧k ļo̧o̧k eo an kōn naan kein: “Bwe āindein Irooj Eaar jiron̄ eō, im ij aikuj pokake” (2 Nipai 33:15).

Ilo jem̧ļo̧k in ļo̧k mour eo an, Jacob ekar kean̄:

“Kom̧in ukweļo̧k, im deļo̧n̄ ilo kōjām erānin̄, im wōnm̧aanļo̧k ilo iaļ eo eaidik, m̧ae iien kom̧ naaj bōk mour indeeo.

“O kom̧in meletlet; ta Imaron̄ ba eļapļo̧k?” (Jekab 6:11–12).

Moronai eaar kadedeļo̧k jerbal in kōpooj pileij ko kōn juon kōtmene in kōjatdikdik an Jerkakpeje eo: “Ij ilo̧k ejjab to n̄an kakkije ilo paradise an Anij, m̧ae iien aō jetōb im ānbwinnū renaaj bar koba, im naaj bōktok eō anjo̧ ilo mejatoto, n̄an ioon kom̧ im̧aan jikin ekajet ejouj an Jeova Eļap, Ri Ekajet Indeeo an jim̧or ro re mour im ro re mej” (Moronai 10:34).

Kwe im n̄a jejeram̧m̧an n̄an katak jān katak ko im naan in kam̧ool ko āliktata an rikanaan im rijilōk ro ilo raan kein āliktata. Āt ko rainin rejjab Nipai, Jekab, im Moronai—bōtaab rej Būreejtōn Faust, Būreejtōn Hinckley, Elder Wirthlin, Elder Perry, Būreejtōn Packer, im Elder Scott.

Ijjab ba bwe ennaan ko āliktata an em̧m̧aan jitōnbōro rein raar ko eļaptata reļļap tata ak aorōk in jerbal in kwaļo̧k ko aer. Ijowōt ke, dipio in katak eo aer ilo jetōb im jeļā ko aer ekemaron̄ ritōl rein n̄an kalikkar m̧ool ko indeeo kōn likio in m̧ool im kajoor eļap.

Ilo kōnono eo an āliktata ilo kweilo̧k eo eļap ilo Eprōļ in 2007 eo, Būreejtōn Faust eaar kean̄:

“Rilo̧mo̧o̧r eo eaar letok n̄an aolepādwōj juon aenōm̧m̧an eaorōk kōn Pinmuur eo An, bōtaab menin emaron̄ itok wōt ilo ad m̧ōņōņō in julo̧k en̄jake ko renana an illu, lāj, ak ukōt nana n̄an nana. …

“Jān kememej bwe jej aikuj in jeorļo̧k bōd bwe en jako ad bōd. … Ij tōmak ilo kajoor in kemour eo me emaron̄ itok n̄an kōj n̄e jej ļoor kapilōk eo an Rilom̧oor eo ‘n̄an jeorļo̧k an aolep armej bōd’ [ K&B 64:10 ]” (“The Healing Power of Forgiveness,” Liahona, Māe 2007, 69).

Ennaan eo an Būreejtōn Faust ej juon katak ekajoor an to̧o̧n wōt ad mour jān juon em̧m̧aan eo ij iakwe im juon iaan em̧m̧aan rein eļap an jeorļo̧k bōd iaar jeļā kajien.

Būreejtōn Hinckley eaar kam̧ool ilo kweilo̧k eo eļap an āliktata ilo Oktoba 2007: “Ij ālij kam̧ool eo aō kōn kūr eo an Rikanaan Josep, kōn jerbal ko an, kōn sili naan in kam̧ool eo an kōn bōtōktōk in make ilo an kar mej kōn m̧ool indeeo. … Kwe im n̄a jej jelm̧ae kōn kajjitōk eo eļamwaan kōn bōk m̧ool eo an Loļo̧k eo Kein Kajuon im ta eo eaar waļo̧k ālkin. Maron̄ eo an Kabun̄ in ej pedped wōt ioon m̧ool eo an Loļo̧k eo Kein Kajuon. Eļan̄n̄e ej m̧ool eo in, im ij kam̧ool bwe ej, innām jerbal eo jej bōk kuņaad ie ej jerbal eo aorōk tata ioon laļ in” (“The Stone Cut Out of the Mountain,” Liahona, Nob. 2007, 86).

Kam̧ool eo an Būreejtōn Hinckley ej kapen juon katak ekajoor to̧o̧n wōt ad mour jān juon em̧m̧aan eo ij iakwe im jeļā eaar juon rikanaan an Anij.

Elder Wirthlin eaar kwaļo̧k ennaan eo an ilo kweilo̧k eo eļap an āliktata ilo Oktoba in 2008 eo.

“Ij kememej wōt kapilōk eo [an jinō] n̄an n̄a kar letok ilo raan eo elōn̄ iiō remoot ļo̧k ke tiim eo aō ekar luuji juon game in football: Kōtļo̧k bwe ta enaaj waļo̧k en waļo̧k, im iakwe.’

“ … Apan̄, eļan̄n̄e ejim̧we kōjebwebweik, emaron̄ juon kōjeram̧m̧an ilo mour ko ad. …

“Ilo ad pukōt kōjak, pukōt ļōmņak eo indeeo, meļeļe pedped eo me Anij ej kōro̧o̧l men otemjej kar jako n̄an ritijlek ro, im kepaak ļo̧k Jemedwōj Ilan̄, jemaron̄ niknik ilo apan̄ im mālijjon̄. Jemaron̄ ba, āinwōt kar jinō, ‘‘Kōtļo̧k bwe ta enaaj waļo̧k en waļo̧k, im iakwe’” (“Come What May, and Love It,” Liahona, Nob. 2008, 28).

Ennaan eo an Elder Wirthlin ej juon katak ekajoor to̧o̧n wōt ad mour jān juon em̧m̧aan eo ij iakwe me eaar kwaļo̧k ta kar katakin n̄an anjo ioon apan̄ ko kōn tōmak ilo Rilo̧mo̧o̧r eo.

Elder Perry eaar jutak ilo lokatok in jiljino allōn̄ ko remootļo̧k. Ilo tōre eo, jaar jab maron̄ ļōmņake naan in kam̧ool eo an enaaj kar eo āliktata ilo kweilo̧k eo eļap.

“Ij kilōk ilo aō kwaļo̧k aō kam̧ool (im ratimjuonn̄oul iiō ko aō ioon laļin ekōm̧m̧an aō maron̄ ba men in) bwe ilo aō rūttoļo̧k, elāpļo̧k aō kile ke baam̧le ej dilep in mour in im ki eo n̄an m̧ōņōņō eo indeeo.

“Ij kam̧m̧olol kōrā eo ippa, ajri ro nejū, kōn ro jibū im ro im epepen eo kein karuo an ro jibū, im kōn … ro nuku me ej kōm̧m̧an bwe mour e aō en m̧ōņōņō im, im aet, maron̄ mour n̄an indeeo. Kōn m̧ool in n̄an indeeo ij kwaļo̧k kam̧ool eo aō ekajoortata im ļap an ekwojarjar” (“Etke M̧are im Baam̧le Raorōk—Aolep Jikin ilo Laļ in,” Kweilo̧k eo Eļap, Māe 2015, 42).

Ennaan eo an Elder Perry ej juon katak ekajoor to̧o̧n wōt ad mour jān juon em̧m̧aan eo ij iakwe im me eaar meļeļe kōn jān jeļā eļap kadkad eo eaorōk ikōtaan baam̧le im m̧ōņōņō indeeo.

Būreejtōn Packer eaar kalikkar ilo kweilo̧k eo eļap jiljino allōn̄ ko remoot ļo̧k karōk in m̧ōņōņō eo an Jemed, Pinmuur eo an Rilo̧mo̧o̧r, im baam̧le ko indeeo:

Ij kwaļo̧k kam̧ool bwe Jisōs ej RiKraist eo im Nejin Anij eo emour. E ej jutak jeban Kabun̄ in. Kōn Pinmuur eo An im kajoor in priesthood eo, baam̧le ko me rekar ijjino ilo mour in remaron̄ ippān doon ilo indeeo ko. …

“Ij kanooj kam̧oolol kōn … Pinmuur eo eo emaron̄ kwaļo̧k aolep māār jekdo̧o̧ņ ewi pen ak ewi aitokan ak ewi lōn̄ in kar āliji. Pinmuur eo emaron̄ kanem̧kwoj eok bar juon alen n̄an bun̄ m̧aan ļo̧k, erreo im wānōk” (“Karōk In M̧ōņōņō Eo,” Kweilo̧k eo Eļap, Māe 2015, 28).

Enaan eo an Būreejtōn Packer ej juon katak to̧o̧n wōt ad mour jān juon em̧m̧aan eo ij iakwe im me ilo kijin̄en̄e im bar ālij kar kean̄ bwe un eo “an aolep m̧akūtkūt ilo Kabun̄ in ej n̄an lo bwe juon em̧m̧aan im juon kōrā ippān ajri ro nejier ren m̧ōņōņō ilo m̧ōko, liāp ippān doon n̄an iien im aolep indeeo” ( Kweilo̧k eo Eļap, Māe 2015, 26).

Elder Scott eaar kean̄ ilo kōnono eo an āliktata ilo kweilo̧k eo eļap, ilo Oktoba 2014: Jaar itok n̄an mour in lukkuun m̧ool n̄an eddōkļo̧k jān mālijjon̄ ko m idajon̄jon Idajon̄jon̄ kein rej jipan̄ kōj erom ļo̧k ānwōt Jemed ilo Lan̄, im Pinmuur eo an Jisōs Kraist ekōm̧m̧an bwe en pidodo n̄an nikniki idajon̄jon̄ ko. Ij kam̧ool bwe ilo ad niknik itok n̄an E, jemaron̄ niknik ilo aolep kapo, aolep meta bōro, aolep idajon̄jon̄ jej jelm̧ai” (“Kōjerbal Tōmak eo Am̧ En Aorōk tata Eo Am̧,” Kweilo̧k eo Eļap, Nob. 2014, 94).

Ennaan eo an Elder Scott ej juon katak ekajoor an toon wōt ad mour jān juon em̧m̧aan eo ij iakwe im rikam̧ool ejeno̧lo̧k an etan Kraist ilo aolepān laļ in ejitōnbōro (see K&B 107:23).

Kallim̧ur im Naan in Kam̧ool

Rilo̧mo̧o̧r eo eaar kean̄, “mekarta jān Ainikiō make ak jān ainikien ro rikarejera, ej āinwōt juon.” (K&B 1:38). Kōm̧m̧an bwe jān ron̄ im keron̄jake m̧ool ko indeeo katak katakin jān rijerbal ro remālim an Irooj. Ilo ad kōm̧m̧an āindein, ij kallim̧ur ad tōmak ilo Jemed Ilan̄ im Jisōs Kraist enaaj kōketak, im jenaaj bōk tōl im kōjparok ilo jetōb n̄an jekjek ko im aikuj ko ad eļap tata.

Ij kam̧ool kōn Kraist eo emour ej tōl jerbal ko an Kabun̄ eo An kar kōjepļaaktok im emour kōn ro Rikarejeran me kar kālet n̄an kwaļo̧k kam̧ool kōn Etan. Āindein ij kam̧ool kōn etan ekwojarjar Jisōs Kraist, amen.