Kwoj Jab Make Iaam Ilo Jerbal In
Jān Būreejtōn Dieter B. Eyring
Rikakpilōklōk eo Kein Kajuon ilo Būreejtōnji eo Kein Kajuon
Ilo ami etal jān juon jerbal an priesthood n̄an bar juon, kom̧ naaj loe bwe Irooj ej pād ilo jerbal in ippam̧i.
Em̧m̧aan ro jitōb bōro, jej kam̧m̧oolol bwe Irooj ekar kūr Elder Ronald A. Rasband, Elder Gary E. Stevenson, im Elder Dale G. Renlund āinwōt Rijilōk ro an Irooj Jisōs Kraist. Būruwōd, im jar ko ad, im ad tōmak rej rejtake er.
Jejeļā kōn jon̄an maron̄ eo ippāer. Kiiō, renaaj aikuji bar kam̧ool eo ilo kūr ko aer, āinwōt ad aolep aikuji, bwe Irooj ej pād ippāer ilo jerbal in An. Kiiō, renaaj aikuji bar kam̧ool eo ilo kūr ko aer, āinwōt ad aolep aikuji, bwe Irooj ej pād ippāer ilo jerbal in An.
Leke in ej eddōkļo̧k ilo ami itok im loe bwe E ekar kūr kom̧ jān rikarejar ro An. Aō naan in rōjan̄ ej n̄an jipan̄ kom̧ jeļā bwe n̄e kom̧ij bōk koņaami, Irooj ej kobaikwaj kajoor eo An n̄an kijejeto ko ami.
Jabdewōt kūr jej būki ilo aelōn̄ in an Irooj rej aikuj eļapļo̧k jān kajjitōk ko an armej im kajoor ko an juon make. Kūr kein rej aikuji jipan̄ jān Irooj, eo enaaj itok. Men̄e juon tikōn ekāāl enaaj katak bwe ej m̧ool, im enaaj etal wōt im ekkatak ium̧win elōn̄ iiō ko.
Juon iaan ļaddik ro jibū ej pād jotenin im ej kein kajuon in an pād ilo m̧wen̄an eo an priesthood. Ekar ekkapit n̄an juon tikōn jiljilino raan ko rem̧ootļo̧k. Ej ļōmņak bwe jerbal eo an kein kajuon ilo eddo an juon priesthood enaaj ajije kwojkwoj eo Jabōt in tok. Jar eo aō in ej bwe enaaj loe iien kein āinwōt rej.
Emaron̄ bōlen ļōmņak bwe jerbal eo an n̄an Irooj ej n̄an ajije pileej in kwojkwoj eo n̄an armej ro rej jijet ilo kwojkwoj eo. Ak jibadbad eo an Irooj ej ejjab baj wōt kōm̧m̧an bwe armej ro ren bōk m̧ōttan pilawā im dān eo. Ej bwe ren kōjparok juon bujen eo me enaaj kōm̧akūtļo̧k er ilo iaļ in n̄an mour indeeo. Im bwe menin en waļo̧k, Irooj ej aikuj leļo̧k juon en̄jake in jetōb n̄an armej eo tikōn eo ej leļo̧k pileej eo n̄ane.
Emōj aō loe an menin waļo̧k ilo juon imōn wōļeej ke tikōn eo ej m̧alļo̧k im leļo̧k pileej eo n̄an juon lellap. Lellap in ekar kalimjōk pilawā eo eļan̄n̄e ekar lukkuun aiboojoj. Ij jan̄in de meļo̧kļo̧k an kar ettōn̄dikdik ke ekar bōk m̧ōttan pilawā eo innām pikpikire bōran tikōn eo, im ba, “O, kom̧m̧ool!”
Tikōn eo ekar baj kōm̧mane wōt eddo eo an. Kiiō, Irooj emōj an kalōn̄ļo̧k jerbal eo an tikōn. Ekar juon kam̧ool bwe lellap in ekar keememej Rilo̧mo̧o̧r eo ke ekar kwaļo̧k kam̧m̧oolol kōn jerbal eo an tikōn eo. Ekar bar kam̧oole ke ļaddik eo ekar ajije kwojkwoj eo n̄an e bwe Jetōb eo en maron̄ pād ippān. Lellap in ekar jab make iaan ilo m̧weo imōn rinan̄inmej. Barāinwōt tikōn eo ilo kar jerbal eo an ewājepdik.
Juon rūkaki ilo Priesthood eo an Aron emaron̄ jab kile, ilo an dieojļo̧k im katakin juon baam̧le, bwe e ej m̧ōttā ippān Irooj ilo jerbal in An. Ij keememej wōt naan in kam̧ool in an juon m̧ōtta riloļo̧k ekar itok n̄an m̧weo imō. Jetōb eo ekar kapen naan ko An n̄an eō im n̄an baam̧le eo aō. Emaron̄ jab keememej raan eo, ak ij keememej wōt.
Irooj enaaj kōļapļo̧k kijejeto ko an juon ļaddik n̄e ej kūr im erom juon pris. Peptaij eo kein kajuon ekar kōm̧mane bōlen āinwōt juon kar armej edik im ejjab jeļā. Emaron̄ inepata eļan̄n̄e enaaj ban jim̧we an ba naan ko im jim̧we an kōm̧m̧ane peptaij eo.
Ak Irooj, wōn rikarjar eo enaaj, kōļapļo̧k menin leļo̧k eo an. Armej eo ej peptaij ekar kālet bwe en etal ilo iaļ eo n̄an mour indeeo. Irooj enaaj kōm̧m̧ane ijo koņaan eļap. Ekar kōm̧m̧ane n̄an juon kōttan n̄an ļaddik eo iar peptaij, dān in mejān ekar to̧o̧r jān turin mejān, im kar jiron̄ eō, “Irreo. Irreo.”
Ilo ami etal jān juon jerbal an priesthood n̄an bar juon, kom̧ naaj loe bwe Irooj ej pād ilo jerbal in ippam̧i. Iaar katak menin jān kweilo̧k in bwe juon būreejtōn an doulul eo an em̧m̧aan ro ilo juon juon kweilo̧k eļap an stake iiō ko ļo̧k. Ilo kweilo̧k in eļap, ekar wōr elōn̄ļo̧k jān 40 etan em̧m̧aan ro rekar bōk Melkisedek Priesthood eo.
Stake būreejtōn eo ekar maltok im unoojdikdik tok, “Em̧m̧aan raņ rekar em̧m̧aan ro rekar janiknik im kar m̧aanjabpopo n̄an erom elder.” Ilo bwilōn̄, ikar kajjitōk ippān būreejtōn eo bwe būrookraam̧ eo an ekar n̄an lo̧mo̧o̧ren em̧m̧aan rein.
Ekar jitōn̄ļo̧k juon likao ilik ilowaan imōn jar eo. Ekar ba, “ļeo ņe. Enan̄in aolepān likao rein rekar bar ro̧o̧ltok kōnke elder quorum būreejtōn eo.” Ekar jijet ilo jiea ko ilik, ejjab karbab nuknuk ko an, neen emōj an erļo̧ke m̧aantak ippān boot ko an.
Ikar kajjitōk ippān stake būreejtōn eo bwen kwaļo̧k kadkadin ālkin kweilo̧k eo. Ke kōm̧ro kar wanm̧ae doon, ikar jiron̄ ļaddik eo bwe ikar ilbōk kōn ta eo ekar kōm̧m̧ane im kar kajjitōk ippān elmen an kar kōm̧m̧ane. Ekar lelōn̄ļo̧k aeran. Ekar ļōmņak ekar jab aikuj naan in kam̧m̧oolol.
Innām ekar mera an ba, ”ijel̗ā kajjojo ro rejāniknik ilo bukwōn in. Elōn̄ iaer ewōr waer tūrak. Ewōr juon waō tūrak barāinwōt. Ij kwal̗ tūrak in waō ijo rej kwal̗ wa ko waer ie. Ejab to, rekar erom m̗ōtta.
“Innām ikar kōttar m̧ae iien ekar wōr juon men ebōd ewaļo̧k ilo mour ko aer. Ej waļo̧k iien otemjej. Rekar jiron̄ tok eō kaki. Ikar ron̄jake im ikar jab ņaruwōn jabdewōt. Innām, ke rekar ba, “Ewōr juon men ebōd ilo mour e aō. Ewōr juon men aikuj em̗m̗anl̗o̗k jān menin; ikar jirton̄l̗o̗k er ta eo ejako im ia eo remaron̄ in loe ie. Jet iien rej tōmak eō, im n̄e rej, ij ān̄intok er.”
Komaron̄ loe etke ekar jim̧we. Kōnke ekar jeļā bwe ekar kōm̧m̧ane ijo koņaan edik im Irooj ekar kōļapļo̧k. Ekar Irooj eo im ekar un̄ūr būruwōn em̧m̧aan rein ilo inepata ko aer. Ekar Irooj eo ekar leļo̧k n̄an er en̄jake eo me ekar aikuj wōr juon men en em̧m̧anļo̧k n̄an er im juon kōjatdikdik bwe remaron̄ in loe.
Likao ren, ro—rekar āinwōt kom̧—kar juon rikarejar an Irooj, kar baj tōmak bwe eļan̄n̄e ekar kōm̧m̧ane ijo koņaad edik, Irooj enaaj jipan̄ em̧m̧aan rein ilo iaļ in aer ļo̧k n̄an kapijuknen im n̄an m̧ōņōņō eo wōt E emaron̄ in leļo̧k n̄an er. Likao in ekar jeļā bwe Irooj ekar kūr e āinwōt elder quorum būreejtōn eo kōnke enaaj kōm̧m̧ane ijo koņaan.
Enaaj wōr iien ko ilo jerbal in jipan̄ ko ami n̄e kom̧ij jab maron̄ loe tōprak eo ekabwilōn̄lōn̄ im ej waļo̧k jān elder quorum būreejtōn eo edik. En̄in ej iien eo im kwonaaj aikuj in lōke bwe Irooj, ejeļā bwe kwonaaj kōm̧mane ijo koņaam̧ ilo jerbal in, kūr eo jān rikarejar ro An. Wōr tōmak ilo kūr eo jān rikarejar ro an Irooj ekar aorōk ilo jerbal in jipan̄ eo an ļōļļap eo jim̧aan-jim̧aan Henry Eyring.
Ekar peptaij ilo Maaj 11, 1855, ilo St. Louis, Missouri. Erastus Snow ekar kapit e n̄an opiij eo an juon pris jejjo iien tokālik. Būreejtōn eo an St. Louis Stake, John kūr e n̄an jerbale juon mijen n̄an Cherokee Nation ilo Oktoba 6.1 Ekar ekkapit n̄an juon elder ilo Oktoba 11. Ekar jepļaak ioon juon kidia n̄an Cherokee Mission ilo Oktoba 24. Ekar 20 an iiō im juon rioktak jiljilimjuon wōt allōn̄.
Eļan̄n̄e elōn̄ kar jabdewōt rikabwijer priesthood ekar wōr unin an en̄jake ke ejjab karbab im jepojak, ekar Henry Eyring. Un eo wōt bwe en wōr ippān peran n̄an etal kōnke ekar jeļā ilo būruwōn bwe Anij ekar kūr e jān rikarejar ro An. Ekar jipan̄ eo n̄an peran eo an. Emaron̄ kar jipan̄ eo an peran eo ad n̄an wōnm̧aanļo̧k wōt, mekarta kūr rot ko ad ilo priesthood eo.
Ālkin an Elder Eyring kar jerbal ium̧win jilu iiō ko reppen im jān mej eo an mijen būreejtōn eo, Henry kar kālete im rejtake āinwōt būreejtōn eo an mijen eo ilo juon kweilo̧k kar kōm̧m̧an ilo Oktoba 6, 1858. Ekar ilbōk im jabrujruj āinwōt an maron̄ waļo̧k n̄an juon tikōn ekāāl. Ekar jeje, “Ekar jab kōtmāne eo aō n̄an kūr n̄an opiij in ak kōnke ekar ankilaan ritōl ro aō, ij m̗ōn̗ōn̗ō in bōke, en̄jaake ejja ilo iien wōt m̗ōjn̗o̗ el̗ap im ejjel̗o̗k aō imminene.”2
Henry Erying kiiō mijen būreejtōn kar ilo̧k n̄an Cherokee, Creek, im Choctaw Nations ilo 1859. Jān kijejeto ko an, Irooj “ekar kobaikļo̧k,” āinwōt an Henry ļo̧o̧ke, “elōn̄ membōr ro rekāāl.” Ekar ejaake ruo branch ko ak kar kile bwe ”rej tiljōk wōt im rie Kabun̄ in.”3
Juon iiō tokālik, Henry ekar jelm̧ae apan̄ kōtaan ritōl ro ilo kien ilubwilijen armej ro im kar bōbrae an kōm̧mane jerbal in mijenede eo an āinwōt Armej ro Rekwojarjar. Ke ekar kejōkl̗o̗kjen̗ kōn ta eo ej aikuj in kōm̗m̗ane, ekar kememej kōmel̗el̗e ko jān mijen būreejtōn eo an m̗oktal̗o̗k ej kwal̗o̗k bwe ej aikuj wōnm̗aanl̗o̗k wōt ilo mijen eo an m̗ae 1859.4
Ilo Oktoba in iiō eo, Henry ekar jeje n̄an Būreejtōn Brigham Young kōn tōl, ak ekar jab bōk juon uwaak n̄an kajjitōk eo an. Henry ekar reko̧o̧te, “Aō jab maron̄ ron̄ jabdewōt jān Būreejtōnji eo an Kabun̄ in, ikar kūr n̄an Irooj ilo jar, kajjitōk Ippān bwen kwaļo̧k tok n̄an n̄a ļōmņak eo an im ankilaan eļan̄n̄e ij pād wōt ak ro̧o̧lļo̧k n̄an Zaion.”
Ekar wōnm̧aanļo̧k wōt: “Ettōņak in kar letok n̄an eō uwaak n̄an jar eo aō. Ikar ettōņak aō itaakļo̧k ilo [Salt Lake] City im mōkaj im etal n̄an opiij eo an [Būreejtōn Brigham] Young, ijo ikar ioon e. Ikar ba n̄an e: ‘[Būreejtōn] Young ikar ro̧o̧ltok jān mijen eo aō, im make tok iaaō, ak ewōr ke jabdewōt men ebōd ilo menin, im̧ōņōņō in ro̧o̧l im kadedeļo̧k mijen eo.’ [Ilo ettōņak eo rikanaan eo] ekar uwaak: ‘Eto am̧ kar pād im ebwe, aolep men rem̧m̧an.’”
Henry ekar je jōnōl eo an, “Elōn̄ ettōņak ko kar m̧okta rekar kūrm̧ool kōn tōmak eo aō, bwe menin enaaj barāinwōt im ijjino eo n̄an m̧aanjabpopo n̄an bar jinoe.”
Ekar itaakļo̧k ilo Salt Lake City Okwōj 29, 1860, im ekar etetal aolepān tōre eo. Raan eo juon, ekar etal n̄an opiij eo an Būreejtōn Brigham Young.5
Henry ekar kōmeļeļeik en̄jake in ilo naan kein: “[Ikar] kūr [Būreejtōn] Young, eo ekar lukkuun jouj im kadeļo̧n̄ [eō] Ikar ba n̄an e, ‘[Būreejtōn] Young, ikar itok ilo am̧ kar jab kōmālim eō, eļan̄n̄e ikar bōd, imōnōņō in ro̧o̧l im kadedeikļo̧k mijen eo aō.’ [Brigham Young] ekar uwaak: ‘Em̧m̧an, eto ad pukōte eok.’”
Henry ekar kōmel̗el̗eik lan̄lōn̄ eo an, ekar ba, ”Ettōn̗ak eo ekar lukkuun kūrm̗ool.”6
An lan̄lōn̄ ekar itok jān juon kam̧ool bwe Irooj ekar jerbal ippān im kar oņaake e. Ekar katak ta eo em̧ool n̄an kōj aolep—bwe rikarejar ro an Irooj rej im̧we n̄an jeļā ankilaan Irooj. Im Henry Eyring ekar kam̧oole ta eo ijeļā barāinwōt: bwe rikanaan eo, āinwōt būreejtōn eo an priesthood, ej im̧we jān Anij n̄an oņaake im kea kōn rikarejar ro an Irooj im n̄an kūr er.
Jekdo̧o̧n kūr rot eo am̧ ilo priesthood eo, komaron̄ kar en̄jake Jemedwōj Ilan̄ an kar jab ļōmņak kōn eok. Komaron̄ jar bwe kwōn jel̗ā ankilaan, im kōn kōn̗aan em̗ool n̄an kōm̗m̗ane jabdewōt ta eo Ej kajjitōk bwe kwōn kōm̗m̗ane, kwonaaj bōk juon uwaak.
Jemedwōj Ilan̄ enaaj kōm̧m̧an bwe kwōn en̄jake bwe E ejeļā kajjeem̧, bwe E ej kam̧m̧oolol kōn jipan̄ ko am̧, im bwe kwōj erreo n̄an bōk nōbar eo kokōņaan ron̄ jān Irooj: “Em̧m̧an am̧ kōm̧m̧an kwō karijera em̧m̧an im tiljek. Kwaar tiljek kōn men ka re iiet, Inaaj kairooj eok ioon men ko rellōn̄: Kwōn deļo̧n̄ ilo lan̄lōn̄ an am̧ irooj.”7
Ej aō jar bwe aolep rikabwijer priesthood ro renaaj diwōjļo̧k ilo tōmak n̄an lo̧mo̧o̧ren aolep jetōb ro rej eddoier. Anij enaaj kobaikwaj kajoor eo An n̄an kijejeto eo an rikarejar ro An. Bōro ko an armej ro renaaj en̄jake im kōm̧man kālet ko me renaaj bōktok er n̄an iaļ in an gospel n̄an m̧ōņōņō im jān būrom̧ōj.
Ej aō jar barāinwōt bwe aolep rikabwijer priesthood ro renaaj en̄jake iakwe im oņaake eo an Jemedwōj Ilan̄, an Rilo̧mo̧o̧r eo, im an rikanaan eo an Anij ilo kūr eo an ilo priesthood eo.
Ij kwaļo̧k aō kam̧ool bwe jej pād ilo jerbal eo an Irooj Jisōs Kraist eo emōj an jerkakpeje. Ij kam̧ool bwe E ekar kūr kom̧ im n̄a n̄an jerbal in An im ejeļā jon̄an maron̄ ko ad im jipan̄ eo jej aikuji. Enaaj kōjeraam̧an kijejeto ko ad ilōn̄ in kōtmāne ko ad ilo ad leļo̧k aolepān ad ilo jerbal in An. Ij kam̧ool bwe rikanaan eo an Anij, eo ej būreejtōn eo an aolep priesthood ilo laļ in, ej im̧we jān Anij.
Ij kam̧m̧oolol kōn waanjon̄ak ko an rikabwijer priesthood ro retiljek jabdewōt jikin. Jemedwōj Ilan̄ im Rilo̧mo̧o̧r eo rej kam̧m̧oolol kōn ijo koņaam kwoj kōm̧m̧ane. Er rejeļā kajjeem̧, im Er rej iakwe eok. Ilo etan Jisōs Kraist, amen.