Ij lokjenaō
Jān Elder Ronald A. Rasband
Jān Doulul eo an Rijilōk ro Jon̄oulruo
Aō naan in kam̧ool kōn Jisōs Kraist em̗ōj an kajoorļo̧k itok jān en̄jake ko aō rellōn̄ me em̗ōj aō lukkuun jeļā kōn iakwe eo An eļap n̄an kōj kajjojo.
Ro jeiū im jatū ipeļaakin laļ in, ij kam̧m̧oolol Būreejtōnji eo Kein Kajuon kōn aer kile eō bwe in kwaļo̧k naan in kam̧ool eo aō ilo Jabōt in. Naan ko ilo juon iaan al ko em̗m̗an ippa ilo bok in al eo an Kabun̄ in ej kōmel̗el̗eiki en̄jaake ko aō:
Ij lokjenaō kin elap an Kraist yokwe n̄a,
Ij buk kin an joij Ej letok n̄ōn iō. …
Ej kabwilōn̄ iō bwe Ear wōnlōltak jen an tron
In lomor aō eo ej jumae im juwa,
Ij bwilōn̄ bwe ej wūjleptok an yokwe n̄ōn iō,
An yokwe emaron̄ binmur im kōwāppenlok. …
O, ej aibujuij, aibujuij n̄ōn iō!1
Jet raan ko rem̧ootļo̧k eaar wōr juon tōre em̧m̧an bwe in ioon Būreejtōnji eo Kein Kajuon im bōk kūr in jān rikanaan in ad ejitōnbōro, Būreejtōn Thomas S. Monson. Ikōņaan kam̧ool n̄an kom̗ aolep kōn kajoor im ia̗kwe eo an Būreejtōn Monson ilo an kar ba n̄an n̄a, “Kūr in ej itok jān Irooj Jisōs Kraist.”
Eaar lokjenaō im wuddidid ke ij ļōmņake aorōkin naan kein me relukkuun em̧m̧an jān rikanaan in ad ejitōnbōro. Būreejtōn Monson, Būreejtōn Eyring, Būreejtōn Uchdorf, ij iakwe kom̗ im inaaj jerbal n̄an Irooj im kom̗ kōn aolepān būruō, maron̄, ļōmņak, im kajoor.
O, eļap aō iakwe Būreejtōn Boyd K. Packer im Elder L. Tom Perry im Richard G. Scott. Ilukkuun on̄ kōn er. Eļap aō jeram̧m̧an bwe em̗ōj kamineneik kōj im katakin kōj jān Em̧m̧aan rein jeid rejitōnbōro. Ijjab lukkuun tijemļo̧k n̄an bōk jikier, ak eļap aō utiej ilo kūr in n̄an doulul in me raar kabjere.
N̄e ij ļōmņak kōn ro me raar jipan̄ eō bwe in erom āinwōt n̄a rainin, ij ļōmņak m̗oktata kōn eo m̗ōtta n̄an indeeo eo em̧m̧an im ejjab ļōmņak wōt kōn e, Melanie. Ilo aolepān iiō ko, eaar jipan̄ eō ejaake eō āinwōt kūle an potter n̄an juon rikal̗oor eo em̧m̧anļo̧k an Jisōs Kraist. An iakwe im jipan̄, im bwe ajri ro nejimro 5, im ro pāleer, im ajri ro jibūmro 24, raar rejtake eō. N̄an baam̧le eo aō rejitōnbōro, Ij iakwe kom.
Āinwōt Nipai eo m̗okta, iaar l̗otak jān jinō im jema ro rem̧m̧an ilo gospel in im jinō im jema ro rem̧m̧an jiljino epepen likļo̧k. Ro jibū im jimaaō jem̧aan me raar kobatok n̄an Kabun̄ in raar itok jān England im Denmark. Painier rein jem̧aan raar wūjlepļo̧k aer n̄an gospel in an Jisōs Kraist im likūt aer jolet n̄an ro ineer bwe ren ļoor er. Ij kam̗m̗oolol kōn epepen kein rellōn̄ an baam̧le in ilo Kabun̄ in, im ijeļā ke ej juon kōttōpar eo ekwojarjar n̄an kōj aolep bwe jen wōnm̧aanļo̧k kake.
Elōn̄ ro raar jipan̄ kōpooj eō n̄an kūr in ekāāl. Ekoba ro m̗ōtta ke ij dik im baam̧le ko, ritōl ro ̗mokta, rūkaki ro, im rikakpilōklōk ilo aolepān mour e aō. Ij aikuj kobaitok ro jān kar mission eo aō ilo tuiōn̄ in Amedka im mijinede ro nejid rejitōnbōro jān New York, New York North Mission. N̄an elōn̄ ro me raar kōm̧m̧an oktak im ļame mour e aō, eļap aō kam̧m̧oolol kom̗.
Ij watōk juon men eaorōk ilo aō kar jerbal ippān Em̧m̧aan ro ilo doulul eo an Jimjuonn̄oul. Ewōr 15 iiō in aō jerbal ilo juon doulul an Kabun̄ in eo me em̧m̧an im ļap iakwe ippān Em̧m̧aan ro ie. Kom̧ em̧ool, ro rikarejera rejitōnbōro. Kiiō ij reim̧aanļo̧k n̄an iaieo ilo doulul in ekāāl. Būreejtōn Russell M. Nelson, ij iakwe eok im kajjojo uwaan Doulul eo an Rijilōk ro Jon̄oulruo.
Sister Rasband im n̄a eļap amro jeram̧m̧an ilo amro loļo̧k membōr ro ilo elōn̄ jerbal in ijjitōn̄ ko ilo iien jar ko ak mission ko ipeļaakin laļ in. Kōmij iakwe Ro Rekwojarjar ilo Raan Kein Āliktata aolep jikin! Tōmak ko ami em̗ōj an kōļapļo̧k tōmak ko am; naan in kam̧ool ko ami raar kakjoorļo̧k naan in kam̧ool ko am.
Kiiō, elan̄n̄e inkar likūt jidik enaan n̄an kom̗ rainin, enkar menin: Irooj eaar ba, “Iakwe doon; āinwōt iaar iakwe kom̗.”2 Eļap lōke ippa bwe ejjeļo̧k bar juon kālet, jerawiwi, ak bōd me kwe ak ro jet remaron̄ kōm̧m̧ane me enaaj ukōt iakwe eo An n̄an kwe ak n̄an er. Ejjab mel̗el̗ein Ej kōtļo̧k ak meļo̧kļo̧k m̗wil ko rejerawiwi—ijeļā Ejjab—ak ej mel̗el̗ein jej aikuj jipan̄ ro m̗ōttad ilo ad mōņōņō in karuwainene, kipel, jipan̄, im lomoren er. Jisōs Kraist ej kōjekdoon aelōn̄ ta eo am, jon̄an aorōkim, im jōkjōk ta eo kopād ie bwe en maron̄ katakin er m̧ool eo.
Emōj kajitikin eō elōn̄ kattōn ke iaar bōk juon aō naan in kam̧ool.
Ijjab kememej aō kar jab tōmak ilo Jemedwōj Ilan̄ im Jisōs Kraist. Iaar lukkuun iakwe er jen ke iaar ekkatak kōn Er ke iaar bukwelōlō iturin jinō, eo eaar āinwōt juon enjeļ n̄an eō, riit jeje ko rekwojarjar im bwebwenato ko an gospel. Tōmak eo m̗okta em̗ōj an ļapļo̧k n̄an juon jeļāļo̧kjen̗ im juon kam̧ool kōn iakwe eo an Jemedwōj Ilan̄, eo ej ron̄jake im uwaake jar ko ad. Aō naan in kam̧ool kōn Jisōs Kraist em̗ōj an kajoorļo̧k itok jān en̄jake ko aō rellōn̄ me Em̗ōj aō lukkuun jeļā kōn iakwe eo An eļap n̄an kōj kajjojo.
Ij kam̗m̗oolol kōn Pinmuur eo an Rilo̗mo̧o̧r eo im ikōņaan bwe in āinwōt Alma n̄an lam̗ōj kōn jilel an Anij.3 Ijeļā bwe Joseph Smith ej juon rikanaan an Anij ilo Jepļaaktok eo im bwe Bok in Mormon ej naan an Anij. Im ijeļā bwe Būreejtōn Thomas S. Monson ej rikarejar eo em̧ool an Anij im rikanaan ilo laļin rainin.
Ilo ad ļoor rikanaan in ad, ij jar bwe enaaj wōr iakwe em̧ool ilo būruōd n̄an ro jet im bwe jenaaj erom jet rikam̧ool im ilo m̧ool “lokjenaō kin elap an Kraist yokwe [kōj].” O, en “aibojoj, aibojoj n̄an [kwe im n̄an] n̄a.” Ilo etan Jisōs Kraist, amen.