Lo Jinōm̧
Jān Elder Jeffrey R. Holland
Jān Doulul eo an Jon̄oulruo Rijilōk ro
Ejjeļo̧k iakwe ilo mour in āinwōt iakwe eo em̧ool an Jisōs Kraist jen iakwe eo ewūjļepļo̧k juon m̧am̧a n̄an ajri eo nejin.
In kobawaj ippāmi aolep n̄an karuwaineneik tok Elder Ronald A. Rasband, Elder Gary E. Stevenson, im Elder Dale G. Renlund im kōrā ro ippāer kōn iaio in em̧m̧an remaron̄ kejōkļo̧kjeņ kake.
Kanaan kōn Pinmuur eo an Rilo̧mo̧o̧r, Aiseia eaar je, “Ear ineek en̄taan ko ad, im bōk ļo̧k būrom̧ōj ko ad.”1 Juon visōn ilo tōre kein eaar kwaļo̧k bwe “[Jisōs] eaar itok n̄an laļ in … n̄an ineeki jero̧wiwi ko an laļ in.”2 Jeje ko jim̧or etto im raan kein rej kam̧ool bwe “Ear pinmuur n̄an er, im Ear dāpij er, im bōkļo̧k er ilo aolepen raan ko m̧okta.”3 Juon al em̧m̧an ippād “ron̄ an ainikiōm̧ lo̧mo̧o̧ren eļap!”4
Ineek, dāpij, bōkļo̧k, lo̧mo̧o̧r. Naan kein rekajoor, rej kwaļo̧j kadkadin Messaia eo. Rej kwaļo̧k jipan̄ im kōjatdikdik in ito-itak eo ebo̧lel jān ijo jej pād ie n̄an ijo jej aikuj in pād ie―ak eban waļo̧k―eļan̄n̄e ejjeļo̧k jipan̄. Naan kein rebarāinwōt eddo, rapan̄, im naan ko rekōmetak ilo kōmeļeļeik mijen eo An, epen kōmeļeļeki, elōn̄aj kōj n̄e jej wōtļo̧k, ebōkļo̧k kōj m̧aanļo̧k n̄e m̧ōjņo̧ ejako, elo̧mo̧o̧ren kōj n̄an ad kapijuknen n̄e lo̧mo̧o̧r epen n̄an ad tōpare. “Jema eaar jilkintok Eō bwe In maron̄ toto ioon debāāl; … kar kotak Eō … āindein naaj kotak armej … n̄an …Eō.”5
Ak komaron̄ kar ron̄ naan in ippān bar jet armej ilo wāween eo jej kōjerbal naan ko āinwōt ineek im dāpiji,bōkļo̧k im kotak,jerbal im lo̧mo̧o̧r? Āinwōt an Jisōs ba n̄an Jon ilo lukkuun jerbal eo an Pinmuur, kōn menin E ej ba n̄an kōj aolep, “Lo jinōm̧!”6
Rainin ij kwaļo̧k jān lokatok in ta eo kar ba ijin m̧okta ļo̧k: bwe ejjeļo̧k iakwe ilo mour āinwōt iakwe eo em̧ool an Jisōs Kraist jen iakwe eo ewūjļepļo̧k juon m̧am̧a n̄an ajri eo nejin. Ke Aiseia, eaar kōnono kōn Rilo̧mo̧o̧r, kar kōņaan kwaļo̧k iakwe eo an Jeova, eaar pijaik ļo̧k juon m̧am̧a eo ewūjļepļo̧k. “Juon kōrā maron̄ ke meļo̧kļo̧k nin̄nin̄ eo nejin?” eaar kajjitōk. Eaar kwaļo̧k bwe kōļmeņļo̧kjeņ in ejjab ekkar bwe Kraist en meļo̧kļo̧k kōj.7
Kain iakwe in ekajoor “meanwōr, im e jouj, … ej jab kappukot men ko an, … ak … kijenmej ilo men otemjej, tōmak ilo men otemjej, kōjatdikdik ilo men otemjej, niknik ilo men otemjej.8 Rōjan̄ eo n̄an aolep, āinwōt tiljek “ej jamin jako.”9 “Bwe bat ko naaj kōm̧akūti,” Jeova eaar ba, “a Aō jouj eļap e jāmin ilo̧k jān kwe.”10 Kōn menin ej barāinwōt ba n̄an ro jineed.
Kwoj loe, ejjab wōt ilo aer keotak kōj, ak rej jipan̄ kōj ineek eddo ko ad.. Ejjab wōt ilo iien bōro̧ro ak toon wōt an mour in kōm̧m̧an bwe jerbal eo an jined en tenkwadik. Aaet, ewōr iien rub bōro, ak enan̄in aolep m̧am̧a ro rejeļā kemaanwa, ilo m̧ool ej juon leke ekwojarjar ilōn̄in jabdewōt men, im jeļā eo watōke bwe jet iien m̧am̧a rejeļā ta eo aikuji n̄an dipļo̧ki.
Jem̧aanļo̧k juon m̧am̧a eaar jeje tok n̄an n̄a: “Ekōjkan bwe juon armej en lukkuun iakwe juon ajri me emaron̄ in tin ebweer kōn anemkwoj eo am? Ekōjkan an lukkuun iakwe kajoor bwe kwon bōk eddo, m̧ōjņo̧, m̧ōk im rub bōro im ro̧o̧l likļo̧k n̄an ejja men eo? Kain rot iakwe emaron̄ kōm̧m̧an am en̄jake, n̄e ewōr juon nejūm̧, bwe mour eo am ejamin, bar am make? Tōl ilo iakwe ej kwojarjar. Ejjeļo̧k bar kōmeļeļe eļap ļo̧k. Ta eo ro jined rej kōm̧m̧ane ej juon men eaorōk ilo jerbal in an Kraist. Jeļā bwe menin ej jiron̄ kōj kōn iakwe eo ekkar naaj bōlen keidi im bar keidi, m̧ae kajjojo ajri, naaj bōk lo̧mo̧o̧r me kōj jemaron̄ ba āinwōt an Jisōs kar ba, ‘[Jema!] em̧ōj aō kadedeļo̧k jerbal eo kwar letok n̄an eō.’11 ”
Keememej leta in ilo kōļmenļo̧kjeņ, kōtļo̧k bwe in kwaļo̧k jilu en̄jake ko reim̧we kōn m̧am̧a ro, raar kam̧ool ilo kwaļo̧k in aō ilo jet wiik rem̧ootļo̧k.
Bwebwenato in aō m̧oktata ej ilo kakkōļ, ej kakeememej kōj bwe ejjab aolep iakwe ej waļo̧k ilo juon jem̧ļokin bwebwenato, ilo jab m̧ōkajin. Ememļo̧kjeņ in eaar dāpdāp wōt ilo kar juon aō bwebwenato ippān juon m̧ōtta ejitenbōro 50 iiō rem̧ootļo̧k eo eaar erļo̧k jān Kabun̄ in eaar jeļā ilo būruwōn ke em̧ool. Jekdo̧o̧n ewi jon̄an aō kar kajjieon̄ kaenōm̧m̧an e, Iaar jab maron̄ bōk tok aenōm̧m̧an n̄an e. Āliktata eaar ba. “Jeff,” “jekdoon ewi kōmetakin n̄an jutak im̧aan Anij, Ijjab maron̄ jutak im̧aan mejen jinō. Gospel eo im ajri ro neji raar lukkuun aorōk n̄an e. Ijeļā iaar rubwe būruwōn, im eaar bar rubwe būruwō.”
Ij lukkuun jeļā bwe ke ej ilo̧k, jinen eaar atbokwoj eo m̧ōtta kōn iakwe, erļo̧ke pein iakwe; en̄in ej ta eo ro jinen im jemen rej kōm̧m̧ane, Ak kakkōļ in ilo bwebwenato in ej bwe ajri ro remaron̄ rubwe buruwōn jineer. Ijin barāinwōt jej bar lo oktak eo an kwojarjar. Ijjab aikuj kakeememej kōj bwe Jisōs eaar mej kōn juon bōro erub, m̧ōk im metak n̄an ineek jerawiwi ko an laļ. Āindein ilo aolep kapo, me jemaron̄ “lo [jineed]” barāinwōt ad Rilo̧mo̧o̧r im kar bōk ļo̧k jim̧or burom̧ōj in jerawiwi ko ad.
Kein karuo, Iaar kōnono ippān juon ļaddik eo ekar etal n̄an mijen ak kōn an make kālet n̄an ro̧o̧l kōn wōt m̧ōm̧ an kanniōk im jet nan̄inmej eaar en̄jaki ilo wāween eo. Eaar pād ilo erreeo, ak an tōmak eaar kanooj idajon̄jon̄, kōņaan ko an make raar ļapļo̧k, im jetōb eo an eaar dikļo̧k. Eaar m̧ōjņo̧ n̄an e, kaipokpok, illu, im kaburom̧ōjm̧ōj.
Mijen būreejtōn eo an, stake būreejtōn eo an, im bisop eo an raar joļo̧k eļap awa ko etale im jan̄ im kōjeram̧m̧ae e ilo aer jipan̄ e, ak enan̄in aolep metak ko an raar an make eaar wōr jet m̧ōttan ilo mour eo an eaar jab kwaļo̧k n̄an er. Jemen eo ejitenbōro ilo bwebwenato in eaar kwaļo̧k an jipan̄ ajri eo nejin, ak jerbal eo an ilo jikin jerbal eaar ļapļo̧k an kaorōke ke menin ej waļo̧k kar jeļm̧ae ke ļaddik in im jinō wōt. Raan im bon̄, wiik ko im̧aan, innām allōn̄ ko raar eļļā n̄an iiō, raar pukot kemour im ājmour. Ilo iien būrom̧ōj enan̄in aolep iien e ak jinen im ej būrom̧ōj aolep iien, eaar dāpij―eddodo ko an, eddo in naan―n̄an ļaddik eo nejin kōn naan in kam̧ool eo an ekajoor kōn Anij, kōn Kabun̄ eo An ak eļaptata kōn iakwe eo An n̄an ajri in. Ilo ejja tōre in wōt eaar kam̧ool kōn pen eo an, dim, iakwe eo an n̄an nejin ejjab jem̧ļo̧k. N̄an itok ippān doon ro raar luukkun m̧ōttan ro raorōk ilo kōnaan eo an―gospel eo an Jisōs Kraist im baam̧le eo an―raar jar kake. Eaar jitlo̧k im kar jan̄, kar jan̄ im kar jitlo̧k, innām ron̄jake im bar ron̄jake ilo an ļaddik eo nejin ālji an jiron̄ e kōn an rubwe būruwōn. Aaet eaar bōktok e―bar juon alen―ilo tōre in eban ratimjuon allōn̄. Tōre in eaar ļōmņak bwe en jipan̄ e me enaaj bōk iien.
Ak kōn jouj an Anij, an make jipan̄, im jipan̄ eo an ritōl ro an Kabun̄ in, ro m̧ōttan, ro uwaan baam̧le ko, im ritijem̧ļo̧k ro, m̧am̧a in ejitōnbōro eaar bar lo ļaddik eo nejin an jepļaaktok n̄an kapijuknen. Jej kile bwe kōjeram̧m̧an in ejjab, ak kar jab, aaet naaj itok n̄an aolep ro jinen im jemān ro rej būrom̧ōj ioon ro nejin kōn jekjek ko, im ļaddik kōn jekjek eo kar kōm̧m̧ane eaar jab kajju oktak―ejjeļo̧k juon ar jeļā kake. Ak jidik kōn jidik, būrūwōn eaar oktak.
Eaar jino ro̧o̧l tok n̄an jar. Eaar kōņaan kālet n̄an bōk m̧ōttan kwojkwoj eoilo erreeo. Eaar bar juon alen bōk juon peba in mālim an tampeļ im kar bōk juon kūr n̄an jerbal āinwōt juon rūkaki in jemenere, ijo im eaar em̧m̧an an kōm̧m̧ane. Im kiiō, ālkin laļem iiō ko,, kōn kajjitōk eo an make im kōn jipan̄ eo an Kabun̄, kar bar kōro̧o̧l e n̄an mijen n̄an kadedeļo̧k jerbal eo an n̄an Irooj. Eaar ļapļo̧k aō dānin kōjaļļaļ kōn peran eo, m̧ool, im kitōltōl eo an ļaddik in n̄an jerbali men ko im dāpij tōmak eo an. Ejeļā ke emuri ippān aolep, ak ejeļā ke emuriki mour eo an make, ruo raar dāpiji im bōktok e, kar jerbal ippān im lo̧mo̧o̧ren e―an Rilo̧mo̧o̧r, Irooj Jisōs Kraist, im an bōklekōt, kar kotak e, ilo m̧ool jinen.
Āliktata, jān kar aje eo ilo Mexico City Temple jilu wiik em̧oot ļo̧k. Ikar pād ijeņ im kar lo eo m̧ōtta ejitenbōro Lisa Tuttle Pieper ito-itak ippān jarlepju eo ilo iien aje eo. Bōtaab ejaad pen an jutak kōn juon pā me eaar maron̄ kotake n̄an leddik eo nejin, Dora, ippān ro jet kajieon̄ in kotak tuanbwij maron̄in pein Dora eo eaiboojoj nejin Anij ilo an maron̄ kotak an̄kijeep ilo pein kōn tōmak obrak kōn kōņaan lam̧ōj, “Hosanna, hosanna, hosanna n̄an Anij im n̄an Lamb eo.”12
N̄an m̧am̧a ro ad ijoko jabdewōt, m̧okta, kiiō, ak ilju im jekļaj, Ij ba, “Kom̧m̧ool kōn am̧ keo̧tak, n̄an kōjparok jetōb ko, n̄an ejaak, im n̄an kwaļo̧k iakwe eo em̧ool an Kraist.” N̄an m̧am̧a Eve, n̄an Sarah, Rebecca, im Rachel, n̄an Mary riNazareth, im n̄an Jined ilo Lan̄, In Kam̧m̧ool kōn jerbal eo ami eaorōk n̄an kakūrm̧ool jibadbad eo an indeeo. N̄an aolep m̧am̧a ro jabdewōt, ekoba ro rej lokaj, Ij ba, “Kom̧in aenōm̧m̧an. Tōmak ilo Anij im kwe make. Em̧m̧an am̧ kōm̧m̧ane jen ke kwoj ļōmņake. Ilo mool, kwoj juon rilo̧mo̧o̧ran ilo Zaion in,13 im āinwōt M̧aajta eo kwoj ļoore, am iakwe ‘ejamin bōjrak.’14 ” Ijjab maron̄ ba eļapļo̧k n̄an aolep. Ilo etan Jisōs Kraist, amen.