Naan eo Ejouj an Anij

Jān Elder Francisco J. Viñas

Jān Jiljilimjuonn̄oul eo

Naan eo ejouj an Anij me jej kwaļo̧ke rainin ej kwaļo̧k n̄an kōj an ukweļo̧k aikuj in wōnm̧aanļo̧k ilo mour ko ad bwe jen maron̄ bōk kajoor eo an Jetōb Kwojarjar.

Elōn̄ iaad rej kweilo̧k tok n̄an bōk koņaer ilo kweilo̧k in eļap raar itok “n̄an ron̄jake naan eo ejouj an Anij, aaet, naan eo ej kōmour jetōb ekinejnej” (Jekab 2:8). Naan in maron̄ loe ilo jeje ko rekwojarjar im ilo ennaan ko jān ritōl ro ad, eo ej bōktok n̄an kōj kōjatdikdik im aenōm̧m̧an ilo en̄taan ilo maroklep.

Jān en̄jake eo ad ilo mour in, jej ekkatak bwe lan̄lōn̄ ilo mour in ejjab dipiio, ak ilo Jisōs Kraist lan̄lōn̄ eo ad ej dipiio (lale K&B 101:36). Enaaj letok n̄an kōj kajoor bwe jen jab en̄taan kōn jabdewōt keaen̄tanaan otemjeļo̧k ijello̧kun wōt n̄e raar jakoļo̧k ilo lan̄lōn̄ eo An (lale Alma 31:38).

Būruwōd emaron̄ in obrak kōn limotak eļan̄n̄e jej loe an juon eo ejitōn bōro ippād metak kōn juon nan̄inmej enana.

An juon eo ejitōn bōro ippād mej emaron̄ letok n̄an kōj būrom̧ōj eļap.

N̄e jet iaan ajri ro nejid rej jōbwābwe jān gospel eo, emaron̄ jab em̧m̧an bōklōkōt eo ad im jeban lukkuun jeļā kōn mejān kajjik eo aer indeeo.

Kōjatdikdik eo kōn ad naaj kōm̧m̧ane juon m̧are ilo tampeļ im ejaake juon baam̧le ilo mour in emaron̄ jino jakoļo̧k ilo ad mour m̧aanļo̧k.

An armej ro me rej aikuj in kar iakwe kōj kōwaane kōj maron̄ letok kinej ko rekōmettak n̄an jetōb ko ad.

Koba ippān bar juon ijello̧kun eo riir emaron̄ kakkure kōtaan eo me jej kōjatdikdik ej n̄an indeeo.

Men kein im elōn̄ kaen̄tanaan ko jet rej m̧ōttan wōt iien mālijjon̄ ko an mour in, jet iien rej kōm̧m̧an ad kajjitōkin kōj make ejja kajjitōk in wōt Rikanaan Josep Smith ekar kajjitōk: “O Anij, kwo pād ia?” (K&B 121:1).

Ilo iien kein reppen ilo mour ko ad, naan eo ejouj an Anij ej kōmour jetōb eo ekinejnej im bōktok naan in kaenōm̧m̧an kein n̄an būruwōd im ļōmņak ko ad:

Nejū m̧aan, aenōm̧m̧an en n̄an am; mennin jum̧ae kein am im en̄taan kein am renaaj n̄an jidik wōt iien;

“Innām, eļan̄n̄e kwo naaj kijejetoiki em̧m̧an, Anij enaaj kotak eok ijo eutiej; kwo naaj anjo̧ ioon aolep rijum̧ae ro am” (K&B 121:7–8).

Naan eo ejouj an Anij ej kobrak kōj kōn kōjatdikdik, jejeļā bwe ro rej tiljek ilo en̄taan renaaj bōk nebar eļap ilo aelōn̄ in lan̄ im bwe “ālikin eļap en̄taan ej itok jeraam̧m̧an ko” (lale K&B 58:3–4).

Naan eo ejouj an Anij, āinwōt kōnono kake jān rikanaan ro, ej letok kōjparok bwe liāp ko ad n̄an indeeo, rej rie jān tiljek ko ad n̄an kallim̧ur ko rekwojarjar ko jekar būki jān jipan̄ ko ad reperan ilo jerbal in em̧ool, renaaj kōjeraam̧m̧an kōj im ro ineed (lale Orson F. Whitney, ilo Conference Report, Apr. 1929, 110).

Ej barāinwōt letok n̄an kōj kōjparok bwe, ālkin ad mour tiljek ilo juon mour, jej jāmin luuji jabdewōt kōjeraam̧m̧an jen ad jab kar kōm̧m̧ani jejjo men ko ejjeļo̧k en ekar kappeik kōj n̄an kōm̧m̧ani. Eļan̄n̄e jekar mour im tiljek m̧ae iien ad eo “jenaaj bōk aolep kōjeraam̧m̧an ko, mour ijo eutiej tata, im aiboojoj eo me jabdewōt m̧aan ak kōrā [ro ekar wōr aer iien em̧m̧an] n̄an naaj bōke.” (Lale The Teachings of Lorenzo Snow, ed. Clyde J. Williams [1984], 138.)

Kiiō, elukkuun aorōk n̄an meļeļe bwe metak ko im en̄taan remaron̄ bar deļo̧n̄e mour ko ad eļan̄n̄e jej likjab in lukkuun ukweļo̧k jān jerawiwi ko ad. Būreejtōn Marion G. Romney ekar katakin: “En̄taan eo eļaptata im aer in kōmālij eo armej ro ilaļ in rej en̄taan kake ej waļo̧k jān jab ukweļo̧k im jab kwaļo̧k jerawiwi eo. … Āinwōt en̄taan im būrom̧ōj ej itok wōt jān jerawiwi, kōn menin, m̧ōņōņō im lan̄lōn̄ ej itok wōt jān jeorļo̧k bōd in jerawiwi ko” (in Conference Report, Apr. 1959, 11).

Etke n̄e jejjab ukwelo̧k ej kōm̧m̧an en̄taan im metak?

Juon iaan uwaak ko rejim̧we ej bwe “juon kaje ej ekkejel, im juon kien ejim̧we kar letok, eo eaar bōktok būrom̧ōj kōn bōklōkōt ko an armej” (Alma 42:18; barāinwōt lale eoon 16). Rikanaan Josep Smith ekar katakin bwe kōj make jej kakkure kōj im bwe ej en̄taan in ebbweer ko ilo kōlmenļo̧kjeņ ko ad ko rej kōm̧m̧an āinwōt eļap urur ej to̧o̧rtok in kijeek im brimstone (lale Teachings of Presidents of the Church: Josep Smith [2007], 224).

Eļan̄n̄e jej kajjieon̄ bōbrae ad jeļā ta eo ejim̧we ilo ad kajjieon̄ in “jekpen ilo [kōj make] men eo ediktata kōnke jero̧wiwi ko [ad]” (Alma 42:30) ak jān ad kajjieon̄ in ņooji, men eo de eo jenaaj tōpare ej n̄an kōmetak Jetōb eo (lale K&B 121:37) im karūm̧ōjļo̧k ad ukweļo̧k. Kain rōļo̧k rot in, ijjelo̧kun an jidik wōt iien, enaaj bōktok eļapļo̧k metak im liajļōļ n̄an mour ko ad im kadikļo̧k maron̄ eo ad n̄an bōk juon jeorļo̧k bōd in jerawiwi ko ad.

Bwe kain en̄taan rot in, naan eo ejouj an Anij ej barāinwōt bōktok aenōm̧m̧an im kōjatdikdik; ej jiron̄ kōj bwe ewōr jipan̄ n̄an kōmeraik metak ko rej waļo̧k jān jerawiwi. Rōļo̧k jān en̄taan in ej itok jān katok in pinmuur eo an Jisōs Kraist im ej waļo̧k n̄e jej kōjerbal tōmak ilo E, ukweļo̧k, im pokake kien ko An.

Elukkuun aorōk bwe jen kile bwe jeorļo̧k bōd in jerawiwi ko, ukwelo̧k ej wāween eo im ejjab juon men eo kōm̧m̧ane ilo juon wōt iien. Ej aikuj jejjet ilo kajjojo bun̄tōn nee ko an.

N̄an waanjon̄ak, n̄e jej bōk m̧ōttan kwojkwoj eo, jej kwaļo̧k n̄an Irooj bwe jenaaj keememej E aolep iien im kōjparok kien ko An. En̄in ej juon wāween ad kwaļo̧k kōņaan eo ad em̧ool.

Iien eo jej jino keememej E im kōjparok kien ko An aolep raan—im jab wōt ilo raan in Jabōt—ej n̄e jeorļo̧k in jerawiwi ko ad rej jino jelet er im An kallim̧ur kōn an Jetōb eo An pād ippād ej jino kūrm̧ool.

Eļan̄n̄e ejjab kōn jejjet in pokake eo me ej aikuj itok ippāntok kōņaan eo ad em̧ool, jeorļo̧k bōd eo emaron̄ jako ālkin jidik iien im jem̧jerā eo an Jetōb ej jino em̧m̧akūt. Jenaaj pād ilo kauwōtata kōn ad kautiej E kōn tieed ak jej kōttoļo̧k buruōd jān E (lale 2 Nipai 27:25).

Ilo kakkobaba, naan eo ejouj an Anij ej kakkōl kōj bwe jerbal in n̄an bōk jeorļo̧k bōd in jerawiwi ko ad emaron̄ in jab tōprak eļan̄n̄e jej bōk kunaad “ilo wijwaan ko an laļ in,” im emaron̄ in bar tōprak jān tōmak eļan̄n̄e m̧ool in ukweļo̧k im kōttāik kōj make. (lale K&B 20:5–6).

Emaron̄ ta jet iaan wijwaan ko an laļ in me remaron̄ in kakkobabatok ilo jerbal in bōk jeorļo̧k bōd in jerawiwi ko ad im bwe rej ekkejeltok ippān kōjparok im kokwojarjar Raan in Jabōt?

Jet iaan waanjon̄ak ko ekoba rumij n̄an kwojkwoj eo ilo an ejjeļo̧k juon un; m̧ōkajļo̧k, ilo ad kar jab etale kōj make, im m̧ōn̄ā pilawā im idaak jān kab eo ilo ad jab mour erreeo (lale 1 Korint 11:28); im m̧ōkajļo̧k ilo ad jab m̧okta kwaļo̧k ruōd im jab kar kajjitōk ippān Anij kōn jeorļo̧k bōd ko aer.

Waanjon̄ak ko jet: ad jab kautiej ilo ad ukook an doon naan ilo electronic devices ko, etal jān kweilo̧k eo ālkin ad bōk kwojkwoj eo, im m̧ad ilo m̧akūtkūt ko ilo m̧ōko im̧ōd me rejjekkar n̄an raan eo ekwojarjar.

Emaron̄ un ta eo etke kōj, jejjeļā aolep men kein, ak ekkā wōt ad likjab n̄an kōjparoki im kokwojarjar raan in Jabōt?

Ilo bok in Aiseia, jemaron̄ loe juon uwaak me, emaron̄ jejjet n̄an Jabōt, ej barāinwōt ekkejelļo̧k ippān kien ko jet jej aikuj kōjparoki: “Eļan̄n̄e kwōj kajeor neem̧ jān raan in Jabōt, jān kōm̧m̧an am̧ kōņaan ilo raan eo Aō e kwojarjar” (Aiseia 58:13).

Naan in jipan̄ ko rej “kajeor neem̧ … jān kōm̧m̧an am̧ kōņaan,” ak ilo bar ba, kōm̧m̧ane ankilaan Anij. Jet iien ekkā, ankilaad—ej ejaak jān kōņaan ko, ijōļ, im ikdeleel ko rekajoor an piktokin armej—idaabtōk ko ippān ankilaan Anij. Rikanaan Brigham Young ekar katakin bwe “n̄e ankilaan, ikdeleel ko rekajoor, im en̄jake ko an juon armej relukkun ettā n̄an Anij im mennin aikuj ko An, armej en ekwojarjar.—En̄in, bwe ankilaaō ej oraņļo̧k ilo ankilaan Anij, bwe ankilaan in enaaj tōlļo̧k eō ilowaan men otemjej rem̧m̧an, im kapelpel eō eļaptata kōn jab wabanban im mour indeeo” (Deseret News, Sept. 7, 1854, 1).

Naan eo ejouj an Anij ej karuwaineneik kōj bwe jen kōjerbal kajoor in Pinmuur eo an Kraist im mour kake ilo mour ko ad im kōllaajrake kōj n̄an Ankilaan—im jab n̄an ankilaan devil eo im kanniōk—bwe, kōn jouj eo An, jemaron̄ bōk lo̧mo̧o̧r (lale 2 Nipai 10:24–25).

Naan eo ejouj an Anij me jej kwaļo̧k rainin ej kwaļo̧k n̄an kōj an ukweļo̧k aikuj in wōnm̧aanļo̧k ilo mour ko ad bwe jen maron̄ bōk kajoor eo an Jetōb Kwojarjar toon wōt ad maron̄.

Ad jem̧jerāiki Jetōb eo enaaj kōm̧m̧an bwe jen armej ro rem̧m̧an. “Enaaj unoojdikdik kōn aenōm̧m̧an im lan̄lōn̄ n̄an jetōb ko ad, … enaaj bōkļo̧k kōņaan kōm̧m̧an men ko renana, dike doon, ebbanban, ilulu, im aolep nana jān [būruwōd]; im [ad] lukkuun kōņaan kōm̧m̧an em̧m̧an, bōktok wāppen, im kalōk aelōn̄ in kiin̄ eo an Anij” (lale Teachings: Joseph Smith, 98).

Kōn kareel in an Jetōb Kwojarjar, jej jāmin illu, barāinwōt naaj kalluik ro jet; jenaaj m̧ōņōņōļo̧k, im kōļmenļo̧kjeņ ko ad renaaj meļak. Iakwe eo ad n̄an ro jet enaaj ļapļo̧k. Jenaaj m̧ōņōņōļo̧k in jeorļo̧k bōd an ro ipeļaakid im kajedeed m̧ōņōņō eo n̄an ro ipeļaakid.

Jenaaj en̄jake kam̧m̧oolol eļap im loe wāween an ro jet eddōkļo̧k, im jenaaj pukōt em̧m̧anļo̧k eo ilo ro jet.

En̄in ej jar eo aō bwe jen maron̄ en̄jake lan̄lōn̄ eo ej itok jān kijejeto n̄an mour jim̧we im bwe jen maron̄ kōjparok jem̧jerā eo an Jetōb Kwojarjar eo ilo mour ko ad jān m̧ool im jab bōjrak in ukwelo̧k. Jenaaj erom armej ro rem̧m̧anļo̧k, im baam̧le ko ad renaaj jeraam̧m̧an. Jān pedped in katak kein ij kam̧ool ilo et eo ekwojarjar etan Jisōs Kraist, amen.