Erreo kōn Kōjeraam̧m̧an ko Ad Kar Kallim̧ur Kaki
Jān Linda S. Reeves
Rikakpilōklōk eo Kein Karuo ilo Doulul eo Eļap an Kōrā ro
Juon visōn ekabwilōn̄lōn̄ kōn kōjeram̧m̧an ko Jemed eaar kallim̧ur kaki rej aikuj in io̧lepen in jibadbad eo im̧aan mejed kajjojo raan.
Ejjab ke em̧m̧an ippāmi sister in? Jej jeļā bwe elōn̄ iaamiwōj remaron̄ jab wōr aer iien em̧m̧an n̄an neji ilo mour in im emōj ami kamaat ami n̄an iakwe, katakin, im kōjeram̧m̧an ajri ro. Im, o, ekōjkan an Jemedwōj Ilan̄ im kōm̧, sister ro am̧i, iakwe kom̧ kōn menin!
Jaar ke aolep, ekoba kom̧ sister ro reddik rejitenbōro ilo Būreimere im Doulul eo an Jiron̄ ro, kar bōk iien em̧m̧an n̄an jibwe juon nin̄nin̄ eo ej kab lo̧tak tok ilo peid im kōm̧m̧an bwe en kalimjōk mājed? Jej ke meļeļe kwojarjar eo im en̄jake eo ej jepooļ jetōb in eaorōk, me kar jilkintok jen Jemedwōj Ilan̄ n̄an kōm̧anm̧an eo ekāāl, juon ānbwin ekwojarjar? Eaar wōr aō en̄jake em̧m̧an, iakwe, im kōn jetōb.
Ānbwiniid rej menin letok ko rekwojarjar jān Jemedwōj Ilan̄. Rej tampeļ ko ad kajjojo. Ilo ad dāpij erreeo im kwojarjar eo an, jemaron̄ erreeo n̄an jipan̄ Jemedwōj Ilan̄ n̄an kōm̧anm̧an ānbwin jetōb ko Nejin rejitōnbōro.
Ilo kōnono eo an Būreejtōn Boyd K. Packer āliktata ilo kweilok eo eļap, me kwomaron̄ keememeji āinwōt “juon kukiij im juon mejenma,” eaar kam̧ool bwe “kien eo n̄an tim̧wōņ im orlok im kobrak lal … ej aorōk ļo̧k … im ej jibadbad in m̧ōņōņō eo an armej. Ilo ad kōjerbal [kajoor] in ilo jim̧we, jemaron̄ epaake ļo̧k Jemedwōj Ilan̄ im en̄jake juon tarlep in mōņōņō, em̧ool āinwot anij ran. Kajoor eo n̄an neji ejjab juon m̧ōttan eo ejidiļo̧k; ej juon karōk.”
Eaar ba:
“Iakwe em̧ool ej waļo̧k wōt ālkin m̧are n̄an kwaļo̧k kōnaan eo ej mijal kajoor ko rekwojarjar … [n̄an] bōbraik jekjek ko me kōņaan ko an kanniōk remaron̄ anjo̧ ioeer. …
“… M̧ōņōņō eo ad ilo mour in, ad lan̄lōn̄ im mour indeeo ej pedped wōt ilo wāween ad kōm̧m̧ani men kein, ilo kōņaan ko an kanniōk.”1
Sister ro aō rejitenbōro, ro reddik im ro rejjab, ewōr juon aō en̄jake eļap ilo aō kepooj kōnono in. Āinwōt an Alma eo edik kar ba, “Ij kōtmāne jān ijo em̧wilaļ tata ilo buruō … bwe kom̧in …kūr ioon Etan ekwojarjar, im ekkōl im jar, bwe kom̧ij jab maron̄ ioon kapo ko reļļapļo̧k jān ami maron̄ inene, … bwe kom̧in maron̄ jerkak ilo raan eo āliktata.”2
Tokālik, Mormon eaar barāinwōt kam̧ool bwe ilo raan ko an Alma, Korior, rijum̧ae Kraist, “kar kwaļo̧k … , im tōlļo̧k buruōn elōn̄ … elōn̄ kōrā ro.”3
Sister raņ, Satan em̧ōj an kajutak juon kōkaļļe āinwōt-Korior ilo tōre in ad kōn eļap tōprak. Ta jet iaan kein jerbal ko an? Kwaļo̧k m̧ōm̧ ko an kanniok, ilo TV, kōrā ro emōj aer m̧are im ļaddik ro kar jeraer rej deļo̧n̄e social media ko, im pija ko renana. Jej aikuj mejmejkaruo, sister ran! Jejab maron̄ ikkure kōn made kijeek ko an Satan im jab bwil. Ijjab jeļā jabdewōt men eo enaaj kōkarbabe kōj bwe Jetōb Kwojarjar eo en erom eo mōttad aolep iien epaakeļo̧k wānōk.
Elōn̄ ilo laļ in rainin rej pukōt ikitōltōl ko im jeļāļo̧kjeņ ko ilo intōrnet. N̄an keidi, jenaaj lukkuun jeram̧m̧an eļan̄n̄e jej kōjerbal tōmak im kijenmej im jar n̄an Jemedwōj Ilan̄, kōn m̧ool eo an men otemjeļo̧k, kōn inepata ko ad. Ekanooj lōn̄ uwaak ko im kallim̧ur ko remaron̄ itok jān ad etale im katak jeje ko rekwojarjar aolep raan im kōn jar ko rem̧ool, ak internet ko rejjab kwaļo̧k kallim̧ur ko. Rikanaan Jekab ekar kam̧ool: “Bwe jetōb ej kōnono m̧ool eo im jab riab. Kōn menin, e ej kōnono kōn men ko āinwōt aer lukkuun waļo̧k.”4
N̄e jej alooj, riit, ak jabdewōt en̄jake ko rej kadikļo̧k jon̄ok ko an Jemedwōj Ilan̄, rej kōm̧ōjņo̧ik kōj. Mekarta jon̄an iiō eo ad, eļan̄n̄e kwo̧j kalimjōk ļo̧k, riit, ron̄jake, ak kālet n̄an kōm̧m̧ane men eo ejjab ekkar n̄an jon̄ok eo an Irooj ilo Nan kōkajoorļo̧k Jodrikdrik ro, kwune, potake, joļo̧ke, etal jene.
Ejjeļo̧k juon iaad ewānōk, bōtaab ke jaar jerawiwi, Būreejtōn Packer eaar kakeememej kōj:
“Kallim̧ur eo ej: ‘Lo, bwe armej eo me eaar ukweļo̧k jān jerawiwi ko an ej jeorļo̧k an bōd, im Irooj ej ba Ejjab kememeji ļo̧k wōt n̄an jidik’ (K&B 58:42). …
“… Pinmuur eo, eo emaron̄ wiaik kōj kajjojo, eo ejjeļo̧k an jeno̧k ko. Meļeļe in jekdo̧o̧n ta jaar kōm̧m̧ane ak ia eo jaar pād ie ak ekōjkan an juon men waļo̧k, eļan̄n̄e jej m̧ool in ukweļo̧k, E eaar kallim̧ur bwe E enaaj pinmur. Im ke eaar en̄taan, eaar kadedeļo̧k. Ekanooj lōn̄ iaad wōj me rej kōm̧m̧an jorrāān … kōn en̄jake ko an bōd, jab jeļā kilen rōļo̧k jāni. Kom̧ij rōļo̧k jāni kōn bōk Pinmuur eo an Kraist, im aolep men ko kar kōm̧m̧an ilo metak remaron̄ oktak n̄an aiboojoj im iakwe im mour indeeo.”5
Ijjeļo̧kin ukweļo̧k, ta jipan̄ ko ak kein jerbal ko kar litoki n̄an kōj n̄an jipan̄ kōj pād wōt ilo erreeo im kwojarjar? Būraimere im jiron̄ ro nejid aolep rejeļā al kōn al eo “Scripture Power.”6 Jemaron̄ ke ba “Jar Ekajoor,” “Tampel Ekajoor,” “Bujen Ekajoor,” “Raan in Jabōt Ekajoor,” “Rikanaan Ekajoor,” im Erreeo Ekajoor”?
Ewōr barāinwōt kōjeram̧m̧an ko im kallim̧ur ko kōjparoki kar ekkeijeļ ippān wāween eo ejejjet ilo kōņak nuknuk karmen ko. Ij en̄jake āinwōt n̄e likūt liporor kar letok n̄an eō jān Jemedwōj Ilan̄. Ij kam̧ool, sister raņ, jej kajieon̄ kōņak nuknuk karmen eo ilo jejjet, Jemedwōj Ilan̄ ej kile āinwōt juon kōkaļļe eļap ilo iakwe eo ad im wūjļepļo̧k eo ad n̄an E. IEj juon kōkaļļe in bujen ko jaar kōm̧m̧ani Ippān, im E eaar kallim̧ur, “N̄a Irooj, I lokjak n̄e kom̧ij jab kōm̧m̧ane ta eo ij ba; ak n̄e kom̧ij jab kōm̧m̧ane ta eo ij ba n̄an kom̧ ejjeļo̧k ami kallim̧ur. ”7
Jem̧aan ļo̧k iaar kōnono ippān juon kar m̧ōtta eo eaar jepel ruo alen kōn wōt an an̄ūrlep ko im jab m̧ool n̄an ļo̧m̧aro pāleen. Liin im ajri ro jilu nejin raar kanooj en̄taan. Liin eaar owar, “iaar kanooj kajieon̄ n̄an mour jim̧we. Etke ekanooj lōn̄ mālijjon̄ ko aō? Ta eo iaar kōm̧m̧ane ebōd? Ta eo Jemedwōj Ilan̄ ekōņaan bwe in kōm̧m̧ane? Ij jar im riiti jeje ko rekwojarjar, jipan̄ ajri ro nejū, emakijkij aō etal n̄an tampeļ.”
Ke iaar ron̄jake sister in, iaar en̄jake āinwōt n̄e in buuļ lam̧ōj, “Kwoj kōm̧m̧ane! Kwoj kōm̧m̧ane aolep ta Jemed Ilan̄ ekōņaan im kōjatdikdik kwonaaj kōm̧m̧ane!”
Ijjab jeļā, elōn̄ raar kwaļo̧k bwe kōjeram̧m̧an ko me Jemed eaar kallim̧ur raar “etto ļo̧k,” eļaptata n̄e mour ko ad rej ioon mālijon̄. Ak Alma eaar katakin ļaddik eo nejin bwe “mour in ej iien eo… n̄an m̧anjabpopo n̄an iioon Anij.”8 Ejjab n̄an būk aolep kōjeram̧m̧an ko ad. Būreejtōn Packer eaar ba bwe “‘im renaaj aolep mour lem̧ōņōņō ejjeļo̧k jem̧ļo̧kin’ ekar jab jeje ilo mour in. Lain in ej jerbal wōt ilo kar mour eo ad m̧okta ke men otemjeļo̧k rej aikuj in bōk jikieer.”9 Ijoke, juon visōn ekabwilōn̄lōn̄ kōn kōjeram̧m̧an ko Jemed eaar kallim̧ur kaki eaikuj in io̧lapān jibadbad eo im̧aan mejed kajjojo raan―en barāinwōt juon kakememej kōn “jouj ko An remōn im rellōn̄”10 jej iooni aolep raan.
Sister ran, ijjab jeļā etke ekanooj lōn̄ mālijon̄ jej iooni, bōtaab ej aō make en̄jake bwe ewōr nōbar eļap, ilo mour indeeo im indeeo, ilo lan̄lōn̄ im ilōn̄ļo̧k jeļā ko ad bwe ilo raan eo āliktata, je maron̄ en̄jake in ba n̄an Jemed eo eļap iakwe im tūriamo ippān, “Ekar ke aolep men ko kwar aikuji! Ij tōmak bwe elan̄n̄e jenaaj keememej kajjojo iien n̄an kōm̧m̧an jabdewōt men kōn m̧weilaļ in iakwe eo an Jemedwōj Ilan̄ im ad Rilo̧mo̧o̧r n̄an kōj. Raar kajjitōk bwe jen ro̧o̧l n̄an im̧aan mejāer bar juon alen, jepooļ jān iakwe eo Aer ejjeļo̧k jem̧ļo̧kin. Ta jorrāān eo, sister ran rejitenbōro, ta en̄taan eo ijin eļan̄n̄e, ilo jem̧ļo̧kin, melejon̄ kein rej lukkuun ko me rej kōkarbab kōj n̄an mour indeeo im ijo utiejtata ilo aelōn̄ in kiin̄ eo an a Anij ippān Jemed im ad Rilo̧mo̧o̧r?
Ij kam̧ool bwe ānbwiniid rej menin letok ko rekwojarjar jān Jemedwōj Ilan̄ im bwe jej aikuj kōjparok mour ko ad ilo erreeo im kwojarjar jān pinmuur eo an Rilo̧mo̧o̧r im dāpij visōn eo kōn menin nōbar ko kar kallim̧ur kaki aolep raan imaan mejād jenaaj juon raan bōk “aolep men ko an Jemad [ad].”11 Ilo āt eo ekwojarjar etan Jisōs Kraist, amen.