Juon kajjitōk n̄an Sister ro Aō

Jān Būreejtōn Russell M. Nelson

Būreejtōn n̄an Doulul eo an Rijilōk ro Jon̄oulruo

Jej aikuj ami kajoor, ami oktak, ami kajoor in tōmak, ami maron̄ n̄an tōl, ami mālōtlōt, im ainikiōm̗i.

Elder ro rejitōnbōro Rasband, Stevenson, im Renlund, kōm, Em̧aan ro Jeimi im Jatimi, rej karuwaineneiktok kom̗ n̄an Doulul eo an Rijjilōk ro Jon̄oulruo. Jej kam̧olol Anij kōn revelesōn ko Ej litok n̄an rikanaan eo An, Būreejtōn Thomas S. Monson.

Ro Jeiū im Jatū, ke jaar ioon doon ilo kweilo̗k eo eļap jijino allōn̄ ko rem̧ootļo̧k, ejjeļo̧k iaad ekar kōtmāne oktak kein rej bōk jikier me emaron̄ jelōt en̄jake ko ad kajjojo ilo Kabun̄ in. Elder L. Tom Perry eaar kwaļo̧k juon enaan ekajoor kōn eddo ko an mare im baamle ko me repād ilo karōk eo an Irooj. Kōm ar bwilōn̄ ke eaar jejjo raan tokālik, jej kab jeļā ke cancer eo enaaj kar bōk mour eo an Elder Perry.

Men̄e ājmour eo an Būreejtōn Boyd K. Packer eaar mōjņoļo̧k, eaar wōnm̧aanļo̧k wōt im “peran ilo kijejeto” ilo jerbal in an Irooj. Eaar m̗ōjņo̗ Eprō̗l̗ eo ļo̧k, jekdo̗o̗n eaar peran wōt n̄an kwaļo̧k an kam̧ool toon wōt an mour. Innām, ālkin wōt 34 raan jān tōre eo Elder Perry eaar jako, Būreejtōn Packer eaar barāinwōt etal n̄an laļ eo an Jetōb.

Jej on̄ l̗o̗k ippān Elder Richard G. Scott ilo an jako ilo kweilo̗k in ad eļap, ak jej reilikļo̧k n̄an kam̧ool ko an rekajoor kōn Rilo̧mo̧o̧r ilo an kar kwaļo̧k ilo elōn̄ kweilo̧k ko rem̧ootļo̧k. Im ālkin wōt 12 raan ko rem̧ootļo̧k, raar bar kūr Elder Richard G. Scott bwe en bar iioon kōrā eo ippān ejitōnbōro, Jeanene.

Eaar wōr aō iien eaorōk ippān Em̗m̧aan rein ilo raan ko aer āliktata, kobaļo̧k ippān ro uwaan baamle ko jim̗or an Būreejtōn Packer im Elder Scott m̗okta jān aer kar jako. Eaar lukkuun pen n̄an n̄a bwe in tōmak ke rein m̗ōttad rejitōnbōro, rikarejar rein an Irooj em̗ōj aer jako. Ij lukkuun būrom̗ōj kōn er eļap jān jon̄an aō maron̄ ba.

Ke ij ļōmņak kōn jako in an rein rejako ilo ad jab kōtmane, juon men iaar būlōn̄ im iban meļo̧kļo̧k ke ij lo kōrā rein ippāier rejitōnbōro. Iban meļo̧kļo̧k aenōm̧m̧an eo eaar jukur būruwōn Sister Packer im Sister Perry ke rej pād turin jikin babu eo an ļōm̗aro pāleer, jim̗or kōrā rein raar obrak kōn iakwe, m̧ool, im tōmak ekajoor.

Ke Sister Packer ej jijjet turin ļeo pāleen ilo awa ko āliktata, eaar juon waanjon̄ak eo ekajoor bwe aenōm̧m̧an ej kōm̧anm̧an aolep l̗ōmņak ko an.¹ Men̄e eaar jeļā ke eo m̗ōttan ejitōnbōro me epaak 70 an iiō enaaj jako, eaar kwaļo̧k aenōm̧m̧an eo an juon kōrā eobrak kōn tōmak. Āinwōt juon enjeļ ilo kalimjōkļo̧k, ilo pija in pijaer ilo iien kōjeram̧m̧an eo an Brigham City Utah Temple.

Iaar lo ejja iakwe in im tōmak in ej waļo̧k jān ippān Sister Perry. Ilo an alikar an wūjlepļo̧k an n̄an jim̗or ļeo pāleen im Irooj, im eaar un̄ur būruō.

Ilo awa ko an ļōm̧aro pāleer āliktata im wōnm̧aanļo̧k wōt n̄an rainin, kōrā rein rekajoor raar kwaļo̧k aer kajoor im peran me kōrā in kōjparok bujen ro ekkā aer kwaļo̧k.² Epen bwe kwōn jon̄e jon̄an kajoor in me epād ippān kōrā rein, ejjab kōn baamle wōt ak ilo Kabun̄ eo an Irooj, āinwōt kōrā in pālele ro, jet bubu; āinwōt kōrā ro jeid im jatid ak nej jined; āinwōt jet rūkaki im ritōl; im eļaptata āinwōt jet waanjon̄ak im rijojomar tōmak.³

Menin em̗ool ilo aolep epepen ko an gospel jān tōre ko an Adam im Eve. Aaet kōrā ro ilo epepen in rejeņoļo̧k jān kōrā ro jet kōnke epepen in ejeņoļo̧k jān epepen ko jet.⁴ Jeņoļo̧k in ej boktok jim̗or maron̄ ko im eddo ko.

Jiln̄oul jijino iiō ko rem̧ootļo̧k, ilo 1979, Būreejton Spencer W. Kimball eaar kanaan kōn an kōrā in kōjparok bujen ro renaaj kōm̧m̧an oktak ilo Kabun̄ eo an Irooj ilju im jeklaj. Eaar kanaan: “Elōn̄ iaan wōnmanļo̧k ko rellap rej waļo̧k ilo kabun̄ in ilo raan ko āliktata kōnke elōn̄ kōrā ro rem̧m̧an ilo laļin … renaaj kobatok ilo kabun̄ in kōn oran bōnbōn eo eļap. Menin enaaj bōk jikin n̄an jon̄an eo me kōrā ro ilo kabun̄ in renaaj romak kōn wāppen im bōk koņaer ilo mour ko aer n̄an jon̄an eo me kōrā ro jet ilo kabun̄ in rej loe er āinwōt rejeņoļo̧k im oktak—ilo wāween ko rekam̧ōņōņō—jān kōrā ro jet ilo laļin.”⁵

Kōrā ro jeiū im jatū rejitonboro, kom rijipan̄ ro reaorōk ilo raan kein āliktata, raan eo me Būreejton Kimball eaar kanaan kake ej rainin. Kom kōrā ro eaar kanaan kake er! Ami mour erreo, meram, iakwe, jel̗ālokjeņ, peran, m̧wil, tōmak, im weppān ilo mour enaaj boktok elōn̄ļo̧k kōrā ro rem̧m̧an ilo laļin, ippāntok baamle ko aer, n̄an Kabun̄ in kōn oran enaaj ļapļo̧k jān kar mokta!⁶

Kōm, em̧m̧aan ro jeimi im jatimi, raikuji ami kajoor, ami oktak, ami kajoor in tōmak, ami maron̄ n̄an tōl, ami mālōtlōt, im ainikiemi. Aelōn̄ in kiin̄ eo an Anij eban im ejjab maron̄ dedeļo̧k n̄e ejjeļo̧k kōrā ro rej kōm̧m̧ani bujen ko rekwojarjar innām kōjparoki, kōrā ro remaron̄ kōnono kōn kajoor im maron̄ eo an Anij!⁷

“Jeaikuji kōrā ro rekarbōb im kōrā ro rejeļā kōm̧m̧an pepe. Jeaikuji kōrā ro me ewōr ippāier kapeel ko n̄an tōl ro remaron̄ pepe im kajekiik im tōl, kōrā ro remaron̄ katakin, kōrā ro me remaron̄ kwaļo̧k ainikier ilo m̧ool. …

“Jeaikuji kōrā ro kōn menin letok n̄an kālet ro me rejeļā kōn men ko ipeļaakin laļin im mije, me rebun̄bun̄, remūlaļ ak rekauwatata.”⁸

Rainin, naij kōļapļo̧k bwe jeaikuji kōrā ro me rejel̗ā wāween kakūrm̧ool men ko reaorōk kōn tōmak ko aer im ro reperan ilo jojomar mour in im baamle ko aer ilo juon laļ eo eobrak kōn jerawiwi. Jaikuji kōrā ro me rej wūjlep aer n̄an tōl ajri ro nejin Anij ilo iaļan bujen in n̄an mour eo eutiejtata; kōrā ro rejel̗ā bōk revelesōn ko aer make, ro remeļeļe kajoor im aenōm̧m̧an im kakajoor ajri ro im baamle ko; kōrā ro rej katakin ilo ejjeļo̧k mijak.

Ilo aolepān mour eo aō, ilukkuun jeram̗m̗an kōn juon kōrā eo ej make wōt. Kōrā eo ippa ejako, Dantzel, ekar juon kōrā emake wōt. Ebanjem̧ļo̧k aō kam̧m̧olool e kōn oktak in eaar kōm̗m̗ane ilo aolepān mour eo aō, ekoba kijejeto ko aō jem̧aanļo̧k ilo aō jino jerbal in m̗ūjm̗ūj menono.

Lemn̄oul ralitōk iio rem̧ootļo̧k kar kajjitōk ippa bwe in mijit juon leddik jidikdik, rool jen mej kōn n̄aninmej in menono. Ļaddik eo jein ej kab bar mej kōn ejja jōkjōk in wōt. Ro jineier im jemeier raar akweļap bwe in jipan̄ er. Iaar jab kōjatdikdik ke m̗ūjm̗ūj eo enaaj kar jipan̄ ak Iaar kallimur bwe inaaj kōm̧m̧an aolep men jon̄an wōt aō maron̄. Kōn aolepān aō kijejeto, ajri in eaar mej. Tokālik, ejja rūtto rein wōt raar bar boktok bar juon ajri n̄an n̄a, 16 an allōn̄, eo eaar bar lotak tok kōn jorrāān in menono. Bar juon alen, kōn aer akweļap, iaar bar kōm̗m̗ane jerbal in m̗ūjm̗ūj eo. Ajri in eaar bar mej. Ilo aō kar kam̧ool kōn meja kōn jilu ajri rejako ilo juon baamle eaar lukkuun kabūromōj eō.

Iaar rool n̄an mweo mō ilo aō kar lukkuun obrak kōn būrom̗ōj. Iaar pād ilo etōņaak eo im jan̄ aolepān bōn̄on eo. Dantzel eaar pād tūru, ron̄jake aō āliji aō ba bwe ijjāmin bar kōm̗m̗ane jerbal in m̗ūjm̗ūj. Innām, emaron̄ 5 awa jibbon̄, Dantzel eaar reitok im kajjitōk tok ilo jouj, “Emōj ke am jan̄? Ekwe kōm̧m̧an am nuknuk. Etal n̄an Hospital. Etal im jerbal! Kwoj aikuj katak eļapļo̧k. Eļan̄n̄e kokamōj eok kiiō, ro jet renaaj katak ilo būromōj kōn ta eo emōj am kadede jel̗ā kake.”

O, Iaar aikuj vision eo an kōrā eo ippa, peran, im iakwe! Iaar bar roolļo̧k im jerbal im katak eļapļo̧k. Eļan̄n̄e en kar jab kōn imwe in kōketak eo an Dantzel, Iban kar juon rim̗ūjm̗ūj menono im iban kar maron̄ kōpooj eō n̄an kōm̗m̗ane jerbal in m̗ūjm̗ūj eo ilo 1972 bwe in lomoren mour eo an Bureejtōn Spencer W. Kimball.⁹

Sister ro, kom̗ jel̗ā ke oktak ko kom̗ij kōm̗m̗ani ilo ami kōnono kōn men ko me rej itok jān būruōmi im l̗ōmn̗ak ko ami ilo an jetōb tōl kom̗? Juon stake būreejtōn eo em̗m̗an eaar ba n̄an n̄a kōn juon iien kweilo̗k an stake eo ilo aer kar kōmel̗el̗e kōn jet men reppen. Ilo juon tōre, eaar kile bwe stake bureejtōn eo an primary eaar jan̄in kōnono, kōn menin eaar kajjitōk el̗an̄n̄e elōn̄ an en̄jaake ekōnaan kwaļo̧k. ”Aeet, lukkuun m̧ool elōn̄,” eaar ba innām wōnm̗aanl̗o̗k wōt n̄an kwal̗o̗k an l̗ōmn̗ak me ekajju ukōt kobban kweilo̗k eo. Stake būreejtōn eo eaar ba, “ilo an kar kōnono, jetōb eaar lukkuun kam̗ool n̄an n̄a bwe em̗ōj an kwal̗o̗k revelesōn eo me eto am pukōte ilo iien kweilo̗k eo.”

Kōrā ro jeiu im jatū, jekdo̗o̗n kūr ta ko ami, jekdo̗o̗n ta jōkjōk ko kom̗ij pād ie, kōmij aikuji l̗ōmn̗ak ko ami, en̄jake ko ami, im ami im̗we. Jeaikuji kom̗ n̄an kōnono im kwal̗o̗k ainikiemi ilo iien kweilo̗k ko an ward im stake ko. Jeaikuji kajjojo sister ro em̗ōj aer m̗are n̄an kōnono āinwōt “juon rijipan̄ im eo ej m̗ool n̄an eo m̗ōttan”¹⁰ ilo ami ippān doon ippān l̗ōm̗aro pālemi n̄an tōl baam̗le ko ami. M̗are ak single, kom̗ sister ran̗ kom̗ij make wōt kōn maron̄ ko ami im jel̗ā eo em̗ōj ami bōke āinwōt menin letok ko jān Anij. Kōm em̗m̗aan ro jeimi im jatimi rejjab maron̄ bōk imwe kein ami rejenoļo̗k.

Jejel̗ā kōn kōm̗anm̗an eo em̗m̗an tata im el̗ap tata eaar kōm̗anm̗an eo an kōrā!¹¹ Jeaikuji ami kajoor!

Men ko rej itok n̄an kakkkure Kabun̄ in, katak ko ie, im wāween ad mour reļļapļo̧k. Kōn wōt men in, jeaikuj kōrā ro remaron̄ dim ilo meļeļe kōn katak ko an Kraist im eo enaaj kōjerbal mel̗el̗e in n̄an katakin jipan̄ kajiririk m̗aantak epepen in armej ro me remaron̄ anjo̗ ioon jerawiwi.¹² Jaikuj kōrā ro me remaron̄ jel̗ā kōn aujiid ko me rej waļo̧k ilo elōn̄ kain jōkjōk ko. Jaikuji kōrā ro me rej jel̗ā wāween tōpar kajoor eo me Anij ej kōpooj n̄an kōrā in kōjparok bujen ko im ro remaron̄ kwal̗o̗k tōmak ko aer kōn peran im iakwe em̗ool. Jeaikuji kōrā ro ewōr ippāer peran im vision āinwōt eo jined Eve.

Kōrā ro jeiu im jatū, ejjel̗o̗k bar men eaorōk l̗o̗k jān mour ko ami indeeo jān oktak eo ami ilo m̗ool. Ej lukkuun oktak, kōrā in kōjparok bujen ro—im ij kobaik eo m̗ōtta ejitenbōroWendy—ro me renaaj kōweppānļo̧k mour ko aer im kallikar ilo juon lal̗ eo enana im naaj kile āinwōt juon eo ejenoļo̗k im oktak ilo wāween ko rekam̗ōn̗ōn̗ō.

Kiiō ranin ij kajjitōk n̄an sister ro aō ilo Kabun̄ eo an Jisōs Kraist im Armej ro Rekwojarjar ilo Raan ko Āliktata bwe ren bun̄maanļo̧k! Bōk jikin eo ejim̧we im emenin aikuj n̄an mweo imōm, ilo jukjuk in pād ko ami, im ilo aelōn̄ in kiin̄ eo an Anij—eļapļo̧k jān kar mokta. Ij kajjitōk n̄an kom n̄an kakūrmm̧ool kanaan ko an Būreejtōn Kimball. Im ij kallimur ilo etan Jisōs Kraist bwe eļan̄n̄e kōnaaj kōm̗m̗ane, Jetōb Kwojarjar enaaj kōl̗apl̗o̗k imwe ko ami ilo jon̄an eo el̗ap jān kar m̗okta!

Ij kwal̗o̗k aō kam̗ool kōn lukkuun mour eo an Irooj Jisos Kraist im kōn Pinmuur eo An, im kōn kajoor eo An. Im āinwōt juon an rijilōk, ij kam̗m̗oolol kom̗, kōrā ro jeiu im jatū, im kōjeram̗m̗an kom̗ ilo ami kōl̗apl̗o̗k im kwal̗o̗k mour ko ami, n̄an kakūrm̗ool jon̄an kōm̗anm̗an eo ami, ilo ami jibwe pein doon im etetal ilo jerbal in ekwojarjar. Ippān doon jenaaj jipan̄ kōpooj lal̗ eo n̄an itok eo kein karuo an Irooj. Kōn menin ij kam̗ool, āinwōt juon ami brother, ilo etan Jisōs Kraist, amen.

Kakememej ko

1. Lale Pilippai 4:7.

2. Ekoba dān in kōmjaļaļ—ilo kōjparok kien ko n̄an jan̄ kōn ro kōm ej iakwe er ro rem̧ootļo̧k jān mour in (lale Katak im Bujen ko 42:45).

3. Lale oktak eo Rebekah eaar kōm̧m̧ane n̄an Isaac im ļaddik eo nejier Jacob ilo Genesis 27:46; 28:1–4.

4. Lale Joseph Fielding Smith, Answers to Gospel Questions, comp. Joseph Fielding Smith Jr., 5 vols. (1957–66), 4:166. Kakememej: Ilo aolep epepen ko m̗okta rekar kōm̧m̧an jon̄an n̄an m̧ōttan jiddik ko ilo laļin im kar jako ilo marok jilōn̄lōn̄ eo. Ilo oktan, epepen in eban wōr jon̄an ilo jikin ko ak iien ko. Enaaj kobrak im koba ilo itok eo an Irooj Kein Karuo.

5. Katak ko an Būreejtōn ro ilo Kabun̄ in: Spencer W. Kimball (2006), 222–23.

6. Ke iaar lotak, ekar dikļo̧k jān 600,000 mem̗bōr ilo Kabun̄ in. Rainin elōn̄ ļo̧k jān 15 million. Bōnbōn in enaaj wōnm̧aanļo̧k wōt im ļapļo̧k.

7. Būreejtōn Joseph Fielding Smith eaar ba n̄an sister ro ilo Doulul eo an Kōrā ro, “Komaron̄ kōnono kōn maron̄, kōnke Irooj eaar likūt kajoor ioom̗i.” Eaar barāinwōt ba bwe Doulul eo an Kōrā ro em̗ōj “ leļo̧k n̄an er kajoor im maron̄ n̄an kōm̧m̧ane elōn̄ men ko reļļap. Jerbal in me jej kōm̧m̧ane ededeļo̧k kōn maron̄ eo ekwojarjar” (“Relief Society—an Aid to the Priesthood,” Relief Society Magazine, Jan. 1959, 4, 5). Naan kein kar waļo̧k jān ippān Elder Dallin H. Oaks ilo juon kweiļo̧k eļap, “Ki ko im Maron̄ ko an Priesthood,” Liahona, Māe 2014, 51.

8. Boyd K. Packer, “The Relief Society,” Ensign, Nov. 1978, 8; bar lale M. Russell Ballard, Counseling with Our Councils: Katak n̄an Jerbal Ippān Doon ilo Kabun̄ in im ilo Baamle ko (1997), 93.

9. Lale Spencer J. Condie, Russell M. Nelson: Jemād, Takto in mwijmwij, Rijilōk (2003), 146, 153–56. Kakememej: Ilo 1964 Būreejtōn Kimball eaar kapit eō āinwōt juon stake būreejtōn im kōjeram̧m̧an eō bwe oran armej remej en dikļo̧k ilo jinoin kar kijejeto ko aō ke ij jino m̗ūjm̗ūj menono. Ejjeļo̧k juon iaam̧ro eaar jeļā n̄an jidik ke ralitōk iiō tokāļik, Inaaj kar m̗ūjit menono eo an Būreejtōn President Kimball ekoba kōkāāl bar juon eke ilo menono eo an.

10. “N̄e jej kōnono kōn m̗are āinwōt juon m̗ōttad, jen kōnono kake m̗ōttad eo em̧ool. Jejab kōņaan bwe kōrā ro rekwojarjar ilo raan kein āliktata ren erom ro m̗ōttad reikūn̄ ak ewōr jon̄aier ilo ijjitōn in n̄an mour indeeo! Jouj kwōn juon rijipan̄ im m̗ōttad eo em̧ool” (Spencer W. Kimball, “Privileges and Responsibilities of Sisters,” Ensign, Nov. 1978, 106).

11. “Aolep kōtōpar ko ilo laļin im ko kar mokta reban kar tōprak n̄e en kar ejjeļo̧k kōrā—dilep an priesthood eo im kōm̧m̧ane eo” (Russell M. Nelson, “Lessons from Eve,” Ensign, Nov. 1987, 87). “Eve eaar kōm̧m̧an eo an Anij āliktata, kadkad eo eļap ilo jerbal eo ekabwilōn̄lōn̄ me eaar waļo̧k mokta” (Gordon B. Hinckley, “The Women in Our Lives,” Liahona, Nov. 2004, 83).

12. Lale Russell M. Nelson, “Ajri in Bujen ro,” Ensign, Māe 1995, 33.