Lan̄lōn̄ eo ilo Mour Āinwōt Kraist
Jān Elder Richard J. Maynes
Jān Būreejtōnji eo an Jiljilimjuonn̄oul
Mour kein ad rej aikuj jejjet aer atartar ippān Kraist eļan̄n̄e jej pukōt m̧ōņōņō eo em̧ool im aenōm̧m̧an ilo mour in.
Laļ in jej m̧our ie ej bōktok eļap inepata n̄an armej ro rem̧m̧an ijoko otemjej bwe en dikļo̧k ak bōlen kōjekdo̧o̧n jon̄o̧k in mour eo eweppān. Ijowōtke, men̄e nana im kapo ko rej kabooļ kōj raan otemjej, jemaron̄ im naaj lo m̧ōņōņō eo em̧ool rainin.
Door mour ko ad ippān Jisōs Kraist im gospel in An enaaj bōktok jokne im m̧ōņōņō ilo mour ko ad, āinwōt an waļo̧k ilo waanjon̄ak in.
Elder Taiichi Aoba jān Doulul eo an Jiljilimjuonn̄oul, eo ej jokwe ilo juon toļ edik ilo bukōn eo etan Shikoku, Japan, kar kajitōk ippān bwe en rūkaki ilo juon kūlaaj ilo juon kweilo̧k an jodikdik ro. “Kwōn Jutak wōt Ijoko Rekwojarjar” kar kālete bwe en unin kōnono eo an kweilo̧k eo. Ālkin ļōm̧ņak kōn unin kōnono eo im ta n̄an katakin, Elder Aoba ekar ļōmņak bwe en kōjerbal jerbal eo an āinwōt juon kein an katakin. Jerbal eo an ej kōm̧man kōnno̧.
Elder Aoba ekar kōmeļeļeik ke kūlaaj in jodikdik ro an raar lukkuun emourur ke rej lo wāween an kar maron̄ kōm̧m̧an mājiik im ukōt jōkjōkin in kūle eo ipein n̄an pileij, bool, im kap ko. Ālkin an kar kwaļo̧k kilen, eaar kajjitōk eļan̄n̄e ewōr eaar kōņaan kajjieon̄. Aolepāer rekar kotak peier.
Elder Aoba eaar kōtļo̧k an jet jodikdik wōnm̧aantak in kajjieon̄e men eo ekāāl eitoklimoier kake. Rekar anto̧o̧ne bwe, ālkin aer kar lale an kōm̧m̧ane, enaaj kar bwe an pidodo. Ijoke, ejjeļo̧k juon iaer ekar tōprak an kajjieon̄ kar kōm̧m̧ane men̄e ekar juon bo̧o̧l jidikdik. Rekar ba: Ijjab maron̄ kōm̧m̧ane menin!” “Etke elukkuun pen menin?” “Menin eļap an pen.” Ennaan kein rekar waļo̧k tōre eo ke jijidikdik in m̧ōttan kūle eo ekar ejeplōklōk ipeļaakin ruum̧ eo.
Ekar kajjitikūn jodikdik ro etke ekar pen aer kōm̧m̧an kōnno̧. Rekar uwaak e kōn elōn̄ uwaak ko: “Ejjeļo̧k aō imminene,” “Ij jan̄in kar ekkatak,” ak “Ejjeļo̧k aō tōļan.” Pedped wōt ioon tōprak eo, ta ko rekar ba rekar aolep m̧ool; ijoke, un eo eaorōktata kōnke rekar jab maron̄ kōm̧m̧ane ej kōn an kar jab kūle eo pād ioļapļap in wiil eo. Jodikdik ro rekar ļōmņak bwe rekar likūt kūle eo ioļapļap, ak ilo ad kalimjeke tujetjet in, ekar jab lukkuun pād ioļapļap. Innām ekar ba n̄an er, “Jen kajjieon̄ bar juon alen.”
Iien jab in, Elder Aoba ekar likūt kūle eo ņa ioļapān wiil eo im bar jino kōro̧o̧l wiil eo, im ekōm̧m̧an juon ron̄ ioļap ilo kūle eo. Jet iaan jodikdik ro rekar bar kajjieon̄. Iien in aolep rekar jino kapokpok im rekar ba: “Wow, ejjab wūdiddid,” “Imaron̄ kōm̧m̧ane menin,” ak “Ikar kōm̧m̧ane!” Aaet, jōkjōk ko raar jab lukkuun jejjet, ak tōprak eo ekar ļap an oktak jān kar aer kajjieon̄ m̧okta. Unin an em̧m̧an tōprak eo aer kōnke kūle eo ekar jejjet an pād ioon wiil eo.
Laļ in jej mour ie ej āinwōt wiil in kōro̧o̧lol eo an rikōm̧m̧an kūle eo, im m̧ōkaj in an wiil in erro̧lool ej ium̧ļo̧k. Āinwōt kūle eo ioon wiil in an rikōm̧m̧an kōnno̧ eo, jej aikuj in bar pād ioļapān barāinwōt. Un eo ad, ioļapļap in mour ko ad, rej aikuj in Jisōs Kraist im gospel eo An. Mour juon mour ej pedped ioon Kraist meļeļein jej ekkatak kōn Jisōs Kraist im gospel eo An innām jej ļoor waanjon̄ak eo An im kōjparok kien ko An ilo jejjet.
Rikanaan eo etto Aiseia ekar ba, “A kiiō, O Irooj, Kwe jemem; kōm kle, im Kwe am potter; im kōm otemjej men in kōm̧m̧an an Peim̧.”1
Eļan̄n̄e mour ko ad rej pedped ilo Jisōs Kraist, E enaaj maron̄ tōprak an eik kōj n̄an jōkjōk eo jej aikuj āinwōt bwe jen maron̄ bar jepļaakļo̧k n̄an E im Jemedwōj Ilan̄ ilo aiboojoj eo ilōn̄ tata. Lan̄lōn̄ eo jej en̄jake ilo mour in enaaj itok wōt jān wāween an tiljek ad pedped e mour ko ad ioon katak ko, waanjon̄ak ko, im pinmuur eo an Jisōs Kraist.
Ro jeiū im jatū, ikar ļotak tok n̄an juon Baam̧le in Armej ro Rekwojarjar ro relōn̄ uwaer, kōn menin, kōjeraam̧m̧an ko im lan̄lōn̄ ko jān an wōr gospel eo an Jisōs Kraist āinwōt pedped in m̧anit an baam̧le eo am eo ekar em̧m̧akūt tok n̄an mour ko am aolep raan in am mour. Ekar jab m̧ae iien eo ikar kōm̧m̧ane mijen eo aō aolep raan āinwōt juon likao em̧m̧an dettan ke ikar kile waļo̧k eo em̧m̧an an tarlep in gospel eo an Jisōs Kraist ioon ro rej jan̄in kar en̄jake kōjeraam̧m̧an ko an ilo mour ko aer. Eoon in ilo Matu ej kallikar wāween eo armej ro rej oktak tok n̄an gospel in an Jisōs Kraist rej en̄jake: “Aelōn̄ in lan̄ ej āinwōt m̧weiūk ņooje ilo jikin kallib, eo armej ear loe im ņooji, im kōn an lan̄lōn̄ kake ej ilo̧k im wiaik jikin kallib eo.”2
In kwaļo̧k ippāmi juon waanjon̄ak jān Bok in Mormon eo ej kōmeļeļeik ta eo juon armej eaar peptaij tok ekar m̧ōņōņō in kōļļāiki bwe en maron̄ bōk lan̄lōn̄ eo ej itok ippān tok wōt menin aorōk in Jisōs ej kōnono kake ilo būrabōļ in kōn menin aorōk in ņooje ilo jikin kallib eo.
Keememej ilo Bok in Alma jepta 20, Ammōn im Lamonai rekar etal n̄an Middonai n̄an aer pukōt im kōtļo̧k ļeo jatin Aron jān kalbuuj. Ilo iaļ eo aer ļo̧k, rekar ioon jemān Lamonai, eo ekar kiin̄ eo an Rileman ro ioon aolepān āne eo.
Kiin̄ eo ekar lukkuun illu bwe ļeo nejin Lamonai ekar ito itak ippān Ammōn, juon RiNipai ej mijenede, eo ekar watōk e juon rikōjdat. Ekar kile ke ļaddik eo nejin ej aikuj in pād ilo kōjota eo ekar kōm̧m̧ane n̄an ļaddik ro nejin im armej ro an. Kiin̄ eo an Rileman ro ekar lukkuun inepata jon̄an ekar kean̄ e ļaddik eo nejin Lamonai bwen m̧an Ammōn kōn jāje eo an. Ke Lamonai ekar m̧akoko, kiin̄ eo ekar kōrajļo̧k kōn jāje eo an make n̄an m̧an ļaddik eo nejin kōn an jab pokake; ijoke, Ammōn ekar bauri im lo̧mo̧o̧ren mour eo an Lamonai. Ekar kajoor jān kiin̄ eo im emaron̄ kar m̧ane.
En̄in ej ta eo kiin̄ eo ekar ba n̄an Ammōn ālkin an kar loe ke mour eo an epād ikōtaan mej im mour: “Eļan̄n̄e kwōnaaj dāpij mour eo aō inaaj lewōj n̄an eok jabdewōt kwōnaaj kajjitōk, em̧ool n̄an jimattan in aelōn̄ in.”3
Kōn menin, kiin̄ eo ekar m̧ōņōņō in kōļļāik wōnāān eo kōn jimettan in aelōn̄ eo an n̄an kōjparok mour eo an. Kiin̄ eo ekar bwilōn̄ im bwilōn̄ ke Ammōn ekar kajjitōk wōt bwe en kōtlo̧k ļeo jatin Aron im ro m̧ōttan jān kalbuuj im bwe ļeo nejin Lamonai enaaj bōk aelōn̄ in kiin̄ eo an.
Tokālik, jān wāween in ekar waļo̧k, ļeo jatin Ammōn Aron kar kōtļo̧k e jān jikin kalbuuj ilo Maddoni. Ālkin an kar rōļo̧k jān jikin kalbuuj, ekar en̄jake bwe en etal n̄an ijo kiin̄ in RiLeman eo ej irooj ioon ilo āne eo. Kar kwaļo̧k kadkad in Aron n̄an kiin̄ eo im ekar jeraam̧m̧an n̄an katakin e pedped in katak ko an gospel eo an Jisōs Kraist, ekoba karōk eo eļap an pinmuur eo. Katak ko an Aron rekar klukkuun im̧we kiin̄ eo.
Uwaak eo an kiin̄ eo n̄an katak ko an Aron ej waļo̧k ilo eoon 15 in Alma jepta 22: “Im ālikin men kein ke em̧ōj an Aron kar tipdiki men kein n̄an e, kiin̄ eo eba: Ta inaaj kōm̧m̧ane bwe in maron̄ bōk mour indeeo in eo kwaar kōnono kake? Aaet, ta inaaj kōm̧m̧ane bwe in maron̄ ļotak ilo Anij, im joļo̧k jetōb nana in ekōlibaakļo̧k ilo ānbwinnū, im bōk Jetōb eo An, bwe in maron̄ obrak kōn lan̄lōn̄, bwe maron̄ in jamin joļo̧k eō ilo raan eo āliktata? Lo, eba, inaaj juļo̧k aolep m̧weiuk ko aō, aaet, inaaj eļļo̧k jān aelōn̄ in kiin̄ eo aō, bwe in maron̄ bōk lan̄lōn̄ in eļap.
Ebwe an kabwilōn̄lōn̄, ilo keidi ilo an leļo̧k jimettan in aelōn̄ in kiin̄ eo an n̄an lo̧mo̧o̧ren mour eo an, kiin̄ eo an Rileman ro ekar kiiō m̧ōņōņō in leļo̧k aolepān aelōn̄ in kiin̄ eo an bwe en maron̄ bōk lan̄lōn̄ eo ej itok jān meļeļe, bōk, im mour kōn gospel eo an Jisōs Kraist.
Kōrā eo pāleeō, Nancy, ej barāinwōt juon rioktak tok n̄an Kabun̄ in. Ekar ba n̄an n̄a elōn̄ kōttan ium̧win iiō ko rellōn̄ bwe lan̄lōn̄ eo ekar en̄jake ilo mour eo an ej ālkin an kar loe, bōk, im mour kōn gospel eo an Jisōs Kraist. Ta eo ej itok ālkin ej juon iien̄aktok jān Sister Maynes ilo en̄jake eo an:
“Āinwōt juon rūm̧m̧an ded 20 jim̧a an iiō, ikar pād ilo juon tōre ilo mour eo aō ilo aō kar aikuj in ukōt juon men bwe in erom juon armej em̧ōņōņō. Ikar en̄jake aō peto petak ilo an ejjeļo̧k aō jibadbad im kōttōbar, im ikar jab jeļā ia ij jibadekļo̧k n̄an pukōt e. Ikar baj jeļā wōt bwe Jemedwōj Ilan̄ ej mour im jejjo iien ilo aolepān mour e aō ij jar, en̄jake bwe Ej ron̄jake.
“Ke ikar jino kappok in aō, ikar deļo̧n̄e jet kabun̄ ko ak aolep iien ij jenliktak kōn ejja en̄jake kein wōt im ebbweer. Ikar en̄jake eļap jeraam̧m̧an kōn jar ko aō kōn tōl im unleplep in mour in rekar āliktata uwaak, im tarlep in gospel eo an Jisōs Kraist ekar bōktok n̄an mour e aō. Ekar kein kajuon in aō kar en̄jake bwe ewōr unin aō mour, im karōk in m̧ōņōņō eo ekar bōktok lan̄lōn̄ eo em̧ool n̄an mour eo aō.”
Bar juon en̄jake jān Bok in Mormon eo ej lukkuun kōmeļeļeiki wāween an pedped e mour eo an Kraist emaron̄ in kobrak kōn eļap m̧ōņōņō aaet men̄e jej kabooļ kōn men ko relukkuun in eppen.
Ālkin an kar Rikanaan Liai im baam̧le eo an em̧m̧akūt jān Jerusalem ilo 600 b.c., er rekar jebwābwe enan̄in ruwalitōk iiō ko ilo āne jam̧den m̧ae iien rekar āliktata tōprakļo̧k ilo āneo rekar ņaetan Bun̄beļo̧k, eo ekar epaake lo̧jet eo. Nipai ej kōmeļeļeik mour in apan̄ eo aer ilo āne jam̧den āinwōt in: “Kōm ar lo elōn̄ en̄taan ko im eļap pen, … jon̄an kōm ij jab maron̄ jei aolep.”4
Ke rej pād ilo Bun̄beļo̧k, Irooj ekar kōmaron̄ Nipai kōn eddo eo n̄an jek juon wa eo enaaj bōkļo̧k er ioon lo̧jet ļo̧k n̄an ānen kallim̧ur eo. Ālkin aer tōprakļo̧k ilo ānen kallim̧ur eo, ekar ļap aitwerōk ko rekar jerjer ikōtaan armej ro raar door Irooj ilo mour ko aer im ro rej jab tōmak im rej ļoor waanjon̄ak ko an Leman im Lamuel. Eļaptata, kauwōtata eo jān kōbata eo ikōtaan jar ko ruo ekar lukkuun ļap jon̄an Nipai im ro rekar ļoor katak ko an Irooj rekar ajeeje er im ko n̄an āne jam̧den n̄an kōjparok eo aer. Ilo tōre in, ewōr 30 iiō ko ālkin an Liai im baam̧le eo an kar em̧m̧akūt jān Jerusalem, Nipai ekar je juon ennaan eo eļap an em̧m̧an im kabwilōn̄lōn̄, eļaptata ālkin an likūt ilo jeje ko rekwojarjar elōn̄ jorrāān im kaban̄ban̄ ko ekar to aer kar jelm̧ai. En̄in rej naan ko an: “Im ālikin men kein, kōm [ar mour] ilo juon wāween elem̧ōņōņō.”5 Mekarta wāween ko reppen n̄an er, rekar maron̄ in mour ilo juon wāween elem̧ōņōņō kōnke rekar pedped e mour ko aer ilo Kraist im gospel eo An.
Ro jeiū im jatū, āinwōt kūle eo ilo wiil in kōm̧m̧an kōnno̧ eo, mour kein ad rej aikuj jejjet aer atartar ippān Kraist eļan̄n̄e jej pukōt m̧ōņōņō eo em̧ool im aenōm̧m̧an ilo mour in. Waanjon̄ak ko an kiin̄ eo an Rileman ro; kōrā eo pāleeō, Nancy; im armej in RiNipai ro er aolep rej rie pedped in katak in em̧ool.
Ij kwaļo̧k aō naan in kam̧ool rainin bwe kōj barāinwōt maron̄ loe aenōm̧m̧an, bwe lem̧ōņōņō in, lan̄lōn̄ in em̧ool eļan̄n̄e jej kālet n̄an mour im pedped e mour ko aer ilo Kraist, ilo etan Jisōs Kraist, amen.