Jelm̧ae im Anjo jān Apan̄ ko Ilaļ in Rainin
Jān Elder Robert D. Hales
Jān Doulul eo an Jon̄oulruo Rijilōk ro
Kālet ko kwoj kāleti—mijen, jeļāļo̧kjeņ, m̧are, jerbal, im jerbal in jipan̄ ilo Kabun̄ in—renaaj kōjparok mejān kajjik eo am̧ n̄an indeeo.
Elōn̄ men ko emōj jeje im kōnono kaki rainin kōn epepen eo an rūm̧m̧an ded ro. Etale ko rej kwaļo̧k bwe rekōņaan make elļo̧k jān doulul ko an Kabun̄. Elōn̄ rej m̧uri im rejjab jerbal. Elōn̄ wōt iaer em̧m̧an ļōmņak in m̧are ippāer, ak elōn̄ rej mijak in m̧are. Nōm̧ba in rem̧m̧an ded ro rejjab kōņaan neji ej ļapļo̧k wōt. Ilo an ejjeļo̧k gospel eo im tōl ko, elōn̄ rej jōbwābwe ilo iaļ ko renana im jab maron̄ loe iaļ eo aer.
Ilo m̧ool, ļapļo̧k in tōl kein ilubwilijin rūm̧m̧an ded ro an Kabun̄ in rejjab lukkuun ļap, jim̧ettan in kōnke jej jeraam̧m̧an kōn karōk eo an gospel eo. Karōk in ekitbuuj jirok likatōttōt wōt ilo aen in dāpdep eo—eddāp n̄an naan ko an Anij im naan ko an rikanaan ro An. Jenaaj ke dāpij aen in dāpdep eo me ej tōlļo̧k kōj n̄an Ippān. Kiiō ej “raan in jokāālet”1 n̄an kōj aolep.
Ke ikar juon ļaddik edik, ibaj kōm̧m̧ane wōt juon kālet ebōd ikar ļōmņake, jema ekkā an ba, “Robert, kōm̧m̧ane ta eo kwojeļā ke ejim̧we!” Kom̧ kar pād ijeņ. Ilo ejja wāween in jān an kōnono, ikōņaan kōnono eļaptata n̄an kom̧, rūm̧m̧an ded ro ad, bwe “aō ej m̧ōņōņō ilo alikkar …bwe [jen] maron̄ jeļā.”2
Kom̧ij mour ilo juon iien eaorōk. Kālet ko kwoj kāleti—mijen, jeļāļo̧kjeņ, m̧are, jerbal, im jerbal in jipan̄ ilo Kabun̄ in—renaaj kōjparok mejān kajjik eo am̧ n̄an indeeo. Meļeļein bwe kom̧ij aikuj reim̧aanļo̧k—kalimjōk ilju im jekļaj eo ami.
Ke ikar juon rikāke baļuun ilo jikin tariņae, ikar katak pedped in katak in: jab karōke bwe kwōn kālo̧k n̄an juon jorur. (Ij jab maron̄ kwaļo̧k n̄an kwe elmen aō kar loe.) Ijjelo̧kin, kwōn kālo̧k itūrerein, bōk bar juon iaļ, ak kōttar an jako lan̄ eo m̧okta jān am jok.
Rūm̧m̧an ded ro jeiū im jatū, ikōņaan jipan̄ kom̧ “kelo̧k jim̧we” ilo lan̄ ko ilo raan ko āliktata. Kom̧ij rikkāke ro. Eddo eo ami ej n̄an ļōmņak kōn jekjek ko rej waļo̧k jān kajjojo kālet ko kom̧ij kōm̧m̧ani. Kajjitōk ippām make: “N̄e ij kōm̧m̧an kālet in, ta men eo enana emaron̄ in waļo̧k?” Kālet ko am rejim̧we renaaj dāpij eok jān am jekarļo̧k jān iaļ eo.
Ļōmņak kōn menin: N̄e kwoj kālet bwe kwon jab idaak arko̧o̧l, koban juon eo enaaj ekkadōkdōk! N̄e kwoj kālet bwe kwōn jab m̧uri, kwoj bōbrae am maron̄ jab oļiin̄!
Juon iaan jibadbad ko an jeje ko rekwojarjar ej n̄an kwaļo̧k ewi wāween an armej ro rewāppen mour ņae mālijjon̄ ko im men eo enana. Er rej kōwaane! Josep ekar ko jān kōrā eo pāleen Potiphar.3 Liai ekar bōk baam̧le eo an im dieojļo̧k jān Jerusalem.4 Meri im Josep rekar ko jān Egypt jān karōk eo enana an Herod.5 Ilo aolep jon̄ak, Jemedwōj Ilan̄ ekar kakkōļ ritōmak rein. Ejjeļo̧k oktak, enaaj jipan̄ kōj men̄e jej aikuj ire, ko, ak errā kōn oktak jepād ie. Enaaj kōnono n̄an kōj jān jar, im n̄e jej jar, Jetōb Kwojarjar eo enaaj pād ippād, eo enaaj tōl kōj. Ewōr ippād jeje ko rekwojarjar, katak ko an rikanaan ro remour, kōjeraam̧m̧an ko an petriak, kapilōk ko rem̧m̧an jān ro jined im jemād im ritōl ro an priesthood im radik, im, ilōn̄ in men otemjej, ron̄jake wōt, unoojdikdik eo an Jetōb.
Irooj enaaj aolep iien kōjparok kallim̧ur eo An: Inaaj tōlļo̧k kom̧.”6 Kajjitōk eo wōt ej, jenaaj ke kōtļo̧k bwe jen ļoor tōl in? Jenaaj ke ron̄jake Ainikien im ainikien rikarejar ro An?
Ij kam̧ool bwe n̄e kwoj pād ijeņe n̄an Irooj, E enaaj pād ijeņ n̄an eok.7 Eļan̄n̄e kwoj iakwe E im kōjparok kien ko An, Jetōb eo An enaaj pād ippam̧ im tōl eok. “Likūt am lōke ilo Jetōb eo ej tōlļo̧k n̄an kōm̧m̧an em̧m̧an. … Jān men in kwo naaj jeļā, aolep men ko otemjeļo̧k … ko rej uwaanļo̧k wōt men ko rejim̧we.”8
Kōn pedped in katak kein āinwōt juon pedped, imaron̄ ke lewaj jet kapilōk?
Elōn̄ wōt iaan epepen ko ami eļap aer m̧uri. Ke ikar juon rūm̧m̧an ded, stake būreejtōn eo aō ekar juon rijerbal in bāāk ilo Wall Street. Ekar katakin eō, “Kwom̧weie eļan̄n̄e komaron̄ mour wōt ilowaan jeraam̧m̧an ko am.” Elmen am̧ kōm̧m̧ane? Kōļļā juon m̧ōttan jon̄oul eo am̧ innām kakoņ! N̄e eļapļo̧k am̧ bōke, eļapļo̧k am̧ kakkoņ. Jab jiāe ippān ro jet bwe en wōr m̧weium̧ men ko eļap oņaer. Jab wiaki men eo kwoj jab maron̄e oņāān
Elōn̄ rūm̧m̧an ded ro ilo laļ in rej m̧uri bwe ren maron̄ jikuuļ, men eo deo remaron̄ loe ej an ļapļo̧k wōņāān jikuuļ jān aer maron̄ kōļļāiki. Lale n̄e elōn̄ jāān in jikuuļ ko, grant ko. Pukōt jerbal ko rebōk jejjo awa ko n̄an jipan̄ eok kōļļāiki. Menin enaaj aikuji am̧ kaarmejet kōņaan ko, ak enaaj jipan̄ eo tōprak.
Jeļāļo̧kjeņ ej kōpooj eok n̄an jerbal ko rem̧m̧an ļo̧k. Ej likūt eok ilo juon jekjek eo n̄an jerbal im kōjeram̧m̧an ro ipeļaakūm̧. Enaaj kwaļo̧k n̄an eok juon iaļ in ekkatak aolepān am mour. Enaaj kōkajoorļo̧k eok bwe kwōn ire ippān jajeļo̧kjeņ im bōd. Āinwōt an Josep Smith katakin: “Jeļāļo̧kjeņ ej ettoļo̧k jān marok, bōjrak im pere; bwe men kein rejjab maron̄ waļo̧k ippān Jeļāļo̧kjeņ. … Ilo jeļāļo̧kjeņ ewōr kajoor.”9 “Bwe katak em̧m̧an eļan̄n̄e rej eo̧ron̄ kapilōk ko an Anij.”10 Jeļāļo̧kjeņ enaaj kōpooj eok n̄an ta eo epād im̧aan, ekoba m̧are.
Bar juon alen, emaron̄ ke kaju aō kōnono? Iaļ eo ej tōl ļo̧k n̄an m̧are ekitbuuj jerā (dating)! Jerā (dating) ej juon iien eo em̧m̧an n̄an kōm̧m̧ao eo eaitok kitien. N̄e kwoj jerā (dating), kwoj katak men otemjej kōn doon. Kajjieon̄ jeļā kajjojo baam̧le ko an doon n̄e emaron̄. Kōttōbar ko amiro rekkar n̄an doon? Kwoj ke kwaļo̧k ejja en̄jake ko wōt kōn kien ko, Rilo̧mo̧o̧r eo, priesthood eo, tampeļ, kōkaajriri, kūr ko ilo Kabun̄ in, im jerbal n̄an ro jet? Emōj ke amiro etale doon n̄e ej bentok, ņamejļan apan̄ ko im likjab ko, bōbrae illu, im kōm̧anm̧an n̄an doon āinwōt men ko reppen? Armej eo kwoj jerāiki (dating) ej ke kakkure ro jet ak kalōk ro jet? Ej ke ilulu, naan ko an, im wāween an kōm̧anm̧an ej ke ta eo kokōņaan mour kake aolep raan?
Emōj kar ba, ejjeļo̧k juon ej m̧are ewāppen; jej m̧are eo ewōr kōttōbar ippān. M̧are eo eboļōmen ejjab kōn ta eo ikōņaan; ej barāinwōt kōn ta eo lio ekōņaan—wōn eo enaaj eo m̧ōtta—im kōņaan im aikuji eō bwe in erom.
Alikkar, jouj im jab jerā (date) ilo aolepān tōre kane kwoj 20 jim̧a iiō bwe kwōn “m̧ōņōņō.” barāinwōt karum̧wijļo̧k m̧are kōnke kwōj kōņaan bar jet kain im kalimomo ko. Etke? Kōnke jerā (date) im m̧are rejjab mejān kajjōk ko. Rej kōjem̧ eo n̄an ijo eļap am kōņaan etal n̄ane. “Kōn men in ļeo enaaj likūt jemān im jinen, im eddāp ņa ippān lio pāleen.”11
Eddo eo am̧ kiiō ej bwe kwōn erreo n̄an armej eo kwonaaj m̧areiki. Eļan̄n̄e kokōņaan m̧areik juon armej em̧m̧an, kōjāiij, m̧ool, m̧ōņōņō, kajoor jerbal, kajoor ilo jetōb, kwōn āinwōt armej in. Eļan̄n̄e kwoj kain armej rot in im kwoj jan̄in m̧are, kwōn kijenmej. Kōttar Irooj. Ij kam̧ool bwe Irooj ejeļā kajjeem̧ im kōņaan ko am̧ im Ej iakwe eok kōn tiljek im kijejeto eo am̧ n̄an E. Ewōr an karōk n̄an eok. Ron̄jake Jetōb eo An. Pukot jaab n̄an kapilōk Irooj, ak n̄an bōk kapilōk jān Pein.”12 Ilo mour in ak mour eo juon, kallim̧ur ko An renaaj kūrm̧ool. “Eļan̄n̄e kom̧ij pojak kom̧ jamin mijak.”13
Eļan̄n̄e ejjab lukkuun ļap jeraam̧m̧an ko am̧, jab inepata. Juon membōr in Kabun̄ in ekar jiron̄ eō, “Ikar jab kōkkaajririik ajri ro nejū kōn jāān; ikar kōkkaajririik er kōn tōmak.” Ewōr juon m̧ool eļap n̄an menin. Jino kōjerbal tōmak eo am ilo aolep eria ko an mour eo am̧. Eļan̄n̄e kwoban, kwonaaj en̄taan eo ij ņaetan “tōmak emōjņo̧.” Kajoor eo emenin aikuj n̄an kōjerbale tōmak eo am̧ eo enaaj m̧ōjņo̧ļo̧k. Kōn menin, kōjerbal tōmak eo am̧ aolep raan, im kwonaaj “kanooj kajoorļo̧k im kajoorļo̧k … penļo̧k im penļo̧k ilo lōke Kraist.”14
Bwe kom̧win maron̄ pojak n̄an m̧are, kōm̧m̧an bwe kom̧win erreo n̄an bōk kwojkwoj eo im kabwijer juon peba in mālim an tampeļ. Etal n̄an tampeļ eo. Jerbal ilo Kabun̄ in. Ilo kakkobaba n̄an kūr ko, ļoor waanjon̄ak ko an Rilo̧mo̧o̧r eo, eo ekar baj “etetal im kōm̧anm̧an em̧m̧an.”15
Kiiō, bōlen emaron̄ wōr ami kajjitōk ko reļļap kōn kālet ko im̧aan. Ilo iiō in rūm̧m̧an ded ko aō, ikar pukōt kapilōk jān ro jinō im jema im jān rikakpilōklōk ro aō retiljek, ilōke er. Juon ekar juon ritōl an priesthood; bar juon ekar juon rūkaki eo ej tōmak eō. Erro jim̧or rekar ba, “Eļan̄n̄e kokōņaan kapilōk in aō, kwōn m̧aanjabpopo n̄an bōke.” Imeļeļe ta meļeļein menin. Jar im kālet rikakpilōklōk ro ewōr jetōb eo em̧m̧an ilo būruwer. Jojokōjparoke ilo am̧ bōk kapilōk jān ro m̧ōttam̧. Eļan̄n̄e kwokōņaan eļapļo̧k jān jon̄an eo ewōr ippām̧, wanlōn̄ ļo̧k, jab kijoone!16
Keememej, ejjeļo̧k juon enaaj pukōtwaj eok ilo etam̧. Tōmak eo wōt am̧ im jar ko am̧ renaaj kōm̧m̧an juon oktak eļap an bōro. Kwe wōt komaron̄ ņamejļāer bwe kwōn pokake bwe en ukōt mour eo am̧. Kōnke pinmuur eo an Rilo̧mo̧o̧r eo n̄an kwe, kajoor eo ej ilo kwe.17 Ewōr am̧ anemkwoj in kālet, ewōr am̧ naan in kam̧ool ko eļan̄n̄e kwoj pokake, im ļoor Jetōb eo ej tōl eo.
Jem̧aanļo̧k, juon rikōm̧m̧an pija ekar ba bwe ekar en̄jake bwe ekar m̧ōttan wōt juon “epepen an nejin ro rejerwaan”—juon epepen “rej pukōt kōjatdikdik im lan̄lōn̄ im kakūrm̧ool, ak rej pukōti ilo aolep jikin ko rebōd im ilo aolep iaļ ko rebōd.”18
Ilo būrabōļ eo an Rilo̧mo̧o̧r eo kōn nejin eo ejerwaan, ļaddik eo ekar lōn̄ an kōjeraam̧m̧an ko rej kōttare, ak m̧okta jān an kar būki, ekar aikuj in lale mour eo an, kālet ko an, im jekjek eo epād ie. Kabwilōn̄lōn̄ eo ekar waļo̧k tokālik ej kōmeļeļeik ilo eoon in kōn juon ennaan ealikkar: “Ekar itok ippān make.”19 Imaron̄ ke rojan̄ kom̧ bwe kom̧win itok n̄an kom̧ make? Ilo Kabun̄ in, n̄e kālet ko raorōk rej aikuj kōm̧m̧an, emakijkij ad kōm̧m̧an kweilo̧k in ko̧o̧njeļ ko. Baam̧le ko̧o̧njeļ ko rej jerbal āinwōt in. Komaron̄ in kōm̧m̧ane ta eo in ņaetan “ko̧o̧njeļ an juon make.” Ālkin am̧ jar, joļo̧k jet iien ippam̧ make. Kōļmenļo̧kjeņ kōn ta eo epād im̧aan. Kajjitikūn eok make: “Ewi wōt eria ko ilo mour eo aō ij aikuj in kōkajoorļo̧k bwe in maron̄ kōkajoorļo̧k ro jet? Ia eo ikōņaan pād ie juon iiō jān kiiō? ruo iiō jān kiiō? Ta kālet ko ij aikuj bwe in tōpar ijeņ?” Keememej, kwoj juon rikkāke, im kwoj bōk eddo. Ij kam̧ool bwe ilo ami itok n̄an kom̧ make, Jemedwōj Ilan̄ enaaj itok n̄an kom̧. Kōn pein kaenōm̧m̧an eo An Jetōb Kwojarjar eo, E enaaj tōl ļo̧k eok.
Ij kwaļo̧k aō naan in kam̧ool bwe Anij ej mour. Ij kwaļo̧k juon kam̧ool ejenolo̧k bwe Rilo̧mo̧o̧r ej iakwe eok. “Jen bun̄m̧aanļo̧k im jab kōmtālik ilo unin [An eļap]? Jen bun̄m̧aanļo̧k im jab kōmtālik.”20 Ilo ami ļoor E, E enaaj kōkajoorļo̧k im kotak kom̧. E enaaj kōro̧o̧lļo̧k eok n̄an m̧weo. Ilo etan Jisōs Kraist, amen.