Ruo Taujin Ritariņae Ro Reddik, jān Arnold Friberg

O̧kwōj 10–16

Alma 53–63

“Rōļo̧k kōn Kajoor eo Eaiboojoj An”

Bwebwenato ko ilo Alma 53–63 remaron̄ jipan̄ kwe lo tōprak ko ilo am̧ kōn m̧ool ko an gospel eo ak jab būki. Ilo am̧ riiti Alma 53–63, je im̧we ko im kejōkļo̧kjeņ kōn wāween ko komaron̄ mour kōn m̧ool ko an gospel eo kwoj ekkatak.

Je En̄jake ko Rej Im̧we Eok

N̄e keidi ippān jarin tariņae ko an armej in Leman, “jarin tariņae eo aō edik” an Hilamōn (Alma 56:33) kōn 2,000 RiNipai ro reddik reban kar bōk tūb eo. Ijello̧kin an iiet oraer, ritariņae ro an Hilamōn “kar aolepāer … kanooj inono,” im “rejjan̄in kar tariņae” (Alma 56:46–47). Ilo jet wāween ko, jekjek eo aer maron̄ kar jeļā kake n̄an kōj me jet iien en̄jake iiet oran ak tōrjān jon̄an ilo pata eo ad ilo raan-ko āliktata ņae Setan im kajoor ko an nana ilo laļ in.

Bōtaab jarin tariņae eo an Hilamōn eaar wōt jet men ko rōļe ie ioon RiLeman ro me ejjab kōn oran ko ak kapeel an jarin tariņae. Raar kāālet Hilamōn, juon rikanaan, n̄an tōl er (Alma 53:19); “raar ekkatak jān ro jineer, bwe eļan̄n̄e reban pere, Anij enaaj lo̧mo̧o̧ren er” (Alma 56:47); im raar “tōmak otem tōmak ilo men ko kar katakin er.” Kōn tōmak eo aer, kar kōjparok er kōn “kajoor in Anij ekabwilōn̄lōn̄.” (Alma 57:26). Men̄e raar aolep ikinejnej ilo pata eo, “eaar ejjeļo̧k juon iaer eaar jako” (Alma 57:25). Kōn menin kōj kajjojo ekar wōr ad en̄jake ko relāj im rekakkure ko raar kōm̧m̧ani kinej ko ak pere ilo jetōb, jemaron̄ bōk peran—ennaan eo an jarin tariņae eo an Hilamōn ebwe “[ewōr] juon Anij ejim̧we, im jabdewōt eo [ekar] jab pere, [renaaj] rōļo̧k kōn kajoor eo eaiboojoj An” (Alma 57:26).

Ļōmņak ko n̄an Ekkatak Jeje ko Rekwojarjar Ippam̧ Make

Alma 53:10–22; 56:43–48, 55–56; 57:20–27; 58:39–40

Ilo aō kōjerbal tōmak ilo Anij, Enaaj kōjeraam̧m̧an eō kōn An kajoor ekabwilōn̄lōn̄.

Bwebwenato ko rōkōļo̧kjeņ āinwōt bōk tūb eo an ritariņae eo reinono an Hilamōn maron̄ in pen n̄an kōnono kaki kōnke raar āinwōt relukkun pen. Bōtaab juon un kōn kain bwebwenato kein rej ilo jeje ko rekwojarjar ej n̄an kwaļo̧k bwe n̄e ewōr ad tōmak, Anij emaron̄ jerbali kabwilōn̄lōn̄ ko ilo mour ko ad. Ilo am̧ riit kōn ritariņae ro ilo eoon kein, pukōt kōkaļļe ko kōn ekōjkan aer kar kōjerbal tōmak eo aer ilo Anij, ta eo eaar kōm̧m̧an bwe tōmak eo aer en kanooj in kajoor, im ta eo eaar kōm̧m̧an bwe en pidodo an waļo̧k kabwilōn̄lōn̄ ko: Alma 53:10–22; 56:43–48, 55–56; 57:20–27; im 58:39–40. Jaat in ej elmakote juon wāween komaron̄ je ta eo kwoj loe.

Ļamļam ko an ritariņae ro an Hilamōn:
Ta eo kar katakin er:
Ta eo raar kōm̧m̧ane:
Kōjeraam̧m̧an ko raar būki:

Ālkin ekkatak eoon kein, ta eo kwoj en̄jake eaar im̧we eok n̄an kōjerbal tōmak eo am̧?

Hilamōn eaar kwaļo̧k jerbal eo an ro jinen ilo kōkajoorļo̧k tōmak eo an ritariņae eo (lale Alma 56:47–48; 57:20–27). Ta jerbal ko ewōr an ro uwaan baam̧le eo im ro jet kar kōm̧m̧ane ilo kalōk tōmak eo am̧? Ta eo komaron̄ kōm̧m̧ane n̄an kōkajoorļo̧k tōmak eo an baam̧le eo am̧ im ro m̧ōttam̧?

Raar Jab Pere, jān Joseph Brickey

Alma 58:1–12, 31–37; 61

Imaron̄ kāālet n̄an ļōmņak em̧m̧an tata kōn ro jet im jab matōrtōr.

Jim̧or Hilamōn im Peoran eaar wōr aer un ko rem̧m̧an n̄an matōrtōr. Hilamōn eaar jab bōk ebwe jipan̄ n̄an jarin tariņae ko an, im Peoran kar riab ņa ruwōn jān Moronai kōn an dāpij jipan̄ (lale Alma 58:4–9, 31–32; 60). Ta eo ej kabwilōn̄ eok kōn uwaak ko aer ilo Alma 58:1–12, 31–37 im Alma 61? Ekōjkan am̧ maron̄ ļoor waanjon̄ak eo aer ilo ejjab jekjek ko wōt?

Elder David A. Bednar kar katakin: “Ilo jet wāween im ilo jet iien, juon ilo Kabun̄ in enaaj kōm̧m̧an ak ba juon men me maron̄ watōke ekōmettak. Kain iien in em̧ool enaaj waļo̧k n̄an kajjojo im aolepād wōj—im em̧ool enaaj waļo̧k elōn̄ļo̧k jān juon alen. … Kwe im n̄a jejjab maron̄ kōjbwebweik kōttōpar ko im m̧wil an armej ro jet. Mekarta, jej jōk ilo ļōmņak ekōjkan ad naaj kōm̧m̧ane. Jouj keememej bwe kwe im n̄a jej rijerbal ro kar bōk menin letok kwojarjar eo kōn anemkwoj in kāālet im jemaron̄ kāālet n̄an jab matōrtōr” (“And Nothing Shall Offend Them,” Ensign ak Liahona, Nob. 2006, 91).

Lale barāinwōt Jabōn Kōnnaan ko 16:32; Moronai 7:45; David A. Bednar, “Meek and Lowly of Heart,” Ensign a Liahona, Māe 2018, 30–33.

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota eo an Baam̧le

Ilo am̧ riiti jeje ko rekwojarjar ippān baam̧le eo am̧, Jetōb emaron̄ jipan̄ eok jeļā ta pedped in katak ko n̄an kwaļo̧ki im kōnono kaki n̄an tōpar aikuj ko an baam̧le eo am̧. Erkein rej jet iaan ļōmņak ko.

Alma 53:10–17

Antai-Nipai-Liai ro raar bujen n̄an kar jab kōto̧o̧rļo̧k bōtōktōk. Ta bujen ko em̧ōj ad kar kōm̧m̧ani ippān Anij? Ta eo jej riiti ilo Alma 53:10–17 me ej im̧we kōj n̄an kōļapļo̧k ad tiljek n̄an bujen ko ad?

Alma 53:20–21

Ekōjkan ad maron̄ erom āinwōt likao ro an Hilamōn? Emaron̄ jipan̄ n̄an ekōnono kōn ta meļeļe in jet iaan jabōn kennaan ko ilo eoon kein; n̄an waanjon̄ak, ta meļeļe in n̄an “peran … kōn kajoor im wāmourur”? Ta meļeļe in n̄an “etetal jim̧we im̧aan [Anij]”?

Alma 58:9–11, 33, 37

Ilo iien aikuj ko reļļap, jej ke oktakļo̧k n̄an Jemedwōj Ilan̄, āinwōt kar ritariņae ro an RiNipai ro? Ekōjkan An kar uwaake jar ko aer? Ekōjkan kar An uwaake jar ko ad?

Alma 61:2, 9, 19

Ta eo jej katak jān Peoran kōn ekōjkan uwaak n̄e jekpen riab ņae kōj?

Alma 62:39–41

En̄in ej juon kein katak me emaron̄ jipan̄ baam̧le eo am̧ meļeļe bwe jemaron̄ kāālet n̄an jim̧or “kapene” ak “kapidodoik” jān mālejjon̄ ko ad: Likūt juon piteto amej im juon lep amej ilo juon ainbat in dān eboiiļ. Piteto eo im lep eo rej jutak kōn kōj, im dān eo ej jutak kōn mālejjon̄ ko jej jelm̧ai. Ilo an piteto eo im lep eo boiiļ, komaron̄ kōnono kōn jet iaan māllejon̄ ko baam̧le eo am̧ ej jelm̧ai. Ta jet iaan jekjek ko reoktak n̄an ņa mejļan mālejjon̄ ko āinwōt kein? Ekkar n̄an Alma 62:41, ekōjkan an uwaak ko ad n̄an mālejjon̄ ko jelet kōj? Ālkin an piteto eo im lep eo lukkuun in mat, mwūjiti piteto eo im rupe lep eo n̄an kwaļo̧k bwe ejja “dān” eo wōt eaar kapidodoik piteto eo im eaar kapene lep eo. Ta eo baam̧le eo emaron̄ kōm̧m̧ane n̄an kanooj lale bwe mālejjon̄ ko ad rej kōttāik kōj im bōkļo̧k kōj epaakeļo̧k Anij?

Kōn elōn̄ļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.

Kōkm̧anm̧anļo̧k Ad Katakin

Kōm̧m̧an bwe ajri ro ren kōm̧m̧ani jekjek ko aer rejej uwaer. “N̄e kwoj kūr ajri ro [nejūm̧] n̄an kōm̧m̧an juon men eiookļo̧k juon pedped in katak an gospel eo, kwoj jipan̄ an em̧m̧anļo̧k meļeļe eo aer pedped in katak eo, im kwoj leļo̧k n̄an er juon kein kakeememej maron̄ jibwe (loe) kōn ta eo raar katak. … Kōtļo̧k bwe ren kalōk, jin̄aik, kōļare, je, im ejaake” (Teaching in the Savior’s Way, 25).

Ej M̧ool, Ļo, Aolep rej Pād im Bōnbōn jān Clark Kelley Price