Jisas i kamkamaot long Ol Man blong Nifae

Mi Mi Laet blong Wol, i kam long James Fullmer

14–20 Septemba

3 Nifae 8–11

“Girap mo Kam Fored long Mi”

Luklukbak long olgeta tingting mo filing we yu bin raetemdaon long taem blong stadi blong yuwan long 3 Nifae 8–11 long wik ia, maet bae i givim yu sam aedia blong tij. Ol tingting andanit ia oli save givim moa aedia long yu.

Raetemdaon Ol Filing mo Tingting blong Yu

serem pikja bokis

Invaetem Ol Man blong Serem Wanem Oli Gat

Samtaem, ol pipol bae oli serem samting sapos yu askem wan spesifik samting long olgeta. Eksampol: yu save invaetem ol memba blong klas blong oli serem wan samting aot long 3 Nifae 8–11 we i bin tijim olgeta wan samting abaot fasin blong Jisas Kraes. Maet yu wantem kontaktem ol memba blong klas sam dei bifo klas i stat blong oli save kam long klas, we oli rere blong serem wan samting.

tijing pikja bokis

Stap Tijim Doktrin

3 Nifae 8–10

Sapos yumi sakem sin, Sevya bae i tekem yumi, i protektem yumi, mo i hilim yumi.

• Olgeta japta ia, insaed long olgeta i gat ol stori blong ol taem we oli prapa spolem gud ol samting, mo evri samting i bagarap, be oli tijim tu ol lesen long saed blong spirit we i save helpem yumi kam kolosap moa long Jisas Kraes. Maet yu save serem klas long trifala grup, mo givim wok long wanwan grup blong luklukgud insaed long wan japta aot long 3 Nifae 8–10, blong oli faenem ol toktok, o ol sentens we i tokbaot wanem nao ol pipol oli bin lanem, o wanem oli bin gotru long hem. Afta, wan aot long wanwan grup ia, i save serem wetem haf blong klas wanem nao grup blong olgeta i bin faenem. Leftemap tingting blong ol memba blong klas blong toktok raon long wei we ol lesen long saed blong spirit ia, oli save helpem yumi kam kolosap moa long Sevya.

• Wan hevi mesej we i stap long ol japta ia, i we, Sevya i stap kamaot long yumi wetem lav mo sore, iven long taem blong ol tes blong yumi we oli had moa. Maet yu save invaetem ol memba blong klas blong oli tingting long wan we oli save hem, we i stap gotru long wan taem blong jalenj, mo afta, lukaotem ol toktok blong Sevya insaed long 3 Nifae 9:13–22 mo 10:1–10 blong faenem ol sentens we bae i save helpem man o woman ia. Maet ol memba blong klas oli save serem ol eksperiens blong olgeta, abaot wan taem we oli bin filim Sevya i bin go kamaot long olgeta blong helpem olgeta.

3 Nifae 9:19–22

Lod i askem wan “hat we i fulap wetem sore mo wan spirit we i wantem blong sakem sin.”

• Bifo Sevya i kam, olgeta we oli stap fetful long graon blong promes oli bin obei long loa blong Moses, we i bin nidim sakrifaes blong ol animol. Blong helpem ol memba blong klas blong oli andastanem gud moa loa ia, yu save tekem sot taem blong luklukbak long Moses 5:5–8. ?From wanem ol pipol blong God, long taem bifo, oli bin kasem komanmen ia blong mekem sakrifaes blong ol animol? Insaed long 3 Nifae 9:20, ?wanem niu komanmen nao Sevya i bin givim, mo olsem wanem nao komanmen ia i poenem yumi i go long Hem mo sakrifaes blong Hem? Ol kwot abaot loa blong sakrifaes we oli stap long “Sam Moa Risos,” oli save help.

• ?Olsem wanem nao yu save helpem ol memba blong klas blong andastanem wanem nao i minim blong wan wan hat we i fulap wetem sore mo wan spirit we i wantem blong sakem sin? Blong stat, maet yu save raetem ol toktok ia antap long bod, fulap wetem sore, we i wantem sakem sin mo sakrifaes. Afta, yu save askem ol memba blong klas blong oli droem ol pikja we oli ripresentem wanem nao ol toktok ia oli minim long olgeta, o yu save raetem ol toktok o ol sentens we oli save joenem long ol toktok ia. Taem ol memba blong klas oli stap serem ol pikja blong olgeta wetem ol toktok, o ol sentens, oli save toktok raon long wei we ol samting ia oli joen long wanem Sevya i stap askem yumi long 3 Nifae 9:19–22. Toktok we i kam long Elda D.Todd Christofferson insaed long “Sam Moa Risos” i save help.

3 Nifae 11:1–17

Jisas Kraes i Laet blong Wol.

• Ol samting we oli hapen, we oli tokbaot long 3 Nifae 11:1–17 oli ol samting we oli moa tabu we oli stap long Buk blong Momon. Tingting blong givim smol taem long ol memba blong klas blong oli rid long olgeta ves ia olgetawan nomo. Maet yu save raetem samfala kwestin long bod blong oli tingting hevi long olgeta taem oli stap rid; ol kwestin olsem: ?Sapos yu bin stap long medel blong ol pipol ia, bae yu harem olsem wanem? ?Long olgeta ves ia, wanem samting abaot Sevya i tajem yu bigwan moa? ?Wanem nao yu lanem aot long eksampol blong Jisas? o ?Wanem eksperiens nao i bin givim yu wan witnes se Jisas Kraes i Sevya blong yu? Yu save givim taem long sam memba blong klas blong serem ol tingting blong olgeta, o wanem oli bin filim.

  Jisas i soem long Ol Man blong Nifae, ol mak ia long ol han blong Hem.

  Wan afta Wan, i kam long Walter Rane

3 Nifae 11:10–41

Jisas Kraes i stanemap doktrin blong Hem mo Jos blong Hem.

• Bae i save tijim man blong luk wanem nao ol fas samting we Sevya i bin jusum blong talem mo mekem taem Hem i bin kamkamaot long graon ia, Plante. Maet ol memba blong klas oli save makem o raetemdaon ol trutok we oli faenemaot aot long ol toktok mo aksen blong Sevya long 3 Nifae 11:10–41. Invaetem olgeta blong serem wanem we oli bin faenem. ?Wanem nao yu lanem abaot Sevya aot long ol ves ia? ?Wanem nao yumi lanem abaot Jos blong Hem?

• Blong save endem ol defren kaen tingting long medel blong ol pipol long saed blong baptaes, Sevya i talemaot ol impoten trutok abaot odinens ia long 3 Nifae 11. Blong helpem ol memba blong klas blong faenemaot ol trutok ia, yu save raetem ol namba blong ol ves ia, long bod: 21–25, 26–27, 33–34. Invaetem wanwan memba blong famli blong jusum wan o tu ves, mo serem wan trutok we i stap tij abaot baptaes.

lanem samting pikja bokis

Stap Leftemap Tingting blong Lanem Samting long Hom

Maet bae klas blong yu i intres blong save se, visit blong Sevya long Ol Man blong Nifae mo Ol Man blong Leman, i bin tajem olgeta bigwan, mekem se tufala pipol ia, we oli bin stap raorao bigwan fastaem, oli bin laef long pis blong ol 200 yia we i kam afta (luk long 4 Nifae 1). Hemia i save givim insperesen long ol memba blong klas blong oli stadi long 3 Nifae 12–16 blong lanem wanem Sevya i bin tijim ol pipol, we i bin mekem olgeta oli bin jenis bigwan olsem.

risos pikja bokis

Sam Moa Risos

Loa blong sakrifaes.

Presiden M. Russell Ballard, i bin eksplenem wan wei blong laef folem loa blong sakrifaes, tedei:

“Afta long bigfala sakrifaes blong Sevya, oli bin stretem tu samting long praktis blong loa blong sakrifaes. Faswan, hem i odinens blong sakramen, we i tekem ples blong odinens blong sakrifaes; mo sekenwan, jenis ia i mekem se man i nomo lukluk long sakrifaes blong animol blong wan man, be i lukluk long man hemwan bakegen. Long wan wei, sakrifaes ia i jenis, i aot long ofring i go long hem we i givim ofring.…

“ … Lod i nomo askem animol o kaekae blong yumi, be naoia, Hem i wantem yumi blong lego evri samting we i no blong God. …

“ … Taem yumi winim ol selfis tingting blong yumi, mo yumi putum God i kam faswan long laef blong yumi, mo yumi mekem kavenan blong wok blong Hem, i nomata se praes blong hem i olsem wanem, nao yumi stap laef folem loa blong sakrifaes. (“The Law of Sacrifice,” Ensign, Oct. 1998, 10).

Elda Neal A. Maxwell blong Kworom blong Olgeta Twelef Aposol i bin talem: “Ril sakrifaes blong yumiwan, i neva blong putum wan animol antap long olta Be, !hem i fasin blong wantem putum animol we i stap insaed long yumi, i go antap long olta, mo letem blong faea i kakae animol ia!” (“Deny Yourselves of All Ungodliness,” Ensign, May 1995, 68).

Wan hat we i fulap wetem sore mo wan spirit we i wantem blong sakem sin.

Elda D. Todd Christofferson i tokbaot mining blong gat wan hat we i fulap wetem sore mo wan spirit we i wantem blong sakem sin:

“Yu save givim presen ia long Lod, we i hat blong yu we i fulap long sore, o hat we i sakem sin, mo spirit blong yu we i wantem sakem sin, o spirit blong yu we i stap obei. Long ril laef, presen ia, hem i yuwan nomo—huia yu, mo huia yu stap kam olsem.

“?I gat wan samting, insaed long yu o insaed long laef blong yu we i no klin gud, o i no klin inaf? Taem yu sakemaot, hemia nao presen we yu givim i go long Sevya. ?I gat wan gudfala evri dei fasin, o i gat wan kwaliti we i no gat insaed long laef blong yu? Taem yu kasem fasin ia, mo yu mekem i kam pat blong ol fasin blong yu, nao, yu stap givim wan presen i go long Lod” (“When Thou Art Converted,” Ensign o Liahona, May 2004, 12).

Stap Kam Antap long Fasin blong Yumi blong Stap Tij

Wok tugeta wetem ol memba blong famli. “Ol pipol we oli gat bigfala paoa blong lidim tingting blong wan man o woman—blong gud, o blong nogud—plante taem, oli olgeta ia we oli stap long hom blong hem. From se hom i senta blong stap laef folem gospel, mo senta blong lanem samting, ol hadwok blong yu blong mekem wan memba blong klas i kam strong moa, bae i wokaot gud nomo taem yu wok tugeta wetem ol memba blong famli” (Teaching in the Savior’s Way, 8–9).