Wan Dei, Wan Naet, mo Wan Dei, i kam long Jorge Cocco

7–13 Septemba

3 Nifae 1–7

“Leftemap Hed blong Yu mo Stap Glad”

Tabu Spirit bae i talem strong long yu blong lukluk nomo long sam spesifik prinsipol, insaed long klas, we oli kam long 3 Nifae 1–7. Olgeta prinsipol ia, maet oli ol prinsipol ia we bae i blesem wan we i stap long nid.

Raetemdaon Ol Filing mo Tingting blong Yu

Invaetem Ol Man blong Serem Wanem Oli Gat

Blong helpem ol memba blong klas blong serem wanem we oli stap lanem long hom, askem olgeta blong raetem, long sam pis pepa, sam trutok we oli faenem insaed long 3 Nifae 1–7, mo tu, oli raetem skripja refrens blong ol trutok ia. Putum ol pis pepa ia insaed long wan smol kontena, mo pulum sam long ol pepa ia blong toktok raon long ol, olsem wan klas. Taem ol memba blong klas oli stap serem tingting, lukluk se i gat ol aedia we oli go wetem olgeta we oli stap long aotlaen ia we i save mekem toktok long klas i go dip moa mo i pusum ol nara memba blong klas blong toktok.

Stap Tijim Doktrin

3 Nifae 1–7

Fasin blong jenisim laef, i wan rod we i nidim blong yumi gogohed blong traehad.

• 3 Nifae 1–7 i tokbaot ol pipol we oli bin jenisim laef blong olgeta i go long Jisas Kraes mo gospel blong Hem, mo olgeta pipol we oli no bin jenis. Blong helpem klas blong yu blong faenem wanem samting i defren bitwin tufala grup ia, yu save mekem wan jat long bod wetem ol heding ia: Ol bilif mo aksen we i mekem man i no save jenisim laef mo Ol bilif mo aksen we i save mekem man i jenisim laef. Serem ol skripja refrens ia long ol memba blong klas, mo invaetem olgeta blong fulumap jat ia wetem wanem we oli faenem (ol eksampol oli stap daon ia long saed blong fas refrens).

  • 3 Nifae 1:4–23, 29–30: Mekem man i no save jenisim laef: no stap biliv long ol toktok blong ol profet, mo, stap jikim ol stret mo gud pipol (ol ves 5–6). Mekem man i save jenisim laef: gat fet long ol toktok blong profet, mo stap prea blong kasem help (ol ves 8, 11).

  • 3 Nifae 2:1–3

  • 3 Nifae 3:12–16

  • 3 Nifae 4:8–10, 30–33

  • 3 Nifae 6:13–18

  • 3 Nifae 7:15–22

  ?Olsem wanem nao yumi save stap strong blong jenisim laef nomata i gat samting we i kam agensem yumi?

• Maet klas blong yu bae i intres blong lukluk gud long wei blong sapotem moa wanem we 3 Nifae 1:27–30 i singaotem “jeneresen we i stap kam antap.” Maet bae yu save askem ol memba blong klas blong faenem long ol ves ia, ol risen from wanem ol yangfala Man blong Nifae mo Man blong Leman oli no bin save stanap agensem fasin nogud we i bin stap raonem olgeta. Hemia i save lidim yufala blong toktok raon long samfala jalenj we jeneresen we i stap kam antap i stap fesem tedei, mo ol bes wei blong helpem olgeta blong developem fet long Kraes. I gat sam tingting we oli stap long “Sam Moa Risos.”

3 Nifae 1:4–21; 5:1–3

Lod bae i mekem evri toktok blong Hem oli hapen.

• Sapos yufala i ridim ol stori long 3 Nifae 1:4–21 mo 5:1–3, i save mekem fet blong ol memba blong klas long ol promes blong Lod, i kam strong moa. Maet ol memba blong klas oli save ridim 3 Nifae 1:4–7 tugeta mo raetemdaon, long bod, olsem wanem maet bae oli filim sapos olgeta nao oli bin ol man blong biliv, we oli stap tokbaot long ol ves ia. Oli save tingting tu long sam semmak situesen we yumi save fesem tedei. ?Wanem nao yumi lanem long 3 Nifae 1:8–21 mo 5:1–3 abaot Lod mo ol promes blong Hem? Blong mekem toktok i go moa, yufala i save luklukbak long wan hym we i tokbaot fasin blong trastem God, olsem “When Faith Endures” (Hymns, no. 128). Ol memba blong klas oli save serem ol eksperiens blong ol taem we oli bin luk praes o blesing we oli kasem from fet mo tras blong olgeta long God, nomata ol samting we oli bin agens i stap.

3 Nifae 1:4–15; 5:12–26; 6:10–15; 7:15–26

Yumi ol disaepol blong Jisas Kraes.

• Momon i bin talem: “Luk, mi mi wan disaepol blong Jisas Kraes” (3 Nifae 5:13). Blong lukluk gud, wetem klas blong yu, se i minim wanem blong stap wan disaepol, yu save invaetem ol memba blong klas blong lukluk gud insaed long 3 Nifae 1:4–15; 5:12–26; 6:10–15; mo 7:15–26, mo lukaotem ol kwaliti, ol bilif mo ol aksen blong ol disaepol blong Kraes. Tingting blong givim, long ol memba blong klas, sam minit blong tingting hevi mo blong raetemdaon samting we oli save mekem blong kam wan disaepol blong Jisas Kraes we i gud moa.

3 Nifae 2:11–12; 3:12–26; 5:24–26

Taem ol stret mo gud man oli kam tugeta long wan ples, Lod i save mekem olgeta oli kam strong moa mo i save protektem olgeta.

• Pat blong risen we Ol Man blong Nifae oli bin save winim ol Gadianton stilman, i from se oli bin joenem ol ami wetem Ol Man blong Leman we oli bin jenisim laef blong olgeta mo oli bin folem daereksen blong Lakonius blong “oli kam tugeta” long Sarahemla (3 Nifae 3:22). ?Wanem lesen nao i stap ia blong ol memba blong klas blong yu? Yu save askem olgeta blong serem ol eksperiens blong ol taem we ol stret mo gud pipol raon long olgeta oli bin mekem olgeta oli kam strong moa. Afta, yu save invaetem ol memba blong klas blong luklukbak long 3 Nifae 3:12–26, mo faenem ol risen from wanem Ol Man blong Nifae oli bin kam tugeta, mo ol blesing we oli bin gotru long olgeta. ?Olsem wanem nao, yumi, yumi gat ol semmak blesing taem yumi kam tugeta wetem ol memba blong famli blong yumi, o ol branj o ol wod blong yumi? ?Wanem moa samting nao bae yumi lanem abaot fasin blong kam tugeta, olsem we oli putum i stap long 3 Nifae 5:24–26?

• Blong stap ridim 3 Nifae 3, hem i save kam wan janis blong helpem ol memba blong klas blong luk hamas nao yumi kam strong moa taem yumi kam tugeta long stret mo gud fasin. Maet yu save tingbaot wan lesen we yu yusum samting long hem blong soem olsem wanem ol samting we yumi no strong long olgeta, oli kam wanem yumi strong long olgeta taem yumi joen wetem ol nara samting. Invaetem ol memba blong klas blong traem tingting long maen blong olgeta, se, oli bin askem olgeta blong winim tingting blong Ol Man blong Nifae abaot gud blong kam tugeta, olsem we oli tokbaot long ol ves 12–26. Maet bae oli save wok long ol grup blong toktok raon long hao nao oli mekem samting ia, hemia folem wanem oli ridim long ol ves ia. Letem olgeta oli serem aedia blong olgeta. Olsem wan klas, maet bae yu wantem toktok raon long ol kwestin olsem: ?Wanem jalenj yumi stap fesem we yumi save putum se i olsem ol stilman blong Gadianton? ?Olsem wanem nao yumi save mekem hom blong yumi mo ol wod blong yumi oli ol ples blong save haed long hem?

3 Nifae 3:1–13

Yumi no nid blong fraet long Setan.

• Leta we Gidianhae, we i lida blong ol stilman blong Gadianton, i bin raetem, i blong traem blong mekem Ol Man blong Nifae oli fraet mo trikim olgeta. Maet ol memba blong klas oli save luklukbak long ol toktok blong hem we i stap long 3 Nifae 3:2–10 mo komperem ol toktok ia long ol wei we Setan i save traem blong trikim yumi tedei. ?Wanem nao yumi save lanem aot long wanem Lakonius, we i jif jaj blong Ol Man blong Nifae, i bin mekem?

Stap Leftemap Tingting blong Lanem Samting long Hom

Blong givim insperesen long ol memba blong klas blong oli ridim 3 Nifae 8–11 blong klas blong nekis wik, talem long olgeta se, insaed long 3 Nifae 11 i tokabaot wan bigfala samting we i bin hapen, we i stap long Buk blong Momon—seves blong Jisas Kraes Hemwan, long medel blong Ol Man blong Nifae (luk long fas toktok blong Buk blong Momon).

Sam Moa Risos

Stap help blong bildimap fet long jeneresen ia we i stap kam antap.

Elda Valeri V. Cordón blong Olgeta Seventi, i bin givim trifala wei blong helpem jeneresen ia we i stap kam antap, blong oli stap tru long gospel:

1. “Blong Wok Strong Moa wetem Strong Tingting mo Stap Lukaot Gud long Hom. … Tijing we i gat paoa, i impoten bigwan blong holemtaet gospel insaed long ol famli blong yumi, mo i nidim blong wok strong wetem strong tingting mo blong yumi traehad. Plante taem, oli bin invaetem yumi blong gat evri dei fasin ia blong stadi long skripja wetem famli, mo yuwan. Plante famli we oli stap mekem hemia, oli gat blesing evri dei, mo oli gat moa yuniti, mo wan rilesensip we i kolosap moa wetem Lod.”

2. “Strong Eksampol insaed long Hom. … Hem i jes no inaf blong toktok long ol pikinini blong yumi mo talem se i impoten blong mared long tempol, blong livim kakae, blong kipim Sabat dei i tabu. Oli mas luk yumi mekem rum long evri dei blong yumi blong go long tempol folem hamas yumi save mekem. Oli nidim blong luk komitmen blong yumi blong livim kakae plante taem, mo kipim Sabat dei i tabu i stap.”

3. “Tradisen o kastom. … Olsem ol famli, yumi nid blong stap longwe long eni kastom we bae i stopem yumi blong kipim Sabat dei i tabu, o blong gat skripja stadi evri dei mo prea evri dei long hom. Yumi nidim blong klosem ol dijitol doa blong hom blong yumi long ponografi mo evri nara paoa blong devel. Blong faet agensem ol kastom blong wol blong tedei, yumi nidim blong yusum ol skripja mo voes blong ol profet blong tedei, blong save tijim ol pikinini blong yumi abaot tabu aedentiti blong olgeta, stamba tingting blong laef blong olgeta, mo tabu misin blong Jisas Kraes” (“The Language of the Gospel,” Ensign o Liahona, May 2017, 56–57; oli ademap italik.

Stap Kam Antap long Fasin blong Yumi blong Stap Tij

Yusum olgeta we oli stap traehad. Samtaem, ol memba blong klas we oli stap traehad, oli nid blong yumi yusum olgeta blong oli filim se yumi lavem olgeta. Tingting blong askem olgeta blong plei wan rol long wan lesen we i stap kam antap, o mekemsua se yu tekem olgeta i go long jos. No givap sapos oli no mekem eni samting afta long ol traehad we yu bin mekem fastaem. (Luk long Teaching in the Savior’s Way, 8–9