“21–27 Septemba. 3 Nifae 12–16: ‘Mi Mi Loa mo Laet,’” Kam Folem Mi—Blong Wanwan Man, Woman mo Famli: Buk blong Momon 2020 (2020)
“21–27 Septemba. 3 Nifae 12–16,” Kam Folem Mi—Blong Sandei Skul: 2020
Nambatri Nifae: Olgeta Twelef Ia Nao we Mi Mi Jusum, i kam long Gary L. Kapp
21–27 Septemba
3 Nifae 12–16
“Mi Mi Loa mo Laet”
Wanwan insaed long klas blong yu bambae i faenem wan samting we i gat mining long olgeta long medel blong ol fulap tijing, we oli gat paoa, blong Sevya, we oli bin raetem long 3 Nifae 12–16. Letem ol memba blong klas blong serem ol prinsipol ia we oli moa impoten long olgeta.
Raetemdaon Ol Filing mo Tingting blong Yu
Invaetem Ol Man blong Serem Wanem Oli Gat
Blong givim wan janis long evriwan blong serem wanem we oli bin stadi long hem long 3 Nifae 12–16, yu save raetem ol namba ia, 12 kasem 16 folem longfala saed blong bod. Afta, ol memba blong klas oli save lukaotem wan ves long wanwan japta ia we oli faenem we i gat moa mining long olgeta, mo afta, raetem namba blong ves anda long namba blong japta antap long bod. Jusum samfala ves blong ridim tugeta, mo toktok raon long from wanem nao oli gat mining.
Stap Tijim Doktrin
Ol tijing blong Sevya oli soem long yumi olsem wanem blong stap ol tru disaepol.
-
Aotlaen blong wik ia insaed long Kam Folem Mi—Blong Wanwan Man, Woman mo Famli i givim tingting ia se bae yumi raetemsot ol ves long 3 Nifae 12–14 blong i finisim sentens ia: “Ol tru disaepol blong Jisas Kraes …” Yu save askem sapos eni memba blong klas we i bin mekem aktiviti ia, i glad blong serem wanem oli bin lanem. O, yu save raetem sentens ia we i no finis i go antap long bod, wetem ol refrens olsem: 3 Nifae 12:3–16, 38–44; 13:1–8, 19–24; mo 14:21–27 (o eni nara skripja we yu bin faenem long stadi blong yuwan). Ol memba blong klas oli save jusum wan skripja blong ridim, wanwan o long grup, mo givim wan tingting blong finisim sentens antap long bod folem wanem ol ves ia oli stap tijim. Leftemap tingting blong ol memba blong klas blong tingting hevi, mo maet blong oli raetemdaon wanem bae oli mekem blong stap moa fetful blong folem Jisas Kraes, mo hemia from ol samting we oli bin lanem aot long ol ves ia
-
Blong helpem ol memba blong klas blong andastanem ol toktok blong Sevya long 3 Nifae 12:48, yu save invaetem wan long olgeta, o moa long wan, blong stadi long mesej blong Elda Jeffrey R. Holland “Be Ye Therefore Perfect—Eventually” (Ensign o Liahona, Nov. 2017, 40–42) longtaem bifo klas i stat, mo blong oli serem ol niu tingting we i bin helpem olgeta blong andastanem ves ia.
Ol tingting blong yumi, oli lidim yumi blong tekem aksen.
-
Sapos yufala i toktok raon long 3 Nifae 12:21–30, bae i save helpem ol memba blong klas blong luk se, olsem wanem nao, taem we yumi kontrolem ol tingting blong yumi, i save helpem yumi blong kontrolem ol aksen blong yumi. Blong statem wan toktok raon long hemia, yu save mekem wan tebol antap long bod, we i gat ol heding we oli go olsem: Ol Aksen we Yumi Wantem Stap Longwe long Olgeta mo Ol Tingting o Filing we Oli Lidim Yumi long Ol Aksen ia. Afta, yu save invaetem ol memba blong klas blong luklukgud insaed long 3 Nifae 12:21–22 mo 27–30 mo stat blong fulumap tebol ia. ?Wanem nara aksen o tingting nao ol memba blong klas oli save ademap i go long lis ia? ?Olsem wanem nao yumi “no mas letem eni long ol samting ia blong go insaed long hat blong yumi”? (3 Nifae 12:29). ?Olsem wanem nao yumi save ronemaot olgeta taem oli kam insaed? Afta we yufala i ridim kaonsel blong Presiden Esra Taf Benson insaed long “sam Moa Risos,” yu save krietem wan niu tebol wetem ol heding ia: Ol Aksen Olsem Hemia blong Kraes we Yumi Wantem Developem mo Ol Tingting we Oli Lidim long Ol Aksen Ia, mo, olsem wan klas, fulumap tebol ia.
Seves blong yumi mo wosip blong yumi, yumi mas mekem from ol raet risen.
-
Taem ol memba blong klas oli stadi long 3 Nifae 13, hem i givim wan janis blong oli luklukgud from wanem oli stap mekem ol gud wok ia. Blong statem wan toktok insaed long klas, tugeta yufala i save ridim ol ves 1–2 mo 16 mo serem mining ia blong, ol man blong tufes: “Olgeta we oli Priten; Grik toktok [we oli yusum long Niu Testeman] we i minim ‘wan akta we i stap plei,’ o ‘wan i ademap sikis pen long wan samting’” (Matiu 6:2, futnot a). Maet wan o tu memba blong klas bae oli glad blong stap priten, o stap aktem se oli stap givim samting long olgeta we oli pua, o oli stap livim kakae. ?From wanem nao, fasin blong stap priten, o fasin blong stap aktem samting, i wan gudfala pikja toktok blong fasin blong gat tufes? ?Olsem wanem nao bae yumi meksua se seves, prea, mo livim kakae blong yumi oli kam long tru hat, mo i no gat tufes biaen long hem?
-
Afta we oli faenem ol gud wok we oli tokbaot long 3 Nifae 13:1–8 mo 16–18, ol memba blong klas oli save toktok raon long wanem samting i save pusum wan man o woman blong mekem ol samting ia, o ol nara samting we God i stap askem yumi blong mekem. ?Wanem nao bae yumi talem long wan we i stap askem yumi se from wanem nao yumi stap mekem ol gud samting? Leftemap tingting blong ol memba blong klas blong tingting hevi long wanem i stap pusum olgeta blong mekem ol gud wok olsem ia. ?Olsem wanem nao yumi save mekem ol tingting blong yumi we oli pusum yumi, oli klin gud?
Sapos yumi lukaotem “ol gudfala samting” long Papa long Heven, bambae yumi kasem olgeta.
-
Blong andastanem invitesen blong Lod blong askem, blong lukaotem, blong noknok, nao, bae i gud mo bae i helpem yu blong faenemaot se ol toktok ia oli minim wanem. ?Wanem nao, wanwan long ol toktok ia oli stap traem blong talem abaot wanem we Lod i stap invaetem yumi blong mekem? ?Olsem wanem nao yumi stap askem, lukaotem, mo noknok? ?Olsem wanem nao ol promes insaed long 3 Nifae 14:7–8 oli bin kamtru insaed long ol laef blong yumi? Ol memba blong klas oli save luklukbak tu long kaonsel blong Presiden Russel M. Nelson insaed long “Sam Moa Risos,” mo lukaotem ol kwestin we hem i askem, mo ol invitesen we hem i givim. Givim taem long ol memba blong klas blong oli tingting hevi mo blong oli raetemdaon ol ansa blong olgeta long ol kwestin ia, mo long ol plan blong olgeta blong tekem aksen folem ol invitesen ia.
-
Sam memba blong klas, maet bae oli no savegud se Sevya i minim wanem taem Hem i talem se: “From evriwan we i askem, i kasem” (3 Nifae 14:8). ?From wanem nao, sam prea, i luk se i no gat ansa long olgeta, mo from wanem nao, samtaem, yumi kasem ol ansa we yumi no wantem? Olsem wan klas, luklukbak long olgeta skripja ia; maet bae i save help blong ansarem ol kwestin ia: Aesea 55:8–9; Hileman 10:4–5; 3 Nifae 18:20; mo Doktrin mo Ol Kavenan 9:7–9; 88:64. Afta, invaetem sam memba blong klas blong serem wanem oli faenem. ?Olsem wanem nao olgeta niu tingting ia oli jenisim wei we yumi stap prea?
Stap Leftemap Tingting blong Lanem Samting long Hom
Blong givim insperesen long ol memba blong klas blong ridim 3 Nifae 17–19 long hom, invaetem olgeta blong tingting se bae i olsem wanem blong harem Sevya i prea from olgeta mo ol famli blong olgeta. Long ol japta ia, bae oli rid abaot ol pipol we oli bin gat tabu eksperiens ia.
Sam Moa Risos
Yumi save kontrolem ol tingting blong yumi.
Presiden Esra Taf Benson i bin tijim:
“Maen, oli tekem se i olsem wan stej, we antap long hem, oli plei wan pat blong drama long wan taem. Long wan saed blong ol wing, Lod, we i lavem yu, i stap traem blong putum antap long stej blong maen blong yu olgeta samting we bae oli blesem yu. Long nara saed blong win, devel we i no laekem yu nating, i stap traem blong putum antap long stej blong maen blong yu olgeta samting we bae oli spolem yu.
“Be yu yu maneja blong stej ia—yu nomo yu disaed se wanem tingting bae i kam antap long stej ia. … Bae yu kam wanem yu stap tingting long hem—wanem yu stap letem oltaem i kam tekem spes antap long stej blong maen blong yu. …
“Sapos ol tingting ia oli mekem huia yumi tedei, mo yumi sapos blong kam olsem Kraes, nao yumi mas gat ol tingting olsem hemia blong Kraes” (“Think on Christ,” Ensign, Apr. 1984, 10–11).
God i wantem toktok wetem yu.
Presiden Russell M. Nelson i talem:
“?Wanem we yu stap lukaotem ia, bae i openem wanem long yu? ?Wanem waes nao yu no gat? ?Wanem nao yu filim se yu mas save o andastanem kwik naoia? Folem eksampol blong Profet Josef. Faenem wan kwaet ples we yu save go long hem oltaem. Putum tingting blong yu i stap daon long fes blong God. Talemaot hat blong yu long Papa blong yu long Heven. Tanem yu long Hem blong yu kasem ansa mo kamfot.
“Prea long nem blong Jisas Kraes abaot ol wari blong yu, ol fraet blong yu, ol wiknes blong yu—yes ol samting we oli hevi long hat blong yu. !Mo afta, yu lisin! Raetemdaon ol tingting we oli kam long maen blong yu. Raetemdaon ol filing blong yu, mo folem wetem ol aksen we Spirit i talem yu blong mekem.
“?God i rili wantem toktok wetem yu? !Yes! … Mi askem yu blong yu pusum yu i go bitim paoa blong yu long saed blong spirit blong yu kasem revelesen blong yuwan. …
“O, i gat plante moa samting we Papa blong yu we i stap long Heven i wantem yu blong save.” (“Revelesen blong Jos, Revelesen blong Laef blong Yumi,” Ensign o Liahona, Mei 2018, 93).
Stap Kam Antap long Fasin blong Yumi blong Stap Tij
Helpem olgeta we oli stap lanem samting blong leftemap wanwan long olgeta bakegen. “Wanwan man o woman insaed long klas blong yu, i wan rij ples blong testemoni, niu tingting, mo eksperiens blong fasin blong laef folem gospel. Invaetem olgeta blong serem mo blong leftemap wanwan long olgeta bakegen” (Teaching in the Savior’s Way,5).