Si Jesus nagpakita sa mga Nephite

Ako Mao ang Kahayag alang sa Kalibutan, ni James Fullmer

Septyembre 14–20

3 Nephi 8–11

“Tindog ug Duol Kamo ngari Kanako”

Ang pagtan-aw og balik sa mga impresyon nga imong gi-rekord atol sa imong personal nga pagtuon sa 3 Nephi 8–11 posibling makaaghat og mga ideya sa pagtudlo. Ang mga sugyot sa ubos mahimong makahatag nimo og dugang nga mga ideya.

Irekord ang Imong mga Impresyon

pagpaambit nga icon

Dapita ang Pagpaambit

Usahay ang mga tawo mas ganahan mopaambit kon mangutana ka og mas piho nga butang. Pananglitan, mahimo nimong dapiton ang mga sakop sa klase nga mopaambit og usa ka butang gikan sa 3 Nephi 8–11 nga nagtudlo nila kabahin sa kinaiyahan ni Jesukristo. Pwedeng ihatag nimo kini nga pagdapit mga pipila ka adlaw sa dili pa itudlo ang leksyon aron moabut sila nga andam sa pagpaambit.

pagtudlo nga icon

Itudlo ang Doktrina

3 Nephi 8–10

Kon kita maghinulsol, ang Manluluwas magauban, manalipud ug moayo kanato.

• Kini nga mga kapitulo naglangkob sa mga paghulagway sa pagkaguba ug pagkapukan, apan nagtudlo usab sila og espiritwal nga mga leksyon nga makatabang kanato nga mas mapaduol ni Jesukristo. Siguro pwede nimong bahinon ang klase ngadto sa tulo ka grupo ug sanguni ang kada grupo sa pagsiksik og usa ka kapitulo gikan sa 3 Nephi 8–10, nga mangita sa mga pulong o hugpong sa mga pulong nga naghulagway sa unsay nakat-unan o nasinati sa katawhan. Usa ka tawo gikan sa kada grupo ang mahimo dayon nga mopaambit sa uban diha sa klase kon unsa ang nadiskubrehan sa ilang grupo. Dasiga ang mga sakop sa klase sa paghisgut kon giunsa niining espiritwal nga mga leksyon sa pagtabang nato nga mas mapaduol sa Manluluwas.

• Usa ka bililhon nga mensahe niini nga mga kapitulo mao nga ang Manluluwas nagtabang kanato uban sa gugma ug kalooy bisan sa higayon sa atong pinakalisud nga mga pagsulay. Pwede kang modapit sa mga sakop sa klase sa paghunahuna og usa ka tawo kinsa nagsinati og lisud nga higayon ug dayon siksika ang mga pulong sa Manluluwas diha sa 3 Nephi 9:13–22 ug 10:1–10 aron makapangita og hugpong sa mga pulong nga mahimong makatabang niana nga tawo. Tingali ang mga sakop sa klase mahimo usab nga mopaambit og personal nga mga kasinatian sa dihang ilang gibati nga ang Manluluwas nagtabang ngadto kanila.

3 Nephi 9:19–22

Ang Ginoo nagkinahanglan sa “masulub-on nga kasingkasing ug mahinulsulon nga espiritu.”

• Sa dili pa ang pag-anhi sa Manluluwas, ang mga matinud-anon sa gisaad nga yuta mituman sa balaod ni Moises, diin naglakip sa pagsakripisyo sa mga hayop. Aron sa pagtabang sa mga sakop sa klase nga mas masabtan kini nga balaod, pwede nimong iribyu sa makadiyot ang Moises 5:5–8. Nganong ang katawhan sa Dios gisugo sa pagsakripisyo og mga hayop kaniadto? Unsa nga bag-ong sugo ang gihatag sa Manluluwas diha sa 3 Nephi 9:20, ug giunsa niini sa pagpunting kanato padulong Kaniya ug sa Iyang sakripisyo? Ang mga kinutlo kabahin sa balaod sa sakripisyo diha sa “Dugang nga mga Kapanguhaan” makatabang.

• Unsaon kaha nimo sa pagtabang ang mga sakop sa klase nga masabtan unsa ang kahulugan sa pagbaton og masulub-on nga kasingkasing ug mahinulsulon nga espiritu? Tingali pwede nimong sugdan pinaagi sa pagsulat sa pisara sa mga pulong nga masulub-on, mahinulsulon, ug sakripisyo. Dayon mahimo nimong hangyoon ang mga sakop sa klase sa pagdrowing og mga hulagway nga nagrepresentar sa unsa ang buot ipasabut niini nga mga pulong ngadto nila o mosulat og mga pulong o hugpong sa mga pulong nga ilang isumpay niini nga mga termino. Samtang ang mga sakop sa klase mopaambit sa ilang mga hulagway, mga pulong, o hugpong sa mga pulong, mahimo nilang hisgutan kon sa unsang paagi nga kini may kalabutan sa unsay gihangyo sa Manluluwas kanato diha sa 3 Nephi 9:19–22. Ang kinutlo ni Elder D.Todd Christofferson diha sa “Dugang nga mga Kapanguhaan” mahimong makatabang usab.

3 Nephi 11:1–17

Si Jesukristo mao ang Kahayag sa Kalibutan.

• Ang mga panghitabo nga gihulagway diha sa 3 Nephi 11:1–17 usa sa mga pinakasagrado diha sa Basahon ni Mormon. Ikonsiderar ang pagtugot sa imong mga sakop sa klase og pipila ka gutlo aron basahon kini nga mga bersikulo diha sa kahilum. Tingali mosulat ka og pipila ka pangutana sa pisara aron ilang pamalandungan samtang sila magbasa, sama niini: Unsa kaha ang imong gibati kon usa ka niini nga katawhan? Unsa ang nakapadayeg nimo kabahin sa Manluluwas niini nga mga bersikulo? Unsa ang imong nakat-unan gikan sa ehemplo ni Jesus? o Unsa nga mga kasinatian ang naghatag kanimo sa pagsaksi ni Jesukristo ingon nga imong Manluluwas? Mahimo nimong tugutan ang mga sakop sa klase sa pagpaambit og pipila sa ilang mga gihunahuna o mga impresyon.

  Si Jesus nga nagpakita sa mga agi sa lansang sa Iyang mga kamot ngadto sa mga Nephite

  Tagsa-tagsa, ni Walter Rane

3 Nephi 11:10–41

Gitukod ni Jesukristo ang Iyang doktrina ug Iyang Simbahan.

• Siguro makatabang kon hisgutan ang unang mga butang nga gipili sa Manluluwas nga isulti ug himoon sa dihang Siya nagpakita didto sa yuta sa Bountiful. Siguro ang mga sakop sa klase mahimong momarka o mosulat sa mga kamatuoran nga ilang naila gikan sa mga pulong ug mga buhat sa Manluluwas diha sa 3 Nephi 11:10–41. Dapita sila sa pagpaambit kon unsa ang ilang nakit-an. Unsay imong nakat-unan mahitungod sa Manluluwas gikan niini nga mga bersikulo? Unsa man ang atong nakat-unan mahitungod sa Iyang Simbahan?

• Aron maundang na ang tataw nga panaglalis sa katawhan kalabut sa bunyag, ang Manluluwas mipadayag og importante nga mga kamatuoran mahitungod niini nga ordinansa diha sa 3 Nephi 11. Aron matabangan ang mga sakop sa klase nga madiskubrehan kini nga mga kamatuoran, mahimong isulat nimo ang mosunod nga mga numero sa bersikulo diha sa pisara: 21–25, 26–27, 33–34. Dapita ang matag sakop sa klase sa pagpili og usa o duha ka bersikulo ug mopakigbahin og kamatuoran nga gitudlo niini mahitungod sa bunyag.

pagkat-on nga icon

Awhaga ang Pagkat-on diha sa Panimalay

Ang imong klase tingali mainteresado nga makahibalo nga ang pagbisita sa Manluluwas ngadto sa mga Nephite ug mga Lamanite grabe og epekto ngadto nila nga kining kanhi nga mabingkilon nga katawhan nagpuyo diha sa kalinaw sa misunod nga 200 ka tuig (tan-awa sa 4 Nephi 1). Mahimong makadasig kini sa mga sakop sa klase sa pagtuon sa 3 Nephi 12–16 aron makakat-on unsa ang gitudlo sa Manluluwas sa katawhan nga posibling maoy hinungdan sa dako kaayo nga kausaban.

mga kapanguhaan nga icon

Dugang nga mga Kapanguhaan

Ang balaod sa sakripisyo.

Si Presidente M. Russell Ballard mipasabut og usa ka paagi nga atong gisunod ang balaod sa sakripisyo karon:

“Human sa katapusan nga sakripisyo sa Manluluwas, duha ka pagpasibo ang gihimo sa buhat sa [balaod sa sakripisyo]. Una, ang ordinansa sa sakramento mipuli sa ordinansa sa sakripisyo; ug ikaduha, kini nga kausaban mibalhin sa tumong sa gihimo nga sakripisyo gikan sa hayop nga giatiman sa tawo ngadto sa tawo mismo. Buot ipasabut, ang sakripisyo nausab gikan sa gihalad ngadto sa tighalad. …

“… Imbis ang Ginoo nagkinahanglan sa atong mga hayop o lugas, karon Siya gusto nga atong hunungon ang tanan nga dili diosnon. …

“… Kon atong mabuntog ang atong kaugalingong hinakog nga mga tinguha ug unahon ang Dios sa atong kinabuhi ug mopakigsaad nga moserbisyo Kaniya bisan unsa pa ang gikinahanglan nga paningkamot, niana nagsunod kita sa balaod sa sakripisyo” (“The Law of Sacrifice,” Ensign, Oct. 1998, 10).

Si Elder Neal A. Maxwell sa Korum sa Napulog Duha ka mga Apostoles miingon: “Ang tinuod, personal nga sakripisyo dili gayud mao ang pagbutang og usa ka hayop diha sa altar. Hinoon, mao kini ang kaandam sa pagbutang sa hayop nga ania kanato diha sa ibabaw sa altar ug pasagdan kini nga maugdaw!” (“Deny Yourselves of All Ungodliness,” Ensign, Mayo 1995, 68).

Usa ka masulub-on nga kasingkasing ug mahinulsulon nga espiritu.

Gihulagway ni Elder D. Todd Christofferson kon unsa ang gipasabut sa pagbaton og masulub-on nga kasingkasing ug mahinulsulon nga espiritu:

“Makahalad kamo ngadto sa Ginoo sa gasa sa inyong masulub-on, o mabasulon, nga kasingkasing ug sa inyong mahinulsulon o masulundon, nga espiritu. Sa tinuod, mao kini ang gasa sa inyong kaugalingon—kon unsa kamo ug kon unsa kamo mahimo sa umaabut.

“Aduna bay butang diha kaninyo o sa inyong kinabuhi nga dili putli o dili takus? Kon inyo kining wagtangon, kana maoy usa ka gasa ngadto sa Manluluwas. Aduna bay maayong batasan o kalidad nga kulang diha sa inyong kinabuhi? Kon inyo kining sagupon ug mohimo niini nga parte sa inyong kinaiya, naghatag kamo og gasa ngadto sa Ginoo” (”Kon Makabig na Kamo,” Liahona, Mayo 2004, 12).

Pagpalambo sa Atong Pagtudlo

Pakigtambayayong uban sa mga sakop sa pamilya. “Ang mga tawo nga adunay labing gamhanan nga impluwensya sa usa ka indibidwal—alang sa maayo o dautan—sa kasagaran mao kadtong anaa sa iyang panimalay. Tungod kay ang panimalay mao ang sentro sa pagpuyo ug pagkat-on sa ebanghelyo, ang imong mga paningkamot sa paglig-on sa usa ka sakop sa klase mahimong labing epektibo kon makigtambayayong ka sa … mga sakop sa pamilya” (Pagtudlo sumala sa Pamaagi sa Manluluwas, 8).