Si Jesus nga Nagtawag sa mga Apostoles

Ikatulo nga Nephi: Kining Napulog Duha Kinsa Akong Gipili ni Gary L. Kapp

Septyembre 21–27

3 Nephi 12–16

“Ako Mao ang Balaod, ug ang Kahayag”

Ang matag tawo sa imong klase posibling makakita og usa ka butang nga makahuluganon kanila sa talagsaong paagi taliwala sa daghang mga gamhanang pagtulun-an sa Manluluwas diha sa 3 Nephi 12–16. Awhaga ang mga sakop sa klase sa pagpaambit sa mga baruganan nga makahuluganon ngadto kanila.

Irekord ang Imong mga Impresyon

pagpaambit nga icon

Dapita ang Pagpaambit

Aron mahatagan ang tanan og kahigayunan nga makapaambit unsay ilang natun-an diha sa 3 Nephi 12–16, mahimo nimong isulat ang mga numero 12 hangtud 16 tabok sa pisara. Ang mga sakop sa klase mahimo dayon nga mosiksik og usa ka bersikulo niini nga mga kapitulo nga ilang nakita nga makahuluganon ug dayon isulat ang numero sa bersikulo ubos sa tukma nga numero sa kapitulo diha sa pisara. Pagpili og pipila ka bersikulo nga dunganon og basa, ug hisguti ngano nga kini makahuluganon.

pagtudlo nga icon

Itudlo ang Doktrina

3 Nephi 12–14

Ang mga pagtulun-an sa Manluluwas nagpakita kanato unsaon nga mahimong tinuod nga mga disipulo.

• Ang latid karong semanaha diha sa Dali, Sunod Kanako—Alang sa mga Indibidwal ug mga Pamilya nagsugyot nga i-summarize ang mga tudling diha sa 3 Nephi 12–14 aron makompleto ang hugpong sa mga pulong nga “Tinuod nga mga Disipulo ni Jesukristo …” Mahimo ka nga mangutana kon anaa bay bisan kinsa sa mga sakop sa klase kinsa mihimo niini nga kalihokan ang andam nga mopaambit kon unsay ilang nakat-unan. O mahimo nimong isulat ang dili kompleto nga hugpong sa mga pulong diha sa pisara, kauban sa mga pakisayran nga sama niini: 3 Nephi 12:3–16, 38–44; 13:1–8, 19–24; ug 14:21–27 (o ubang mga tudling nga imong nakit-an sa imong personal nga pagtuon). Ang mga sakop sa klase mahimong mopili og tudling nga basahon, sa indibidwal o sa mga grupo, ug magsugyot og usa ka paagi nga makompleto ang hugpong sa mga pulong diha sa pisara base sa kon unsa ang gitudlo niadto nga mga bersikulo. Awhaga ang mga sakop sa klase sa pagpamalandong ug tingali isulat kon unsa ang ilang buhaton aron mas matinuoron sa pagsunod ni Jesukristo tungod sa unsay ilang nakat-unan gikan niini nga mga bersikulo.

• Aron matabangan ang mga sakop sa klase nga masabtan ang mga pulong sa Manluluwas diha sa 3 Nephi 12:48, mahimo nimong dapiton ang usa o mas daghan pa nila sa pagtuon sa mensahe ni Elder Jeffrey R. Holland nga “Busa Kamo Kinahanglan Magmahingpit—Sa Katapusan” ( Liahona, Nob. 2017, 40–42) sa dili pa magklase ug mopaambit og mga panabut nga makatabang nila nga masabtan kini nga bersikulo.

3 Nephi 12:21–30

Ang atong mga hunahuna mopadulong ngadto sa mga binuhatan.

• Ang usa ka panaghisgutan sa 3 Nephi 12:21–30 mahimong makatabang sa mga sakop sa klase nga makita kon sa unsang paagi nga ang pagkontrol sa atong mga hunahuna makatabang nato nga makontrol ang atong mga binuhatan. Aron sa pagsugod og panaghisgutan, pwede ka nga mohimo og talaan sa pisara nga aduna sa mga ulohan nga sama sa Mga Buhat nga Gusto Natong Likayan ug Mga Hunahuna o Mga Emosyon nga Paingon Niini. Dayon mahimo nimong dapiton ang mga sakop sa klase sa pagsiksik sa 3 Nephi 12:21–22 ug 27–30 ug sugdan sa pagpuno ang talaan. Unsa ang uban nga mga buhat ug mga hunahuna nga ikapuno sa mga sakop sa klase ngadto sa mga listahan? Unsaon nato nga “dili motugot nga kini nga mga butang mosulod sa [atong] kasingkasing? (3 Nephi 12:29). Unsaon man nato kini pagpapahawa kon kini mosulod? Human mabasa ang tambag ni Presidente Ezra Taft Benson diha sa “Dugang nga mga Kapanguhaan,” pwede ka nga mohimo og bag-o nga talaan nga aduna sa mga ulohan nga Sama ni Kristo nga mga Buhat nga Gusto Nato nga Palambuon ug Mga Hunahuna Nga Naggiya ngadto Niini ug pun-a og sulat isip usa ka klase.

3 Nephi 13:1–8, 16–18

Ang atong pagsimba ug pagserbisyo kinahanglan nga himoon alang sa sakto nga mga rason.

• Ang pagtuon sa 3 Nephi 13 naghatag og kahigayunan alang sa mga sakop sa klase nga masuta ngano nga naghimo sila og maayo nga mga buhat. Aron sa pagsugod og panaghisgutan, mahimo mo nga magdungan og basa sa mga bersikulo 1–2 ug 16 ug mopaambit sa kahulugan sa mga maut: Tigpakaaron-ingnon; ang Griyego nga pulong [nga gigamit diha sa Bag-ong Tugon] nagpasabut og ‘artista sa entablado,’ o ‘usa ka tawo kinsa … sobra ra kaayo ang pag-arte sa iyang papel’” . Tingali usa o duha ka sakop sa klase ang malingaw nga magpakaaron-ingnon o moarte nga daw naghatag sila ngadto sa mga kabus o nagpuasa. Nganong ang pagpakaaron-ingnon o pag-arte usa ka maayo nga sumbingay alang sa pagkamaut? Unsaon nato sa pagsiguro nga ang atong pagserbisyo, pag-ampo, ug pagpuasa kinasingkasing ug walay sagol nga pagkamaut?

• Human matino ang mga maayong buhat nga gihisgutan diha sa 3 Nephi 13:1–8 ug 16–18, ang mga sakop sa klase mahimong maghisgut unsa ang mga katuyoan nga moawhag sa usa ka tawo sa paghimo niining mga butanga o uban pang mga butang nga gihangyo sa Dios nga atong buhaton. Unsa ang atong isulti sa usa ka tawo kinsa mangutana kanato ngano nga mobuhat kita og maayo nga mga butang? Awhaga ang mga sakop sa klase sa pagpamalandong sa ilang personal nga mga pag-aghat alang sa paghimo og maayong mga buhat nga sama niini. Unsaon nato sa pagpaputli sa atong mga katuyoan?

3 Nephi 14:7–11

Kon mangita kita og “maayo nga mga butang” gikan sa Langitnong Amahan, atong madawat.

• Aron masabtan ang pagdapit sa Ginoo sa pagpangayo, pagpangita, ug pagpanuktok, tingali makatabang ang pagsuhid unsa ang kahulugan niini nga mga pulong. Unsa ang gipasabut sa matag pulong kabahin sa unsa ang gidapit sa Ginoo nga atong buhaton? Unsaon nato sa pagpangayo, pagpangita, ug pagpanuktok? Sa unsang paagi nga ang mga saad diha sa 3 Nephi 14:7–8 natuman diha sa atong mga kinabuhi? Ang mga sakop sa klase mahimo usab nga moribyu sa tambag ni Presidente Russell M. Nelson diha sa “Dugang nga mga Kapanguhaan,” mangita sa iyang mga gipangutana ug sa mga pagdapit nga iyang gihatag. Hatagi ang mga sakop sa klase og higayon sa pagpamalandong ug pagsulat sa ilang mga tubag sa iyang mga pangutana ug ang ilang mga plano sa pagsunod sa iyang mga pagdapit.

• Ang ubang mga sakop sa klase tingali dili sigurado kabahin sa unsay buot ipasabut sa Manluluwas sa dihang Siya miingon, “Kay ang matag usa nga mangayo, makadawat” (3 Nephi 14:8). Ngano nga ang ubang mga pag-ampo mora og wala gayuy tubag, ug ngano nga usahay atong madawat ang mga tubag nga dili nato ganahan? Ang pagribyu sa pipila sa mosunod nga mga kasulatan isip usa ka klase mahimong makatabang sa pagtubag niini nga mga pangutana: Isaias 55:8–9; Helaman 10:4–5; 3 Nephi 18:20; ug Doktrina ug mga Pakigsaad 9:7–9; 88:64. Awhaga ang mga sakop sa klase sa pagpaambit kon unsay ilang nakit-an. Unsaon kaha niini nga mga panabut nga makaapekto sa paagi sa atong pag-ampo?

pagkat-on nga icon

Awhaga ang Pagkat-on diha sa Panimalay

Aron sa pagdasig sa mga sakop sa klase sa pagbasa sa 3 Nephi 17–19 sa balay, mahimo nimo silang dapiton sa paghanduraw kon unsa kaha ang bation nga madungog ang Manluluwas nga mag-ampo alang kanila ug sa ilang mga pamilya. Niini nga mga kapitulo ilang mabasa ang kabahin sa katawhan nga aduna niining balaan nga kasinatian.

mga kapanguhaan nga icon

Dugang nga mga Kapanguhaan

Mahimo natong ikontrol ang atong mga hunahuna.

Si Presidente Ezra Taft Benson nagtudlo:

“Ang hunahuna gipakisama sa usa ka entablado diin usa lang ka salida sa matag higayon ang mapahigayon. Sa usa ka kilid ang Ginoo, kinsa nahigugma kanimo, naningkamot sa pagbutang diha sa entablado sa imong hunahuna nianang unsay makapanalangin nimo. Sa pikas kilid ang dautan, kinsa nasuko nimo, naningkamot sa pagbutang diha sa entablado sa imong hunahuna nianang unsay makapanghimaraut nimo.

“Ikaw mao ang tigdumala sa entablado—ikaw mao ang magdesisyon kon unsa nga hunahuna ang mookupar sa entablado. … Ikaw mahimo kon unsay imong gihunahuna—unsay imong kanunay nga gitugutan nga mookupar sa entablado sa imong hunahuna. …

“Kon ang mga hunahuna mohimo kanato kon unsa kita, ug kita kinahanglan nga mahisama ni Kristo, kinahanglan maghunahuna kita og sama ni Kristo nga mga hunahuna” (“Think on Christ,” Ensign, Abr. 1984, 10–11).

Ang Dios gusto nga makigsulti kaninyo.

Si Presidente Russell M. Nelson miingon:

“Unsa ang maabli diha kaninyo sa inyong pagpangita? Unsa nga kaalam ang kulang kaninyo? Unsa ang inyong gibati nga maoy dinaliang panginahanglan nga mahibaloan o masabtan? Sunda ang ehemplo ni Propeta Joseph. Pangita ug mingaw nga lugar diin kamo kanunay makaadto. Ipaubos ang inyong kaugalingon atubangan sa Dios. Ibubo ang inyong kasingkasing ngadto sa inyong Langitnong Amahan. Dangop Kaniya alang sa mga tubag ug alang sa kahupayan.

“Pag-ampo sa ngalan ni Jesukristo bahin sa inyong mga kabalaka, inyong mga kahadlok, inyong mga kahuyang—o, ang mga tinguha sa inyong kasingkasing. Ug dayon maminaw! Isulat ang mga ideya nga masulod sa inyong hunahuna. Isulat ang inyong mga gibati ug sundi kini sa paglihok sa unsay giaghat nga angay ninyong buhaton. …

“Ang Dios buot ba gayud makigsulti kaninyo? Oo! … Giawhag ko kamo nga palapdan pa ang inyong kasamtangang espiritwal nga abilidad sa pagdawat og personal nga pagpadayag. …

“O, aduna pay daghang gusto sa inyong Amahan sa Langit nga inyong mahibaloan” (“Pagpadayag alang sa Simbahan, Pagpadayag alang sa atong mga Kinabuhi,” Liahona, Mayo 2018, 95).

Pagpalambo sa Atong Pagtudlo

Tabangi ang mga tigkat-on sa pagbayaw sa usag usa. “Ang matag indibidwal sa imong klase usa ka abunda nga tinubdan sa pagpamatuod, mga panabut, ug mga kasinatian sa pagsunod sa ebanghelyo. Dapita sila sa pagpakigbahin ug pagbayaw sa usag usa” (Pagtudlo sumala sa Pamaagi sa Manluluwas, 5).