Si Jesus nagpakita sa mga Nephite

Ang Kahayag sa Iyang Pamay-ong Midan-ag diha Kanila, ni Gary L. Kapp

Septyembre 28–Oktubre 11

3 Nephi 17–19

“Tan-awa, ang Akong Hingpit nga Kalipay Nabug-os”

Ang imong pagpangandam sa pagtudlo kinahanglan magsugod sa imong personal nga pagtuon sa mga kasulatan. Ang Dali, Sunod Kanako—Alang sa mga Indibidwal ug mga Pamilya makadugang sa imong gitun-an, ug kini nga latid makahatag usab nimo og mga ideya nga motabang nimo nga makaandam.

Irekord ang Imong mga Impresyon

pagpaambit nga icon

Dapita ang Pagpaambit

Diha sa 3 Nephi 17:1–3, ang Manluluwas midapit sa katawhan sa pagpauli ngadto sa ilang mga panimalay ug “iandam ang [ilang] mga hunahuna” sa dili pa mobalik aron matudloan pag-usab. Tingali imong pangutan-on ang imong mga estudyante giunsa nila pagpangandam alang sa hisgutanan karon ug unsa ang ilang gipamalandungan.

pagtudlo nga icon

Itudlo ang Doktrina

3 Nephi 17; 18:24–25, 28–32

Ang Manluluwas maoy atong hingpit nga ehemplo sa pagpangalagad.

• Kitang tanan adunay mga kahigayunan sa pagpangalagad sa uban, ug pwede kita nga mahimong mas maayo niini. Usa ka paagi sa pagkat-on gikan sa ehemplo sa Manluluwas sa pagpangalagad mao ang pagbasa sa 3 Nephi 17 isip usa ka klase ug pagdapit sa mga sakop sa klase sa pagkomento sa matag higayon nga sila makakita og usa ka butang nga nagtudlo nila kabahin sa pagpangalagad. Unsa ang atong nakat-unan kabahin sa kinaiya sa Manluluwas nga naghimo Niya nga dako nga ehemplo sa pagpangalagad? Unsa nga mga kamatuoran ang atong makat-unan kabahin sa pagpangalagad gikan sa ehemplo sa Manluluwas? Mahimo usab ka nga mangita og dugang nga mga panabut diha sa 3 Nephi 18:24–25 ug 28–32. Ang mga sakop sa klase mahimo dayon nga maghisgut og piho nga mga butang nga sila mibati og kadasig sa paghimo aron sa pagsunod sa ehemplo sa Manluluwas sa pagpangalagad.

  Si Jesus nga mipanalangin sa mga batang Nephite

  Tan-awa ang Inyong Gagmay nga mga Bata, ni Gary L. Kapp

3 Nephi 17:13–22; 18:15–25; 19:6–9, 15–36

Gitudloan kita sa Manluluwas kon unsaon sa pag-ampo.

• Aron matabangan ang mga sakop sa klase sa pagkat-on gikan sa daghan nga mga ehemplo ug mga pagtulun-an kabahin sa pag-ampo diha sa 3 Nephi 17–19, mahimo ka nga mosulat sa pisara og Kinsa? Giunsa? Kanus-a? ug Ngano? ug dapita ang klase sa pagpangita og mga tubag niini nga mga pangutana nga may kalabutan sa pag-ampo diha sa mosunod nga mga bersikulo: 3 Nephi 17:13–22; 18:15–25; ug 19:6–9, 15–36. Unsa ang ubang mga panabut nga nakuha sa mga sakop sa klase samtang sila mibasa niini nga mga bersikulo? Ang pamahayag ni Elder Richard G. Scott diha sa “Dugang nga mga Kapanguhaan” mahimong makadugang niining panaghisgutan. Mahimo usab ka nga modapit sa mga sakop sa klase sa pagpaambit kon unsa ang ilang gibuhat aron mahimong mas makahuluganon ang ilang personal ug pamilya nga mga pag-ampo (tan-awa sa 3 Nephi 18:18–21).

• Ang latid karong semanaha diha sa Dali, sunod Kanako—Alang sa mga Indibidwal ug mga Pamilya nagsugyot og mga pangutana nga pamalandungan kabahin sa pag-ampo samtang magbasa niini nga mga bersikulo. Mahimo nimong hangyoon ang mga sakop sa klase sa pagpaambit og bisan unsa nga mga panabut nga naa nila kabahin niini nga mga pangutana. O mahimo ka nga modapit og pipila ka sakop sa klase sa pag-anha sa klase nga andam sa paghisgut og usa ka butang nga ilang nakat-unan kabahin sa pag-ampo gikan sa 3 Nephi 17–19. Unsa ang nakadasig nila nga buhaton aron mas mahimong makahuluganon ang ilang mga pag-ampo?

• Si Jesus nagtudlo ngano nga kinahanglan kita nga mag-ampo kanunay (tan-awa sa 3 Nephi 18:15–18). Ang pagtudlo nga maggamit og makita nga butang mahimong makatabang sa imong klase nga masabtan unsa ang Iyang gitudlo. Pananglitan, tingali imong pun-on og tubig ang usa ka sudlanan aron sa pagrepresentar sa impluwensya ni Satanas. Pagsuksok og tissue (nga nagrepresentar nato) nga gitarung og butang diha sa lubot sa tasa (nga nagrepresentar sa kanunay nga pag-ampo). Ituwad ang tasa, ug iduot kini pasulod ngadto sa ubos sa sudlanan sa tubig. Ang tissue dapat magpabilin nga uga diha sa ilawom sa tasa bisan og giliyukan kini sa tubig. Unsa ang gitudlo niini nga leksyon ug sa 3 Nephi 18:15–18 kanato kabahin sa pag-ampo? (tan-awa usab sa D&P 10:5). Unsa ang gipasabut sa “mag-ampo sa kanunay”? Sa unsang paagi nga ang pag-ampo makatabang nato nga mabatukan ang impluwensya ni Satanas? Ikonsiderar ang pagtugot sa mga sakop sa klase og pipila ka gutlo nga isulat ang unsay gibati nila nga maayong buhaton aron mapalambo ang ilang pag-ampo.

3 Nephi 18:1–12

Mahimo kita nga mabusog sa espirituhanong paagi samtang moambit kita sa sakrament.

• Aron sa pagsugod og panaghisgutan kabahin sa mga pagtulun-an sa Manluluwas mahitungod sa sakramento diha sa 3 Nephi 18; mahimo nimong bahinon ang imong klase ngadto sa mga grupo ug hatagi ang matag grupo og usa sa mosunod nga mga kasulatan aron basahon ug hisgutan: Mateo 26:26–28; 3 Nephi 18:1–12; Doktrina ug mga Pakigsaad 20:75–79; 27:1–4. Human mabasa ang gihatag nila nga tudling, ang matag grupo mahimong maghunahuna og usa o duha ka pangutana kabahin sa sakramento nga natubag sa mga bersikulo nga ilang gibasa ug isulat ang ilang mga pangutana sa pisara. Dayon ang uban diha sa klase mahimong mosiksik sa mga kasulatan alang sa mga tubag sa mga pangutana. Ang mga sakop sa klase mahimo usab nga maghisgut kon unsaon nila nga adunay mas makahuluganon nga kasinatian sa pag-ambit sa sakramento.

• Unsa ang buot ipasabut sa mahimong “busog” samtang kita moambit sa sakramento? (tan-awa sa 3 Nephi 18:4–5, 9; 20:9). Ikonsiderar ang pagdapit sa mga sakop sa klase sa paghisgut niining pangutana nga magpares samtang sila magbasa sa 3 Nephi 18:1–12 og dungan. Mahimo usab nimong dapiton ang mga sakop sa klase sa pagpamalandong sa katapusang higayon nga sila mibati nga “busog” sa espirituhanong paagi sa dihang miambit sa sakramento. Siguro ilang hisgutan ang mga butang nga tingali makapugong o makasamok nato gikan sa pagkahimong “busog” pinaagi sa sakramento ug mopaambit og mga ideya kabahin sa unsaon pagbuntog kadto nga mga babag.

3 Nephi 19:9–15, 20–22

Ang mga disipulo ni Jesukristo mangita sa gasa sa Espiritu Santo.

• Ikonsiderar ang paghangyo sa mga sakop sa klase sa paghunahuna og usa ka butang nga gusto kaayo nila. Unsay andam nilang buhaton aron madawat kini? Mahimo kining mopadulong sa usa ka panaghisgutan kabahin sa unsa ang “labing gitinguha,” sa napulog duha ka mga apostoles sumala sa gihulagway diha sa 3 Nephi 19:9–15 ug 20–22. Ngano kaha nga nahimo man kining importante kaayo ngadto kanila? Ngano nga importante kini kanato? Sumala niini nga mga bersikulo, unsaon nato nga maikagong mangita sa pagpakig-uban sa Espiritu Santo?

pagkat-on nga icon

Awhaga ang Pagkat-on diha sa Panimalay

Ang Ginoo miingon, “Mahinungdanon ang mga pulong ni Isaias” (3 Nephi 23:1). Aron maawhag ang mga sakop sa klase sa pagbasa sa 3 Nephi 20–26, mahimo nimo silang sultihan nga niini nga mga kapitulo, si Jesus mipasabut sa pipila ka “mahinungdanon” nga mga pulong ni Isaias. Dapita ang mga sakop sa klase sa pagpamalandong ngano nga kini nga mga pulong ni Isaias mahinungdanon. Awhaga sila nga moabut sunod Dominggo nga andam sa pagpaambit unsa ang ilang nakat-unan.

mga kapanguhaan nga icon

Dugang nga mga Kapanguhaan

Ang bili sa pag-ampo.

Si Elder Richard G. Scott mipamatuod bahin sa bili sa pag-ampo:

“Mag-ampo kita sa atong Langitnong Amahan sa sagradong ngalan sa Iyang Pinalanggang Anak, si Jesukristo. Ang pag-ampo labing epektibo kon kita magtinguhang malimpyo ug masulundon, uban sa angay nga motibo, ug andam mobuhat sa Iyang sugo. Ang mapainubsanon, masaligon nga pag-ampo naghatag og direksyon ug kalinaw.

“Ayaw kaguol sa inyong kanga-kanga nga pagpahayag sa pagbati. Pakigsulti lang sa inyong manggiloy-on, masinabtanong Amahan. Kamo bililhon Kaniya nga anak nga Iyang gipangga sa hingpit ug gusto Niya nga tabangan. Sa inyong pag-ampo, timan-i nga ang Amahan sa Langit duol ra ug Siya naminaw.

“Ang yawe sa maayo nga pag-ampo mao ang pagkat-on sa paghimo og husto nga mga pangutana. Hunahunaa nga ilisan ang pamaagi gikan sa pagpangayo sa mga butang nga imong gusto ngadto sa tinud-anayng pagsiksik unsa ang Iyang gusto para kaninyo. Dayon kon kamo masayud sa Iyang gusto, pag-ampo nga kamo giyahan nga makaangkon og kusog sa pagtuman niini.

“Kon kamo mobati nga nahilayo gikan sa atong Amahan, tingali tungod kini sa daghang rason. Bisan unsang hinungdan, sa inyong padayon nga pagpangayo og tabang, mogiya Siya kaninyo nga mohimo niana nga makapabalik sa inyong pagsalig nga Siya duol ra. Pag-ampo bisan kon wala kamoy tinguha sa pag-ampo. Usahay, sama sa bata, magperwisyo kamo ug abi ninyo og dili kamo makaduol sa inyong Amahan kon adunay problema. Mao hinoon kana nga labing gikinahanglan ninyo nga mag-ampo. Ayaw hunahunaa nga dili gayud kamo takus nga mag-ampo.

“Naghunahuna ako kon ato ba gayud nga masabtan ang tugub nga gahum sa pag-ampo hangtud atong masugatan ang sobra ka dagko, kalit nga problema ug makaamgo nga kita walay gahum sa pagsulbad niini. Diha molingi kita sa atong Amahan sa mapainubsanong pag-ila sa atong hingpit nga pagkinahanglan Kaniya. Makatabang ang pagpangita og tago nga dapit diin ang atong mga pagbati dayag nga mapahayag sa walay pagpugong ug ingon ka dako sa panginahanglan” (“Ang Paggamit sa Langitnon nga Gasa sa Pag-ampo,” Liahona, Mayo 2007, 8).

Pagpalambo sa Atong Pagtudlo

Paningkamot alang sa Kristohanon nga paghigugma. Kon adunay sakop sa imong klase nga nanginahanglan og pagpakigdait, ikonsiderar unsaon nimo pagtabang kaniya nga mobati nga apil sa klase. Pananglitan, tingali modapit ka og lain nga sakop sa klase sa paglingkod tupad niini nga tawo ug makighigala kaniya.