Si Jesus nga Nag-ampo kauban sa mga Nephite

Pag-ampo ni Kristo, ni Derek Hegsted

Oktubre 19–25

3 Nephi 27–4 Nephi

“Wala Nay mga Katawhan nga Labaw Pa ka Malipayon”

Ang personal nga pagtuon sa 3 Nephi 27–4 Nephi mao ang pinakamaayo nga paagi sa pag-andam sa pagtudlo. Ang mga doktrina ug mga ideya niini nga gilatid mahimong makatabang nimo nga makatubag sa espirituhanong mga pag-aghat nga imong madawat samtang ikaw nagtuon.

Irekord ang Imong mga Impresyon

pagpaambit nga icon

Dapita ang Pagpaambit

Usa sa mga paagi sa pag-awhag sa mga sakop sa klase sa pagpaambit og mga panabut gikan sa ilang personal nga pagtuon mao ang pagdapit nila sa pagpangita og himno nga may kalabutan sa kamatuoran nga ilang nakat-unan diha sa 3 Nephi 27–4 Nephi. Mahimo dayon sila nga mopaambit og mga himno nga ilang nakit-an ug sa unsang paagi nga kini nga mga himno may kalabutan sa mga kamatuoran sa kasulatan.

pagtudlo nga icon

Itudlo ang Doktrina

3 Nephi 27:1–22

Ang Simbahan ni Jesukristo gitawag diha sa Iyang pangalan ug gitukod diha sa Iyang ebanghelyo.

• Ang paghisgut sa pangalan sa Simbahan tingali makapalambo sa pagpasalamat sa imong mga sakop sa klase sa ilang pagkahimong miyembro sa Ang Simbahan ni Jesukristo sa mga Santos sa Ulahing mga Adlaw. Ikonsiderar ang pagdapit sa mga sakop sa klase sa paglista og mga pangalan sa nagkadaiyang mga organisasyon ug ihulagway unsa ang gisulti kanato sa mga pangalan kabahin niana nga mga organisasyon. Dayon ang mga sakop sa klase mahimong mobasa sa 3 Nephi 27:1–12, mangita kon unsa ang gitudlo sa Manluluwas kabahin sa pangalan sa Iyang Simbahan. Mahimo usab sila nga mopaambit kon unsa ang kahulugan nganha kanila nga mahimong miyembro sa Simbahan ni Kristo. Unsay buot ipasabut sa pagdala sa Iyang pangalan nganha sa atong mga kaugalingon?

• Aniay laing paagi sa paghisgut sa kamahinungdanon sa pangalan sa Simbahan sa Manluluwas. Human sa usa ka panaghisgutan sa mga kamatuoran nga makita sa 3 Nephi 27:1–22, mahimo nimong isulat ang tibuok nga pangalan sa Simbahan diha sa pisara. Dayon ang mga sakop sa klase mahimong mopili og mga pulong diha sa pangalan ug mosugyot kon sa unsang paagi nga ang matag pulong makatabang nato sa pagkahibalo kon kinsa kita o unsa ang atong gituohan. Ang pamahayag ni Presidente M. Russell Ballard diha sa “Dugang nga mga Kapanguhaan” mahimong makatabang. Nganong importante man ang paggamit sa pangalan sa Simbahan samtang mopaambit kita sa atong mga gituohan ngadto sa uban?

• Human ipasabut nga ang Iyang Simbahan kinahanglan nga “natukod diha sa [Iyang] ebanghelyo” (3 Nephi 27:10), ang Manluluwas mihulagway kon unsa ang Iyang ebanghelyo. Tingali imong dapiton ang mga sakop sa klase sa pagpaambit kon unsaon kaha nila sa pagpasabut ngadto sa usa ka higala unsa ang ebanghelyo. Dayon mahimo nimo silang dapiton sa pagsiksik sa 3 Nephi 27:13–22, mangita kon giunsa sa paghatag og kahulugan sa Manluluwas ang Iyang ebanghelyo. Unsaon nato sa pag-summarize unsa ang gisulti sa Manluluwas? Samtang atong tun-an ang kahulugan sa Manluluwas sa ebanghelyo, unsa nga mga panabut ang atong makuha kabahin kon unsaon nato pagsunod sa ebanghelyo diha sa atong inadlaw-adlaw nga mga kinabuhi?

3 Nephi 29–30

Ang Basahon ni Mormon usa ka timailhan nga ang gimbuhaton sa Dios sa ulahing mga adlaw natuman na.

• Tingali makasugod ka og panaghisgutan kabahin sa 3 Nephi 29–30 pinaagi sa pag-istorya kabahin sa mga timailhan. Pananglitan, ang mga sakop sa klase makangalan og mga timailhan nga nagpahibalo nato nga dunay umaabut nga bagyo o nga ang mga panahon nag-usab-usab. Dayon mahimo nilang basahon ang 3 Nephi 29:1–3 aron makat-on unsa ang gitimaan sa pag-abut sa Basahon ni Mormon, diin gitawag ni Mormon og “kini nga mga pamahayag” (tan-awa usab sa 3 Nephi 21:1–7). Unsa nga mensahe ang gihatag sa Ginoo diha sa 3 Nephi 29:4–9 ngadto niadtong kinsa “motamay” o “molimud” sa buhat sa Dios sa ulahing mga adlaw? Sa unsang paagi nga ang pagbasa sa Basahon ni Mormon kada adlaw mopalig-on sa atong pagtuo niadtong mga butang nga “gitamay” o “gilimud” sa ubang mga tawo sa atong panahon? Tingali gusto nimo nga dapiton ang mga sakop sa klase sa pagbasa sa pagdapit sa Ginoo diha sa 3 Nephi 30 ug ipaambit kon giunsa sa Basahon ni Mormon sa pagtabang nila nga modawat niini nga pagdapit.

4 Nephi

Ang pagkakabig ngadto ni Jesukristo ug sa Iyang ebanghelyo moresulta sa panaghiusa ug kalipay.

• Ang asoy diha sa 4 Nephi naghulagway sa hingpit nga kalipay nga moabut sa atong mga kinabuhi—isip mga indibidwal, isip mga pamilya, ug isip usa ka ward o stake—samtang kita naningkamot nga mas tiunay nga nakabig ngadto ni Jesukristo. Ikonsiderar ang paghangyo sa mga sakop sa klase sa pagsiksik sa 4 Nephi 1:1–18 ug isulat diha sa pisara ang mga panalangin nga miabut ngadto sa katawhan sa dihang silang tanan nakabig ngadto sa Ginoo. Sa unsang paagi nga ang ilang pagkakabig nakaapekto kon giunsa nila pagtratar ang usag usa? Tingali ang mga sakop sa klase makapaambit kon sa unsang paagi nga ang ebanghelyo nakadala og susama nga mga panalangin ngadto sa ilang mga pamilya o sa ilang ward. Aron matabangan ang mga sakop sa klase nga makasabut kon unsaon sa matag usa kanato nga mopuyo nga mas sama sa katawhan diha sa 4 Nephi ug unsaon nato sa pag-awhag og mas dako nga panaghiusa ug kalipay niadtong mga anaa sa atong palibut, mahimo nimong basahon ang pamahayag ni Elder D. Todd Christofferson diha sa “Dugang nga mga Kapanguhaan.” Ang mga sakop sa klase mahimong motimbang-timbang sa ilang personal nga mga paningkamot diha sa tulo ka dapit nga gihulagway ni Elder Christofferson.

• Ang katawhan sa Basahon ni Mormon miila sa ilang mga kaugalingon isip mga Nephite ug mga Lamanite—ug daghan pang ubang mga “-ite”—sa mga siglo, apan human sa pangalagad sa Manluluwas taliwala kanila, kini nga paglain-lain nawagtang. Human mabasa ang 4 Nephi 1:17 og dungan, tingali ang mga sakop sa klase makapaambit sa ilang mga hunahuna kabahin sa unsa nga mga klase sa mga “-ite” o mga grupo ang anaa sa atong katilingban karon. Unsa ang atong mahimo aron mabuntog ang mao nga mga pagkabahin-bahin ug tinuoray nga mahimong “nagkahiusa, mga anak ni Kristo”? (bersikulo 17).

• Unsa ang makat-unan sa mga sakop sa klase gikan sa pagkunhod sa katilingban sa Zion nga gihulagway diha sa 4 Nephi? Mahimo nimo silang dapiton sa pagsiksik sa 4 Nephi 1:19–34, mangita kon unsay mitapos sa kalipay ug panaghiusa nga nasinati sa katawhan sa hapit 200 ka tuig human sa pagbisita sa Manluluwas. Unsa nga mga kamatuoran diha niini nga mga bersikulo ang makatabang nato nga matino ang mga kinaiya ug mga linihukan nga kinahanglan nga usbon diha sa atong mga kinabuhi ug diha sa atong katilingban?

pagkat-on nga icon

Awhaga ang Pagkat-on diha sa Panimalay

Ang Mormon 1–6 naghulagway sa masulub-on nga mga panghitabo nga mipaingon sa pagkalaglag sa katawhan nga Nephite. Aron sa pag-awhag sa mga sakop sa klase sa pagbasa niini nga mga kapitulo, dapita sila sa pagpangita sa mga butang nga ilang nabantayan kabahin sa mga Nephite nga atong nakita nga nanghitabo sa atong panahon.

mga kapanguhaan nga icon

Dugang nga mga Kapanguhaan

Ang pangalan sa Simbahan ni Kristo.

Si Presidente M. Russell Ballard miingon:

“Naghunahuna ako sa makadaghan nganong ang Manluluwas mihatag sa siyam ka pulong nga pangalan ngadto sa Iyang gipahiuli nga Simbahan. Kini ingon og taas, apan kon atong hunahunaon kini isip usa ka paghulagway sa kinatibuk-ang pagsabut kon unsa ang Simbahan, kini sa laktod mahimo sa katingalahang paagi nga mubo, klaro, ug diretso. Unsa pa nga paghulagway ang mas direkta ug klaro ug gani gipahayag sa ingon ka diyutay nga mga pulong?

“Ang matag pulong naghatag og katin-awan ug gikinahanglan kaayo. Ang pulong nga Ang nagpasabut sa pagkatalagsaon nga kahimtang sa gipahiuli nga Simbahan taliwala sa mga relihiyon sa kalibutan.

“Ang mga pulong nga Simbahan ni Jesukristo nagpahayag nga kini Iyang Simbahan [tan-awa sa 3 Nephi 27:8]. .…

Sa Ulahing mga Adlaw nagpasabut nga pareho ra kini nga Simbahan sa Simbahan nga gitukod ni Jesukristo atol sa Iyang mortal nga pangalagad apan gipahiuli niining ulahing mga adlaw. Nahibalo kita nga adunay usa ka pagsupil, o apostasiya, nga gikinahanglan sa pagpahiuli sa Iyang tinuod ug hingpit nga Simbahan sa atong panahon.

“Ang mga Santos nagpasabut nga ang mga miyembro niini nagsunod Kaniya ug naningkamot sa paghimo sa Iyang kabubut-on, pagsunod sa Iyang mga sugo, ug sa makausa pa sa pagpangandam nga makapuyo uban Kaniya ug sa atong Langitnong Amahan sa umaabut. Ang Santos dayag nga mao kadtong naningkamot sa paghimo sa ilang kinabuhi nga balaan pinaagi sa pagpakigsaad sa pagsunod kang Kristo” (“Ang Importansya sa Pangalan,” Liahona,Nob. 2011, 80).

Unsa ang gikinahanglan aron matukod ang Zion?

Si Elder D. Todd Christofferson mitudlo: “Ang Zion usa ka Zion tungod sa pamatasan, hiyas, ug pagkamatinud-anon sa iyang mga lumulupyo [tan-awa sa Moises 7:18]. … Kon atong itukod ang Zion diha sa atong mga panimalay, mga branch, mga ward, ug mga stake, kinahanglan atong barugan kini nga sumbanan. Gikinahanglan nga (1) mahimong maghiusa sa usa ka kasingkasing ug usa ka hunahuna, (2) aron mamahimo, sa tinagsa ug sa dinaghan, nga usa ka balaan nga katawhan, ug (3) moatiman alang sa mga timawa ug nagkinahanglan uban sa ingon ka epektibo nga atong wad-on ang kakabus taliwala kanato. Dili kita makahulat nga ang Zion moabut nga kining mga butanga mahitabo—ang Zion moabut lamang kon kini mahitabo” (“Dali na Diri sa Zion,” Liahona, Nob. 2008, 38).

Pagpalambo sa Atong Pagtudlo

Paggamit og lahi-lahing mga pamaagi. Mahimong sayon ra nga makomportable sa usa ka partikular nga estilo sa pagtudlo, apan ang lain-laing mga pamaagi sa pagtudlo makatabang sa lain-laing mga sakop sa klase. Hunahunaa ang mga pamaagi nga imong gigamit bag-ohay lang—migamit ka ba og mga sugilanon, mga leksyon nga naggamit og mga butang, mga hulagway, ug uban pa? (tan-awa sa Pagtudlo sumala sa Pamaagi sa Manluluwas, 7).