Si Kristo nagpakita sa mga Nephite

Paghulagway ni Kristo nga nagpakita sa mga Nephite ni Andrew Bosley

Oktubre 12–18

3 Nephi 20–26

“Kamo Ang mga Anak sa Pakigsaad”

Tuguti ang Espiritu nga mogiya sa imong pagtuon sa 3 Nephi 20–26. Siya motabang nimo sa pagtino sa mga baruganan nga makahuluganon ngadto sa mga tawo nga imong tudloan.

Irekord ang Imong mga Impresyon

pagpaambit nga icon

Dapita ang Pagpaambit

Human mabasa og dungan ang mga pulong sa Manluluwas diha sa 3 Nephi 23:1, mahimo ka nga mangutana sa mga sakop sa klase kon unsa ang ilang nasiksik samtang sila mibasa sa mga kasulatan karong semanaha. Unsa ang ilang nakit-an?

pagtudlo nga icon

Itudlo ang Doktrina

3 Nephi 20:25–41; 21:9–11, 22–29

Sa ulahing mga adlaw, ang Dios mohimo og usa ka mahinungdanon ug kahibulongan nga buhat.

• Ang Manluluwas nagsulti kabahin sa “usa ka mahinungdanon ug usa ka kahibulongan nga buhat” (3 Nephi 21:9) nga buhaton sa Iyang Amahan sa ulahing mga adlaw. Tingali ang mga sakop sa klase makapaambit kon unsay ilang nakat-unan kabahin niana nga buhat samtang sila nagtuon niini nga mga kapitulo sa balay. Ang mga pangutana nga sama niini makatabang sa pagsugod og panaghisgutan: Unsa ang gisulti sa Manluluwas nga mahitabo sa umaabut nga adlaw? (tan-awa ilabi na ang 3 Nephi 20:30–32, 39–41; 21:22–29). Nganong Iya man nga tawagon kining mga butanga og “mahinungdanon“ ug “kahibulongan”? Unsa nga ebidensya ang atong nakita nga kini nga buhat nahitabo? Unsaon man nato sa pag-apil niini?

• Aron matabangan ang mga sakop sa klase nga makita kon giunsa sa Propeta nga si Joseph Smith sa pagtabang nga matuman ang mahinungdanon ug kahibulongan nga buhat sa Ginoo, mahimo ka nga mopakita og hulagway sa Propeta ug dapita ang klase sa pagbasa sa 3 Nephi 21:9–11, nga mangita sa mga pulong ug hugpong sa mga pulong nga mopahinumdom nila sa kinabuhi ug pangalagad ni Joseph Smith. Pananglitan, giunsa sa Ginoo “[pag]hatag ngadto kaniya sa gahum nga siya modala [sa ebanghelyo] ngadto sa mga Hentil”? (bersikulo 11). Nganong importante man nga mahibalo nga ang pangalagad ni Joseph Smith gitagna na daan sa Manluluwas? (tan-awa usab sa 2 Nephi 3).

• Mahimo usab ka nga makatabang sa mga sakop sa klase nga makita ang ilang mga kaugalingon diha sa mahinungdanon nga buhat nga gipanagna diha niini nga mga kapitulo pinaagi sa pagbasa og dungan sa 3 Nephi 20:25–27. Kon kinahanglan, pwede nimong ipasabut nga kon kita mohimo og mga pakigsaad kauban sa Ginoo, mahimo kita nga binhi ni Abraham. Unsaon nato isip mga kaliwat ni Abraham sa pagpanalangin sa “tanan nga mga kaliwatan sa yuta”? (bersikulo 25). Ang mga sakop sa klase mahimong mamalandong niini nga pangutana samtang sila mobasa sa pamahayag ni Presidente Russell M. Nelson diha sa “Dugang nga mga Kapanguhaan” ug mopaambit sa ilang mga hunahuna.

3 Nephi 23; 26:1–12

Gusto sa Ginoo nga kita mosiksik sa mga kasulatan.

• Unsa ang gipakita sa mga inter-aksyon sa Manluluwas sa mga Nephite kabahin sa paagi nga Siya mibati mahitungod sa kasulatan? Aron matabangan ang mga sakop sa klase nga makahibalo, mahimo nimong hangyuon ang katunga nila nga basahon ang 3 Nephi 23 ug ang laing katunga sa pagbasa sa 3 Nephi 26:1–12; dayon mahimo silang magpaambit sa usag usa kon unsa ang ilang nakita. Mahimo usab sila nga mopaambit sa ilang mga ideya kabahin sa unsaon sa pagpakita sa Ginoo nga ang mga kasulatan importante kanato. Pananglitan, unsa ang kalainan tali sa pagsiksik sa mga kasulatan ug ang yano lang nga pagbasa niini? (tan-awa sa 3 Nephi 23:1).

3 Nephi 24:1–6

Ang Ginoo sama sa kalayo sa magtutunaw.

• Ang biswal nga mga gamit tingali makapalambo sa inyong panaghisgutan sa 3 Nephi 24:1–6. Pananglitan, mahimo ka nga magpakita og pilak nga sensilyo o pipila ka sabon samtang ang mga sakop sa klase mobasa sa mga bersikulo aron makahibalo kon sa unsang paagi nga kining mga butanga may kalabutan ngadto sa Manluluwas ug sa Iyang misyon. Mahimo usab ka nga mopaambit uban sa klase sa pagpasabut kabahin sa pagtunaw og pilak ug sabon sa tiglaba diha sa “Dugang nga mga Kapanguhaan.” Sa unsang paagi nga ang Ginoo “sama sa kalayo sa magtutunaw, ug sama sa sabon sa tiglaba”? (bersikulo 2). Unsa ang gitudlo kanato niini nga mga ehemplo kon sa unsang paagi nga kita pagaputlion sa Manluluwas?

3 Nephi 24:7–18

Ang Dios maloloy-on kaayo niadtong kinsa mobalik ngadto Kaniya.

• Mahimo nimong ipasabut nga ang mga pagtulun-an kabahin sa ikapulo diha sa 3 Nephi 24:8–12 maoy tubag sa pangutana diha sa bersikulo 7: “Asa-kami mobalik [ngadto sa Ginoo]?” Unsa ang kalabutan tali sa “[pagbalik] ngadto [sa Ginoo]” ug pagbayad og ikapulo? Ang mga sakop sa klase mahimong mopaambit kon giunsa nila sa pagkadawat sa mga panalangin nga gilista diha sa mga bersikulo 10–12 samtang sila mibayad og ikapulo. Sa unsang paagi nga kini nga mga kamatuoran makatabang og maayo sa usa ka tawo kinsa nanlimbasug sa pagbayad og ikapulo?

• Unsa nga kinaiya nga gihulagway diha sa 3 Nephi 24:13–15 ang kasagaran makita sa kalibutan karon? Awhaga ang mga sakop sa klase sa pagpaambit kon unsa ang ilang isulti ngadto sa usa ka tawo kinsa mibati nga mas sayon ang kinabuhi o mas maayo alang niadtong kinsa wala motuman sa mga kasugoan. Sumala sa 3 Nephi 24, giunsa sa Ginoo pagpanalangin niadtong kinsa moserbisyo Kaniya? Siguro imo usab silang awhagon sa pagpangita og mga sanglitanan diha sa 3 Nephi 22. (Tan-awa usab sa Mosiah 2:41; Alma 41:10.)

3 Nephi 25:5–6

Ang atong mga kasingkasing kinahanglan nga mobalik ngadto sa atong mga katigulangan.

• Aron sa paghulagway sa konsepto sa pagpabalik sa atong mga kasingkasing ngadto sa atong mga katigulangan, mahimo ka nga modapit og usa ka sakop sa klase sa pagpalayo gikan sa klase ug ihulagway ang mga sakop sa klase gikan sa panumduman (asa sila naglingkod, unsay ilang gisul-ob, ug uban pa). Dayon siya mahimong molingi sa klase ug mosulay og usab. Unsa ang gitudlo kanato niini nga sanglitanan kabahin sa pagpabalik sa atong mga kasingkasing ngadto sa atong mga katigulangan pinaagi sa buhat sa templo ug family history? Human mabasa ang 3 Nephi 25:5–6, tingali ang mga sakop sa klase makapaambit kon sa unsang paagi nga ang ilang mga kasingkasing napabalik ngadto sa ilang mga katigulangan. Mahimo usab nimo nga dapiton ang temple ug family history consultant sa ward aron sa pagpaila nila sa pipila ka mga himan sa family history. Sa unsang paagi nga kini nga buhat may kalabutan sa panagpundok sa Israel nga gihulagway ni Presidente Russell M. Nelson diha sa “Dugang nga mga Kapanguhaan”?

pagkat-on nga icon

Awhaga ang Pagkat-on diha sa Panimalay

Diha sa 3 Nephi 27–4 Nephi atong mabasa ang kabahin sa “[pinakamalipayon] nga katawhan sa tanan nga mga katawhan nga gilalang sa kamot sa Dios” (4 Nephi 1:16). Isugyot ngadto sa klase nga ang pagbasa niini nga mga kapitulo makatabang kanato nga makat-on unsaon sa pagpangita og kalipay para sa atong kaugalingon ug sa atong mga pamilya.

mga kapanguhaan nga icon

Dugang nga mga Kapanguhaan

Mahimo ka nga kabahin sa usa ka butang nga halangdon.

Si Presidente Russell M. Nelson mipahayag:

“Sigurado nga kini karon ang ulahing mga adlaw, ug ang Ginoo mipadali sa Iyang buhat sa pagpundok sa Israel. Kana nga panagpundok mao ang labing importanting butang nga nahitabo sa yuta karon. Walay makatandi niini sa gidak-on, walay makatandi niini sa kaimportante, walay makatandi niini sa kahalangdon. Ug kon pilion ninyo, kon gustuhon ninyo, mamahimo kamong dakong bahin niini. Mahimo kamong dakong bahin sa usa ka dakong butang, mahinungdanong butang, halangdong butang!

“Kon maghisgot kita kalabut sa pagpundok, nagsulti lamang kita niining sukaranang kamatuoran: ang matag usa sa mga anak sa atong Langitnong Amahan, sa matag kilid sa tabil, angayang makadungog sa mensahe sa gipahiuli nga ebanghelyo ni Jesukristo. …

“… Hunahunaa kini! Sa tanang katawhan nga nakapuyo niining kalibutana, kita ang makahimo sa pag-apil niini nga kalihokan sa katapusan, dakong panagpundok. Makapahinam gayud kana! …

“Kini nga pagpundok kinahanglang importante kaayo kaninyo. Kini mao ang misyon diin gipadala kamo dinhi sa yuta” (“Paglaum sa Israel” [tibuok kalibutan nga debosyonal alang sa kabatan-onan, Hunyo 3, 2018], broadcasts.ChurchofJesusChrist.org).

Pagtunaw ug pagpaputli.

Ang pilak makita nga nakasagol sa uban nga mga mineral diha sa mga deposito sa oro. Sa karaang panahon, ang tigtunaw og pilak mopuga sa pilak pinaagi sa pagbutang sa oro diha sa pugon nga gipainit sa taas kaayo nga temperatura. Kini maoy hinungdan sa walay pulos nga (ang mga hugaw o wala kinahanglana nga mga mineral) mogawas ibabaw sa gipalanay nga oro. Ang tigtunaw mokiskis sa mga hugaw, nagbilin sa lunsay nga pilak, nga mailhan tungod sa iyang dili kasagaran nga kadan-ag.

Ang tiglaba usa ka tawo kinsa molimpyo o mopaputi sa panapton. Ang panapton ihumol sa tubig nga sagulan sa “sabon sa tiglaba,” nga gidesinyo aron motangtang sa lana ug hugaw. Samtang ang panapton gihumol, ang tiglaba mopalo-palo o motunob-tunob niini aron matangtang ang mga hugaw. (Tan-awa sa “Refiner’s Fire and Fuller’s Soap,” New Era, Hunyo 2016, 6–7.)

Pagpalambo sa Atong Pagtudlo

Tudloi ang mga tawo, dili lang magtudlo sa mga leksyon. “Ang paagi sa imong pagtagad sa mga tawo sama kaimportante sa unsay imong itudlo kanila. Usahay ang atong pagkaokupado sa pagpresentar og leksyon makapugong nato sa pagpahayag sa atong gugma niadtong atong gitudloan. Kon mahitabo kini kanimo, hunahunaa kon sa unsang paagi nga ikaw makatutok sa unsay labing importante” (Pagtudlo sumala sa Pamaagi sa Manluluwas, 6).