Si Mormon nga nagsulat diha sa bulawan nga mga palid

Si Mormon Nga Nagpamubo sa mga Palid, ni Tom Lovell

Oktubre 26–Nobyembre 1

Mormon 1–6

“Ako Manghinaut nga Madani Kamong Tanan … sa Paghinulsol”

Samtang ikaw magbasa sa Mormon 1–6, pangita alang sa mga kamatuoran nga makatabang sa mga sakop sa imong klase nga magpabiling matinud-anon sa panahon sa kadautan, sama sa gihimo ni Mormon.

Irekord ang Imong mga Impresyon

pagpaambit nga icon

Dapita ang Pagpaambit

Usahay ang mga sakop sa klase magpanagana sa pagpaambit sa ilang mga panabut tungod kay sila walay higayon sa pag-organisar sa ilang mga hunahuna. Aron sa pagtabang nila niini, hatagi sila og pipila ka minuto sa pagsulat sa mga panabut nga ilang nakuha gikan sa pagtuon sa Mormon 1–6 sa panimalay, dayon hangyoa sila sa pagpaambit.

pagtudlo nga icon

Itudlo ang Doktrina

Mormon 1–6

Mahimo kitang mopuyo nga matarung bisan pa sa kadautan sa atong palibut.

• Daghan sa mga sakop sa imong klase ang makasabut sa kasinatian ni Mormon sa pagpaningkamot nga magpuyo nga matarung diha sa dautan nga kalibutan. Tingali sila makapaambit kon unsay ilang nakat-unan gikan sa ehemplo ni Mormon. Aron makatabang sa pagpahigayon niini nga hisgutanan, mahimo nimong dapiton ang mga sakop sa klase sa pagpangita og mga bersikulo nga mitino sa mga kinaiya ni Mormon ug paghimo og lista niadto nga mga kinaiya diha sa pisara (tan-awa, pananglitan ang Mormon 1:2–3, 15–16; 2:1, 23–24; 3:1–3, 12, 17–22). Giunsa kaha niining mga kinaiya sa pagtabang ni Mormon nga magpabiling lig-on sa espirituhanong paagi? Unsaon niini sa pagtabang nato nga mahimong mas sama ni Mormon?

  Mga Nephite ug mga Lamanite nga nakiggubat sa usag usa

  Gubat, ni Jorge Cocco

• Si Mormon kanunay nga misulat direkta ngadto sa katawhan sa atong panahon. Unsa ang atong makat-unan gikan sa iyang mga pulong ngadto kanato diha sa Mormon 3:17–22 ug 5:10–24? Hatagi ang matag sakop sa klase og usa ka pirasong papel nga adunay mga pulong “Tambag ni Mormon alang Kanato” nga nakasulat sa ibabaw, ug awhaga sila sa pagpangita og mga mensahe diha niini nga mga bersikulo nga may kalabutan sa atong panahon. Unsaon nato sa paggamit ang tambag ni Mormon aron makatabang nato nga magpabiling lig-on sa espirituhanong paagi diha sa kalibutan karon?

• Kon nagtudlo ka og kabatan-onan, mahimo nimong magamit ang ehemplo ni Mormon aron sa pagtabang nila nga makasabut nga pwede silang mahimong matarung nga mga lider bisan sila bata pa. Kon nagtudlo ka og mga hamtong, mahimo nimong gamiton ang iyang ehemplo aron sa pagsugod og hisgutanan kabahin sa mga kahigayunan nga makatabang sa kabatan-onan nga mahimong maayo nga mga lider. Aron sa pagsugod sa hisgutanan, mahimo nimong hangyoon ang pipila ka mga sakop sa klase sa pagribyu sa Mormon 1 ug ang uban sa pagribyu sa Mormon 2, nga magtimaan sa mga kahigayunan nga gihatag ni Mormon sa pagpangulo atol sa iyang pagkabatan-on. Unsa ang mga kinaiya nga naa niya nga nakapahimo niya nga bantugan nga lider? Ang mga sakop sa klase mahimong mopaambit og mga ehemplo nga ilang nakita kabahin sa gamhanan nga impluwensya sa matarung nga mga anak ug kabatan-onan. Mahimo usab sila nga maghisgut sa mga kahigayunan nga sila—o kabatan-onan nga ilang nailhan—anaa para mahimo nga mga lider nga adunay mga kinaiya nga sama sa anaa ni Mormon.

Mormon 2:10–15

Ang paghinulsol nanginahanglan og usa ka masulub-on nga kasingkasing ug mahinulsulon nga espiritu.

• Aron makakat-on sa kalainan tali sa kasubo nga paingon sa paghinulsol ug kasubo nga dili, ikonsiderar ang pagbasa sa Mormon 2:10–15 og dungan ug hisgutan ang mga pangutana nga sama niini: Unsa ang tahas sa “pagsubo” diha sa paghinulsol? Unsa ang kalainan tali sa “kasubo …ngadto sa paghinulsol” ug sa “kasubo sa gipanghimaraut”? Unsa nga mga batasan ug mga linihukan ang makatabang nato nga maanaa ang “masulub-on nga mga kasingkasing ug mahinulsulon nga mga espiritu”?

Mormon 3:12

Mahimo kita nga mohigugma sa uban bisan og dili kita uyon sa ilang mga pagpili.

• Sama ni Mormon, daghang sakop sa imong klase ang suod nga nakig-uban sa mga tawo kinsa dili nila parehas og mga gituohan. Unsaon kaha nimo sa paggamit sa kasinatian ni Mormon aron sa pagtudlo sa mga sakop sa klase kabahin sa paghigugma sa uban bisan sa ilang mga kalainan? Ikonsiderar ang pagbasa sa Mormon 3:12 og dungan ug maghisgut sa mga higayon sa dihang si Mormon nagpakita og paghigugma niadtong kinsa misalikway sa iyang mensahe ug tuyo nga misukol batok sa Dios (tan-awa, pananglitan sa, Mormon 1:16–17; 2:12). Unsa nga mga kasinatian ang mapaambit sa mga sakop sa klase gikan sa ilang kaugalingon nga mga kinabuhi sa paghigugma niadtong kinsa dili parehas nila og mga gituohan o mga hiyas? Ang pamahayag ni Presidente Dallin H. Oaks diha sa “Dugang nga mga Kapanguhaan” naghatag og dugang nga tambag.

Mormon 6:17

Si Jesukristo nagbarug nga bukas ang mga bukton aron sa pagdawat kanato.

• Alang niadto kinsa tingali wala na molaum nga sila mapasaylo sa ilang mga sala, ang paghulagway ni Mormon sa Manluluwas nga mibarug “uban sa bukas nga mga bukton sa pagdawat kaninyo” mahimong makahatag og kasiguroan. Ikonsiderar ang pagbasa sa Mormon 6:17 og dungan ug magpakita og hulagway ni Jesukristo nga nakabukas ang mga bukton (sama sa Gospel Art Book, nu. 66). Unsa ang gitudlo niini nga bersikulo kabahin sa kahinam sa Manluluwas sa pagtabang kanato? Mahimo usab nimong ikonsiderar ang dungan nga pagkanta og himno nga nagtudlo og susama nga mensahe, sama sa “Come unto Jesus” (Hymns [Mga Himno], nu. 117). Mahimo usab nga imong ipaambit ang kasinatian ni Presidente Russell M. Nelson diha sa “Dugang nga mga Kapanguhaan” ug hangyoa ang mga sakop sa klase sa paghisgut kon unsaon nato sa pagtabang sa uban nga makaila nga posible ang paghinulsol.

pagkat-on nga icon

Awhaga ang Pagkat-on diha sa Panimalay

Mahimo nimong hangyuon ang mga sakop sa klase sa paghunahuna sa unsay ilang isulat ngadto sa katawhan sa umaabut. Diha sa Mormon 7–9 atong mabasa unsa ang gisulat ni Mormon ug Moroni, mga siglo na ang milabay, ngadto sa katawhan sa atong panahon.

mga kapanguhaan nga icon

Dugang nga mga Kapanguhaan

Paghigugma sa uban kinsa lahi ang gituohan.

Si Presidente Dallin H. Oaks mipasabut:

“Kinahanglan natong sundon ang mga pagtulun-an sa ebanghelyo sa paghigugma sa atong silingan ug paglikay sa panagbingkil. Ang mga sumusunod ni Kristo kinahanglan nga maoy ehemplo sa kabuotan. Kinahanglang higugmaon nato ang tanang tawo, maminaw og maayo, ug magpakabana sa sinsero nilang mga gituohan. Bisan og supak kita, kinahanglan dili kita makapasakit. Ang atong baruganan ug pagpamulong bahin sa kontrobersyal nga mga hilisgutan kinahanglang dili makagubot. Kinahanglang maayo kita sa pagpasabut sa atong baruganan ug sa paggamit sa atong impluwensya. Sa pagbuhat sa ingon, mohangyo kita nga dili masakitan ang uban sa atong sinsero nga gituohan ug sa gawasnong paggamit sa atong relihiyon. Giawhag namo ang tanan nga mogamit sa Bulawanong Patakaran sa Manluluwas: ‘Buhati ang mga tawo sa bisan unsay buot ninyo nga ilang pagabuhaton kaninyo’ (Mateo 7:12).

“Kon ang popular nga mga opinyon mosukwahi sa atong mga sumbanan, kinahanglang dawaton nato ang dili maayong mga resulta diha sa kamabination ug magbinuotan sa atong mga kaaway” (“Paghigugma sa Uban ug Pagpakabuhi nga may mga Panaglahi,” Liahona, Nob. 2014, 27).

Ang paghinulsol posible.

Si Presidente Russell M. Nelson mipaambit sa mosunod nga kasinatian:

“Sa miaging tuig samtang si Elder David S. Baxter ug ako nagmaneho padulong sa stake conference, mihunong kami sa usa ka kan-anan. Human niadto sa pagbalik sa among sakyanan, gisugat kami og usa ka babaye nga nanawag namo. … Nangutana siya kung kami mga elder ba sa Simbahan. Miingon kami og oo. Hapit sa walay pagpugong-pugong, iyang gisulti ang istorya sa trahedya sa iyang kinabuhi, naglunang sa sala. Karon, 28 anyos pa lang, miserable na siya. Iyang gibati ang pagka walay bili, nga wala nay pulos ang pagpakabuhi pa. Samtang siya nagsulti, ang kanindot sa iyang kalag misugod sa pagdan-ag. Maluhaon nga naghangyo, nangutana siya kung duna pa ba siyay paglaum, bisan asa sa iyang kawalay paglaum.

“‘Oo,’ kami mitubag, ‘dunay paglaum. Ang paglaum gisumpay kana sa paghinulsol. Mahimo ka nga mag-usab. Mahimo ka nga “moduol ngadto ni Kristo, ug paghingpit diha kaniya”.[Moroni 10:32]. Amo siyang giaghat sa dili paglangay [tan-awa sa Alma 13:27; 34:33]. Siya mapaubsanong midanguyngoy ug matinuorong mipasalamat kanamo.

“Samtang si Elder Baxter ug ako mipadayon sa among pagbiyahe, namalandong kami niadto nga kasinatian. Nahinumdom kami sa tambag nga gihatag ni Aaron ngadto sa walay paglaum nga kalag, kinsa miingon, ‘Kon ikaw maghinulsol sa tanan nimo nga mga sala, ug moyukbo sa atubangan sa Dios, ug motawag sa iyang ngalan sa hugot nga pagtuo, … niana ikaw makadawat sa paglaum diin ikaw nagtinguha’ [Alma 22:16]. …

“… Ngadto sa 28-anyos nga babaye nga naglunang sa hilabihang pagpakasala, ug sa matag usa kanato, ako mopahayag nga ang tam-is nga panalangin sa paghinulsol posible. Moabut kini pinaagi sa hingpit nga pagkakabig ngadto sa Ginoo ug sa Iyang balaang buhat.”

Agig dugang, si Presidente Nelson nakaobserbar: “Ato usab nga gihinumduman ang makasasala nga katawhan ubos sa pag-amuma sa ilang mabination nga lider, nga si Mormon, kinsa misulat, ‘Ako diha sa walay paglaum, kay ako nasayud sa mga paghukom sa Ginoo nga kinahanglan moabut diha kanila, kay sila wala maghinulsol sa ilang mga kadautan, apan nakigbisog alang sa ilang mga kinabuhi nga walay pagtawag niana nga Binuhat kinsa milalang kanila’ (Mormon 5:2)” (“Paghinulsol ug Pagkakabig,” Liahona, May 2007, 102, 104).

Pagpalambo sa Atong Pagtudlo

Ang espiritwal nga paglambo mahitabo diha sa panimalay. Ang imong mga sakop sa klase mogahin og 165 ka oras matag semana gawas sa simbahan. Atol nianang higayona, aduna silay ilang kaugalingon nga espirituhanong mga kasinatian nga nagtudlo nila kabahin sa ebanghelyo. Paghatag og mga pangutana nga nag-awhag sa mga tigkat-on nga mopaambit sa mga butang nga ilang nakat-unan atol sa semana ug kauban sa ilang mga pamilya (tan-awa sa Pagtudlo sumala sa Pamaagi sa Manluluwas, 18).