Si Ether misulod sa usa ka langub

Si Ether Mitago sa Usa ka Lungag sa Bato ni Gary Ernest Smith

Nobyembre 23–29

Ether 12–15

“Pinaagi sa Hugot nga Pagtuo ang Tanan nga mga Butang Matuman”

Ang katuyoan niini nga latid dili ang pagsugo kon unsa ang mahitabo diha sa klase. Kini usa ka dugang ngadto—dili hulip alang—sa personal nga pagpadayag. Tuguti ang Espiritu nga mogiya sa imong personal nga pagtuon ug pagpangandam, ug dayon tan-awa kon ang mga kalihokan niini nga latid makatabang sa mga sakop sa klase mga makadiskubre ug makapaambit sa importanting mga baruganan diha sa Ether 12–15.

Irekord ang Imong mga Impresyon

pagpaambit nga icon

Dapita ang Pagpaambit

Aron matabangan ang mga sakop sa klase nga mopaambit kon unsa ang ilang nakat-unan gikan sa ilang personal o pamilya nga pagtuon sa kasulatan, mahimong isulat nimo sa pisara ang mga pulong nga sama sa “Akong nakat-unan nga …” “Ako adunay pagpamatuod sa …” ug “Akong nasinatian …” Dapita ang mga sakop sa klase nga mopaambit og usa ka butang gikan sa Ether 12–15 nga makakompleto sa usa sa mga pamahayag diha sa pisara.

pagtudlo nga icon

Itudlo ang Doktrina

Ether 12:2–22

Makadawat kita og saksi sa kamatuoran samtang nagpakita kita og hugot nga pagtuo diha ni Jesukristo.

• Aron matabangan ang mga sakop sa klase nga mapamalandungan kon unsa ang ipasabut sa pagpakita og pagtuo ni Jesukristo, mahimo nimo silang pangutan-on kon unsa nga mga hulagway o mga pulong ang mosulod sa hunahuna kon makadungog sila sa pulong nga pagbansay. (Mahimo gani nimong tan-awon ang pulong sa diksyonaryo.) Unsa ang epekto sa pisikal nga pagbansay diha sa atong kalawasan? Unsaon nato sa paggamit niini nga baruganan sa atong pagtuo? Sa unsang mga paagi nga kita “makapakita og pagtuo” ni Kristo? Ang mga sakop sa klase mahimong mangita sa Ether 12:2–22 ug hisgutan kon giunsa sa mga katawhan nga naa niini nga mga bersikulo sa pagpakita og pagtuo. Unsaon nato sa pagsunod sa ilang mga ehemplo? Sumala niini nga mga bersikulo, unsa ang mga resulta sa pagpakita og pagtuo ni Jesukristo?

• Ang mga ehemplo sa hugot nga pagtuo diha sa Ether 12:7–22 naghatag og maayo nga ribyu sa makapadasig nga mga sugilanon nga inyong dungan nga natun-an sa Basahon ni Mormon. Tingali ang mga sakop sa klase makapaambit og uban pa nga mga ehemplo sa hugot nga pagtuo ug unsa ang ilang nakat-unan gikan niini (ang uban makita sa Hebreohanon 11). Mahimo usab silang magpaambit og mga ehemplo sa pagkamatinud-anon gikan sa kasaysayan sa ilang pamilya o ilang kaugalingong kinabuhi. Sa unsang paagi nga kini nga mga ehemplo nakapalig-on sa ilang pagtuo ni Jesukristo ug sa Langitnong Amahan?

• Ang Ether 12 puno sa mga panabut ug mga kamatuoran kabahin sa pagtuo. Ang mga sakop sa klase mahimong makakita og mga bersikulo niini nga kapitulo nga magtudlo nila kabahin sa hugot nga pagtuo. Mahimong mosulat dayon sila diha sa pisara kon unsa ang ilang nadiskubrihan.

Ether 12:1-9, 28, 32

Ang hugot nga pagtuo mopaingon ngadto sa “[pag]laum alang sa maayo nga kalibutan.”

• Adunay usa ba sa imong klase ang makahulagway ngano nga ang angkla importante sa usa ka barko? Mahimong magpakita ka og hulagway sa usa ka barko ug usa ka angkla (o pagdrowing og usa diha sa pisara) ug hisguti kon unsay mahitabo sa usa ka barko nga walay angkla. Unsa ang mahitabo nato kon kita walay paglaum? Ang mga sakop sa klase mahimo dayon nga mobasa sa Ether 12:4 ug moistorya kon sa unsang paagi nga ang paglaum sama sa “usa ka angkla sa [atong] kalag.” Mahimo usab nilang basahon ang Ether 12:1–9, 28, ug 32 ug ipaambit ang mga panabut nga ilang nakuha kabahin sa paglaum. Unsa ang dapat nato nga lauman? (tan-awa sa Ether 12:4; Moroni 7:41; tan-awa usab sa Juan 16:33).

Ether 12:23–29

Pinaagi sa grasya ni Jesukristo, ang mahuyang nga mga butang mahimo nga malig-on.

• Aron sa pagtabang sa mga sakop sa klase nga mahimong personal ang mga kamatuoran nga nakat-unan ni Moroni kabahin sa kahuyang ug kalig-on diha sa Ether 12, mahimo nimong dapiton ang mga sakop sa klase sa paghunahuna og usa ka tawo nga siguro nawad-an og kadasig tungod sa iyang mga kahuyang. Dayon dasiga ang mga sakop sa klase sa pagsiksik sa Ether 12:23–29 aron sa pagpangita sa mga mensahe nga makatabang nianang tawhana. Kon si Moroni ania pa dinhi karon, unsa kaha ang iyang isulti aron sa pagdasig kaniya? Ang mga sakop sa klase mahimo usab nga mopaambit sa ilang mga kasinatian gikan sa ilang kaugalingong kinabuhi sa dihang ang Manluluwas mitabang nga ang “mahuyang nga mga butang mahimo nga malig-on ngadto kanila” (Ether 12:27). Sa unsang paagi nga kini nga kausaban lahi gikan sa mga paningkamot sa pagpalambo sa kaugalingon nga tingali himoon sa usa ka tawo nga dili magsalig sa Manluluwas? Alang sa dugang pa niini nga hilisgutan, tan-awa ang pamahayag ni Presidente Henry B. Eyring diha sa “Dugang nga mga Kapanguhaan.”

• Ang kasinatian ni Moroni usa sa daghan diha sa mga kasulatan nga nagpakita kon giunsa sa grasya sa Manluluwas nga himoon ang atong mga kahuyang nga malig-on. Siguro makatabang kon bahinon ang klase sa mga grupo, sangunan ang matag grupo sa pagpili og usa ka tawo diha sa mga kasulatan kinsa adunay kahuyang, ug hisguti kon giunsa sa Ginoo pagpalig-on niana nga tawo. Ang ubang mga ehemplo gisugyot diha sa “Dugang nga mga Kapanguhaan.” Mahimo usab nimong isugyot nga iribyu sa mga sakop sa klase ang kahulugan sa grasya diha sa Giya Ngadto sa mga Kasulatan o Matinud-anon sa Tinuhoan (mga pahina 77–78). Giunsa paghulagway sa mga ehemplo sa kasulatan nga ilang gitun-an ang gahum sa grasya sa Manluluwas? Sa unsang paagi kita nagdapit niini nga gahum diha sa atong kinabuhi?

• Kasagaran lang nga ikumparar ang atong mga kahuyang sa gituohang mga kalig-on sa lain; bisan si Moroni mibati nga siya layo ra kon ikumparar sa igsoon ni Jared (tan-awa sa Ether 12:24). Nganong delikado man nga ikumparar ang atong kaugalingon sa uban? Sumala sa Ether 12:26–27, sa unsang paagi nga gusto sa Ginoo nga tan-awon nato ang atong mga kahuyang? (tan-awa usab ang pamahayag ni Presidente Henry B. Eyring diha sa “Dugang nga mga Kapanguhaan”). Sa unsang paagi nga gusto Niya nga tan-awon nato ang kahuyang sa uban? (tan-awa sa Ether 12:26).

Ether 13–15

Ang pagsalikway sa mga propeta magdala og espiritwal nga peligro.

• Kay nahatagan na man sa importanting mga kamatuoran nga gitudlo diha sa Ether 12, mahimong dili na nimo pilion nga mogahin og daghang oras diha sa klase sa mga kapitulo 13–15. Hinoon, makatabang ang paghangyo og usa ka sakop sa klase sa pag-summarize sa daklit sa unsay nahitabo niini nga mga kapitulo. Aron sa pagtabang sa mga sakop sa klase nga makakita og makahuluganong mga mensahe niini nga saysay, mahimo nimo silang hangyoon sa pagkompleto sa mga pulong “sa ingon atong makita…” sa usa ka leksyon nga ilang nakat-unan gikan sa pagkapukan sa mga Jaredite. Sa unsang paagi nga ang ilang pagkapukan kapareho sa pagkapukan sa mga Nephite? (tan-awa, pananglitan sa, Ether 15:19 ug Moroni 8:28). Unsa ang gusto sa Ginoo nga atong makat-unan gikan niining mga saysay, ug unsa ang atong mahimo aron malikayan ang kapalaran sa mga Jaredite? Ang mga sakop sa klase mahimo usab nga moribyu kon sa unsang paagi nga ang katapusan sa basahon ni Ether konektado sa Omni 1:19–22; Mosiah 8:8; ug Mosiah 28:11–18.

pagkat-on nga icon

Awhaga ang Pagkat-on diha sa Panimalay

Sa sunod semana ang mga sakop sa klase magsugod sa pagtuon sa basahon ni Moroni. Mahimong makapainteres nila ang mahibaw-an nga si Moroni wala sa sinugdanan magplano nga mosulat og bisan unsa pa nga dugang human sa basahon ni Ether, apan nagpabilin siyang buhi nga mas taas pa kaysa iyang gilauman. Niining semanaha ilang sugdan sa pagbasa ang katapusang mga mensahe nga si Moroni nadasig sa pagsulat sa wala pa siya mamatay.

mga kapanguhaan nga icon

Dugang nga mga Kapanguhaan

Ang espirituhanon nga pag-uswag nanginahanglan nga makita ang atong mga kahuyang.

Si Presidente Henry B. Eyring, nga mikomento sa Ether 12:27, mitudlo: “Miingon si Moroni nga dihang siya ‘nakadungog niini nga mga pulong,’ siya ‘nahupay’ (Ether 12:29). Makahupay kini kanatong tanan. Kadtong dili makakita sa ilang mga kahuyang walay paglambo. Ang inyong pagkasayud sa inyong mga kahuyang usa ka panalangin kay nakatabang kini nga magpabilin kamong mapaubsanon ug padayon ang inyong pagsunod sa Manluluwas. Dili lang mohupay ang Espiritu kaninyo, apan Siya usab ang paagi nga ang Pag-ula mousab sa inyong pagkakamo. Dayon mahimong lig-on ang mga butang nga huyang” (“Kaninyo Ihatag Ko ang Akong Kalinaw,” Liahona, Mayo 2017, 16).

Mga Pananglitan: Ang huyang gihimo nga lig-on.

• Enoch (Moses 6:31–34; 7:13)

• Moises (Exodus 4:10–12; 14:31)

• Gideon (Mga Maghuhukom 6:12–16; 8:22–23)

• Pedro (Lucas 5:8–10; 22:55–62; Mga Buhat 4:13–21)

• Moroni (Ether 12:23–29)

• Joseph Smith (Joseph Smith—Kasaysayan 1:28; D&P 35:17; 135:3)

Pagpalambo sa Atong Pagtudlo

Tudloan sa “ngano.” “Usahay ang mga tigkat-on—ilabi na ang kabatan-onan—naghunahuna kon sa unsang paagi ang mga baruganan sa ebanghelyo adunay kalabutan ngadto kanila o nganong kinahanglan silang mosunod og piho nga mga sugo. Hinoon, kon sila nakasabut sa mahangturong plano sa Langitnong Amahan alang sa kalipay sa Iyang mga anak, ang mga hinungdan sa mga baruganan sa ebanghelyo ug mga sugo mahimong mas klaro ug ang kadasig sa pagsunod magkadako” (Pagtudlo sumala sa Pamaagi sa Manluluwas, 20).