Si Alma nga Nagbunyag og Mga Tawo sa Katubigan sa Mormon

Minerva Teichert (1888–1976), Si Alma Nagbunyag sa Katubigan sa Mormon, 1949–1951, oil on masonite, 35⅞ x 48 inches. Brigham Young University Museum of Art, 1969

Nobyembre 30–Disyembre 6

Moroni 1–6

“Aron Pag-agak Kanila sa Matarung nga Agianan”

Si Moroni nagtinguha nga ang mga butang nga iyang gisulat mahimo “nga bililhon” ngadto niadtong magpuyo sa ulahing mga adlaw (Moroni 1:4). Samtang ikaw mainampoon nga mobasa sa Moroni 1–6, ikonsiderar ang mga butang nga mahimong labing mahinungdanon niadtong imong mga gitudloan.

Irekord ang Imong mga Impresyon

pagpaambit nga icon

Dapita ang Pagpaambit

Usahay ang mga sakop sa klase mahimong mas maayo sa pagpakigbahin sa ilang mga panabut gikan sa ilang personal nga pagtuon kon sila adunay gamay nga higayon sa paghinumdom kon unsa ang ilang gibasa. Tingali mogahin ka og pipila ka minuto sa pagsugod sa klase aron sa pagribyu sa mga ulohan sa mga kapitulo alang sa Moroni 1–6. (Kini mahimo usab nga makatabang sa mga sakop sa klase nga wala magbasa sa panimalay.) Dayon dapita ang mga sakop sa klase sa pagpangita sa mga kapitulo alang sa bersikulo nga ilang nakita nga makahuluganon ug gusto nga ipakigbahin sa uban diha sa klase.

pagtudlo nga icon

Itudlo ang Doktrina

Moroni 2–6

Ang mga ordinansa sa pagkapari kinahanglan nga ipahigayon sumala sa gisugo sa Ginoo.

• Kon ang mga sakop sa imong klase (o ilang mga mahal sa kinabuhi) nangandam sa pagdawat sa mga ordinansa sa pagkapari, tingali bililhon ang pagribyu unsa ang gitudlo ni Moroni kabahin sa mga ordinansa diha sa Moroni 2–6. Ang mga sakop sa klase mahimong mobuhat nga magpares nga i-aksyon ang mga sitwasyon nga sama sa mosunod. (1) Ang imong igsoon nga lalaki padulong nga i-orden ngadto sa pagkapari. Unsa nga tambag ang imong ihatag gikan sa Moroni 3? (2) Usa ka higala nga sakop sa lain nga relihiyon natingala nganong importante ang pag-ambit sa sakramento kada semana. Unsa ang imong isulti? (tan-awa sa Moroni 4–5). (3) Ang bunyag sa imong anak nga babaye hapit na, apan dili siya sigurado kon andam na ba siya. Unsaon nimo siya sa pagtabang? (tan-awa sa Moroni 6:1–3). Human sa mga pag-aksyon sa mga sitwasyon, ang klase mahimong maghisgut unsa ang ilang nakat-unan gikan sa matag usa. Mahimo usab sila nga mopakigbahin sa ilang mga pagpamatuod kabahin sa unsang paagi nga ang mga ordinansa nga sama niini nakapaduol nila sa Langitnong Amahan ug ni Jesukristo.

• Aron sa pagsugod og panaghisgutan kabahin sa pagpangandam alang sa bunyag, mahimo ka nga mohangyo og usa ka sakop sa klase sa pagsaysay sa mga paagi nga sila nangandam alang sa importante nga mga pasalig sa ilang mga kinabuhi, sama sa misyon, kaminyoon, pagka-ginikanan, o bag-o nga trabaho. Sa unsang paagi nga kana nga pagpangandam ikatandi ngadto sa pagpangandam nga gikinahanglan aron mosarang alang sa bunyag, sama sa gihulagway diha sa Moroni 6:1–3? (tan-awa usab sa Mosiah 18:8–10; D&P 20:37). Ngano nga ang mga hiyas nga gilista niini nga mga tudling mahinungdanon alang sa bunyag? Unsaon nato pagkahibalo kon kita andam ba alang niini nga ordinansa? Awhaga ang mga sakop sa klase sa pagpamalandong kon unsa ka maayo ang ilang pagsunod ngadto niini nga mga sumbanan sukad sa ilang pagbunyag ug unsa ang ilang mahimo aron molambo. Mahimo usab nimo silang dapiton sa pagsulat og bisan unsa nga mga impresyon nga ilang nadawat ug sa pagtan-aw niini sa kanunay.

  batan-on nga babaye nga nagdawat og panalangin

  Ang mga ordinansa gipahigayon pinaagi sa gahum sa pagkapari.

Moroni 4–5

Ang pag-ambit sa sakramento makatabang nato nga mapaduol ngadto ni Jesukristo.

• Ang latid karong semanaha sa Dali, Sunod Kanako—Alang sa mga Indibidwal ug mga Pamilya nagsugyot og mga kalihokan sa pagtuon nga may kalabutan sa sakramento. Tingali mahimo nimong dapiton ang pipila ka sakop sa klase sa pagkompleto niini nga mga kalihokan sa panimalay ug moanha sa klase nga andam sa pagpakigbahin unsa ang ilang nakat-unan. Mahimo usab nga imong dapiton ang mga sakop sa klase sa pagpakigbahin sa usag usa kon unsa ang ilang gibuhat aron maandam ang ilang mga kaugalingon ug ilang mga pamilya aron adunay sagrado nga mga kasinatian sa sakramento.

• Kadaghanan nato nakadungog na sa pag-ampo sa sakramento sa daghang higayon, apan ato ba gayud nga gihinuktukan unsa ang gipasabut sa mga pulong? Aron matabangan ang mga sakop sa klase nga makapamalandong niini nga mga pag-ampo, mahimo nimo silang hatagan og pipila ka minuto sa pagsulat sa duha ka mga pag-ampo sa sakramento gikan sa panumduman. Dayon dapita sila sa pagtandi sa unsay ilang gisulat ngadto sa Moroni 4:3 ug 5:2. Unsa ang sayon nila nga nahinumduman? Unsay ilang nakalimtan? Aduna ba silay nabantayan nga bisan unsa kabahin niini nga mga pag-ampo nga wala nila mabantayi kaniadto? Dapita ang mga sakop sa klase sa pagpakigbahin og mga pulong gikan sa mga pag-ampo sa sakramento nga makahuluganon kanila o nga mitabang nila nga bation ang kasagrado niini nga ordinansa. Aron mas mapalig-on ang pagtamud sa mga sakop sa klase alang sa sakramento, ikonsiderar ang pagdapit og usa ka sakop sa klase sa pagkanta o pagtugtog og himno sa sakrament.

Moroni 6:4–9

Ang mga disipulo ni Jesukristo nangalagad sa usag usa.

• Ikonsiderar ang paggamit og analohiya aron sa pagtabang sa mga sakop sa klase nga masabtan ang kamahinungdanon nga mahimong “maamumahan pinaagi sa maayo nga pulong sa Dios” (Moroni 6:4). Pananglitan, unsa nga klase sa pag-amuma ang gikinahanglan sa usa ka gamayng tanom o usa ka masuso? Unsa ang mahitabo kon imong mapasagdan ang usa ka butang nga nanginahanglan og pag-amuma? Sa unsang paagi nga ang bag-o ug mibalik nga mga miyembro sa Simbahan susama ngadto sa usa ka tanom o batang gamay nga nanginahanglan og pag-amuma? Ang mga sakop sa klase mahimong mosiksik sa Moroni 6:4–9 alang sa mga ideya kabahin sa unsaon nila “pag-amuma” ang usag usa sa espirituhanong paagi. Mahimo usab sila nga mangita og mga ideya diha sa “Dugang nga mga Kapanguhaan.” Mahimo kang mopakigbahin og kasinatian diin ang isig ka disipulo nangalagad kanimo. Tingali ang mga sakop sa klase andam nga mopakigbahin sa susama nga mga kasinatian.

• Ang Moroni 6:4–9 mahimong makatabang sa mga sakop sa klase nga masabtan giunsa kita sa pagpanalangin sa dihang kita “giihap uban sa mga katawhan sa simbahan ni Kristo” ug mitambong og mga miting sa simbahan. Unsaon nato sa pagpasabut niini nga mga panalangin ngadto sa usa ka tawo kinsa nagduda sa panginahanglan sa usa ka organisado nga simbahan? Tingali ang mga sakop sa klase mosiksik niini nga mga bersikulo aron makakita og usa ka butang nga ilang mapaambit. O mahimo nilang ilista ang pipila sa mga panalangin nga ilang nadawat isip mga miyembro sa Simbahan (tan-awa sa D. Todd Christofferson, “Nganong Anaa ang Simbahan,” Liahona, Nob. 2015, 108–11). Unsa ang atong mahimo aron masiguro nga ang atong isig ka disipulo “mahinumduman ug maamumahan pinaagi sa maayo nga pulong sa Dios” samtang kita “nagtigum kanunay“? (Moroni 6:4–5).

pagkat-on nga icon

Awhaga ang Pagkat-on diha sa Panimalay

Ang mga sakop sa klase tingali mahimong mas matinguhaon sa pagbasa sa Moroni 7–9 sunod semana kon imong ipasabut nga naglakip og duha ka sulat nga gisulat ni Mormon aron matabangan ang iyang anak nga lalaki nga magpabiling matinud-anon diha sa lisud nga mga panahon.

mga kapanguhaan nga icon

Dugang nga mga Kapanguhaan

Naamumahan pinaagi sa pulong sa Dios.

Si Elder Jeffrey R. Holland mitudlo: “Kadaghanan sa mga tawo wala moanha sa simbahan sa pagpangita lamang og pipila ka bag-ong mga kamatuoran sa ebanghelyo o sa pakigkita og daang mga higala, bisan tuod kanang tanan importante. Sila mianha nga nagpangita og espirituhanong kasinatian. Gusto sila og kalinaw. Gusto sila nga ang ilang pagtuo malig-on ug ang ilang paglaum mabag-o. Sa laktud, gusto nila nga, maamumahan sa maayong pulong sa Dios, nga malig-on pinaagi sa mga gahum sa langit” (“A Teacher Come from God,” Ensign, Mayo 1998, 26).

Si Presidente Gordon B. Hinckley mipasabut nga ang pag-amuma og mga kinabig pinaagi sa pulong sa Dios usa ka gimbuhaton alang sa tanan. Kini buhat alang sa mga home teacher ug mga visiting teacher [karon tigpangalagad nga mga brother ug mga sister]. Kini buhat alang sa bishopric, alang sa mga korum sa pagkapari, alang sa Relief Society, sa young men ug young women, bisan sa Primary.

“Didto ako sa usa ka fast and testimony Sunday nga miting sa milabay lamang nga Dominggo. Usa ka 15- o 16-anyos nga batang lalaki ang mibarug atubangan sa kongregasyon ug miingon nga siya nakahukom nga magpabunyag.

“Dayon sa tagsa-tagsa, ang batang mga lalaki sa korum sa mga teacher miduol sa mikropono sa pagpahayag sa ilang gugma alang kaniya, sa pagsulti kaniya nga siya naghimo sa hustong butang, ug sa pagsiguro kaniya nga sila modapig kaniya ug motabang kaniya. Nindot kaayo kini nga kasinatian nga madungog kadtong batan-ong mga lalaki nga nagsulti sa mga pulong sa pagdayeg ug pag-awhag sa ilang higala. Ako masaligon nga tanan niadtong mga batang lalaki, lakip na ang usa kinsa gibunyagan sa miaging semana, moadto og mga misyon.

“Sa usa ka interbyu sa mga tigbalita gipangutana ko, ‘Unsay nakahatag kanimo og labing dako nga katagbawan samtang imong makita ang buhat sa Simbahan karon?’

“Ang akong tubag: ‘Ang labing makatagbaw nako nga kasinatian mao ang makita kon unsay mabuhat niini nga ebanghelyo alang sa mga tawo. Naghatag kini kanila og usa ka bag-ong panglantaw sa kinabuhi. Naghatag kini kanila og panglantaw nga wala pa gayud nila mabati sukad. Nagtabang kini kanila nga motinguha sa mga butang nga halangdon ug balaan. Adunay nahitabo kanila nga milagrusong tan-awon. Sila mitan-aw ngadto ni Kristo ug nalagsik.’

“… Ako mohangyo sa matag usa kaninyo nga palihug tabang niini nga gimbuhaton” (“Converts and Young Men,” Ensign, Mayo 1997, 48).

Pagpalambo sa Atong Pagtudlo

Pagtinguha og imong kaugalingon nga inspirasyon. Imbis nga motan-aw niini nga mga gilatid isip mga instruksyon nga kinahanglan nimong sundon, gamita kini aron makabaton og mga ideya o makapagawas sa imong kaugalingong inspirasyon samtang mamalandong ka sa mga panginahanglan niadtong imong gitudloan.