Si Jesus nagpakita sa mga Nephite

Nga Ikaw Makahibalo, ni Gary L. Kapp

Disyembre 14–20

Moroni 10

“Duol ngadto kang Kristo, ug Paghingpit diha Kaniya”

Ang mga sakop sa imong klase tingali adunay makahuluganon nga mga kasinatian sa pagbasa sa Basahon ni Mormon karong tuiga. Gamita kini nga mga kasinatian aron sa pag-awhag sa tanan nga naa sa klase sa pagtuon sa mga kasulatan.

Irekord ang Imong mga Impresyon

pagpaambit nga icon

Dapita ang Pagpaambit

Mahimo nimong dapiton ang mga sakop sa klase sa paghanduraw nga si Moroni mibisita sa klase. Unsa ang ilang isulti kaniya mahitungod sa unsay iyang gisulat diha sa Moroni 10? Aduna bay bisan unsa nga mga bersikulo nga labing mahinungdanon ngadto kanila? Tingali mahimo silang mopakigbahin og ilang mga kasinatian uban niini nga mga bersikulo.

pagtudlo nga icon

Itudlo ang Doktrina

Moroni 10:3–7

Makahibalo ako sa kamatuoran pinaagi sa gahum sa Espiritu Santo.

• Ang mga sakop sa klase mahimong makaangkon og bag-ong mga panabut kon sila magtuon sa Moroni 10:3–5 nga mabinantayon. Aron sa pagtabang nila, mahimo ka nga mosulat og mahinungdanon nga mga pulong gikan niini nga mga bersikulo diha sa lahi nga mga piraso sa papel ug hatagi og usa ang matag sakop sa klase o ngadto sa grupo sa mga sakop sa klase. Dapita sila sa pagpamalandong o paghisgut kon unsa ang buot ipasabut sa ilang hugpong sa mga pulong, lakip na kon unsa ang ilang mahimo aron sa paggamit niini sa ilang mga kinabuhi. Dayon mahimo silang mobasa sa Moroni 10:3–5 og dungan, nga mohunong kon moabut kamo sa mga pulong nga gitun-an sa usa nila aron kana nga sakop sa klase mahimong mopakigbahin sa iyang mga hunahuna.

• Aron sa pag-awhag sa mga sakop sa klase sa pagpakigbahin sa ilang mga kasinatian pinaagi sa pagsunod sa pagdapit ni Moroni niini nga mga bersikulo, mahimo nimo sila nga dapiton sa paghanduraw nga sila misulay sa pag-awhag og usa ka higala o miyembro sa pamilya nga makaangkon og pagpamatuod sa Basahon ni Mormon. Unsaon kaha nila sa paggamit ang Moroni 10:3–7? Unsa nga mga kasinatian ang ilang mapakigbahin? Unsaon nato sa pagtabang ang uban nga masabtan kon unsa ang buot ipasabut sa pagkahibalo og usa ka butang “pinaagi sa gahum sa Espiritu Santo”? (Moroni 10:5).

Moroni 10:8–25

“Dili molimud sa mga gasa sa Dios.”

• Ngano nga ang pag-awhag nga “dili molimud sa mga gasa sa Dios” mahinungdanon kaayo niining ulahing mga adlaw? (Moroni 10:8). Awhaga ang mga sakop sa klase sa pagpamalandong niining pangutana samtang sila magbasa sa Moroni 10:8–18. Aron matabangan nga mapalig-on ang pagtuo sa mga sakop sa klase sa espirituhanong mga gasa, mahimo nimo silang dapiton sa pagpakigbahin og mga sanglitanan sa mga tawo nga migamit sa matag gasa nga gilista diha sa Moroni 10:9–16. Ang mga sanglitanan mahimong magagikan sa mga kasulatan, gikan sa kasaysayan sa Simbahan, o gikan sa ilang kaugalingong mga kinabuhi. (Ang mga sanglitanan nga gikan sa Basahon ni Mormon gisugyot diha sa “Dugang nga mga Kapanguhaan.”) Mahimo usab ninyong hisgutan kon sa unsang paagi nga ang pipila ka mga gasa nga gihulagway niini nga mga bersikulo napadayag diha sa pag-abot sa Basahon ni Mormon. Nganong importante man alang sa usa ka tawo kinsa nangita og pagpamatuod sa Basahon ni Mormon nga motuo diha sa mga espirituhanong gasa? Unsa ang atong gihimo usahay sa “paglimud” niini nga mga gasa diha sa atong mga kinabuhi? Sa unsang paagi nga kini nga mga gasa mitabang nato nga “[mo]duol ngadto kang Kristo, ug [mag]hingpit diha kaniya”? (tan-awa sa Moroni 10:30–33).

• Laing paagi nga masuhid ang espirituhanong mga gasa nga gihulagway niini nga mga bersikulo mao ang pagsulat diha sa pisara og mga pangutana nga sama sa Unsa ang espirituhanong mga gasa? Kang kinsa kini gihatag? Nganong gihatag man kini? ug Unsaon nato kini pagdawat? Dayon dapita ang mga sakop sa klase sa pagsiksik sa Moroni 10:8–25 aron sa pagkaplag sa mga tubag. (Ang pamahayag ni Presidente Brigham Young ug Presidente Dallin H. Oaks diha sa “Dugang nga mga Kapanguhaan” makatabang usab.) Agig dugang ngadto sa espirituhanong mga gasa nga gilista diha sa mga bersikulo 9–16; unsa pa ang ubang “mga gasa sa Dios” ang atong nadawat o nga kita napanalanginan? (Moroni 10:8). Mahimong mopakigbahin ka sa gitudlo ni Elder Bruce R. McConkie: “Ang espirituhanong mga gasa dili maihap ug nagkalain-lain. Kadtong nalista diha sa gipadayag nga pulong yano lamang nga mga paghulagway sa walay utlanan nga pagbu-bu sa balaanong grasya nga gihatag sa mabinationg Dios ngadto niadtong nahigugma ug nagserbisyo kaniya” (A New Witness for the Articles of Faith [1985], 371).

Moroni 10:30–33

Mahimo akong mahingpit ngadto sa Dios pinaagi sa kalooy ni Jesukristo.

• Unsa ang imong gibati nga maoy makatabang sa mga sakop sa imong klase nga modawat sa pagdapit ni Moroni nga “[mo]duol ngadto kang Kristo, ug [mag]hingpit diha kaniya”? (Moroni 10:32). Tingali ang pagsugod og himno nga may kalabutan niini nga hilisgutan, sama sa “Come, Follow Me” (Hymns [Mga Himno], nu. 116), makadapit sa Espiritu diha sa inyong panaghisgutan, ug ang mga sakop sa klase mahimong mopakigbahin og bisan unsa nga koneksyon nga ilang nakita tali sa himno ug sa mga kamatuoran nga makita diha sa Moroni 10:30–33. Unsa ang atong nakat-unan gikan niini nga mga bersikulo ug niini nga himno kabahin sa unsay buot ipasabut sa pagduol ngadto kang Kristo? Unsa ang buot ipasabut sa mahimong “hingpit diha kang Kristo”? (tan-awa usab sa D&P 76:50–53, 69). Ipakigbahin ang imong mga gibati kabahin sa unsay buot ipasabut sa “mahimong hingpit pinaagi ni Jesus” (D&P 76:69), ug awhaga ang mga sakop sa klase sa pagpakigbahin sa ilaha.

• Tungod kay mao man kini ang katapusang panaghisgutan sa imong klase sa Basahon ni Mormon karong tuiga, siguro gusto ka nga mohangyo sa mga sakop sa klase sa pagpakigbahin sa pipila sa ilang gibati ug nakat-unan samtang sila nagtuon niini nga basahon. Aron matabangan ang mga sakop sa klase nga mahimo kini, pwede nga dungan ninyo nga basahon ang Moroni 10:32–33 ug hangyoa ang mga sakop sa klase sa paggahin og pipila ka minuto nga mamalandong kon sa unsang paagi nga ang Basahon ni Mormon nakatabang nila sa pagduol ngadto kang Kristo. Mahimo ka nga mangutana: Sa unsang paagi nga ang Basahon ni Mormon nakatabang nato nga mas mapalambo ang gugma alang sa Dios? Sa unsang paagi nga kini nakatabang nato nga mas mosalig sa hingpit diha sa kalooy ni Kristo? Sa unsang paagi nga kini nakatabang nato nga “dili molimud” sa gahum sa Manluluwas? Dapita ang mga sakop sa klase sa pagpaambit sa ilang mga pagpamatuod sa Basahon ni Mormon ug sa pagsaksi niini kang Jesukristo.

pagkat-on nga icon

Awhaga ang Pagkat-on diha sa Panimalay

Aron matabangan ang mga sakop nga maghinam-hinam sa pagtuon sa Doktrina ug mga Pakigsaad sunod tuig, mahimo ka nga magribyu sa Moroni 10:9–16 ug ipasabut nga kini nga mga gasa tanan makita sa Simbahan karon. Samtang atong basahon ang Doktrina ug mga Pakigsaad, atong makita kon sa unsang paagi nga ang mga gasa ug gahum sa Dios gigamit aron paghimo sa Iyang gimbuhaton sa ulahi nga mga adlaw.

mga kapanguhaan nga icon

Dugang nga mga Kapanguhaan

Mga pagpakita sa espirituhanong mga gasa diha sa Basahon ni Mormon.

• Pagtudlo pinaagi sa Espiritu: Nephi ug Lehi (Helaman 5:17–19)

• Naghinobra nga pagtuo: Alma, Amulek, Ammon, ug uban pa (Ether 12:13–22)

• Pag-ayo: Alma (Alma 15:5–11)

• Dagko nga mga milagro: Ang tulo ka disipulo (3 Nephi 28:19–22)

• Panagna: Lehi (2 Nephi 1:6-7)

• Pagkakita sa mga anghel: Amulek (Alma 10:7–10)

• Paghubad sa mga pinulongan: Mosiah (Mosiah 28:11–16)

Ang pagpamatuod ni Presidente Brigham Young sa espirituhanon nga mga gasa.

“Hugot nga Pagtuo. Kon kamo motuo sa mga baruganan sa Ebanghelyo ug makakab-ot pinaagi sa hugot nga pagtuo, nga mao ang gasa sa Dios, siya makadugang og hugot nga pagtuo, modugang sa hugot nga pagtuo ngadto sa hugot nga pagtuo. …

“Ang Gasa sa Pagpang-ayo. Ania ako aron sa pagpamatuod ngadto sa gatusan ka mga higayon sa mga lalaki, mga babaye ug mga bata nga naayo pinaagi sa gahum sa Dios, pinaagi sa pagpandong sa mga kamot, ug daghan akong nakita nga mibangon gikan sa ganghaan sa kamatayon, ug gibuhi pagbalik gikan sa kamatayon, ug kansang mga espiritu mibiya gayud sa ilang mga lawas, mibalik pag-usab. Ako mopamatuod nga ako nakakita nga ang masakiton naayo pinaagi sa pagpandong sa mga kamot, sumala sa saad sa Manluluwas. …

“Panagna, Pagpadayag, ug Kahibalo. Ang matag lalaki ug babaye mahimong usa ka tigpadayag, ug adunay pagpamatuod ni Jesus, nga mao ang espiritu sa panagna, ug makahibalo sa hunahuna ug kabubut-on sa Dios mahitungod kanila, nga makalikay sa dautan, ug mopili niana nga maayo” (Pagtulun-an sa mga Presidente sa Simbahan: Brigham Young [1997], 293–94).

“Paghupot diha sa tanan nga maayo nga gasa.”

Si Presidente Dallin H. Oaks miistorya kon sa unsang paagi nga ang pagpangita og espirituhanong mga gasa mipanalangin sa iyang inahan: “Kay namatay man ang iyang bana, ang akong biyuda nga inahan kulang na. Nag-ampo gayud siya og maayo alang sa unsay iyang gikinahanglan aron matuman ang iyang responsibilidad nga mabuhi ang iyang tulo ka gagmayng anak! Siya nangita, siya takus, ug siya napanalanginan! Ang iyang mga pag-ampo gitubag sa daghang paagi, lakip na ang pagdawat sa espirituhanong mga gasa. Siya adunay daghan, apan ang ako gayud nga mahinumduman mao ang mga gasa sa hugot nga pagtuo, pagpamatuod, ug kaalam” (“Spiritual Gifts,” Ensign, Sept. 1986, 72).

Pagpalambo sa Atong Pagtudlo

Pagreserba og panahon alang sa pagpaambit sa mga tigkat-on. “Kon ang mga tigkat-on mopakigbahin sa ilang nakat-unan, sila dili lamang mobati sa Espiritu ug molig-on sa ilang kaugalingong mga pagpamatuod, apan nag-awhag usab sila sa mga sakop sa klase sa pagdiskobre sa mga kamatuoran sa ilang mga kaugalingon” (Pagtudlo sumala sa Pamaagi sa Manluluwas, 30).