Sila si Jose, Maria, ug ang batang Jesus diha sa pasungan

Tan-awa ang Kordero sa Dios, ni Walter Rane

Disyembre 21–27

Pasko

“Siya Moanhi sa Kalibutan aron sa Pagtubos sa Iyang mga Katawhan”

Samtang atong tun-an ang pagkatawo ni Jesukristo karong semanaha, ikonsiderar kon unsaon nimo nga makatabang sa imong klase nga mapalig-on ang ilang mga pagpamatuod ni Jesukristo ug sa Iyang Pag-ula. Ang pipila ka ideya niini nga gilatid mahimong makatabang.

Irekord ang Imong mga Impresyon

pagpaambit nga icon

Dapita ang Pagpaambit

Dapita ang mga sakop sa klase nga magporma og managpares o gagmayng grupo ug ipakigbahin kon sa unsang paagi nga ang pagkat-on kabahin ni Jesukristo gikan sa Basahon ni Mormon karong tuiga nakapalig-on sa ilang pagtuo diha Kaniya ug sa Iyang mga pagtulun-an.

pagtudlo nga icon

Itudlo ang Doktrina

1 Nephi 11:13–23; Helaman 14:1–13; 3 Nephi 1:4–22

Si Jesukristo natawo aron mahimo natong Manluluwas.

• Unsaon nimo sa paggamit ang Basahon ni Mormon aron sa pagtudlo sa mga sakop sa klase kabahin sa mga sagradong panghitabo sa pagkatawo sa Manluluwas? Usa ka paagi mao ang pagbahin sa klase ngadto sa tulo ka grupo ug hatagi ang matag grupo og usa sa mosunod nga mga tudling sa kasulatan nga dunganon og basa: 1 Nephi 11:13–23; Helaman 14:1–13; ug 3 Nephi 1:4–22. Hangyoa ang mga grupo sa paghisgut unsa ang gitudlo niini nga mga kasulatan kabahin sa pagkatawo sa Manluluwas. Dayon ang matag grupo mahimong mopakigbahin ngadto sa uban diha sa klase unsa ang ilang gihisgutan. Nganong bililhon man ang pagkaanaa sa pagsaksi sa Basahon ni Mormon sa pagkatawo sa Manluluwas?

• Ang pagkahibalo kabahin sa pagkatawo ni Kristo mahinungdanon, apan ang pagkahibalo ngano nga Siya natawo kinahanglanon. Unsaon nimo pagtabang kadtong imong mga gitudloan nga makapamalandong sa matubsanong gahum ni Jesukristo? Tingali ang mga sakop sa klase makapaambit og pipila ka mga sugilanon ug mga tudling nga ilang natun-an karong semanaha (tan-awa ang outline karong semanaha diha sa Dali, Sunod Kanako—Alang sa mga Indibidwal ug mga Pamilya). Awhaga sila sa pagpakigbahin kon sa unsang paagi nga ang mga butang nga ilang gitun-an nakapalig-on sa ilang pagdayeg sa pagkatawo sa Manluluwas ug sa Iyang matubsanong gahum.

• Aron sa pagsugod og panaghisgutan kabahin sa mga gasa nga gihatag sa Dios kanato pinaagi sa Iyang Anak, mahimo nimong dapiton ang pipila ka sakop sa klase sa pag-istorya kabahin sa espesyal nga mga gasa nga ilang nadawat sa Pasko. Giunsa nato sa pagpakita og pasalamat alang sa mga gasa nga atong nadawat? Ang mga sakop sa klase mahimo dayon nga mobasa sa kinutlo ni Presidente Thomas S. Monson nga makita diha sa “Dugang nga mga Kapanguhaan” ug hisgutan ang upat ka gasa nga gisulti ni Presidente Monson. Unsa ang papel nga gihuptan sa Manluluwas diha niini nga mga gasa? Unsaon nato sa pagpakita ang atong pasalamat ngadto sa Langitnong Amahan alang niini nga mga gasa?

• Isip kabahin sa inyong panaghisgutan kabahin sa Pasko, ikonsiderar ang pagdapit og mga sakop sa klase sa pagpatugtog o pagkanta og mga himno sa Pasko. Mahimo usab ka nga mosuhid sa pipila sa mga kapanguhaan nga gilista diha sa “Dugang nga mga Kapanguhaan.”

Ulohan nga pahina sa Basahon ni Mormon; pasiuna ngadto sa Basahon ni Mormon; 2 Nephi 25:23, 26; 33:4, 10

Ang Basahon ni Mormon nagpamatuod ni Jesukristo.

• Samtang ang imong pagtuon sa Basahon ni Mormon diha sa Sunday School padulong na sa pagtapos, tingali ganahan ka nga mohatag sa mga sakop sa klase og kahigayunan sa pagpamalandong unsa ang ilang nakat-unan kabahin ni Jesukristo diha sa Basahon ni Mormon karong tuiga. Aron makatabang sa pagsugod og hisgutanan, mahimong basahon ninyo og dungan ang 2 Nephi 25:23, 26 ug 33:4, 10, ingon man ang mga pinili nga tudling gikan sa pasiuna sa Basahon ni Mormon ug ulohan nga pahina. Mahimo usab nimo nga ipaambit ang usa ka sugilanon o tudling nga mas nakapaduol nimo ni Jesukristo ug dayon hatagi ang mga sakop sa klase og pipila ka minuto aron sa pagpaambit sa ilang kaugalingong mga sugilanon o mga tudling. Ihatag ang imong pagpamatuod sa Basahon ni Mormon, ug dapita ang ubang mga sakop sa klase sa paghimo sa ingon.

pagkat-on nga icon

Awhaga ang Pagkat-on diha sa Panimalay

Aron sa pagdasig sa mga sakop sa klase sa pagsugod og basa sa Doktrina ug mga Pakigsaad, mahimo ka nga mopaambit og usa ka paborito nga bersikulo o usa ka makapadasig nimo nga kasinatian atol sa pagtuon sa Doktrina ug mga Pakigsaad.

mga kapanguhaan nga icon

Dugang nga mga Kapanguhaan

Mga kapanguhaan sa Pasko.

• Mateo 1:18–25; 2; Lucas 2

• Gospel Art Book, mga nu. 28, 29, 30, 31, 81

• Mga hulagway diha sa latid niining semanaha sa Dali, Sunod Kanako—Alang sa mga Indibidwal ug mga Pamilya

• Christmas.ComeUntoChrist.org

Ang mga gasa sa Manluluwas.

Si Presidente Thomas S. Monson mitudlo:

“Namalandong ako sa nagkalahing mga kahimtang sa Pasko. Ang sobra ra kaayo nga mga gasa, nga mahalong pagkaandam ug maayo kaayong pagkaputos, miabut sa hilabihang pagpasulabi niini diha sa inila nga mga komersyal nga katalog nga nagdala sa ulohan nga ‘Alang sa tawo nga anaa kaniya ang tanan.’ Sa usa sa maong pagbasa akong naobserbahan ang usa ka 372 metro-kwadrado nga balay nga giputos og higanteng ribon ug ikatandi nga greeting card nga nag-ingon, ‘Malipayong Pasko.’ Ang ubang mga butang naglakip sa napuno sa dyamante nga mga club alang sa golf, usa ka Caribbean cruise alang sa byahero, ug usa ka luxury trip ngadto sa Swiss Alps alang sa mahiligon og laag. Kini mohaum sa tema sa usa ka salida nga cartoon sa Pasko nga nagpakita sa Tulo ka Maalamong mga Tawo nga nagbyahe padulong sa Bethlehem nga adunay mga kahon sa gasa diha sa ilang mga kamel. Ang usa miingon, ‘Timan-i ang akong mga pulong Baltazar, kita nagsugod og usa ka butang niini nga mga gasa nga mahimong dili na gyud kapugngan!’ …

“Sa sulod sa pipila ka mga gutlo, mahimo ba natong kalimtan ang mga katalog sa Pasko, uban sa mga gasa niini nga dili kaayo kasagaran ang paghulagway. Gani dili nato hunahunaon ang kabahin sa mga bulak alang ni Mama, ang espesyal nga kurbata alang ni Papa, ang cute nga manyika, ang tren nga motaghoy, ang dugay nang gihulat nga biseklita … ug atong itumong ang atong mga hunahuna ngadto sa hinatag sa Dios nga mga gasa nga molungtad. Sa akong listahan mohatag lang ko og upat: …

“Una, ang gasa sa pagkatawo. Malukpanon kini nga gihatag sa matag usa kanato. Ang atoa mao ang balaanong kahigayunan sa pagbiya sa atong langitnong panimalay aron makabaton og mortal nga lawas ug sa pagpakita pinaagi sa atong mga kinabuhi sa atong katakus ug mga kasarang nga usa ka adlaw makabalik ngadto Kaniya, bililhon nga mga minahal sa kinabuhi, ug usa ka gingharian nga gitawag og celestial. … Ang ato mao ang responsibilidad sa pagpakita sa atong pasalamat pinaagi sa mga aksyon sa atong mga kinabuhi. …

“Ikaduha, ang gasa sa kalinaw. Sa langas kaayo nga kalibutan nga atong gipuy-an, ang kabanha sa trapiko, ang kusog nga mga komersyal sa media, ug ang daghang mga gikinahanglan nga gibutang sa atong oras—dili kita makalimot sa mga problema sa kalibutan—nga maoy hinungdan sa sakit sa ulo, mohatag og kasakit, ug mohurot sa atong kusog sa pagsagubang. …

“Siya kinsa nagpas-an sa kasub-anan ug nakasinati sa kasakit nakasabut sa matag magul-anong kasingkasing ug naghatag sa gasa sa kalinaw. ‘Kaninyo ibilin ko ang kalinaw; kaninyo ihatag ko ang akong kalinaw. Hatagan ko kamo niini dili sama sa hinatagan sa kalibutan. Kinahanglan dili magkaguol ang inyong kasingkasing, ni magtalaw” (Juan 14:27). …

“Ikatulo, ang gasa sa gugma. ‘Magtutudlo, unsa man ang dakung sugo sa kasugoan?’ nangutana ang abogado kinsa namulong ngadto kang Jesus. Miabut ang dali-dali nga tubag: ‘Higugmaa ang Ginoo nga imong Dios sa tibuok mong kasingkasing, ug sa tibuok mong kalag, ug sa tibuok mong salabutan.

“‘Mao kana ang dako ug ang unang sugo.

“‘Ug ang ikaduha sulosama ra, nga mao kini, Higugmaa ang imong silingan sama sa imong kaugalingon’ (Mateo 22:36–39). …

“Ikaupat, ang gasa sa kinabuhi—gani ang pagka-imortal. Ang plano sa atong Langitnong Amahan naglangkob sa katapusang mga pagpadayag sa tinuod nga gugma. Ang tanan nga mahinungdanon kanato, ilabi na ang atong mga pamilya, mga higala, atong kalipay, atong kaalam, atong mga pagpamatuod, mawala kon dili tungod sa atong Amahan sa Langit ug sa Iyang Anak, nga si Ginoong Jesukristo. Lakip sa gihambin gayud nga mga hunahuna ug mga sinulat niining kalibutana mao ang balaanong pamahayag sa kamatuoran: ‘Kay gihigugma gayud sa Dios ang kalibutan nga tungod niana gihatag niya ang iyang bugtong Anak, aron ang tanan nga mosalig kaniya dili malaglag, kondili may kinabuhing dayon’ (Juan 3:16)” (“Gifts,” Ensign, Mayo 1993, 59–62).

Pagpalambo sa Atong Pagtudlo

OK ra nga moingon og, “Wala ko kahibalo.” Bisan kon kinahanglan nimong paningkamutan nga matubag ang bisan unsang mga pangutana sa imong mga sakop sa klase kabahin sa ebanghelyo, ang Ginoo wala magdahum nga nakahibalo ka sa tanan. Kon wala ka kahibalo unsaon sa pagtubag ang usa ka butang, ikonsiderar ang pagtubag pinaagi sa pagdapit sa klase sa pagpangita og dungan alang sa tubag diha sa mga kasulatan ug ipaambit unsa ang ilang nakaplagan. (Tan-awa sa Pagtudlo sumala sa Pamaagi sa Manluluwas, 24.)